ده‌قی‌ وتاری‌ به‌ڕێز سكرتێری‌ گشتی‌ حیزب له‌ سه‌نای‌ ئامریكا

به‌رێزان!
ئه‌گه‌ر له سه‌ره‌تای هاتنه سه‌رکاری رژیمی کۆماری ئیسلامیی ئێران له سالی 1357 (1979) کاربه‌ده‌ستانی سه‌فاره‌تی ئه‌مریکا ماوه‌ی ...(444) رۆژ به دوور له هه‌موو عورفێکی نێونه‌ته‌وه‌یی بارمته‌ی ده‌ستی ئه‌و ریژیمه بوون ئێستا ئه‌وه زیاتر له 27 ساله زۆربه‌ی زۆری خه‌ڵکی ئێران بارمته‌ی ده‌ستی ئه‌و ریژیمه‌ن.

له‌ونێوه‌دا، ژنان، رۆژنامه‌نووسان و ئازادیخوازان به گشتی و گه‌لانی بنده‌ستی

ئێرانی به تایبه‌تی له نێو ئه‌و بارمتانه‌دا له ژێر زه‌خت و زه‌بروزه‌نگیی زیاتردا بوون، هۆیه‌کانی زۆرو روونی ئه‌و زه‌بروزه‌نگه‌ش ده‌گه‌رێته‌وه بۆ بناخه‌ی بۆچوون و ئیدئۆلۆژیی ئیسلامی ویلایه‌تی موتڵه‌قه‌ی فه‌قیهـ که تایبه‌ته به ریژیمی کۆماری ئیسلامی ئێران. له یاساکانی ئیسلامی ولایه‌تی‌ فه‌قیهـ ‌دا له ئیسلامدا ژن وه‌ک مرۆڤیکی ده‌ره‌جه دوو ده‌ناسرێ‌، باس له ئازادی و دێمۆکراسی له خانه‌ی ده‌ست تێوه‌ردان له ئه‌حکامی ئیلاهی دژمێردرێ و سه‌زای قورسیان هه‌یه‌ و، باس له مافه سیاسی‌یه‌کانی نه‌ته‌وایه‌تیش له راستای دابه‌شکردن وله ئاکام‌دا لاواز کردنی ئیسلام وه‌ک یه‌که‌یه‌ک ده‌ژمێردرێ، بۆیه داخوازی مافی نه‌ته‌وایه‌تی مۆرکی جودایخوازی له ئێران و، له ئاکامدا پیلانی ئه‌مریکا، ئیسرائیل و... بۆ لاوازکردنی لێ ده‌رده‌هاوێ و به شێوه‌ێه‌کی وه‌حشییانه سه‌رکوت ده‌کرێ.
تا ئێستا به هه‌زاران که‌س له تێکۆشه‌رانی مافخوازی کورد، عه‌ره‌ب،به‌لووچ،تورک و تورکمه‌ن به‌و تاوانانه له ماڵ و زێدی خۆیان دوور خراونه‌ته‌و،دارایی‌یان ده‌ستی به‌سه‌ردا گیراوه، له زیندان کراوان و ته‌نانه‌ت ئێعدام کراون. له‌و راستایه‌داو له به‌رێوه‌بردنی ئه‌و سیاسه‌ته‌دا کورده‌کان وه‌ک نموونه دێنینه‌وه.
حیزبی دیمۆکراتی کوردستانی ئێران که به‌رێوه‌به‌ری جووڵانه‌وه‌ی دێمۆکراسیخوازی کورده‌کانه تا ئێستا دوو سکرتێری گشتیی حیزبه‌که‌ی له ڤیه‌ن له ساڵی 1368 (1989) له کاتی موزاکه‌ره له گه‌ل دیپلۆماته‌کانی کۆماری ئیسلامی و له سالی 1371 (1992) له برلین به ده‌ستی عه‌وامیلی ریژیم تیرۆر کراون. دادگایه‌ک که دوای قه‌تلی برلین بۆ لێکۆلینه‌وه له سه‌ر ئه‌و تاوانه پیک هات کۆماری ئیسلامی له ئاستی‌ هه‌ره سه‌ره‌وه‌ی ده‌سه‌ڵات دا به تاوانبار زانی و بێجگه‌له‌وه به سه‌دان که‌س له تێکۆشه‌رانی ئه‌و حیزبه و باقی رێکخراوه سیاسی‌یه‌کانی کورد له ئێران و ده‌ره‌وه‌ی ئێران به پیلانی ریژیم تیرۆر کراون.
کوشتنی زیاتر له 10 که‌س و بریندار کردنی ده‌یانی دیکه له رێپێوانه‌کاندا زۆر جار له ئێراندا، هاتۆته پێش وزۆر نمونه‌ی دیکه‌ی له‌م شیوه‌ره‌فتارانه له گه‌ل خه‌لک رۆژانه له وڵاتی ئێمه‌دا روو ده‌ده‌ن.
ئه‌وانه هه‌موو سه‌ره‌ڕای ژیانی پڕ له بێبه‌شی، بیکاری و ئیعتیادی به‌ربڵاوه که رۆژ به رۆژ له حالی په‌ره‌گرتنی زیاتر دایه و بی هیوایی ،نه‌خۆشیگه‌لی جۆراوجۆری رۆحی که به تایبه‌ت له نێو لاوه‌کان دایه. ئه‌وه زۆر به کورتی وه‌زعی گشتی خه‌ڵکی ئێرانه. هه‌مووی ئه‌و وه‌زعه ناله‌باره به هۆی تاقمێکی زۆر بچووک که خۆیان سه‌پاندوه‌و هه‌موو لووتکه‌کانی ده‌سه‌ڵاتیان به‌ده‌سته‌وه‌ گرتوه پیک هاتوو، یانی وه‌ک باسمان کرد هه‌موو خه‌ڵکی ئێران و داهات و سامانه گشتی‌یه‌کانی بارمته‌ی ده‌ستی ئه‌و تاقمه‌ن.
له باری نێونه‌ته‌وه‌یی‌یه‌وه وه‌زعه‌که بۆ ئێوه به‌رێزان روونتره:
ده‌ست تێوه‌ردان له کاروباری نێوخۆی وڵاتان ، یارمه‌تیدان به ڕه‌وتی توند و تیژی له فه‌له‌ستین و باقی وڵاتانی دراوسێ و به تایبه‌ت له چه‌ند ساڵی ئه‌م دوایه‌دا له عێراق سیاسه‌تی ئاشکرای ریژیم پێک دینێ. پشتیوانیی بێ‌ ئه‌م لاو ئه‌و لا له تیرۆریزم و له نیهایه‌تدا کێشه‌ی وزه‌ی ئه‌تۆمی ئه‌و وڵاته، ئاشتیی له خۆرهه‌ڵاتی نێوه‌ڕاستی شێواندوه و رۆژبه‌رۆژ مه‌ترسییه‌کانی بۆ راده‌ی نێونه‌ته‌وه‌یی روونتر ده‌رده‌که‌وێ، له‌و پێوه‌ندیی‌یه‌دا ئاخاوتنی رۆژی سێ شه‌ممه‌ 11 ئاوریل مه‌حمود ئه‌حمه‌دی نه‌ژاد، سه‌رۆک کۆمار دنیای له‌و خه‌به‌ره ئاگادار کرده‌وه‌ که توانیویانه یورانیۆم غه‌نی بکه‌ن و ئێمه گومانمان نیه که ئامانجی نیهایی ریژیم له پرۆژه ئه‌تۆمی‌یه‌که‌یدا ده‌ست پێڕاگه‌یشتن به چه‌کی ناوکی‌یه‌.
ئه‌وه‌ی به کورتی باسمان کرد سیاسه‌تی بێ ئه‌م لاولای کۆماری ئیسلامی بووه و هه‌رواش درێژه‌ی ده‌بێ،به‌لام له هه‌ر مه‌رحه‌له‌یه‌ک‌دا به شێوه‌یه‌ک به‌رێوه‌ی ده‌با و دیباته پێش که بۆی که‌م خه‌رجتر و هاسان تر بێ. به‌و مانایه که ئێران له سه‌ر گه‌یشتن به ستراتژی خۆی سووره و به هیچ جۆر پاشه‌کشه‌ی لێ ناکا، ئه‌وه‌ی جێگای باسه ته‌نیا تاکتیکه‌کانی ریژیمن. ئه‌گه‌ر له سه‌ره‌تای به ده‌سه‌ڵات گه‌یشتی ئه‌و ریژیمه‌مه‌وه تا ئێستا لێکدانه‌وه‌ێکی وردمان له سه‌ر کردووه و سیاسه‌ته‌کانی ریژیم له نێو خۆو و ده‌ره‌وه‌ هه‌بێ، ئه‌و راستی‌یه‌مان به باشی بۆ روون ده‌بێته‌وه‌ ده‌ورانی هاتنه سه‌ر کاری ریژیم ، شه‌ری 8 ساڵه‌ی ئێران و عیراق، هێنانه کایه‌ی تاقمێک به ناوی ریفورمیست، نمایشه‌کانی هه‌ڵبژاردن به ناوی په‌ڕڵمان و سه‌رۆک کۆماری و سه‌رئه‌نجام دیاری کردنی ئه‌حمه‌دی نه‌ژاد به سه‌رۆک کۆماری و كابینه‌ی‌ نیزامی و ئه‌منیه‌تی‌یه‌که‌ی و...هه‌موو مه‌رحه‌له تاکتیکی‌یه‌کانی ئه‌و ریژیمه‌ن.
گرفتی سه‌ره‌کیی دنیا و به‌شێک له خه‌ڵکی ئێران _ ئێستا ئه‌و به‌ش‌ زۆر که‌م بۆته‌وه_ له‌وه‌دایه که تا ئێستا ئه‌و ریژیمه‌یان نه‌ناسیوه. گرینگترین هۆی ئه‌و نه‌ناسینه‌ش دروکردنی ئه‌و ریژیمه‌یه، وه‌ک سیاسه‌تێکی عام ده‌ره‌وه‌‌و ژووره‌وه به مه‌به‌ستی فریدانی خه‌ڵک بووه درۆی کردن بۆ سه‌رانی ئه‌و ریژیمه نه‌ک هه‌ر ئیراد نیه به‌ڵکوو له باری ئاینییه‌وه پێویسته. بۆ ڕاستیی ئه‌و وته‌یه هه‌ر ئه‌ونده به‌سه‌ که بۆ ماوه‌ی حه‌وتوویه‌ک له سه‌ر بابه‌تێکی گرینگ _وه‌ک پرۆژه‌ی ناو‌کی_ گوێ بۆ قسه‌کانی سه‌رانی ریژیم رابگرن. ئاشکرا ده‌بیینن که هه‌ر کام شتێک ده‌ڵێ که له گه‌ل ئه‌وه‌ی دیکه ناتابایه ،ئه‌وه‌ش هیچی له خۆراو بۆچوونی تاکه‌ که‌ش نیه. به‌لکوو سیاسه‌تێکی دیاریکراو له لایه‌ن ده‌سه‌ڵاتداری‌یه‌تیی به‌رزی ولات، ولایه‌ت فه‌قیهـ، به مه‌به‌ستی چه‌واشه کردنی جیهان.

به‌رێزان!
ئه‌وه واقعیه‌تی ریژیمی کۆماری ئیسلامیی ئێرانه، واقعییه‌تێکی تاڵ به‌ڵام مه‌وجوود که به هۆی هه‌ڵه‌ی ئێمه‌ی خه‌ڵکی ئێران له سه‌ره‌تاوه به پشتیوانیی ئورووپایی‌یه‌کان و ته‌نانه‌ت یارمه‌تیی ئه‌و ریژیمه به مه‌به‌‌ستی به‌ده‌ستهێنانی ده‌سکه‌وتی بازرگانی له لایه‌ن ئورووپایی‌یه‌کانه‌وه گه‌یشتۆته ئێره.
ئێستا دونیا له په‌یوه‌ندی له گه‌ل ئه‌و غووله‌دا دوو رێگای له به‌ره:
رێگای یه‌که‌م مودارا کردن له گه‌ل ریژیم هه‌ر به‌و شێوه‌ی تاکوو ئێستا کراوه، ئاکامی ئه‌و هه‌ڵبژاردنه کۆماری ئیسلامیه‌کیی خاوه‌ن چه‌کی ئه‌تۆمی خۆرهه‌ڵاتێکی شێواو و پر له ئاژاوه‌تر له ئێستا و وه‌زعێکی خراپتر بۆ مافی مرۆڤ له ئێران وبه هێز بوونی هه‌رچی زیاتری خواستی جیایی نه‌ته‌وه‌کانی ئێرانی لێ‌ ده‌که‌وێته‌وه. بێجگه‌له‌وه ئه‌م حاله‌ته به مانای ته‌سلیمبوونی بی ئه‌م لاو ئه‌ولای دنیایه له‌ به‌رامبه‌ر تررۆریزم بدا.
رێگای دووهه‌م لابردنی کۆماری ئیسلامی بۆیه‌کجاری و رزگار بوون له ده‌ست ئه‌و ریژیمه‌یه، که ئاکامه‌که‌ی ده‌بێته یارمه‌تیدان به ڕه‌وتی دێمۆکراسی و پشتگیریی ته‌واوی مافی مرۆڤ له ئێراندا.
له ناوچونی به‌هێزترین پشتیوانی تیرۆریزم له جیهان و به تایبه‌ت له ناوچه‌که‌دا و، چاره‌سه‌ر کردنی کێشه‌ی فه‌له‌ستین و ئیسرائیل و سه‌قامگیری له عێراق و باقیی شوێنه‌کانی ناوچه.
بۆ گه‌یشتن به ومه‌به‌سته له پێشدا پێویسته کۆمه‌لگای نێونه‌ته‌وه‌یی به تایبه‌ت رۆژئاوا یه‌کده‌ست و یه‌کگرتوو بێ. چوونکه ریژیم زیاترین که‌ڵکی له جیاوازیی بۆچوون له نێوان ئه‌مه‌ریکاو ئورووپا وه‌رگرتوه، یارمه‌تیده‌ری هێزه‌کانی ئۆپۆزسیۆنی دێمۆکراتی ئێران له نێوخۆو ده‌ره‌وه‌ی ئێران بێ. له‌و پێوه‌ندییه‌ پێویسته ئاماژه‌ بکه‌م که یارمه‌تیدانی نه‌ته‌وه‌کانی ئێرانی و یه‌ک له‌وان کورده‌کان بۆ به ده‌ستهێنانی مافی ئۆتۆنۆمیی خۆیان له ئێرانێکی یه‌کگرتووی دێمۆکراتی فیدڕالی داهاتوودا، ده‌توانێ گه‌وره‌ترین حه‌ره‌که‌تی دژی ریژیم به ده‌ستی ئه‌وان فه‌راهه‌م بێنێ.
نابێ له بیرمان بچێ که باشترین شێوه‌ی ده‌سه‌ڵاتداری له ئێرانی پاش کۆماری ئیسلامیدا دابه‌ش کردنی ده‌سه‌ڵات له نێوان نه‌ته‌وه‌کانی ئێرانی له شێوه‌ی فیدڕالیزمێک دابین ده‌بێ که له سه‌ر بناخه‌ی جوغرافی _ نه‌ته‌وه‌یی بنیاد نرابێ. گه‌لی کورد و هه‌موو گه‌لانی دیکه‌ی بنده‌ستی ئێرانیش بۆ رزگار بوون له چه‌وسانه‌وه‌و جیاوازیدانان له شێوه‌‌ی حکوومه‌تێکی ئه‌و تۆ پشتیوانی ته‌واو ده‌که‌ن.
به کورتی به‌ره‌وپێش بردنی ڕه‌وتی دێمۆکراتیزاسیۆن له ناوچه‌كه‌‌‌دا و رزگاریی جیهان له مه‌ترسییه‌کانی تیرۆریزم و دواکه‌وتوویی پێویستی به یه‌کگرتووی کۆمه‌ڵگای نێونه‌ته‌وه‌یی له گه‌ل نه‌ته‌وه‌کانی ئێران هه‌یه.
ئێمه حیزبی دێمۆکراتی کوردستانی ئێران، به‌ڕێوه‌به‌ری جوولانه‌وه‌ی کورد له کوردستانی ئێراندا خۆمان له‌وبه‌ره‌یه‌دا ده‌بینینه‌وه و ئاماده‌ین بۆ به‌رێوه‌بردنی ئه‌رکی سه‌ر شانمان له‌و پێناوه‌دا.