Xortên neteweya Kurd!

 Kurdistaniyên bi şan û şeref!

 Hukmê kuştin, teror û tirsandina xortên neteweya me îcar ji Rojhilat ve rabûye. Vê carê li hember peyvê de hukmê gule û sêdarê  bi ser rojnamevan û çalakên sivîl ên Kurd hatiye dayîn.

 Roja sêşem, 17.07.2007’an, dadgeheke rejîma totalîter û azadîkuj a Komara Îslamî ya Îranê li Sine, di biryareke ne adîlane û dîktatorane de, biryara îdamê ji bo rojnamevan Ednan Hesenpûr û çalakê sivîl  Hîwa Botîmar de kiriye.

 Diyare eva ne cara yekemîn e ku hukmê bi vî awayî li ser xortên neteweya Kurd li Rojhilatê Kurdistanê tê dayîn. Ji dema serkar hatina Meleyan heya niha hukmê îdam û daliqandinê bi ser hezaran xûşk û birayên me di vê parçeyê Kurdistanê de hatiye sepandin û li ser wan hatiye cîbicîkirin.

 Ev cinayet û serberedayînên desthilata hakim di nav Îranê de xwe negirtiye, belkî sînorên wî welatî bezandiye û komek rêberên navdar û sedan xebatkarên Kurd li derveyî tixûbên Îranê bi biryara berpirsiyarên mezin û bilind ên Komara Îslamî teror kiriye.

 Derkirina biryara îdamê ji bo rojnamevan û çalakên sivîl ku tenê çeka destê wan pênûs û peyv e,  ji aliyekê hov û dirindeyiya bêrade ya rejîmê dide xuyakirin û ji aliyê din ve guhnedan û ne parastina biryarnameyên li pey hev ên Komîsyona Mafên Mirovan ya Rêxistina Neteweyên Yekbûyî e ku dehan caran Komara Îslamî derheq binpêkirina mafên mirovan şermezar kiriye.

 Sepandina hukmê îdamê li ser biryarên li Rojhilatê Kurdistanê, rewşa wekî hev a jiyana xortên neteweya me li hemû Kurdistana bin destê dîktator û desthilatdarên serberedayî û çarenivîsa hevbeş ya me nîşan dide.

 Lewra, em nûnerên ew partî û rêxistinên Kurdî û Kurdistanî yên ku ev daxuyaniya  hevbeş wajo (îmza) kirine, serbarê mehkûm û şermezarkirina tund ya biryara bêdadgeh a Komara Îslamî, em daxwaza betalkirina her çiqas zû ya vî kumî û serbestberdana Ednan Hesenpûr û Wahid Botîmar û hemû girtiyên din ên siyasî dikin.

 Em ji hemû kom û komeleyên navneteweyî weke: Konseya Ewlekariya Rêxistina Neteweyên Yekbûyî, Parlemana Ewropayê, Rêxistina Efûya Navneteweyî, Rêxistina Parêzvan a Mafên Mirovan, Civata Cîhanî ya Qelem(PEN) û tev rêxistin û saziyên mirovhez dixwazin ku bi hemû awayekî mumkin Komara Îslamî a Îranê ji bo hilgirtina vî hukmî û serbestberdana Ednan Hesenpûr û Wahid Botîmar bixe bin zext û givaşê.

 Em di xem û nigeraniya malbat û ezîzên Ednan û Wahid de, şirîk û hevxem in.

 21.07.2007

 Partiya Demokrat a Kurdistana Îranê

- Saziya Xebat a Kurdistana Îranê

- Partiya Sosyalîst a Kurdistanê – PSK

- Rêkevtina Demokratîk ya Kurd li Sûriyê – Wifaq

- Partiya Pêşverû ya Demokrat a Kurd li Sûriyê

- Partiya Yekîtiya Demokrat a Kurd li Sûriyê

- Partiya Azadiya Kurd li Sûriyê

- Partiya Demokrat a Kurd li Sûriyê – El Partî

- Partiya Welatparêzên Demokrat ên Kurdistanê - PWD

- Partiya Demokrat a Kurd li Sûriyê

- Partiya Azadiya  Kurdistanê – PAK

 Partiya Demokrat a Kurdistanê – PDK Bakûr