ئاگاداری:

كۆبوونه‌وه‌ی‌ لایه‌نه‌ كوردییه‌كانی‌ كوردستانی‌ ئێران بۆ باس‌و راگۆڕینه‌وه‌ سه‌باره‌ت به‌ پێكهێنانی‌ به‌ره‌

به‌بێ‌ به‌شداریی‌ كۆمه‌ڵه‌ی‌ شۆڕشگێڕی‌ زه‌حمه‌تكێشانی‌ كوردستان‌و رێكخراوی

كوردستانیی‌ حیزبی‌ كۆمۆنیستی‌ ئێران (كۆمه‌ڵه‌) به‌ڕێوه‌ چوو

رێكه‌وت 16/12/1384: پاش هه‌وڵێكی‌ به‌رچاوی‌ به‌ڕێز دوكتور سامان شاڵی‌، به‌رپرسی‌ KNC به‌ مه‌به‌ستی‌ باسكردن له‌ پێكهێنانی‌ به‌ره‌یه‌كی‌ كوردستانی‌ له‌نێوان هێزه‌كانی‌ ئۆپۆزیسیۆن له‌ كوردستانی‌ ئێران، سه‌ره‌نجام ته‌وافوق كرا له‌سه‌ر كۆبوونه‌وه‌یه‌كی‌ هاوبه‌ش له‌نێوان پێنج حیزبی‌ كوردیی‌ كوردستانی‌ ئێران.
له‌ رۆژی‌ دووشه‌ممه‌، 15/12/1384، كۆبوونه‌وه‌كه‌ به‌پێی‌ ئه‌و قه‌راره‌ به‌ڕێوه‌چوو. هه‌یئه‌ته‌كانی‌ حیزبی‌ دێموكراتی‌ كوردستانی‌ ئێران، یه‌كیه‌تیی‌ شۆڕشگێڕانی‌ گه‌لی‌ كوردستان‌و سازمانی‌ خه‌بات له‌شوێنی‌ كۆبوونه‌وه‌كه‌دا ئاماده‌بوون. به‌ڵام به‌ داخه‌وه‌ رێكخراوی‌ كۆمه‌ڵه‌ی‌ شۆڕشگێڕی‌ زه‌حمه‌تكێشانی‌ كوردستان‌و سازمانی‌ كوردستانیی‌ حیزبی‌ كۆمۆنیستی‌ ئێران (كۆمه‌ڵه‌) هه‌ركام به‌ به‌هانه‌یه‌ك ئاماده‌ی‌ به‌شداری‌ له‌ كۆبوونه‌وه‌كه‌دا نه‌بوون.
نوێنه‌رانی‌ حیزبه‌ به‌شداربووه‌كان دوای‌ باس‌و ئاڵوگۆڕی‌ بیروڕا هیوایان خواست كه‌ له‌ داهاتوودا ئه‌و كۆبوونه‌وه‌ به‌ به‌شداریی‌ هه‌ر پێنج رێكخراو پێك بێ‌، بۆ ئه‌وه‌ی‌ بناخه‌ی‌ پێكهێنانی‌ ئیئتلاف یان به‌ره‌یه‌ك كه‌ بتوانێ‌ نه‌خشی‌ كاریگه‌رتر له‌ بزووتنه‌وه‌ی‌ كورد له‌ كوردستانی‌ ئێران دا بگێڕێ‌، دابڕێژن.

سكرتاریای‌ كۆمیته‌ی‌ ناوه‌ندیی‌
حیزبی‌ دێموكراتی‌ كوردستانی‌ ئێران
8ی‌ مارسی‌ 2006ی‌ زایینی‌