راگه‌یه‌ندراوی‌ ده‌فته‌ری‌ نوێنه‌رایه‌تیی‌ حیزبی‌ دێموكراتی‌ كوردستانی‌ ئێران له‌ ده‌ره‌وه‌ی‌ وڵات

به‌ پشتیوانی‌ له‌ مانگرتنی‌ سیاسیی‌ خه‌ڵكی‌ كوردستانی‌ ئێران

29-10-1385

هاونیشتمانانی‌ به‌ڕێز!
دۆستان‌و لایه‌نگرانی‌ حیزبی‌ دێموكراتی‌ كوردستانی‌ ئێران له‌ ده‌ره‌وه‌ی‌ وڵات!
به‌ پێشوازی‌ له‌ 61ه‌مین ساڵڤه‌گه‌ڕی‌ دامه‌زراندنی‌ كۆماری‌ كوردستان‌و بۆ ده‌ربڕینی‌ ناڕه‌زایه‌تی‌ له‌ توندبوونی‌ گوشاره‌ سیاسییه‌كانی‌ رێژیمی‌ كۆماری‌ ئیسلامیی‌ ئێران، شه‌پۆلی‌ به‌ربڵاوی‌ ده‌ستبه‌سه‌ركردنی‌ چالاكانی‌ مه‌ده‌نی‌، سیاسی‌، فه‌رهه‌نگی‌‌و زانكۆیی‌و كرێكاری‌ له‌ كوردستان له‌لایه‌ن رێژمه‌وه‌، خه‌ڵكی‌ كورد له‌مڕۆ، 28ی‌ به‌فرانباری‌ 1385 به‌رانبه‌ر به‌ 18ی‌ ژانویه‌ی‌ 2007ه‌وه‌ بۆ ماوه‌ی‌ سێ‌ رۆژ مانگرتنی‌ سیاسی‌ ده‌ست پێ‌ده‌كه‌ن.
نوێنه‌رایه‌تیی‌ حیزبی‌ دێموكراتی‌ كوردستانی‌ ئێران له‌ ده‌ره‌وه‌ی‌ وڵات، وێڕای‌ پشتیوانی‌ له‌ بزاڤی‌ مه‌ده‌نیی‌ خه‌ڵكی‌ كورد له‌ كوردستانی‌ ئێران، بانگه‌شه‌ی‌ هه‌موو ئه‌ندامان، لایه‌نگران‌و دۆستانی‌ حیزبی‌ دێموكراتی‌ كوردستانی‌ ئێران له‌ ده‌ره‌وه‌ی‌ وڵات، كورده‌كانی‌ هه‌نده‌ران‌و ئازادیخوازانی‌ سه‌رانسه‌ری‌ جیهان ده‌كات كه‌ له‌ رۆژی‌ هه‌ینی‌، 19ی‌ ژانویه‌ تا 20ی‌ ژانویه‌ی‌ 2007 به‌ هه‌ر شێوه‌یه‌ك بۆیان ده‌گونجێ‌، به‌ هه‌ڵكردنی‌ مۆم له‌به‌ر په‌نجه‌ره‌كانیان‌و هه‌ڵواسینی‌ ئاڵای‌ كوردستان، كۆبوونه‌وه‌ له‌ شوێنه‌ گشتییه‌كان‌و گه‌یاندنی‌ زانیاری‌ به‌ بیروڕای‌ گشتیی‌ ئه‌و وڵاتانه‌ی‌ تێ‌یاندا ده‌ژین، پاڵپشتیی‌ ئه‌و مانگرتنه‌ بكه‌ن.
ئێمه‌ وێڕای‌ پیرۆزبایی‌ شه‌ست‌و یه‌كه‌مین ساڵڤه‌گه‌ڕی‌ دامه‌زراندنی‌ كۆماری‌ كوردستان به‌ سه‌رۆكایه‌تیی‌ پێشه‌وا قازی‌ محه‌ممه‌د، رێبه‌رو دامه‌زرێنه‌ری‌ حیزبی‌ دێموكراتی‌ كوردستانی‌ ئێران‌و، پشتیوانی‌ له‌ مانگرتنی‌ سیاسیی‌ خه‌ڵكی‌ كوردستان، داوا له‌ كۆڕ‌و كۆمه‌ڵه‌ نێونه‌ته‌وه‌یی‌یه‌كان ده‌كه‌ین، گوشار بخه‌نه‌ سه‌ر كۆماری‌ ئیسلامی‌ بۆ كۆتایی‌هێنان به‌ سه‌ركوتی‌ خه‌ڵكی‌ كورد له‌ ئێران دا.
سڵاو له‌ بزاڤی‌ مه‌ده‌نیی‌ خه‌ڵكی‌ كوردستانی‌ ئێران
سڵاو له‌ یادی‌ دامه‌زراندنی‌ كۆماری‌ كوردستان
سڵاو بۆ زیندانیانی‌ سیاسی‌، سه‌نبۆلی‌ خۆڕاگری‌‌و خه‌بات له‌ به‌رانبه‌ر رێژیمی‌ "سته‌م"‌و نابه‌رابه‌ری‌

حیزبی‌ دێموكراتی‌ كوردستانی‌ ئێران
نوێنه‌رایه‌تیی‌ ده‌ره‌وه‌ی‌ وڵات
28ی‌ به‌فرانباری‌ 1385
پاریس