Hevwelatiyên xweragir û xwedî bawer!

Xelkê azadîxwaz yê Kurdistanê!

Malbata serbilind a şehîdan û girtiyên xweragir ên siyasî!

Endam û alîgirên xebatkar ên Partiya Demokrat a Kurdistanê!

Kadro û Pêşmergeyên netirs û can li ser dest

ên Kurdistanê!

Sala 1386’an a Rojî, bi hemû nexweşî, destkevt û serkevtinan ve borî û hevdem tevî hatina werza çêbûna xweziyê û nûbûna salê û cejna neteweyî a Newrozê,

 em pê davêjin sala nû a 1387’an a Rojî.

Hevdem tevî nûbûna salê û rêvebirina cejna neteweyî a Newroza Kurdan, em dê gavên xwe ji bo meşandina rêya tejî kosp û asteng ya xebatê xurttir û hêviya rizgarî ji bindestî û çewisandinê di nava dilê xwe de gurrtir û asoya serkevtin û gihîştin bi maf û azadiyên xelkê Kurdistanê, ronahîtir û geştir bibînin.

Em di demekê de xatira xwe ji sala 86’an a Rojî dixwazin ku Îran û Kurdistanê di zulmet û tarîtiya sîstema paşverû û azadîkuj a Welayeta Feqîh de, yek ji salên reş û bixof ên êxsîrî û koletiya xwe ceriband.

Li vir em dê nihêrîneke kurt bi ser wan kirîz û qeyranan bikin ku rejîma kevneperest a zal bi ser Îranê, di her sê warên hundirîn, herêmî û navneteweyî de bi sedema siyaseta şaş û serberedayî a xwe anîne holê:

A- Siyaseta hundirîn:

Rejîma gemar a Melayan her ji destpêka hatine serkara xwe ve, bi sedema sernetewandin ji bo xwestek û daxwazên rewa û berheq ên neteweyên pêkîner ên Îranê, di asta navxweyî de, polîtîkek şaş û tepeserker meşand û kire rêbaza xwe û wê siyasetê jî tu encamek ji bilî serkut, qirkirin, betalî û bêkarî, îtiyad û kişandina madeyên hişber, riziyok û gendelî û xurtbûna roj li pey rojê a diyardeyên biyom ên civakî li şûnde nebûye.

Di sala 86’an de, rêjeya îdamê li gor salên borî, du qad zêde bûye, rejîma Komara Îslamî di warê daliqandina kesên bin temen 18 saliyê de, di nava hemû welatên cîhanê de, di pileya yekem de ye. Qasê herî zêde a kevirbarankirina jinan di Îrana Melayan de tê meşandin û rêjeya herî zaf a rojnamevanên girtî di cîhanê de, di çalên reş û tarî ên wê rejîmê de, jiyanê dibihurînin û Îran ê bûye girtîgeha herî mezin a rojnamegeran di cîhanê de.

Rêberên rejîmê li serveyî dijberên azadiya gotin û raderbirrînê di cîhanê de cih girtine, sedan hezar zarokên bêpar ji tev mafên jiyanê, bi eşkere di şeqaman de û li ser rêyan tên xuyakirin. Di Îranê de, bi milyonan mirov rasretast û nerasterast, bi destê madeyên hişber, dinalin û tûşî vê belayê bûne, awsan û enflasyona aborî ji sînorê %20’ê derbas bûye, zêdetirî 20 milyon kes di Îranê de, bi destê bêkarî, bêdahatî û belengazî û rojreşiyê dinalînin. Gelaleya binav tenahiya civakî, yê dest avêtiye hevika azadiyên takekesî û Îran ê bûye girtîgeheke mezin ku xof û tirs lê dibare.

Di sala 86’an de, tevgera jinan, kedkar, xwendekar û mamostayan bi awayê herî hov û dirindane hatin serkut û tepeserkirin û zext û givaşek bêmînak, kete ser neteweyên bindest ên Kurd, Belûç, Ereb, Azerî û Turkmen.

Her çiqas sala 86’an a Rojî sala serkut û qirkirina sîstematîk û dirindane a neteweyên bindest, rojnameger û çalakên sivîl, tevgerên civakî ên jinan, kedkar, xwendekar û mamostayan bû, lê bi rûmet û serbilindî ve, îsal sala berxwedan, ranewestan û mafxwaziyê jî bû. Di vê navberê de, xebat û berxwedana xwendekarên Kurd di zanîngehên Kurdistanê û bajarên din ên Îranê tevî ne wekheviyan de, cihê diyar û hêjayî xwe hebû.

Di vê salê de, rejîma tepeserkar a Komara Îslamî a Îranê, tu alaveke serkut û qirkirinê nema ku mifahê jê nestîne û neceribîne, lê bi şanazî ve, nekarî ruhiyeta şoreş û berxwedana gelên bindest ên Îranê û tevgerên xelkê û civakî rastî têkçûnê bike û pêlên xurt ên nerazîbûna xelkê û rûhiya berengarî heta rojên dawî ên sala 86’an a Rojî, her dom kir. Her ew giyanê şoreş, berxwedan û nerawestana sala 86’an a Rojî ye ku ji bo pêşwazîkirin ji sala nû û pêşdebirina wê xebata berheq di sala 1387’an a Rojî de hêviyê dide me.

Hevwelatiyên xebatkar!

Şanosaziya hilbijartin a tûra heştem a Meclîsa Şewra Îslamî ku çend rojan berî niha birêve çû, serbarê çend mehan hewl û xebata hikûmetê bi armanca rakêşana xelkê bo ser sindoqên dengdanê, ne tenê nekarî rewa û meşrûiyetê ji bo rejîmê bi destkevt bîne, belkî vê carê bû sedema abrûçûneke din ji bo hikûmetê. Vê carê heta Yekîtiya Ewropayê jî bi eşkere îlan kir ku ev hilbijartinane ne azad û ne dadperwerane bûn. Îlankirina çend qatan zêde a hejmara dengan ji aliyê dem û dezgehên hilbijartinê ve nekarîn rûyê biyom û kirêt ê vê şanogeriyê bipeçêve.

B- Asta Herêmî:

Ajawe û Fitneçîtiya rejîma aştînexwaz a Komara Îslamî û maytêkirinên wê di nav kar û barên welatên deverê di tevahiya salê de, ne tenê berdewam bû, belku bi awayekî bêmînak her li Pakistan, Keşmîr û Efxanistanê ve heta welatên kêleka Kendava Fars, Yemen, Îraq, Lubnan û Filistînê kire qada fitne û ajaweçêkirinê û şandina teror û reşekujiyê û bi vî awayî ev rejîma terorîstperwer di bîr û raya giştî a akinciyên hemû herêma Rojhilata Navîn de ê bûye maka neewleyiya siyasî, teror û reşekujiyê û mijûl e ev fikre di hizr û ramana siyasetvan û rûniştvanên navçeya Rojhilata Navîn de cih digre ku bi hebûna rejîma têkder a Welayeta Feqîh, egera cihgirbûna aştî û tebahiyê di wê deverê de tune ye û hewce dike ji holê were rakirin.

C- Di asta navneteweyî de:

Di sala 1386’an de, pirsa bernameya gumanbar a projeya Etomî a Îranê, bûye doza herî girîng a civaka cîhanê û niha rejîma Komara Îslamî take rejîma cîhanê ye ku rasterast ê ketiye dijberîkirin tevî tenahî û aştiyê di asta navneteweyî de û metirsiyên wê rejîmê bo ser ewlekarî û aştiya cîhanê, komdengiyeke cîhanî li dijî wê rejîmê di asta Konseya Ewlekarî ya Rêxistina Neteweyên Yekbûyî de derket dolê, bi terzekê ku di çaxê nêzîk bi sê dehsalan ji temenê biyom û gemar yê rejîma Melayan de, tu demekê komdengiyeke wisa li dijî wê rejîmê di asta cîhanî de nehatiye dîtin. Encama wê komdengiyê jî di sê biryarnameyên 1737, 1747 û 1803’an a Konseya Ewlekarî a RNY de xwe derxistiye holê.

Hevwelatiyen hêja!

Civatên xelkê mafxwaz yê Kurdistanê!

Her çiqas ku rejîma Komara Îslamî di her 3 warên navxweyî, herêmî û navneteweyî de bi komek kirîz û qeyranên bêwêne berbirû ye, lê ew kirîzane bi tenê nikarin wê rejîma serberedayî û dîktator bi tavahî rastî têkçûnê bînin. Lewra em bawer in ku rêya ji holê rakirina rejîma azadîkuj a Komara Îslamî, tenê ji rêya hevgirtin û hevpêwendî û xebata bêrawestan û bi bername a hemû neteweyên Îranê û gişt hêz û tevgerêm siyasî û civakî misoger dibin.

PDK Îranê ji bo gihîştin bi wan armancane amade ye hemû cure alîkarî, hevpêwendî û hevxebatiyekê bike, tenê bi mercekê ku encama wê xebatê, demokrasî ji bo Îranê û dabînbûna mafê neteweyî ên gelên zilmjêkirî ên Îranê û yek ji wan neteweya Kurd jê çêbe. Di vê pêvajoyê de em dê bixebitin û xebatê bikin ku Kongreya Neteweyên Îrana Federal bihêztir û çelengtir bikin.

Xelkê heqxwaz ê Kurdistanê!

Hevalên qedirbilind!

Di sala 1386’an de, metodên herî hov û dirindane û bêmînak ên serkut û qirkirinê li ser xelkê Kurdistanê hatin ceribandin, lê birûmet û şanazî ve, gelê me weke herdem bêdengî ret kiriye û rêya berxwedana qehremanane girte pêşberî xwe û selimand ku ew gelê maflêxwarî, divêt bi hemû maf û azadiyên xwe bigihîje û bi dest bixe.

We xelkê heqxwaz yê Kurdistanê di sala 86’an de, bi daxistin û girêdana dikan û bazaran di salvegera terorkirina rêberên xwe yên zana û leheng, selimand ku hûn dirêjederên rêya tejî serfirazî û rûmet a Şehîdên gel û partiyê ne. We xelkê şoreşvan, bi nivîsîna dirûşmên şoreşgerane û belavkirina tirakt, CD û wêneyên Şehîdan di hemû boneyên neteweyî û hizbî de, nîşan da ku hûn keç û xortên biemek ên vê welatê pîroz in û hêjayî hemû cure destxweşî, spas û pêzanînekê ne. Beşdarînekirina we a berfireh û ya cihê rêz û qedirgirtinê di tûra heştem a şanosaziya binav hilbijartina Meclisa Şêwra Melayan de, ji aliyekê nîşanderê hişyariya siyasî a we ya bilind bû û ji aliyekî din ve ji raya giştî a cîhanê jî selimand ku ji wê rejîma azadîkuj bêzar in û dixwazin guhartinên bingehîn di sîstema paşverû a desthilatdar bi ser Îranê de çê bibin.

Ez bi nûnerî ji aliyê rêberiya Partiya Demokrat û Kadro û Pêşmerge û endamên wê ve, ji vê tirîbonê ve silavên emek û wefadariyê pêşkêşî we dikim û radigehînim ku hemû xebatkarên demokrat, şanazî û rûmetê bi hişyarî û netirsî û hesta we ya şoreşgerane dikin.

PDK Îranê, partiya rêberên Şehîd Qazî, Qasimlo û Şerefkendî ye, mêj dem e biryar daye heta serkevtinê neraweste û ji evraz û nişîvên xebatê de, tenê pişta xwe bi alîkarî û berevanîkirina bêdawî a we civatên xelkê girê bide.

Di dawiyê de li ser navê tim rêberiya PDK û hemû Kadro û Pêşmerge û endamên xebatkar ên partiyê ve, nûbûna salê û cejna neteweyî a Newrozê ji we pîroz dikim û hêvîdar im sala nû bibe sala gihîştin bi tev maf û azadiyên neteweya me a zilmjêkirî.

Silav li xelkê Kurdistanê, piştevanên herdemî ên Partiya Demokrat!

Nemirî ji bo Şehîdên birûmet ên Kurdistanê!

Silav li hemû girtiyên siyasî ên ku di van rojên cejnê de di çalên reş û tarî ên Komara Îslamî de diborînin!

Mirin û neman ji bo dijminên azadî û mafê gelan!