دۆسیه‌ی دادگایی كردین زانیار و لوقمان مۆرادی ڕاگیراوه‌

زایینی: ٣٠-١١-٢٠١٥ - هەتاوی: ١٣٩٤/٠٩/٠٩ - ١٧:٠٢ تاران
دۆسیه‌ی دادگایی كردین زانیار و لوقمان مۆرادی ڕاگیراوه‌
كوردستان میدیا: زیاتر له‌ ساڵ و نیوێك‌ به‌سه‌ر ڕاگرتنی دادگایی كه‌یفه‌ری زانیار و لوقمان مۆرادی تێپه‌ڕ ده‌بێ و هه‌تا ئێستا له‌مباره‌وه‌ هیچ هه‌واڵێك له‌مه‌ڕ به‌ڕێوه‌چوونی دادگاكه‌یان بڵاو نه‌بووه‌ته‌وه.

به‌پێی ڕاپۆرتی ماڵپه‌ڕی هێرانا، ئۆرگانی كۆمه‌ڵه‌ی چالاكانی مافی مرۆڤی ئێران، پارێزه‌ره‌كه‌یان ڕایگه‌یاندووه‌ كه‌ هه‌رچه‌ند زانیار و لوقمان مۆرادی به‌ تۆمه‌تی موحاربه‌ حوكم دراون، به‌ڵام پێشتر ده‌بوایه‌ دادگای كه‌یفه‌ری به‌ڕێوه‌ چووبا و ئه‌و حوكمه‌یان ده‌ركردبایه‌ و پاشان ئه‌و حوكمه‌ بۆ پشتڕاستكردنه‌وه‌ چووبایه‌ بۆ دادگای ئینقلاب.

بنه‌ماڵه‌ی ئه‌و دوو ده‌سبه‌سه‌ركراوه‌ رایانگه‌یاندووه‌، به‌ هۆی زه‌خت و گوشاری به‌رپرسانی به‌ندیخانه‌، كه‌ سه‌ر به‌ ئیتلاعاته‌ له‌ سه‌رده‌می ده‌سبه‌سه‌ر كردنیاندا، ئه‌وان تووشی نه‌خۆشی جۆرواجۆر بوون و تا ئێستاشی له‌گه‌ڵ بێ له‌ موره‌خه‌سی بێبه‌ش بوون.

زانیار و لوقمان مۆرادی ماوه‌یه‌ك پێش ئێستا به‌ تۆمه‌تی ئه‌ندامبوون له‌ حێزبێكی كوردی و كوشتنی كوڕی پێشنوێژی شاری مه‌ریوان تۆمه‌تبار كراون. به‌ڵام ئه‌و تۆمه‌ته‌ له‌ لایه‌ن زانیار و لوقمان ڕه‌ت كراوه‌ته‌وه‌.