سه‌ردانی‌ به‌ڕێز سكرتێری‌ گشتیی‌ حیزب له‌ ده‌زگای‌ به‌نێوبانگی‌ B.B.C

رۆژی‌ 21ی‌ فێوریه‌ی‌ 2005ی‌ زایینی‌، هاوڕێی‌ به‌ڕێز‌و تێكۆشه‌ر كاك مسته‌فا هیجری‌، سكرتێری‌ گشتیی‌ حیزبی‌ دێموكراتی‌ كوردستانی‌ ئێران سه‌ردانی‌ ده‌زگای‌ راگه‌یاندنی‌ "بی‌.بی‌.سی‌"ی‌ كرد‌و له‌ لایه‌ن كارگێڕانی‌ به‌شی‌ فارسی‌ ئه‌و ده‌زگایه‌وه‌ به‌ گه‌رمی‌ پێشوازی‌ لـێ‌كرا. له‌و دیداره‌دا هاوڕێ‌ سكرتێری‌ گشتی‌ وێڕای‌ دیتنی‌ به‌شه‌ جیاجیاكانی‌ "بی‌.بی‌.سی‌"، باسێكی‌ سه‌باره‌ت به‌ ره‌وشی‌ رۆژهه‌ڵاتی‌ نێوه‌ڕاست‌و ئێران‌و كوردستان پێشكه‌ش كرد. به‌ڕێز سكرتێری‌ گشتیی‌ حیزب له‌و دیداره‌دا پێشنیاری‌ كردنه‌وه‌ی‌ به‌شی‌ كوردی‌ له‌ "بی‌.بی‌.سی‌"دا پێشكه‌ش به‌ به‌رپرسانی‌ ئه‌و ناوه‌نده‌ كرد‌و گوتی‌ ئه‌و هه‌نگاوه‌ ده‌توانێ‌ كاریگه‌ری‌ چه‌ندلایه‌نه‌ی‌ هه‌بێ‌ به‌تایبه‌ت له‌م سه‌رده‌مه‌ ئاڵۆز‌و هه‌ستیاره‌دا.