Piştî belavbûna nûçeya girtina Pasdar Mihemed Cefer Sehrarûdî, yek ji Fermandehên Hêza Qudsê ji aliyê arteşa Amerîkayê ve li bajarê Hewlêra Paytexta Kurdistana Îraqê, komek ji çalakên siyasî, mamostayên zanîngehê û kesayetiyên Zanistî û Civakî, di nameyekê de ji bo Serok wezîr û wezîra dadê ya Otrîşê, ji rayedarên wî welatî daxwaz kirin heta xebat û kirinên hewce bona radestkirina Mihemed Cefer Sehrarûdî, yek ji bikujên Dr. Qasimlo û hevalên wî li Viyenayê, ji bo mehkemekirinê encam bidin û bînine piratîkê.

Bîroya PDK Îranê li Derveyî welat tevî sipas û pêzanînê ji vê meş û xebata edaletxwazane ya îmzakerên vê nameya servekirî, bi micid ji rayedarên Otrîşê daxwazê dike heya bi helwestgirtina xwe ji bo radestkirina bikujan û mehkûmkirina sebebkaran û rêberên Komployên terorê ku di nava desthilatdariya rejîmê de cih girtine, kêmkarî û xirabiya helwest û kiryara xwe ku bû sedema haydan û berdewambûna dezgeha terorê ya Komara Îslamî li derveyî welat, qerebû û cibran bike.

Azadixwazên Kurdistanê û xebatkarên PDK Îranê hêviya vê çendê ji berpirsiyarên Otrîşê dikin heya bi kiryarên micid weke hukmê Dadgeha Berlînê, Arjantîn û Swîsê, erk û wezîfeyên xwe li hember azadî û demokrasêyê bicî bîne û di xebata Cihanî li dijî terorîzma dewletî de roleke bêtir bilîze.

Di dawiyê de careke din em ji hemû hêzên demokratîk, mirovhez û mirovên azadîxwaz dixwazin, bi piştgiriya xwe ji vê nameya servekirî, dewlet û berpirsiyarên Otrîşê neçar bikin di rêvebirina zêdetir ya edaletxwaziyê û encamdana wezîfeyên mirovî yên xwe li hember neteweya Kurd tevbigere.

Bîroya Nûneriya PDK Îranê Li Derveyî Welat

Parîs

29.01.2007