یەکیەتیی ژنانی دێموکراتی کوردستانی ئێران هێرشی هێزەکانی ڕێژیمی ئێرانیان بۆ سەر ژنانی گوندی ئاق‌دەرە مەحکووم کرد

زایینی: ١٩-٠٦-٢٠١٧ - هەتاوی: ١٣٩٦/٠٣/٢٩ - ١٣:٢١ تاران
یەکیەتیی ژنانی دێموکراتی کوردستانی ئێران هێرشی هێزەکانی ڕێژیمی ئێرانیان بۆ سەر ژنانی گوندی ئاق‌دەرە مەحکووم  کرد
کوردستان میدیا: یەکیەتیی ژنانی دێموکراتی کوردستانی ئێران لە ڕاگەیەندراوێکدا هێرشی هێزەکانی ڕێژیمی ئێرانیان بۆ سەر ژنانی گوندی ئاق‌دەرە لە پارێزگای ورمێ مەحکووم کرد.

دەقی ڕاگەیەندراوەکە:

ژنانی ئازادیخوازی كورد

خەڵكی تێكۆشەری كوردستان


لە كەس شاراوە نییە كە هەر لە سەرتای هاتنە سەر كارییەوە، سیستمی دواكەوتووی كۆماری ئیسلامی لە ئێران، دەستی داوەتە سەركووتی گەلانی ئیران و جیابیرانی خۆی و لە پێناو دزین و بردنی سەرچاوە سروشتی و كانگە ژێر زەوییەكانی سەرانسەری ئێران، لە هیچ هەوڵ و كۆششێك درێغی نەكردووە و ئەوەی لەو سامانە نەتەوەییانە بێ بەش بووە، گەلانی بن دەستی ئێران بوون.

لە نێوان گەلانی بندەستی ئێرانیشدا گەلی كورد و كوردستان بە هۆی هەڵكەوتی جوغرافیایی و ئێكۆسیستمی خۆی لە سەرووی هەموویان دەوڵەمەندی لە بواری كانگا ژێر زەوییەكان، بۆتە گۆڕەپانی گەندەڵی و دزی باندەكانی حكومەت و لە نێوانیشیاندا كورد بەش مەینەتی و بێكاری و بێ دەرەتانی و برسێتی پشكی شێری بەركەوتووە.

ژنانی تێكۆشەری كورد!

لە كوردستانی ژێر سێبەری كۆماری ئیسلامیدا، سەرەڕای ئەوەیكە تەواوی سەرچاوەی داهات و سامانە نەتەوەییەكان بە تاڵان دەبرێن، تەنانەت لە كارگە و كارخانە بەرهەم هێنەرەكانیش لە خەڵكی خۆجێی و كورد كەڵك وەرناگیرێت، بەڵكوو لە شار و پارێزگاكانی ناوەندی ئێران یان لە كەسانی سەر بە نەتەوەكانی غەیری كورد كەڵك وەردەگیرێت.

ئەوەش بۆتە هۆی ئەوەیكە ئەو بێكاری و برسیەتییە سیستماتیكەی كە باڵی بەسەر كوردستاندا كێشاوە گوشاری سەر ژیانی رۆژانەی گەلی كورد لە رۆژهەڵات زیاتر بكات ، نموونەی هەرە بەرچاوی ئەم دزییە لە كانگای زێڕی ئاق دەرەی سەر بە شاری تیكابە كە لە چەند ڕۆژی ڕابردوودا بووە هۆی نیشاندانی نارەزایەتی خەڵكی ئەو گوندە و لە ئەنجامدا بە توندترین شێوە لە لایەن هێزە سەركوتكەرەكانی ڕێژێمەوە بێدەنگ كرا.

كانگای زێڕی ئاق دەڕە كە یەكێك لە كانگا زێڕە گەورەكانی ئێرانە، سەرەڕای ئەوەیكە تەواویی بەرهەمی ئەم كانگایە دەچێتە خەزێنەیی دەسەڵاتی ڕێژیم و بۆ دەزگا ئەمنیەتی و سەركوتكەرەكان و گیرفانی ئاغا زادەكان تەرخان دەكرێت تەنانەت هێزی كارو بەرهەم هێنەری ئەم كانگایەش خەڵكانی هاوردەن و لە شارەكانی ترەوە هاوردە كراون.

ژنان و كچان و دایكانی ئاق دەڕە تەنیا بۆ ئەوەیكە بڵێن ئێمەش بەشمان لەو كانگایەدا هەیە و دەمانهەوێت لاوەكانمان لێرەدا كار بكەن، تاكوو لە كاتی كۆڵبەریدا نەبنە ئامانج و نەكوژرێن، خۆ پیشاندانیان ڕێك خست، بەڵام ئەم خۆپێشاندانە هێمنانەیە و ئەم خەڵكە مافخوازە سڤیلە بووە ئامانجی دەسەڵاتی شووم وبێ رەحمی ڕێژیم و چەند كەسیان كە زۆربەیان ژن بوون بریندار كران.

بۆیە لێرەدا ئێمەش وەك یەكیەتیی ژنانی دێمۆكراتی كوردستانی ئێران وێرای هەموو هێز و لایەنە سیاسی و مەدەنییەكان ، سەركوتی ژنان و كچان و دایكان و بەگشتی خەڵكی ئاق دەڕە لەلایەن هێزە سەركوتكەرەكانی ڕێژیمی ئیسلامی ئێرانەوە مەحكووم دەكەین و داواكارین كە سەرەڕای ئەوەیكە دەبێ داهاتی كانگا ژێر زەوییەكانی كوردستان بە گشتی و بە تایبەتی كانگای زێڕی ئاق دەڕە لە ژیان و خۆشبژێویی خەڵكی دەڤەرەكە خەرج بكرێت بەڵكوو دەبێ كرێكار و هێزی مروڤی ئەم كانگایە و تەواوی كانگاكانی كوردستان لە خەڵكی خۆجێیی ئەو ناوچانە بێت.

بڕوخێ ڕێژێمی سەركوتكەری ئیسلامی ئێران

سەركەوێ خەباتی مافخوازانەی ژنانی كوردستانی ڕۆژهەلات

یەكیەتیی ژنانی دێمۆكراتی كوردستانی ئێران

٢٨ی جۆزەردانی ١٣٩٦ی هەتاوی
١٨ی ژوئەنی ٢٠١٧ی زایینی