Sibêdeya roja yekşem, 16.12.2007’an, balafirên şerker ên dewleta Turkiyê di êrîşekê de, hejmarek ji gundên başûrê Kurdistanê topbaran kirin.

 Di encama êrîşa han de, hejmarek ji hevwelatiyên sivîl ên Kurd ku di nava wan de jin û zarok jî dihatin dîtin, jiyana xwe ji dest dan.

 Her wiha akinciyên deverên han, ji tirsa domandina êrîşan, bi neçarî berbi bajar û bajarokên derdorê koçber bûne.

 Destdirêjiyên dewleta Turkiyê bo ser axa Herêma Kurdistanê bê tu belge û di rastiyê de, binpêkirina usûl û azînên navneteweyî tê hesibandin.

 Partiya Karkerên Kurdistanê(PKK) jî tenê hêcetek e û armanca sereke a dewleta Turkiyê tenê û tenê dijberîkirin tevî maf û azadiyên neteweya Kurd û vîna xelkê Başûrê Kurdistanê ye ku li gor yasaya bingehîn a dewleta federal ya Îraqê, xwediyê herêmek otonom in.

 Her di vê derheqê de jî kiryarên han, xêncî alozkirina deverê, tu arîşe û û pirsgirêkekê ji bo tu kesê çareser nake.

 Eva ku di vê bûyerê de ji bo me û xelkê Bşûrê Kurdistanê cihê keser û her wiha cihê pirsiyarê ye, izndana dewleta Amerîkayê ye ji bo operasiyona han. Çunku niha jî erkê parastina sînorên esmanî û erdî ên Îraqê, listûyê hêzên hevalbendan e ku Amerîka serokatiya wan dike.

 Em weke partiyên Kurd û Kurdistanî di vê daxuyaniya hevbeş de, êrîş û destdirêjiyên dewleta Turk bo ser axa Herêma Kurdistanê mehkûm dikin. Her wiha em hevxemiya xwe tevî malbatanê şehîdan, birîndaran û kesên ku zirar gihîştiye wan, eyan dikin û daxwazê ji Konbseya Ewlekarî ya Saziya Neteweyên Hevgirtî, Yekîtiya Ewropayê û kom û civatên navneteweyî dikin ku li hember êrîşên dewletên Turkiye û Îranê bo ser herêmek ku weke beşek ji Îraqê de tê hesibandin, bêdeng nebin û bi eşkere pêşiyê jê bigirin.

Partiya Demokrat A Kurdistana Îranê

Partiya Sosyalîs A Kurdistanê(PSK)

Partiya Yekîtiya Kurd Li Sûriyê(Yekîtî)

Rêxistina Xebata Kurdistana Îranê

Rêkevtina Demokrat A Kurd Li Sûriyê(Wefaq)

Paritya Pêşverû Ya Demokrat A Kurd Li Sûriyê

Partiya Demokrat A Kurdistanê(PDK – Bakûr)

Partiya Yekîtiya Demokratîk A Kurd Li Sûriyê

Partiya Welatparêzên Kurdistanê(PWD)

Partiya Demokratîk A Kurd Li Sûriyê(El Partî)

Partiya Azadiya Kurd Li Sûriyê

Partiya Azdiya Kurdistanê