ناوه‌ندی‌ كرماشانی‌ یه‌كیه‌تیی‌ دێموكراتیكی‌ خوێندكارانی‌ كورد خوازیاری‌ ئازادیی‌ كاوه‌ قاسمیی‌ كرمانشاهی‌ بوو

19-11-1388

كوردستان میدیا: ناوه‌ندی‌ كرماشانی‌ یه‌كیه‌تیی‌ دێموكرتیكی‌ خوێندكارانی‌ كورد له‌ به‌یانیه‌یه‌كدا خوازیاری‌ ئازادیی‌ كاوه‌ قاسمیی‌ كرمانشاهی‌ بوو.
كاوه‌ قاسمیی‌ كرمانشاهی‌، وێبلاگنووس‌و ئه‌ندامی‌ رێكخراوی‌ مافه‌كانی‌ مرۆڤی‌ كوردستان، سه‌رله‌به‌یانیی‌ رۆژی‌ 14ی‌ رێبه‌ندان له‌ لایه‌ن هێزه‌ جلوبه‌رگ شه‌خسییه‌كانی‌ رێژیمه‌وه‌ ده‌ستبه‌سه‌ر كرا.
له‌و به‌یانیه‌یه‌دا كه‌ له‌ لایه‌ن هه‌واڵده‌ری‌ كوردستانه‌وه‌ به‌ ده‌ستمان گه‌یشتووه‌، ناوه‌ندی‌ كرماشانی‌ یه‌كیه‌تیی‌ دێموكرتیكی‌ خوێندكارانی‌ كورد هه‌روه‌ها، وێڕای‌ هێماكردن به‌ رووداوه‌كانی‌ ئه‌م دواییانه‌ی‌ كوردستان‌و ئێعدامی‌ دوو چالاكی‌ سیاسیی‌ كورد، ئێحسان فه‌تاحیان‌و فه‌سیح یاسه‌مه‌نی‌‌و هه‌بوونی‌ 21 به‌ندكراوی‌ به‌ ئێعدام مه‌حكوومكراوی‌ كورد له‌ به‌ندیخانه‌كانی‌ رێژیمدا، خوازیاری‌ هه‌ڵوه‌شاندنه‌وه‌ی‌ حوكمی‌ ئێعدام‌و ئازادیی‌ سه‌رجه‌م به‌ندكراوانی‌ سیاسی‌‌و ئه‌و كه‌سانه‌ی‌ كه‌ به‌هۆی‌ بیروباوه‌ڕو داكۆكی‌ له‌ مافه‌كانی‌ مرۆڤه‌وه‌ به‌ندكراون، بووه‌.
ناوه‌ندی ناوبراو هه‌روه‌ها، داوای‌ له‌ گشت ئازادیخوازان‌و ئۆرگانه‌كانی‌ چالاكی‌ داكۆكیكاری‌ مافه‌كانی‌ مرۆڤ كردووه‌ كه‌ له‌ هه‌مبه‌ر ئه‌و كرده‌وه‌ نادادوه‌رانه‌یانه‌دا بێ‌ ده‌نگ نه‌بن‌و له‌م پێوه‌ندییه‌دا ناڕه‌زایه‌تیی‌ خۆیان ده‌رببڕن.
تا ئێستا ئاگادارییه‌ك له‌ چاره‌نووسی‌ كاوه‌ قاسمیی‌ كرمانشاهی‌ نیه‌و بنه‌ماڵه‌و رێكخراوه‌كانی‌ پارێزه‌ری‌ مافه‌كانی‌ مرۆڤ نیگه‌رانی‌ ره‌وشی‌ ناوبراون.