نامه‌ی‌ هاوڕێی‌ تێكۆشه‌ر, سكرتێری‌ گشتیی‌ حیزب, بۆ رێبه‌ری‌ حیزبی‌ دێموكراتی‌ نوێی‌ كانادا

به‌ڕێز جه‌ك!
زۆر خۆشحاڵ‌ بووین كه‌ په‌یامی‌ پیرۆزبایی‌‌و هاوپه‌یمانیت به‌ بۆنه‌ی‌ كۆنگره‌ی‌ 13وه‌ بۆ ناردین. زۆر به‌داخین كه‌ له‌ وه‌رسووڕانی‌ سه‌ده‌ی‌ نوێ‌دا, ناوچه‌كه‌مان به‌ گشتی‌‌و ئێرانی‌ وڵاتمان به‌تایبه‌تی‌ له‌ نه‌بوونی‌ ئازادی‌‌و دێموكراسی‌دا ئازار ده‌كێشێ‌.
هیوادارین كۆنگره‌ی‌ داهاتوومان له‌ ئێرانێكی‌ ئازاد‌و فیدراڵ‌‌و دێموكرات‌دا بگیرێ‌, كه‌ ماف‌و ئازادی‌یه‌ سه‌ره‌تایی‌یه‌كانی‌ گه‌لانی‌ ئێران‌و له‌ نێوانیان‌دا كورد رێزیان لـێ‌بگیرێ‌‌و ئێوه‌ش به‌شداری‌ كۆنگره‌كه‌مان بن.
هه‌روه‌ها لێره‌دا, به‌ پێویستی‌ ده‌زانم پیرۆزبایی‌ سه‌ركه‌وتنی‌ حیزبه‌كه‌تان له‌ هه‌ڵبژاردنی‌ ناوچه‌ی‌ فیدراڵ‌دا بكه‌م‌و ئاوات بخوازم كه‌ پێوه‌ندی‌ نێوان حیزبه‌كانمان زیاتر په‌ره‌بستێنێ‌.

زۆر به‌ رێزه‌وه‌
مسته‌فا هیجری‌
سكرتێری‌ گشتیی‌ حیزبی‌ دێموكراتی‌ كوردستانی‌ ئێران
17/10/2004