به‌شداریی‌ به‌ڕێز سكرتێری‌ گشتیی‌ حیزب له‌ كۆبوونه‌وه‌ی‌ حیزبی‌ كاری‌ نۆروێژدا

سه‌رله‌ئێواره‌ی‌ رۆژی‌ 9/3/2005ی‌ زایینی‌، هاوڕێی‌ تێكۆشه‌ر كاك مسته‌فا هیجری‌، سكرتێری‌ گشتیی‌ حیزبی‌ دێموكراتی‌ كوردستانی‌ ئێران، به‌شداری‌ كرد له‌ كۆبوونه‌وه‌یه‌كی‌ نێوخۆیی‌ حیزبی‌ كاری‌ نۆروێژدا. حیزبی‌ كاری‌ نۆروێژ، گه‌وره‌ترین حیزبی‌ سیاسیی‌ نۆروێژ‌و ئه‌ندامی‌ ئه‌نتێرناسیونال سوسیالیسته‌. له‌و كۆبوونه‌وه‌یه‌دا، جگه‌ له‌ به‌ڕێز كاك مسته‌فا هیجری‌، دوو چاوه‌دێری‌ نێونه‌ته‌وه‌یی‌ نۆروێژی‌ به‌شدار له‌ هه‌ڵبژاردنه‌كانی‌ ئه‌م دواییانه‌ی‌ عێراق‌و كوردستان،

به‌ڕێزان "ڤیدار بیركڵاند"‌و "پێر تۆرشداڵن"، ئاماده‌ بوون. له‌ سه‌ره‌تای‌ ئه‌و كۆبوونه‌وه‌یه‌دا، ئه‌و دوو چاوه‌دێره‌ نێونه‌ته‌وه‌یی‌یه‌، راپۆرتێكیان له‌سه‌ر میكانیزم‌و شێوه‌ی‌ به‌ڕێوه‌چوونی‌ هه‌ڵبژاردنه‌كان له‌ كوردستان‌و ده‌ستكه‌وت‌و ده‌ره‌نجامه‌كانی‌ بۆ ناوچه‌ به‌ گشتی‌‌و بۆ كورد به‌تایبه‌تی‌، پێشكه‌ش كرد‌و ئه‌و پرۆسه‌یه‌یان به‌ پرۆسه‌یه‌كی‌ دێموكراتیانه‌‌و پۆزه‌تیڤ له‌قه‌ڵه‌م دا.

پاشان به‌ڕێز سكرتێری‌ گشتیی‌ حیزبی‌ دێموكراتی‌ كوردستانی‌ ئێران، كورته‌یه‌ك له‌ مێژووی‌ خه‌باتی‌ ره‌وای‌ گه‌لی‌ كورد به‌گشتی‌‌و خه‌باتی‌ میللی‌ ـ دێموكراتیكی‌ كوردستانی‌ ئێران به‌تایبه‌تی‌، بۆ به‌شداران شی‌ كرده‌وه‌‌و تیشكی‌ خسته‌ سه‌ر دوایین ئاڵوگۆڕه‌كانی‌ رۆژهه‌ڵاتی‌ نێوه‌ڕاست‌و پرۆسه‌ی‌ دێموكراتیزاسیۆن‌و میكانیزمی‌ پشتیوانی‌ له‌ دێموكراسی‌‌و مافه‌كانی‌ مرۆڤـ. له‌ كۆتایی‌ په‌یڤه‌كه‌ی‌ به‌ڕێز كاك مسته‌فا هیجری‌دا، چه‌ندین پرسیار له‌ لایه‌ن ئاماده‌بووانه‌وه‌ ئاراسته‌ی‌ به‌ڕێز سكرتێری‌ گشتیی‌ حیزب كرا‌و به‌ڕێزیشیان وه‌ڵامی‌ سه‌رجه‌م پرسیاره‌كانی‌ دایه‌وه‌‌و سه‌رنجی‌ تێكڕای‌ به‌شداربووانی‌ بۆ لای‌ هه‌ڵوێست‌و بۆچوونه‌ دێموكراتیكه‌كانی‌ حیزبی‌ دێموكراتی‌ كوردستانی‌ ئێران، راكێشا.