کۆبوونه‌وه‌ی به‌رینی لاوان له‌ گه‌ڵ به‌ڕێز و تێکۆشه‌ر،کاک مسته‌فا هیجری، سکرتێری گشتی حیزبی دێموکراتی کوردستانی ئێران له‌ وڵاتی نورویژ

رۆژی شه‌ممۆ،رێکه‌وتی 12.03.2005 ی زایینی، به‌ ئاماده‌ بوونی زیاتر له‌ 150 که‌س له‌ ئه‌ندامانی یه‌کێتی لاوانی دێموکراتی کوردستانی ئێران له‌ نورویژ ،له‌ ناوچه‌ی لیلله‌ستروێم کۆبوونه‌وه‌یه‌ک پێکهات له‌ گه‌ڵ به‌رێز و تێکۆشه‌ر، کاک مسته‌فا هیجری، سکرتێری گشتی حیزبی دێموکراتی کوردستانی ئێران. سه‌ره‌تای به‌رنامه‌که‌ له‌ لایه‌ن کاک سه‌لاح عه‌بدوڵاپوور، به‌رپرسی به‌شی ته‌شکیلاتی یه‌کێتی لاوانی دێموکراتی کوردستانی ئێران له‌ وڵاتی نورویژ، کرایه‌وه‌ و به‌ڕێزیان،وێرای به‌ خێرهێنانی کاک موسته‌فای هیجری و سه‌رجه‌م میوانه‌کان، داوای کرد له‌ کۆڕی سروودی لاوانی ناوچه‌ی لیلله‌ستروێم تا سروودی نه‌ته‌وایه‌تی ئه‌ی ره‌قیب پێشکه‌ش بکه‌ن.
پاش پێشکه‌ش کردنی سروودی نه‌ته‌وایه‌تی ئه‌ی ره‌قیب، خوله‌کێک بێده‌نگی بۆرێزگرتن له‌ گیانی پاکی شه‌هیدان راگه‌یه‌ندرا!
پاشان، به‌ڕێز مه‌نسوور عه‌زیزی ، به‌رپرسی گشتی یه‌کێتی لاوانی دێموکراتی کوردستانی ئێران له‌ وڵاتی نورویژ ،وێرای به‌خێرهاتنی به‌ڕێز سکرتێری گشتی حیزبی دێموکراتی کوردستانی ئێران و سه‌رجه‌م ئاماده‌ بووان، راپۆرتی کاری یه‌کێتی لاوانی دێموکراتی کوردستانی ئێران_نورویژی، له‌ پاش کۆنفرانسی سێیه‌م و له‌ ماوه‌ی 4 مانگ کاری کۆمیته‌ی گشتی نوێ، پێشکه‌ش کرد و ئاماژه‌یدا به‌ ئه‌و کاروپرۆژانه‌ی که‌ یه‌کێتی لاوان له‌ به‌رنامه‌ی کاری خۆیدا بۆ ساڵی 2005 ی زایینی، دایناون.

پاشان داوا کرا له‌ به‌ڕێز و تێکۆشه‌ر، کاک مسته‌فا هیجری،سکرتێری گشتی حیزبی دێموکراتی کوردستانی ئێران، که‌ بۆ لاوان بدوێت و رێنوینی و روونکردنه‌وه‌یان له‌ مه‌ڕ کاروچالاکی رێکخراوه‌یی وئه‌رکه‌ داهاتووه‌کانیان، بداتێ.
به‌ڕێز، کاک مسته‌فا هیجری خۆشحاڵیی خۆی ده‌ربڕی که‌ له‌ کۆیه‌کی ئاوا به‌ربڵاوی لاواندا دانیشتووه‌ و هیوای خواست که‌ بتوانێت باسێکی به‌ پێز له‌ گه‌ل لاواندا ئاڵو گۆڕ پێبکات و له‌ لایه‌که‌وه‌ لاوان له‌ ئه‌وه‌وه‌ فێر بن و له‌ لایه‌کی دیکه‌شه‌وه‌ ئه‌ویش له‌ لاوانه‌وه‌ فێر بێت.
به‌رێزیان له‌ گه‌ڵ ئه‌وه‌ی که‌ گوتی: لاوان سه‌رمایه‌ی داهاتووی گه‌ل و حیزبه‌که‌مانن، ئاماژه‌شیدا به‌ کاریگه‌ری لاوانی کورد له‌ سه‌رره‌وتی پێشکه‌وتنخوازی گه‌له‌که‌مان و پێگرتنی دێموکراسی راسته‌قینه‌ له‌ بیر و هزری ئه‌واندا و هه‌روه‌ها سه‌رنجی خسته‌ سه‌ر توانای به‌ هێزی لاوان له‌ به‌رێوه‌بردنی ئه‌رکه‌کانی داهاتوو و هیوای خواست که‌ لاوانی کورد له‌ ده‌ره‌وه‌ی وڵات، بتوانن له‌وه‌ زیاتر خۆیان بۆ خزمه‌ت کردن به‌ داهاتووی وڵاته‌که‌یان ئاماده‌ بکه‌ن و هه‌وڵ بده‌ن تا ئه‌و جێیه‌ی که‌ بۆیان ده‌لوێ، له‌ بیر کردنه‌وه‌ له‌ خزمه‌ت به‌ گه‌له‌که‌یان، خۆ نه‌پارێزن و له‌ هه‌مانکاتدا ده‌بێ هه‌رده‌م رێز له‌ باوکان و دایکانی خۆیان بگرن و له‌ هه‌وڵیشدا بن که‌ له‌ گه‌ڵ گه‌ل و لایه‌ن و رێکخراوه‌کانی سه‌ر به‌ نه‌ته‌وه‌کانی دیکه‌، له‌ پێوه‌ندی دۆستانه‌ و باشدا بن و باسی دۆزی گه‌لی کوردیان بۆ بکه‌ن.
کاک مسته‌فا هه‌روه‌ها ئاماژه‌یدا ‌ به‌وه‌ی که‌ ده‌بێ له‌مه‌وبه‌دوا هه‌و‌ڵبدرێت که‌ هانی لاوان بدرێ بۆ ئه‌وه‌ی بتوانن له‌ داهاتوودا ئه‌رکی به‌ڕێوه‌بردنی کۆمیته‌کانی حیزبی وه‌ ئه‌ستۆ بگرن و هه‌روه‌ها بتوانین لاوان هان بده‌ین که‌ خۆ له‌ رێکخستنه‌کانی حیزبه‌که‌مان نزیک بکه‌نه‌وه‌ و شانازی ئه‌ندامه‌تی له‌ حیزبه‌که‌ماندا وه‌رگرن و له‌ کۆتایشدا گوتی:
کۆمیته‌کانی حیزبی له‌ ده‌ره‌وه‌ی وڵات پێویسته‌ له‌ سه‌ریان که‌ هه‌روه‌ک چۆن ئێستا له‌ ناوخۆی وڵات گرینگی زیاتر له‌ لایه‌ن رێبه‌رایه‌تی حیزبه‌که‌مانه‌وه‌ به‌ لاوان ده‌درێت، ئه‌وانیش ئاوا تا ئه‌و جێیه‌ی له‌ توانایاندا هه‌یه‌ له‌ هه‌وڵدا بن بۆ یارمه‌تیدانی کۆمیته‌کانی یه‌کێتی لاوانی دێموکراتی کوردستانی ئێران له‌ ده‌ره‌وه‌ی وڵات.
پاشان نۆره‌ گه‌یشت به‌ به‌شی پرسیار و پێشنیاری لاوانی به‌شدار له‌ دانیشتنه‌که‌دا و به‌شێکی زۆر له‌ لاوان، پرسیار و پێشنیاره‌کانی خۆیانیان ئاراسته‌ی کاک مسته‌فای هیجری کرد. پاشان بیست خوله‌ک پشوو راگه‌یه‌ندرا!

له‌ کاتی پشوودانه‌که‌دا، له‌ لایه‌ن به‌شی په‌زیرایی کۆمیته‌ی گشتی لاوانه‌وه‌، په‌زیرایی کرا له‌ سه‌رجه‌م میوانانی به‌شدار بوو له‌ کۆبوونه‌وه‌که‌.
دوابه‌دوای پشوودانه‌که‌ ، به‌ڕێز کاک موسته‌فا هیجری،سکرتێری گشتی حیزبی دێموکراتی کوردستانی ئێران، وه‌ڵامی سه‌رجه‌م پرسیاره‌کانی دایه‌وه‌ و پێشنیاره‌کانیشی به‌ هه‌ند وه‌رگرت.
دوابه‌دوای وه‌ڵامه‌کانی کاک مسته‌فای هیجری بۆ ئه‌ندامانی یه‌کێتی لاوانی دێموکراتی کوردستانی ئێران له‌ وڵاتی نورویژ، نۆره‌ گه‌یشت به‌ دابه‌ش کردنی خه‌ڵاته‌کان! دیاری کۆمیته‌ی گشتی یه‌کێتی لاوانی دێموکراتی کوردستانی ئێران له‌ وڵاتی نورویژ له‌ لایه‌ن کاک مه‌نسوور عه‌زیزیه‌وه‌، پێشکه‌ش به‌ به‌ڕێز کاک موسته‌فا هیجری، سکرتێری گشتی حیزبی دێموکراتی کوردستانی ئێران، کرا.
نامه‌ی رێزلێنان له‌ به‌ڕێز سکرتێری گشتی حیزبی دێموکراتی کوردستانی ئیران و حیزبی دێموکراتی کوردستانی ئیران، له‌ لایه‌ن کاک سه‌لاح عه‌بدوڵاپووره‌وه‌ پیشکه‌ش به‌ به‌ڕێز کاک موسته‌فای هیجری کرا.
دواتر گوڵێک له‌ لایه‌ن به‌ڕێز ئه‌وین عه‌زیزی، به‌رپرسی ئاموزشی یه‌کێتی لاوانی دێموکراتی کوردستانی ئێران_نورویژ، پێشکه‌ش به‌ به‌ڕێز کاک مسته‌فا هیجری کرا.
پاشان نامه‌ی رێزلێنان و شاخه‌ گوڵێک که‌ له‌ لایه‌ن یه‌کێتی لاوانی دێموکراته‌وه‌ بۆ به‌ڕێز کۆمیته‌ ناوچه‌ی حیزبی دێموکراتی کوردستانی ئێران_لیلله‌ستروێم، ئاماده‌ کرابوو ، له‌ لایه‌ن کاک موسته‌فا هیجری یه‌وه‌ ، پێشکه‌ش به‌ نوینه‌ری ئه‌و کۆمیته‌یه‌ کرا.
دواتر‌ نامه‌ی رێزلێنان و شاخه‌ گوڵ که‌ له‌ لایه‌ن کۆمیته‌ی گشتی یه‌کێتی لاوانی دێموکراتی کوردستانی ئێران_ نورویژه‌وه‌ بۆ سه‌رجه‌م کۆمیته‌ ناوچه‌کانی یه‌کێتی لاوان له‌ وڵاتی نورویژ، ئاماده‌ کرابوو، له‌ لایه‌ن کاک مسته‌فا هیجری یه‌وه‌ ، پێشکه‌ش به‌ نوێنه‌رایه‌تی ئه‌و کۆمیتانه‌ کرا.
هه‌روه‌ها کۆمیته‌ی گشتی نوێی لاوان، بۆ رێزنان له‌ کاروچالاکییه‌کانی کۆمیته‌ی پێشووی گشتیی لاوان، نامه‌ و گوڵی رێزلێنانی ئاماده‌ کردبوو که‌ له‌ لایه‌ن کاک مسته‌فا هیجرییه‌وه‌ پێشکه‌ش به‌ کاک سامره‌ند ئه‌لیاسی، به‌رپرسی گشتی پێشووی لاوان ،وه‌ک نوێنه‌ری ئه‌و کۆمیته‌یه‌، کرا.
هه‌روه‌ها نامه‌ و گوڵی رێزلێنانی کۆمیته‌ی گشتی یه‌کێتی لاوانی دێموکراتی کوردستانی ئێران_نورویژ، له‌ لایه‌ن کاک مسته‌فای هیجرییه‌وه‌، پێشکه‌ش به‌ لاوی به‌ڕێز و خوێندکار،به‌ڕێوه‌به‌ری ماڵپه‌ڕی یه‌کێتی لاوانی نورویژ، کاک موختار ئه‌لیاسی، کرا.
پاشان کۆمیته‌ ناوچه‌ی حیزبی دێموکراتی کوردستانی ئێران له‌ لیلله‌ستروێم، بۆ رێزلێنان له‌ کاروچالاکییه‌کانی کۆمیته‌ی گشتی یه‌کێتی لاوانی دێموکراتی کوردستانی ئێران_نورویژ و موشاوره‌کانی ئه‌و کۆمیته‌یه‌، به‌رێزان ئه‌نوه‌ر ئازه‌ری و ئاوات مه‌حموودیان ، شاخه‌ گوڵی رێزلێنانی ئاماده‌ کردبوو که‌ لایه‌ن کاک موسته‌فا هیجرییه‌وه‌، پێشکه‌شیان کرا.
دواتر کۆبوونه‌وه‌که به‌ سووپاسی به‌ڕێز سکرتێری گشتیی حیزبی دێموکراتی کوردستانی ئیران بۆ کۆمیته‌ی گشتی یه‌کێتی لاوانی دێموکراتی کوردستانی ئێران له‌ نورویژ، کۆتایی پێهات.

کۆمیته‌ی گشتی یه‌کێتی لاوانی دێموکراتی کوردستانی ئێران، نورویژ
13.03.2005 ی زایینی