راسان و پێشمەرگە

زایینی: ٠٦-١٢-٢٠١٧ - هەتاوی: ١٣٩٦/٠٩/١٥ - ٢٠:٠٢ تاران
راسان و پێشمەرگە
عەبدوڵڵا رەسووڵی

قوناغی نوێی خەباتی رزگاریخوازی نەتەوەكەمان یەكێك لە كات و ساتە گرنگەكانی مێژووییە و بە ناوی راسانەوە دەستی پێكرد. بێگومان راسان قوناغێكی نوێی خەباتە كە جیاوازییەكی بناغەیی و گرنگی لەگەڵ فوناغەكانی رابردوودا هەیە. لەبەر هەمان هۆش هەموو پێكهێنەرەكانی خەباتی رزگاریخوازی لە بەشی سیاسی و نیزامییەوە هەتا بەشی شار و مەدەنی و خەباتی سەرشەقام بەتەواوی پێناسە و ئەركەكانیان دەگۆڕێت و هاوكاتیش راسان هەوڵ دەدات شوناسێكی نوێ و ئەركی نوێیان پێبەخشێت.

ئەو بابەتە سەلماوە كە لە چوارچێوەی راساندا هەموو چین و توێژەكانی كۆمەڵگا ئەرك و پێگەی تایبەت بە خۆیان لە نێو بزوتنەوەی رزگاریخوازی گەلی كورددا دەبێت. كاتێك راسان بەمانای بەستنەوەی خەباتی شار و خەباتی شاخە بێگومان دەبێت ئەوەمان لا روون بێت، كە خەباتكارانی شاخ هەمیشە پارێزەر و پشتیوانی خەباتكارانی شارن و هەر ئەوانن دەتوانن ببنە چەكوشی بان‌سەری داگیركەران بۆ ئەوەی لە كاتی خەباتی رزگاریخوازیدا گوشار لەسەر خەباتكارانی شار كەم بكەنەوە.

ئەوەش روونە كە لە هەموو كۆمەڵگایەكدا هێزی چەكدار و سەرباز، پارێزەری لایەنی سیاسی و كۆمەڵایەتی و مەدەنییە و بە بێ بوونی هێزی سەربازی هیچ كۆمەڵگایەك ناتوانێت خۆی بپارێزێت. بۆیە هەر لێرەیشەوە دەبێت ئەوەمان لە بەرچاو روون بێت كە پێشمەرگە پارێزەری پێكهاتەی كۆمەڵگایە؛ بەڵام ئەمە بەمانای ئەوە نییە كە كاتێك نەتەوەیەك ژێردەستە ئەوا ئەركی خەباتی رزگاریخوازی بەتەواوی دەكەوێتە سەرشانی هێزی سەربازی و یاخود لە كوردستان دەكەوێتە سەرشانی پێشمەرگە.

لە راساندا گۆڕەپانی خەبات ئەوەندە بەرفراوان بووە كە دەرفەتی بۆ یەك بە یەكی ئەندامانی كۆمەڵگا رەخساندووە تاکوو بەپێی شوێن و رێگەی خۆی هەنگاو بنێت و هیچ جیاوازییەك لە بواری ئەرك و جێبەجێ كردنەوە بوونی نییە، تەنیا ئەوە پێویستە ئەو كردارە لە خزمەتی رزگاركردنی نەتەوەدا بێت.

بە دروست بوونی ئەم حاڵەتە لێرەوە ئەركی پێشمەرگەش گۆڕاوە؛ پێشمەرگە وەك باسکی بەهێزی گەل و هاوكاتیش وەك باسكی پارێزەی نەتەوە و خاك و نیشتمان، كە پێشتر ئەركی سەرشانی رزگاركردنی نیشتمان لە دەستی داگیركەران بوو، ئەمجارە و لە راساندا ئەركی گۆڕاوە و هاوكاتیش بەهەمان شێوە كە گۆڕەپانی خەبات بۆ هەموو چین و توێژەكانی كۆمەڵگا بەرفراوان بووە ئەوا ئەركی پێشمەرگەش گۆڕاوە و بەرفراون بووە.

گۆڕانكاری لە ئەركی پێشمەرگە لەوێڕا بەدەردەكەوێت كە لە راساندا پێشمەرگە تەنیا هێزی خەباتكار نییە، بەڵكوو جیا لە خەباتكاربوونی پارێزەری چین و توێژە خەباتكارەكانی دیكەیشە. بەو مانەیە كە پێشمەرگە جیا لە خەباتێكی چەكداری لە دژی دوژمن بەشێك لە ئەركی دەبێتە ئەوەیكە گوشار لە سەر چین و توێژەكانی دیكە بۆ بەردەوامبوونی خەبات كەم بكاتەوە و لە كاتی پێویست پارێزەری گیان و شێوازی خەباتی ئەوان بێت.

ئەوەی روونە پێشمەرگە لە راساندا جیاوازییەكی زۆر گرنگی پەیدا كردووە؛ ئەویش لەوێڕا بەدەردەكەوێت كە بەپێچەوانەی قوناغەكانی پێشوو، كە پێشمەگە هەندێ كات تاقانە سیما و سیمبۆلی خەباتكاری بوو، ئەمجارە تێكڕای نەتەوە خۆی لە گۆڕەپانی خەباتدا دەبینێتەوە و تێكڕای چین و توێژەكان دەبنە خەباتكار، بەڵام پێشمەرگە هەمان پێشمەرگەیە كە باسكی بەهێزی گەلە و بە لایەكدا بەشێكە لە خەباتكارانی نەتەوە و بە لایەكی دیكەشدا پارێزەری هەموو خەباتكاران و پشتیوانی بەهێزی ئەوانە بۆ ئەوەی بتوانین درێژەدەری خەباتیان بن.

بۆیە، لێرەوە دەڵێم، راسان توانیویەتی جیا لە گۆڕینی روانگە بۆ سەیركردنی پێشمەرگە، ئەرك و رۆڵی جیاواز بە پێشمەرگە بدات و هاوكاتیش پێشمەرگە بۆ ئاستێك بەرز بكاتەوە كە هەست بكات تێكڕای نەتەوە لەگەڵی، لە گۆڕەپانی خەباتدایە و تێكڕای نەتەوە پشتیوانیەتی و دەبێت ئەویش بیانپارێزێت.