رێكخراوی‌ هه‌واڵنێرانی‌ بێ‌سنوور

نه‌ته‌وه‌یه‌كگرتووه‌كان ده‌بێ‌ له‌سه‌ر به‌شداری‌ سه‌عید مورته‌زه‌وی‌ له‌

كۆبوونه‌وه‌ی‌ شوورای‌ مافه‌كانی‌ مرۆڤـ دا روونكردنه‌وه‌ بدا

سه‌رچاوه‌: ماڵپه‌ڕی‌ "اخبار روز"
رێكخراوی‌ هه‌واڵنێرانی‌ بێ‌سنوور له‌ راگه‌یه‌ندراوێك دا وێڕای‌ رێزگرتن له‌ وه‌زیری‌ ده‌ره‌وه‌ی‌ كانادا پیترمه‌ك كه‌ی‌ بۆ ناڕه‌زایه‌تیی‌ ده‌ربڕین له‌ به‌شداریی‌ دادستانی‌ تاران له‌ كۆبوونه‌وه‌ی‌ شووڕای‌ مافه‌كانی‌ مرۆڤی‌ نه‌ته‌وه‌یه‌كگرتووه‌كان دا ناوبراو داوای‌ كرد كه‌ له‌سه‌ر به‌شداریی‌ ئه‌و دادوه‌ره‌ ئێرانییه‌ داوای‌ روونكردنه‌وه‌ له‌سه‌رۆكی‌ شووراو كۆمیسیۆنی‌ به‌رزی‌ مافه‌كانی‌ مرۆڤی‌ رێكخراوی‌ نه‌ته‌وه‌یه‌كگرتووه‌كان بكا.
هه‌روه‌ها فوانسوا بوگنیو، سه‌رۆكی‌ به‌شی‌ كانادای‌ هه‌واڵنێرانی‌ بێ‌سنوور له‌م باره‌یه‌وه‌ رایگه‌یاند:
"به‌شداریی‌ سه‌عید مورته‌زه‌وی‌ كه‌ له‌ كوژرانی‌ زه‌هرا كازمی‌دا ده‌ستی‌ هه‌بووه‌، شتێكی‌ قبووڵنه‌كراوه‌. ئێمه‌ داوا له‌ رێكخراوی‌ نه‌ته‌وه‌یه‌كگرتووه‌كان ده‌كه‌ین كه‌ داخوازیی‌ كانادا جێبه‌جێ‌ بكا".
پیتر مه‌ك كه‌ی‌، وه‌زیری‌ ده‌ره‌وه‌ی‌ كانادا رقی‌ خۆی‌ له‌ بڕیاری‌ ئێران بۆ ناردنی‌ سه‌عید مورته‌زه‌وی‌ بۆ ئه‌و كۆبوونه‌وه‌یه‌ ده‌ربڕی‌‌و ئه‌م كاره‌ی‌ به‌ نیشانه‌ی‌ "ئه‌و په‌ڕی‌ سووكایه‌تی‌"ی‌ كۆماری‌ ئیسلامی‌ به‌ "بنه‌ما قه‌بووڵ‌كراوه‌كانی‌ مافه‌كانی‌ مرۆڤـ له‌ كۆمه‌ڵگای‌ نێونه‌ته‌وه‌یی‌دا" زانی‌.