سه‌ردانی‌ به‌ڕێز سكرتێری‌ گشتیی‌ حیزب له‌ ئاڵمان

به‌ڕێز كاك مسته‌فا هیجری‌، سكرتێری‌ گشتیی‌ حیزب له‌ سه‌ردانێكی‌ چوار رۆژه‌ بۆ ئاڵمان (17 تا 20ی‌ مای‌ 2006)، چاوی‌ كه‌وت به‌ ژماره‌یه‌ك له‌ به‌رپرسانی‌ سیاسی‌‌و ئه‌ندامانی‌ فراكسیۆنی‌ حیزبه‌ ئاڵمانی‌یه‌كان له‌ پارلمانی‌ ئه‌و وڵاته‌و له‌سه‌ر مه‌سه‌له‌ جۆراوجۆره‌كانی‌ رۆژ ئاڵوگۆڕی‌ بیروبۆچوونی‌ كرا.

ته‌وه‌ری‌ باسه‌كان له‌ چاوپێكه‌وتنه‌كانی‌ سكرتێری‌ گشتی‌ له‌گه‌ڵ‌ لایه‌نه‌ ئاڵمانی‌یه‌كان دا بریتی بوون له‌:

ـ بارودۆخی‌ گشتیی‌ ئێران‌و ئامانجه‌ شاراوه‌كانی‌ كۆماری‌ ئیسلامی‌ له‌ هێندێك بواری‌ سیاسه‌تی‌ ده‌ره‌وه‌ی‌دا.
ـ به‌رنامه‌ی‌ ئه‌تۆمیی‌ ئێران
ـ سیاسه‌ته‌كانی‌ رێژیم له‌ به‌رامبه‌ر كوردستان‌و داخوازییه‌كانی‌ گه‌لی‌ كورد له‌ كوردستانی‌ ئێران.
ـ كۆنگره‌ی‌ نه‌ته‌وه‌كانی‌ ئێرانی‌ فیدراڵ‌‌و شوێن‌و گرنگی‌ ئه‌و كۆنگره‌یه‌ له‌ ئه‌وڕۆو داهاتووی‌ ئێران دا.
ـ پێویستیی‌ دابین كردنی‌ مافه‌ سیاسی‌یه‌كانی‌ نه‌ته‌وه‌ ژێر ده‌سته‌كان وه‌ك كاریگه‌رترین هه‌نگاوو مه‌رجی‌ سه‌ره‌كیی‌ وه‌دیهاتنی‌ دێموكراسی‌‌و سه‌قامگیریی‌ سیاسی‌ له‌ ئێرانی‌ دواڕۆژدا.
ـ دێموكراتیزه‌كردن‌و دامه‌زراندنی‌ سیستمێكی فیدراڵی‌ له‌ جێگای‌ كۆماری‌ ئیسلامی‌، وه‌ك ته‌نیا ئاڵترناتیڤـ بۆ به‌رگری‌ له‌ شه‌ڕو وێرانی‌، خه‌بات دژی‌ تیرۆریزمی‌ نێونه‌ته‌وه‌یی‌‌و دابینكردنی‌ سه‌قامگیری‌ له‌ ناوچه‌دا.