Li Îngilîstanê dadgehekê zîndana heta heta li bav û apê keçeke kurd birrî, piştî ku wan hişt ku jina ciwan bête îşkencekirin, tecawizkirin û kuştin. Bavê keçikê 20 sal zînadan stendin, apê wê 23 û zilamekî ku ev tawan pêk anîbû, 17 sal zîndan stendin. Sê kesên dî ku bi pêkanîna vê tawanê hatin gunehkarkirin, reviyabûn

welatekî dî. Dadgehvan “Brian Barker” diyar kir ku sedema van cezayên giran ew e ku tawan "hovane û bê rehim" bûye. Li gorî gotina bav û ap, ku ji Kurdistana Îraqê ne, ji ber ku keça wan xwestiye bi Kurdekî 29-salî re bizewice, wê namûsa malbatêbinpêkiriye.

Dadgeha Îngilîzî diyar kir ku piştî ku bav û apê Benaz Mehmûd a 20-salî, Mehmud Mehmûd (52) û Arî Mehmûd (51), bi têkiliya keça xwe hisiyane, wan çar zilam ji bo kuştina wê kelifandine. Van zilaman Benaz girtiye, ew bêtirî du seet û nîvan tecawiz kiriye, îşkence kiriye û kuştiye. Piştî sê mehan ji kuştina wê, laşê Benazê di çenteyekî de di hewşa maleke li bajarê Birmîngahm de hatibû dîtin. Mihemed Hema (30), zilamê ku 17 sal zîndan lê hatin birrîn, li pêşiya dadgehê li kiryara xwe mûkir hat û got wî û her sê hevkarên xwe yên dî nîv seetê hewil daye ku Benazê bixendiqînin, û piştre wan pêlî qirika wê kiriye, da ku "rihê wê derxin".
Berî ku Benaz Mehmûd bê revandin û kuştin, ew çar caran çûbû cem polîsan û doza parastinê kiribû, lê polîsan alîkariyê wê nekiribû. Piştî hewildana pêşî ya kuştina wê, ew ketibû nexweşxaneyê. Niha pênc polîs dê bêne muhasebekirin, ji ber ku wan guh nedabû tirsa keça kurd û jê bawer nekiribû.
Çîroka Benaz Mehmûd di 17-saliya wê de dest pê kir, dema malbata wê ew bi zorê bi Kurdekî ji Kurdistana Îraqê re zewicand. Piştî du salan, zewac têk çû û Benaz vegeriya mala dê û bavê xwe. Piştre Benaza ciwan dil ket mêrê kurd Rehmet Suleymanî. Ji ber ku yarê wê ne bi dilê bavê wê bû, çimkî "ew ne oldar bû" wek ku bavê wê dixwast, Mehmûd Mehmûd keça xwe bi kuştinê tehdîd dikir, ger ew dawiyê li vê evîna xwe ya nû neyne. Tirsa bavê wê ew bû ku ev evîn ji malbatê re bibe "fedîhe" û "namûsa" malbatê bête birîndarkirin.
Malbata Benazê di sala 1998’ê de ji Kurdistana Îraqê koçberî Brîtanyayê bû û mafê penaberiyê stend. Benaz hingî 11 salî bû. Hin şahidan li pêşiya dadgehê got ku bavê Benazê gellek caran li keça xwe ya zarok dixist, ji ber wê spray di porê xwe de dida, yan jî li gorî nerîna bavê wê jiyanek "zêde rojavayî" pêk dianî. Herweha li gorî şahidekî, apê wê carekê gotiye ku eger Benaz keça wî bûya, wê yê ji mêj ve ew "kiriba ar".
Xûşka Benazê, Bêxal Mehmûd (22), li pêşiya dadgehê got ku Benaz carekê di dema zaroktiya xwe ji malê reviyabû. Hingî bavê wê li ser kasêtekê ew tehdîd kiribû, ku ger ew venegere malê, ewê xûşk û diya wê û xwe jî bikuje. Vê yekê hiştiya ku Benaz vegere malê. Birayê wê hingî bi lêdanan pêşwaziya wê kiriye û ji ber birînan ew ketiye nexweşxaneyê. Vî birayî ji dadgehê re got ku bavê wî jê xwestiye ku xûşka xwe bikuje, lê wî nekariye vê yekê bike.
Di dawiya sala 2005’ê de, Benaz Mehmûd nameyek ji polîsan re şand, tê de navên çend zilaman nivîsandibû ku hewil didan wê û yarê wê Rehmet Suleymanî bikujin. Lê polîsan alîkariya wê nekir.
Di roja yekê ji sala 2007’ê de, keça kurd cama mala pîrka xwe şikand û reviya. Bavê wê hiştibû ku ew alkholê vexwe û bi lepikan di destan de êrîşî wê kiribû. Benaz karî bireve û yekser çû cem polîsan. Lê dîsa jî polîsan tiştek jê re nekir û bi ser halan de jî polîsekî difikirî ku Benazê ji bo şikandina qizêza mala pîrka wê ceza bike.

Di dadgehê de perçeyek vîdyo hate nîşandan, ku demek kurt piştî reva Benazê ji mala pîrka wê hatibû kişandin. Di wî filmî de, ku yarê wê Rehmet Suleymanî bi bêrîkfona xwe kişandibû, Benaz Mehmûd tê nîşandan bê çawa ew birîndar li ser textekî nexweşxaneyekê dirêj kiriye. Benaz di film de dibêje ku ew bitirs e. Suleymanî li pêşiya dadgehê got: "Ew niha, pêşeroj û hêviya min bû."
Piştî ku Benaz di destpêka 2006’ê de ji nexweşxaneyê derket, wê hewil dida ku dê û bavê xwe qanii bike ku wê dev ji evîndarê xwe berdaye. Lêbelê dema ku piştre ew dîsa li kolanekê bi hev re hatin dîtin, grûpekê ji zilaman hewil da ku Rahmat Suleyamnî birevîne. Dîsa Benaz çû cem polîsan, ku vê carê jê re pêşniyaz kir ku wê derbasî xaniyekî jinan bikin. Lê Benazê qebûl nekir û wilo dixuye ku ew roja bi dû de li mala wê ya li Londonê hatiye kuştin. Sê meh di ser kuştina wê re derbas bûn ta ku polîsan laşê wê di çenteyekî de di hewşa xaniyekî li Birmingham binaxkirîdît.
Kuştina Benazê di civîneke malbatî de hatibû plankirin.
Jêder: Malpera Amedê