کۆبوونه‌وه‌ی سکرتێری گشتی حیزبی دێموكراتی‌ کوردستانی ئێران

له‌گه‌ڵ ئه‌ندامان و لایه‌نگرانی حیزب له‌ واشینگتۆن

سه‌رله‌ ئێواره‌ی رۆژی یه‌کشه‌ممه‌، 4/6/2006، به‌رامبه‌ر به‌ 14ی جۆزه‌ردانی 1385ی هه‌تاوی، به‌ڕێز مسته‌فا هیجری له‌ یه‌کێک له‌ زانستگاکانی ده‌وروبه‌ری واشینگتۆن‌دا کۆبوونه‌وه‌یه‌کی گشتیی بۆ ئه‌ندامان و لایه‌نگرانی حیزب پێک‌هێنا که‌ به‌ ئاماده‌کاریی کومیته‌ی حیزب له‌ واشینگتۆن ساز کرابوو.
سه‌ره‌تا کاک عه‌لی قادری، به‌رپرسی کومیته‌ی حیزب له‌ واشینگتۆن وێڕای به‌خێرهاتن‌کردنی سکرتێری گشتیی حیزب‌و سه‌رجه‌م هاوڕێیانی به‌شدار له‌ کۆبوونه‌وه‌که‌، داوای له‌ به‌ڕیزیان کرد تا له‌ سه‌ر بارودۆخی‌ حیزب و کوردستان و هه‌روه‌ها سه‌فه‌ره‌که‌یان بۆ وڵاته‌ یه‌کگرتووه‌کانی ئامریکا وتارێک پێشکه‌ش به‌ به‌شداربووان بکا.
سکرتێری گشتیی حیزب سه‌ره‌تا باسی له‌و ئاڵوگۆڕانه‌ کرد که‌ له‌ کۆنگره‌ی 13ی حیزب‌دا هاتوونه‌ته‌ دی که‌ له‌ نێویان‌دا گۆڕینی دروشمی ستراتیژیکی حیزب‌و په‌سندکردنی ئاڵای کوردستان زۆر به‌رجه‌سته‌و دیارن.
له‌ ته‌وه‌رێکی دیکه‌ی باسه‌که‌ی‌دا، سکرتێری حیزب ئاماژه‌ی به‌ کرانه‌وه‌ی

ته‌له‌ویزیۆنی تیشک له‌ قۆناغی تاقیکاری‌دا کردو وتی که‌ خه‌ڵکی کوردستان له‌ ده‌ست به‌کار بوونی تیشک تی ڤی خۆشحاڵی خۆیان ده‌ربریوه‌و هیوایشی خواست که‌ به‌رنامه‌کانی تیشک تی ڤی به‌ شێوه‌یه‌کی زۆر رێک و پێک به‌ رێوه‌ بچێت. هه‌روه‌ها پێی له‌سه‌ر ئه‌وه‌ داگرت که‌ ئه‌م ته‌له‌ویزیۆنه‌ ببێته‌ تلۆویزیۆنێك بۆ په‌ره‌پێدانی هه‌ستی نه‌ته‌وایه‌تیی گه‌لی کوردو نه‌ته‌وه‌کانی تری ئێران.

کۆنگره‌ی نه‌ته‌وه‌کانی ئێرانی فیدراڵ‌و شوێنی گرینگی ئه‌م پێکهاته یه‌ له‌ ئه‌مرۆ و داهاتوی ئێران‌دا ته‌وه‌رێکی دیکه‌ی باسه‌که‌ی سکرتێری گشتیی حیزبی پێک‌ده‌هێناو جه‌خت له‌سه‌ر ئه‌وه‌ کرایه‌وه‌ که‌ حیزبی دێموکراتی کوردستانی ئێران ئاڵاهه‌ڵگری ئێرانێکی فیدراڵه‌.
هه‌روه‌ها له‌ به‌شێکی دیکه‌ی باسه‌که‌ی‌دا، سکرتێری حیزب له‌سه‌ر ئه‌م خاڵانه‌ی خواره‌وه‌ هه‌ڵوێسته‌ی کردو به‌وردی بۆ به‌شداربووانی کۆبوونه‌وه‌ی شی‌کردنه‌وه‌:
1. بارودۆخی گشتیی ئێران و پیلانه‌ نهێنی‌یه‌کانی کۆماری ئیسلامیی ئێران له‌ هێندێک بواری سیاسه‌تی ده‌ره‌وه‌دا.
2. به‌رنامه‌ی ئه‌تۆمیی کۆماری ئیسلامی
3. سیاسه‌تی د‌ژی گه‌لیی رێژیم به‌ دژی خه‌ڵکی کوردستان
4. دێموکراتیزه‌کردنی ئێران‌و دامه‌زراندنی حکومه‌تێکی فیدراڵی له‌ جێگه‌ی کۆماری ئیسلامی وه‌ک ته‌نیا بژار بۆ به‌رگری له‌ شه‌ڕ و وێرانی
5. خه‌بات دژی تیرۆریزم و سه‌قامگیرکردنی ئاشتی له‌ ناوچه‌ دا
6. باسێک له‌سه‌ر بارودۆخی ته‌شکیلاتیی حیزب

دوابه‌شی کۆبوونه‌وه‌که‌ ته‌رخان‌کرابوو بۆ وه‌ڵام‌دانه‌وه‌ی پرسیاری به‌شداربووان‌، که‌ له‌لایه‌ن سکرتێری گشتیی حیزبه‌وه‌ به‌وردی وڵامی‌ پرسیاره‌كان درانه‌وه‌.
کۆبوونه‌وه‌که‌ دوای 3 کاتژمێر کۆتایی پێ‌هات.