|
alîgirên partiya me dikim û
pêşerojeke geş ji bo we bi hêvî dixwazim.
Gelî birêzan!
Her wekî hûn dizanin bi avakirina
Partiya Demokrat metodek nû ji bo bi destveanîna maf û azadiyên neteweya me li
Kurdistana Îranê hat nava xebata azadîxwazane ya xelkê Kurdistanê, vê partiyê di
yekemîn bernameya xwe de ku ji 8 madeyan pêkhatibû, bi ronî û zelalî li ser
dexwaza demokrasiyê û mafê neteweyî rawesta bû, daxwaziyek ku piştî 61 salan ji
vî serdemî de ne tenê xwesteka xelkê Kurdistanê, belkî daxwaza dinyaya pêşkevtî
û hewcehiyeke civaka mirovahiyê ye.
Ji me hemûyan re ron û eşkere ye ku
partiya me di domandina xebata azadîxwazane ya xwe li dijî zordarî û ne
wekheviya du rejîmên Paşayetî û Komara Îslamî de ji bo gihîştin bi armancên
bilind yên neteweya me ji tev awa û metodên xebatê li gor rewşê mifah
wergirtiye, çi wê dema ku Komara Îslamî xebata çekdarî bi ser me de sepand û em
neçar bûn bi çek û tifengê parêzvaniyê ji maf û azadiyên xelkê Kurdistanê bikin
û hevdem tevî vê çendê jî xortên me yên şoreşvan bi cangorîkirinê xebata siyasî
meşandine, bi şahidiya dost û dujminan, xotên biemeg yên partiya me û şervanên
eqîd û mêrxas, li pêşahiya xebata xelkê Kurdistanê ji bo gihîştin bi azadiyê û
mafên xwe ên neteweyî bûn.
Hevalên rêzdar!
Di yek sala borî de, li hundir û
derveyî welat bi dehan nerazîbûn û xwenîşandanên rêxistinên sinfî, civakî û
siyasî li dijî newekheviya heyî di Komara Îslamî ya Îranê de hatin meşandin ku
ya herî girîng nerazîbûna xelkê Makoyê û bi xwînê gevizandina vê serhildana
nerazîbûnê ji aliyên hêzên Komara Îslamî, nerazîbûna Mamostayên Kurdistanê di
hefteya Mamosta de, nerazîbûna kedkarên “Xet Wahid” (Ajotkarên Otobosên nava
bajar) li Tehranê, nerazîbûna xwendekaran, serhildana gelê Azerbaycanê bo heyamê
10 rojan û bilindkirina dirûşmên neteweyî di xwenîşandanan de, xwepêşandana
jinên azadîxwaz di roja 22’yê Cozerdana îsal li dijî ew zilm û newekheviya ku di
Komara Îslamî de li gor qanûna wan dimeşe, nerazîbûna 22’ê Pûşpera îsal,
hevdehemîn salvegera terorkirina Dr. Qasimlo û hevalên wî li ser daxwaza PDK
Îranê û xwedîlêderketina xelkê Kurdistanê bi bangewaza partiyê bûn bi parek ji
xebata ber bi geşebûnê ya civatên xelkê.
Ev nerazîbûn û berxwedaniye di
halekê de dimeşin ku xelk ji serkut, girtin û îşkenceya bêrehmane û nemirovane
ya kirêgirtiyên Komara Îslamî haydar in û amade ne di rêya bidestveanîna azadiyê
û mafên xwe ên neteweyî de nirx û bihayê jê re bidin, lewra ye jî ku xebata gel
ji bo bidestveanîna azadiyê û mafê neteweyî di pêşerojê de dê bi bername û pan û
berfirehtir bidome.
Li derveyî welat jî partiya me bi
rêvebirina dîplomasiyeke xurt û bihêz karî ye gelek karên girîng wekî
çelengkirina Kongireya Neteweyên Îrana Federal, civîn di salonên “Senate” û
“Congreessa” Amerîka û Parlemana Fransayê, civîn tevî zaf binke û saziyên
bibandor li ser pirojeya siyaseta cîhanî, kombûn û civînên bi çend organên
dewletî ên girîng û bandorker li Amerîka û Ewropayê pêk bîne ku di tevahiya wan
civînan de xwastek û daxwazên neteweyên Îranê û bi taybetî gelê Kurd û girîngî û
rola van hêzane di guhertinên pêşerojê di Îranê de hetiye berbas.
Di warê propagendeyê de, partiya me
bi avakirina malpereke înternetî li Ewropayê û nemaze damezirandina televîzyona
“TISHK”ê germî û guriyeke nû yê daye xebata gelê Kurdistanê ku di pêşerojê de dê
bandora xuya û berbiçav hebe.
Di hevdehemîn salvegera şehîdkirina
Dr. Qasimlo de, endam û dostên partiyê ji bo lidarxistina xwenîşandaneke mezin
li welatê Otrîşê û çend welatên din yên Ewropa û Amerîkayê sozdariya xwe bi Dr.
Qasimlo û partiya wî nîşan dan.
Tevî silav û herbijîn ji bo hemû
xebatkarên rêya azadiyê, ez silavên taybetî ji bo xelkê şoreşvan û azadîxwaz yê
Kurdistanê, yar û piştevanê herdemî yê Partiya Demokrat dişînin, destxweşî û
mandînebûnê jî ji endam û alîgirên netirs û newestiyayî yên partiya me dikim.
Xûşk û birayên qedirgiran!
Hemû ew pêşketinane li xebata rewa û
berheq ya neteweyên Îranê û yek ji wan neteweya Kurd di halekê de ye ku rajîma
Komara Îslamî bi sedema siyaseta mezinxwazî û piştgirî ji girûpên tundrew yên
wekî Hizbelah û Hemasê û fitne û têkderî li herêmê, binpêkirina mafê mirovan û
li rex wan jî xebat ji bo bidestveanîna Çeka Etomî, gefa ji holê rakirina welatê
Îsraîlê li ser xerîteya coxrafiyê û gelek kar û kiryarên neberpirsane yên din,
ji aliyê civaka navneteweyî yê ketiye bin zext û givaşê û rastî kirîzekê hatiye
ku heke em ne bêjin derketin ji vê kirîzê mihal e, em dikarin bibêjin pir dijwar
e. Ji ber biîsrarbûna rejîmê li ser van siyasetane û ne bersîvdayîna bi daxwaza
civaka navneteweyî derheq sekinandina zengînkirina Uraniyûmê, egera biryara
cezadana Îranê ji aliyê Konseya Ewlekariyê, pêşdîtina pêşerojeke ne diyar ji bo
xelkê Îranê di bin siya vê rejîma kevneperest û serberedayî tê kirin.
Rejîma Komara Îslamî ku xwe li
hember givaşa xurt ya navneteweyî de dibîne û ji aliyeke din tirs ji xebata ber
bi geşekirina neteweyên Îranê perîşan kiriye û roj li pey rojê zexta xwe ji bo
ser xelkê bizalhatî (werezbûyî) yê Îranê zaf û zêdetir dike. Li gor
serhejmariyan, Komara Îslamî ya Îranê li sala borî di cîhanê de pileya duyem di
îdamkirina xelkê de hebûye û cinayeta herî nû ya rejîmê di vê derbarê de,
kuştina cihê gumanê ya Ekber Mihemedî, xwendekarê azadîxwaz di girtîxaneyê de
bû.
Rejîmê îsal tund û tûjî li dijî
girtiyên siyasî zêdetir kiriye û eziyet û êşandina wan di zêde û xurt bûnê de
ye, her di vê demê de, roj li pey roj givaşeke bêtir dikeve ser rêxistinên
xwendekarî, kedkarî, mamostayan û jinan û navgînên ragihandinê weke rojname û
kafînet tên girtin û qedexekirin yan bi tevahî yê ketine bin zêrevaniya rejîmê.
Konterolkirina telefona xelkê û bi taybet ew malbatên ku gumana alîkarîkirin
tevî rêxistinê siyasî ji wan tê kirin, bi awayê herî tund dimeşe.
Gelî rêzdaran!
Li gor vê rewşa nû ku min qala vê
kir û bi baldan bi vê rastiyê ku partiya me hem di nava kom û komeleyên siyasî
yên cîhanî, Îranî û Kurdistanî de xwediyê hitbareke taybet û hem di nava xelkê
Kurdistanê de jî xweştevî û nifûzeke berbiçav heye, bêguman dikare li guhertinên
pêşerojê di Îranê de roleke gelek baş derheq rijdkirina xebata hundir û
hevxistina opozîsyonê de bilîze. Merca bingehîn ya cîbecîkirina van wezîfeyên
girîng, mifahwergirtin ji hemû potansiyelan ji bo bizvandina civatên xelkê
Kurdistanê û komkirin û birêxistina wan di refa xebatkarên demokrat de ye.
Em dizanin, îro medya roleke baş di
hişyarkirin û jordebirina zanyariyên civatên xelkê de dilîze, lewra divêt em ji
dezgehên piropagendeyê ên xwe ji bo şermezariya bênpêkirina maf û azadiyên xelkê
ji aliyê rejîmê ve demekê jî derengiyê nekin û her di ve demê de rêya berxwedanî
û xwestin û baskirina maf û daxwaziyan nîşanî wan bidin.
Dîplomasî di gehandina daxwaziyên
xelkê bi civaka navneteweyî bandoreke mezin û jêhatî di pêşdebirina xebata gel
ji bo azadî û serbestiyê de dilîze, lewra divêt em girîngiyeke bêtir bi karê
dîplomasiyê bidin.
Birêvebirina ev erkên jor û
karkirina micid di vê derbarê de rewş û delîveya hilwaşandina rejîmê amadetir
dike û xelkê ji belaya hebûna Komara Îslamî serbest dike. Di vê roja dîrokî de
em careke din peyama hevxebatiyê ji bo neteweyên bindest yên Îranê û gişt
azadîxwazên Îranê di pêxema hiloşandina Komara Îslamî ya Îranê û avakirina
hikûmeteke demokratîk ya Federalî de dişînin.
Bi hêviya wê rojê, careke din cejna
we pîroz be. |
