Sibêdeya roja 09.05.2007’an de, otumbêleke barhilgir ya “TNT”rêjkirî, li hermber deriyê Wezareta Hundir ya Hikûmeta Herêma Kurdistanê li Hewlêrê hate teqandinê. Mixabin ev bûyer bû sedema şehîd û birîndarbûna dehan welatiyên sivîl, her wiha ziyan û xisarên mezin û zaf yên madî ji hevwelatiyan û hejmarek dem û dezgehên hikûmetî ketin.

Ev tawana terorîstî ji her aliyekê ve hatibe organîzekirinê û her armanceke diyarîkirî di piştde be, beşek ji wan pîlan, komplo û zextane ye ku ji aliyê dujminên azadiya Kurd û Kurdistanê ve bona têkdana rewşa ewlekarî û asayîşa Kurdistanê û berlêgirtin ji pêvajoya geşekirina siyasî, aborî, dîplomasî û avadankirina Kurdistanê di holê de ye.

Herçiqas bi van cure tawanane, xwîna hejmarek ji Kurdistaniyan tê rijandinê û ewlehiya welatiyan bo heyameke demkî têk diçe, lê vîn û îradeya neteweya Kurd ji gefxwarin, teror û tirsandina terorîstan û terorîstperweran xurttir e.

Nîşane wisan xuya dibin ku tevî nêzîkbûna roj li pey rojê a cîbicîbûna madeya 140’an a Destûra Îraqê, komplo û maytêkirinên dujminên Kurdan û neyarên aştî û tenahiyê li Îraq û Kurdistanê, bêtir xurt dibin. Eva di demekê de ye ku madeya 140’an mijareke qanûnî ya Zagona Bingehîn a Îraqê ye û Kurdistanî li ser cîbicîkirina vê madeyê biîsrar in û xortên neteweya Kurd li parçeyên din ên Kurdistanê jî piştgiriyê ji viyana rewa û berheq ya xwûşk û birayên xwe û biryara dezgeh û navendên siyasî ên berheq û demokratîk ên Herêma Kurdistanê dikin.

Em nûnerên hêz û aliyên siyasî ên Kurdistanê yên jêr ku me ev daxuyaniye wajo kiriye, serbarê şermezarkirina ew tawan û kiryara terorîstî û hevxemî tevî malbatên şehîd û birîndarên vê bûyerê, daxwazê ji Rêxistina Neteweyên Yekbûyî, Yekîtiya Ewropayê û kom û komeleyên alîgirên parastina mafên mirovan û hemû demokrat û azadîxwazên cîhanê dikin, bo kurtkirina destavêtinên herêmî di nava kar û barên Kurdistanê û berbirûbûn tevî terorîstan, hevkariyê bi gelê Îraqê bi giştî û gelê Kurd re bi taybetî bikin û her di vê demê de jî ji bo cîbicîkirina madeya 140’an, em ji Hikûmeta Îraqa Federal dixwazin ji bo cîbicîkirina wê madeya destûrî, gavên lezgîn û micid bavêje.

1. Partiya Demokrat ya Kurdistana Îranê

2. Partiya Sosyalîst a Kurdistanê (PSK)

3. Partiya Demokrat a Kurdistan – Bakûr (PDK – Bakûr)

4. Partiya Demokrat a Kurd li Sûriyê – Elpartî

5. Partiya Pêşverû ya Demokrat a Kurd li Sûriyê

6. Partiya Yekîtiya Demokrat a Kurd li Sûriyê

7. Partiya Welatparêzên Demokrat (PWD)

8. Partiya Azadiya Kurd li Sûriyê

9. Partiya Yekîtiya Kurd li Sûriyê

1. Rêkevtina Demokrat a Kurd li Sûriyê – Wefaq

11. Partiya Azadiya Kurdistanê (PAK)

10.05.2007