|
diyardeyeke demokratîk weke
hilbijartinê rêve bibe û hevdem nûnerên Meclîsa “Xîbreganê”ê destnîşan bike.
Komara Îslamî ya Îranê di rewşekê
de ku li hundirê welat bi sedema nebûnî, bêkarî û betaliyê û binpêkirina maf û
azadiyên xelkê tevî nerazîbûneke xuya û berfireh berbirû ye û li derve jî seba
maytêkirin û destêwerdan di nava kar û barên hundir yê welatan, piştgirîkirin
ji girûpên terorîstî û komikên tundrew û hewl û bizav ji bo bidestxistina Çekên
Etomî di bin zext û givaşa raya giştî û welatên bihêz de ye, dixwaze şanoyeke
din di bin navê hilbijartinên Şêwrên Gund û Bajaran de lidar bixe û bi her
awayekê pê çê be, xelkê bo ser sindoqên dengdanê rakêşe û wisan nîşan bide ku
serbarê vê rewşa ku tê ketiye, niha jî xelk alîgir û piştevanê rejîmê ne û bi
beşdarîkirin di hilbijartinan de ji aliyekê sozdayina xwe ji bo rejîmê dubare
dikin û ji aliyê din ve jî li rêya van cure hilbijartinan, parek ji kar û barên
xwe bidestve digirin û vê şanoyê bixe ber çavê raya giştî û xwe pê mezin bike.
Ji tu kesê re ne veşartî ye ku di
dirêjahiya temenê Komara Îslamî û pêka kakil û naveroka kevneperestane û dijî
demokratîk ya vê rejîmê, hilbijartin di şeklê rastîn û demokratîk yê xwe de
birêve neçûne û encameke dilxwaz ji bo xelkê lê neketiye. Ji ber ku ve rejîme bi
xwe li ser bingeheke demokratîk nehatiye avakirin û bawerî bi hilbijartinan ne
bi wateya xwe ya rastîn heye. Ev rastiye ne tenê di asta hilbijartinên Şêwrên
Gund û Bajaran de, belkî di hilbijartinên girîng û bibandortir de jî bi tevahî
yê derketiye holê.
Di Komara Îslamî ya Îranê de
pêkhateya desthilatê li ser bingeha “Welayeta Feqîh” û biryara takekesî hatiye
avakirin ku di rejîmeke bi vî awayî de xelk ji bilî vê çendê ku fermanan birêve
dibe û di xizmeta desthilatê de ye, tu delîve û derfetek din jê re nemaye, heya
bikarin di çarçoveya her çiqas tesk û berteng de jî be, li ser qeder û
çarenivîsa xwe biryarê bidin û parek ji kar û barên xwe bidestve bigirin.
Ceribandina du ger ji hilbijartinên
berê yên Şêwrên gund û bajaran yê daye kifşê ku ev cure Şêwrene ne bi awayê
qanûnî xwediyê maf û desthilateke wisan in ku bikarin di xizmeta xelkê gund û
bajaran de bibin û ne bi kiryar û piratîk jî rê ji wan re tê dayîn ku di vêc û
berjewendiya gel û karê avedankirina gund û bajaran gavan bavêjin, lewra jî di
hinek gund û bajaran de jî kesên xweşnav û xweştevî yên xelkê jî bi kêmî rêya
wan ketibe nava wan şêwr û civatane, bi kiryar ji wan re xuya bûye ku di bin
desthilat û zext û givaş û zêrevaniya xurt ya rayedarên herêmî yên vê rejîmê
nikarin ji bo xelkê bibin sedem û çavkaniya tu xêr û xizmetekê.
Heke hetanî niha Şêwrên Îslamî yên
han hatine neçarkirin ku bêtir di xizmeta rejîmê de bin û ji bo pêşvebirina
armanc û bernameyên dijî gelî ên rejîmê li herêmê û bajarên cur bi cur ên welat
de kar û xizmetê bikin, heke heya niha Şêwrên Gund û Bajaran derfeta kêmtir ji
bo bîr û fikirkirin ji xelkê û gav avêtin di rêya berjewendiyên xelkê de hebûye,
di pêşerojê de û nemaze tevî bi destvegirtina desthilatê ji aliyê Mehmûd
Ehmedînejad û kabîneya wî ya leşkerî û polîsî, desthilata Şêwran ji ya heyî
kêmtir û felsefeya hebûna wan jî kêmrengtir û bêmifahtir ji bo xelkê, lê
bibandortir ji bo rejîmê dibe. Her di vê der barê de çavnihêrî tê kirin ku
pêvajoya li bêjîngdana berbijaran û ret û betalkirina kêrhatîbûna ew kesên ku
heya radeyekê hez dikin xizmetê bi xelkê û gund û bajaran bikin, xurtir û bêtir
be û destnîşankirin û serxistina mohreyan ji sindoqên dengdanê û kirêgirtiyên
rejîmê bi merema hevahengkirina Şêwran ku tevî siyasetên rejîmê xuyatir be û
aqibet ev bi nav Şêwrane ku divêt di xizmeta xelkê de bin, bi kiryar di xizmeta
rejîmê û li hemberî gel de tên ragirtin û zêdetir ji berê jî weke aleva
pêşdebirina bername û komployên rejîmê li gund û bajaran tên bikaranîn. Di
encama vê rewşê de gelek ji siyasetên dijî gelî û xwe parastina rejîmê ji ne
encamdana kar û barên xizmetkirinê bi xelkê li stûyê van Şêwrane tê avêtin û
kêmasiyên rejîmê pê serpûş dikin û diveşêrin.
Lewra ye ku divêt eva bihê
berçavgirtin ku heke Şêwrên Gund û Bajaran li berê bêdesthilat bûn û bi kiryar
rê ji wan nehatiye dan heya di çarçoveya tesk û teng ya êxtiyarên xwe de karekî
wisan ji bo xelkê û gund û bajaran bikin, vê carê bi kiryar û piratîk dê kosp û
astengên bêtir di xizmetkirina wan bi xelkê çê bibe û dê pitir bihên neçarkirin
ku xwe tevî siyasetên rejîmê û xizmetkirin bi Komara Îslamî rê bixin. Lewra
beşdarîkirin di hilbijartineke wiha de çi ji bo xwe berbijarkirinê û çi bo
amadebûn li ser sindoqên dengdanê, dikare çi xêrek û çi xweşnavî û bandorek ji
bo berendam û dengderan lê bikeve?
Serbarê vê yekê ku van bi nav
hilbijartinane tu encameke baş ji bo xelkê lê nakeve, rejîm hewl û bizavê dide
ji çend aliyan ve mifaha xwe jê bistîne:
Yekem: Dixwaze bi rakişandina xelkê
bi awayekî berfireh bo ser sindoqên dengdanê, rûçikek wisan ji xwe bixe ber çavê
raya giştî ku tu bêjî xelk bi dileke germ û hêviyeke mezin pişikdariyê di van
hilbijartinane de dikin û rejîm ji vê pirsê wekî hebûna piştevaniya xelkê ji xwe
û berheqî û meşrûiyeta sîstema xwe mifahê jê distîne.
Duyem: Bi bername û ji bo
cihgirkirina mohre û kirêgirtiyên xwe di nava Şêwran de dê karekê bike ku
siyaset û komployên dijî gelî ên xwe ji rêya van Şêwran encam bide, bednaviyê ji
bo Şêwran pêk bîne û eyb, kêmasî û buxtanê li ser îdare û dezgehên xwe rabike.
Sêyem: Her li kêleka van bi nav
hilbijartinên Şêwrên Gund û Bajaran de, rejîm bi nav hilbijartina nûnerên
Meclîsa “Xibregan”ê jî encam dide. Ev hevçaxiye bêtir ji ber vê çendê ye ku
rejîm dizane heke bi cuda hilbijartinê ji bo Meclîsa “Xîbregan”ê ku erk û
wezîfeya diyarîkirina “Welî Feqîh” û çavdêrî û kontrolkirina bi ser karên wî de
li stû de ye, her bi emr û raspardeyên “Weliyê Feqîh” tên diyarîkirin û di hemen
demê de jî tu pêwendiyek bi parek berçav ya welatiyan nine ku baweriya wan bi
hebûna “Weliyê Feqîh” tune ye.
Demekê ku ev rastiyane berçav
dikevin û mirov dêna xwe dide derbasbûyiya van cure Şêwr û civatane û armanc û
miramên rejîmê ji meşandina van terze hilbijartinane tê şîrovekirin, me tîne ser
vê baweriyê ku beşdarîkirin di hilbijartinên Şêwrên Gund û Bajaran ji bilî
alîkarîkirin bi rejîmê ji bo serxistina komplo û pîlanên rûyekî û xapandina bîr
û raya giştî ya cîhanê, encameke din lê nakeve. Berevajî vê yekê jî, xwe
parastin û beşdarînekirin di van hilbijartinane de dikare merem û komployên
rejîmê rastî têkçûnê bike û rêya xapandina raya giştî jê qut û asteng bike.
Di vê derheqê de çavnihêriya me ji
hemû neteweyên Îranê bi giştî û bi taybetî xelkê azadîxwaz yê Kurdistanê eva ye
ku bi çaveke vekirî ji rastiyan binêrin û bi hûrbînî mêzeyî komployên rejîmê û
mifahwergirtina nebaş ji deng û amadebûna wan li ser sindoqên dengdanê bikin û
bi xwe ne berbijarkirin û neçûna bo ser sindoqên dengdanê hem xweşnavbûna xwe û
berjewendiyên giştî û girîng ên xelkê biparêzin û hem rejîma Komara Îslamî ji
gihîştina bi armancên qirêj û mirar û komployên dijî gelî yên wê tevî têkçûn û
sernekevtinê berbirû bikin. Bi taybet di wê rewşa nazik û hestiyar de ku Komara
Îslamî tevî kirîz û pirsgirêkên hundirîn û derveyî berbirû ye, dixebite ji her
delîve û fersendekê bi qazancê man û parastina desthilata xwe mifahê jê bistîne.
Werin em bi helwesteke jêhatî û
şoreşvanî çeper û meydana vê şanosaziyê li rejîmê berteng bikin û rêyê nedin ku
ev rejîme henekan bi berçavî û nirxên demokratîk û kesayetiya yek yeke dengderan
bike.
Partiya Demokrat Ya Kurdistana
Îranê
Deftera Siyasî
23.07.1385
15.10.2006 |
