راگه‌یه‌ندراوی هاوبه‌شی هێز و لایه‌نه‌ کورد و کوردستانییه‌کان سه‌باره‌ت به‌ تاوانی تێرۆریستی له‌ هه‌ولێر

22-02-1386

سه‌رله‌به‌یانیی رۆژی چوارشه‌ممه‌ 9/5/2007، ئۆتۆمبیلێکی بارهه‌ڵگری TNT رێژ کراو، له‌ به‌رده‌م وه‌زاره‌تی ناوخۆی حکومه‌تی کوردستان له‌ هه‌ولێر، ته‌قێندرایه‌وه‌ و مخابن بووه‌ هۆی شه‌هید و بریندار بوونی ده‌یان هاووڵاتی سڤیل و که‌وتنه‌وه‌ی خه‌ساره‌تی مادی له‌ هاووڵاتیان و ژماره‌یه‌ک داموده‌زگای حکومیی.
ئه‌م تاوانه‌ تێرۆریستییه‌ له‌ هه‌ر لایه‌که‌وه‌ رێکخرابێ و هه‌ر ئامانجێکی دیاریکراو له‌ پشته‌وه‌ بێ، ئاڵقه‌یه‌که‌ له‌و زنجیره‌ پیلان و گوشارانه‌ی له‌ لایان دوژمنانی ئازادیی کورد و کوردستانه‌وه‌ بۆ تێکدانی باری ئه‌منییه‌ت و ئاسایشی کوردستان و له‌بار بردنی ره‌وتی گه‌شه‌ی سیاسی، ئابوری و دیپلۆماسیی و ئاوه‌دانکردنه‌وه‌ی کوردستان، له‌ ئارادایه‌‌.
هه‌رچه‌نده‌ به‌م جۆره‌ تاوانانه‌، خوێنی ژماره‌یه‌ک له‌ کوردستانییه‌کان ده‌ڕژێ و ئاسایشی هاووڵاتیان بۆ ماوه‌یه‌کی کاتی ده‌شێوێ، به‌ڵام ئیراده‌ی رۆڵه‌کانی نه‌ته‌وه‌ی کورد له‌ هه‌ڕه‌شه‌ و تێرۆر و تۆقاندنی تێرۆریستان و تێرۆریستپه‌روه‌ران به‌ هێزتره‌.
ئاماژه‌کان وایده‌رده‌خه‌ن که‌ له‌گه‌ڵ نزیک بوونه‌وه‌ی رۆژ به‌ رۆژی جێبه‌جێ بوونی ماده‌ی 140 ی ده‌ستوری عێراق، پیلان و ده‌ستێوه‌ردانه‌کانی دوژمنانی کورد و نه‌یارانی ئاشتی و ئاسایش له‌ عێراق و کوردستان، زیاتر په‌ره‌ده‌ستێنێ. ئه‌وه‌ له‌ کاتێکدایه‌ که‌ ماده‌ی 140 بابه‌تێکی یاسایی ده‌ستوری عێراقه‌ و کوردستانییه‌کان سوورن له‌سه‌ر جێبه‌جێکرانی ئه‌م ماده‌یه‌ و رۆڵه‌کانی نه‌ته‌وه‌ی کورد له‌ پارچه‌کانی دیکه‌ی کوردستانیش پشتیوانیی له‌ ئیراده‌ی ڕه‌وای خوشک و براکانیان و بڕیاری دامه‌زراوه‌ سیاسییه‌ شه‌رعییه‌کانی هه‌رێمی کوردستان ده‌که‌ن.
ئێمه‌ نوێنه‌رانی ئه‌و هێز و لایه‌نه‌ سیاسییه‌ کوردستانییانه‌ی خواره‌وه‌ که‌ ئه‌م راگه‌یه‌ندراوه‌مان ئیمزاکردووه‌، وێڕای مه‌حکوومکردنی ئه‌و تاوانه‌ تێرۆریستییه‌ و هاوخه‌می له‌گه‌ڵ بنه‌ماڵه‌ی شه‌هید و برینداره‌کانی ئه‌م رووداوه‌، داوا له‌ رێکخراوی نه‌ته‌وه‌یه‌کگرتووه‌کان، یه‌كیه‌تیی‌ ئورووپا و کۆڕ و کۆمه‌ڵه‌کانی لایه‌نگری پاراستنی مافه‌کانی مرۆڤ و هه‌موو دێموکرات و ئازادیخوازه‌کانی جیهان ده‌که‌ین، بۆ کورت کردنه‌وه‌ی ده‌ستێوه‌ردانه‌ هه‌رێمییه‌کان له‌ کاروباری کوردستان و به‌ره‌نگاربوونه‌وه‌ی تێرۆریستان، هاوکاریی گه‌لانی عێراق به‌گشتی و گه‌لی کورد به‌تایبه‌تی بکه‌ن بۆ جێبه‌جێکردنی ماده‌ی 140. هه‌ر له‌و کاته‌شدا داوا له‌ حکومه‌تی عێراقی فیدراڵ ده‌که‌ین بۆ جێبه‌جێکردنی ئه‌و ماده‌ ده‌ستوورییه،‌ هه‌نگاوه‌کانی خێراتر بکا.
1- حیزبی دێموکراتی کوردستانی ئێران
2- پارتی سوسیالیستی کوردستان PSK
3- پارتی دێموکراتی کوردستانی باکوور - PDK
4- پارتی دێموکراتی کورد له‌ سووریا‌ - الپارتی
5- پارتی پێشڤه‌ڕۆی دێموکراتی کورد له‌ سووریا‌
6- پارتی یه‌كیه‌تیی‌ دێموکراتی کورد له‌ سووریا‌
7- پارتی وڵاتپارێزانی کوردستان PWD
8- پارتی ئازادیی کورد له‌ سووریا‌
9- پارتی یه‌کێتی کورد له‌ سووریا‌
10- رێکه‌ڤتنی دێموکراتی کورد له‌ سووریا‌ - وفاق
11- پارتی ئازادیی کوردستان PAK
2007-05-10