Hevpeyvîn: Selîm Zencîrî 

Xwendevanên hêja yên Agirî,

Yekîtiya Xwendekarên Demokrat Yên Kurdistana Îranê sê salan berî niha, anku payîza sala 2005’an avabûna xwe ragihand û kar û xebatên xwe ji bo wergirtina endaman û organîzasyona xwe li hundir û 

derveyî welat da destpêkirin. Desteya Avaker ya vê yekîtiyê di heyamê wan sê salan de, erkê birêveberiya Yekîtiya Xwendekarên Demokrat girtibû stûyê xwe û bi kar û xebatên berdewam û çalakane yên xwe karîn xîm û bingeha vê yekîtiyê bihêz û qahîmtir, herweha rêxistina xwe jî berfireh, xurt û ektîvtir bikin heta gihandine vê qonaxê û bi hewce zanîn ku kongreya yekemîn a xwe lidar bixin.

 Hêjayî gotinê ye ku kongreya vê yekîtiyê di 17 heta 20’ê Adara îsal di bin navê RABÎNê de dest bi kar û xebatên xwe kir û di encam de bi pilan û piroje û hilbijartina rêveberiyek nû bi serkevtin ve dawî bi karê xwe anî.

 Lewre me jî bi hewce zanî çend pirsiyaran derheqî kongreya wan û awayê birêveçûna wê, raberî Sekreterê Yekîtiya Xwendekarên Demokrat yên Kurdistana Îranê, birêz Kerîm Perwîzî bikin ku em bala we bo xwendina hevpeyvînê dikişînin:

Kek Kerîm, di destpêkê de em bi boneya serkevtina kongireya we ya yekemîn pîrozbahiyên herî germ pêşkêşî rêveberiya nû û hemû endam û alîgirên Yekîtiya Xwendekaran dikin û hêvî dikim ku hûn di xebat û tekoşîna xwe de serkeftî bin.

Ez jî spasiya we dikim û bi nûneratiya Yekîtiya Xwendekarên Demokrat yên Kurdistana Îranê ve, pêrozbahiya serkevtina yekemîn kongreyê ji hemû endamên vê rêxistinê, bi taybet li hundirê welat û li zanîngehên Kurdistan û Îranê de dikim û hêvîdar im rêveberiya nû di erkên pêsipartî yên kongireyê de serkevtî bin.

Em dikarin bizanin ku armanca we ji girtina kongireyê çi bû?

Kongreya her rêxistinekê, kombûna bîr û rayên endamên wê rêxistinê ye. Desthilata herî bilind û çavkaniya biryardana di rêxistinê de ye.

Kongreya rêxistinê dengê rohn û eşkere yê endamên rêxistinê ye ku bi kombûna di cihê kongreyê de çalakî, tekoşîn, biryar û birêvebirina erk û wezîfeyan di heyamê borî de dinirxînin û erk û wezîfeyên nû ji bo pêşeroja rêxistinê destnîşan dikin.

Bi vî awayî kongre koma dengan û encama bîr û rayên rêxistinê ye, lewre Yekîtiya Xwendekarên Demokrat jî bi liberçavgirtina van rastiyan û piştî borîna sê sal bi ser avabûna xwe de, bi hewce zanî ku kongreya yekemîn a xwe lidar bixe. Di heyamê sê sal avabûna xwe de, karên bingehîn û eslî yên vê rêxistinê birêve çûbûn û zêdetir ji wê jî, gavên dîrokî û girîng hatibûn avêtin.

Ji bo pêkanîn û avakirina her rêxistinekê hewce ye aliyê kêm di çend waran de gavên destpêkîn bihên avêtin û xîm û bingeha wê li ser çend waran de bihê raçandin. Biyava yekemîn, rêxistinî û teşkîlatî ye. Bi vê manayê ku rêxistinek di destpêka avabûna xwe de hewce dike hin kesan weke endam li dora xwe kom bike û organîzasiyonekê ji wan re pêk bîne ku li gor wê organîzasiyona bingehîn, him endam bi awayekî rêxistinî û organîzekirî bi hev re kar bikin, him jî çarçoveya rêxistinê çê bikin û şekl û xemlekê jê re bidin.

Yekîtiya Xwendekarên Demokrat û Desteya Avaker a wê di heyamê wan sê salan de, karên gellek binirx û girîng encam dan û pêkhateya xwe jî çê kiribû, heya qasekê jî pêş ketibû û metod û şêwaza organîzasyonek kemilî bi xwe ve girtibû û dikarîn weke parek organîzebûyî kar bikin. Biyava din a bingeha her rêxistinekê, ragihandin e ku Yekîtiya Xwendekaran bi serkevtin ve karî di vê beşê de jî kanalên ragihandinê weke Kovar, Malpera Înternetî û bernameya Radyoyî bidest bixe û hewl û xebatê ji bo destveanîna ragihandina bi reng jî bike.

Di biyava pêwendiyê de jî gavên baş avêtin û li ser perwerdekirina endam û gihandina nêrîn û rayên yekîtiyê bi tex û qatên pêwendîdar, konferans, semînar û civînên baş û bimifah pêk anîn.

Bi giştî di gellek karên xwe de serkevtinên baş bidest xistibû. Herweha rêbaz, hêla teşkîlatî û nîşan û sembola bizav û rêxistinê hatibûn destnîşankirin û gav jêre hatibûn avêtin. Lewre bi berçavgirtina van rastiyan û herweha hewcehiya nûbûn û dengstandina giştî ji endaman, Desteya Avaker gihîşte wê baweriyê ku yekemîn kongreya xwe lidar bixe û eşkere bike ku organîzasyona wan dikare xwe vejîne û xwe nû bike.

Kongreya we di bin navê ’’RABÛN’’ê de dest bi karên xwe kir, çima Rabûn?

Merem ji hilbijartina vî navî, du tiştên sereke bûn: Yekem, eva ku em bêjin Yekîtiya Xwendekarên Demokrat û bizava xwendekarî a kurd bona xebat di pêxema armanc û hêviyên xwe de rabûne. Duyem, hayder û palderek ji bo xwendekarên ezîz û hêja be bona tevlîbûn bi bizava xwendekarî a kurd û Yekîtiya Xwendekarên Demokrat.

Asta beşdariya xwendekarên keç li kongireyê, li bas û nîqaşên nav kongirê û herweha di rêveberiya nû de çawa bû?

Mixabin civaka Kurdistanê, civakek paremayî ye û ji bo beşdariya jinan û keçan di jiyana siyasî, civakî û aborî de astengî û pirsgirêkên zaf diafirîne û heya niha jî beşdariya jinan û keçan di kar û barên siyasî û rêxistinî de negihîştiye vê radeyê ku, xwast û daxwaza her mirovek azadîxwaz û wekhevîxwaz e. Hêviya hemû azadîxwazekê ye ku beşdariya jinan û keçan di jiyana siyasî- civakî de hevterîb ligel mêr û xortan be û weke hev û bi yek qas beşdar bin, ku mixabn hêj di Kurdistanê de cih negirtiye û bi tevahî piraktîze nebûye.  Lê serbarê wana, asta beşdariya keç û jinan di kongreya Yekîtiya Xwendekaran de nêzîk bi %40 a beşdaran bû ku eva jî bi xwe cihê hêviyê ye. Em hêvî dikin di pêşerojê de ew radeye bibe %50, anku wekheviya temam ligel mêran. Keçên endam di kongireyê de jî bi xweşî ve di bas û nîqaş, raderbirîn û biryarên kongireyê de beşdariyek ektîv û bibandor hebûn û di encama hilbijartina rêveberiya nû de karîn nêzîk bi 30 ji 100’ê ya rêveberiya nû pêk bînin.

Heya çiqas mirov dikare bi demokratîkbûna kongireya we hêvîdar be?

 Bi raya min û bi raya endamên kongreyê jî ku di bas û mijarên kongrê de beşdar bûn, kongre, kongreyek azad û demokratîk bû, azadiya raderbirrîn û nêrîn û dîtina takekesan bi tevahî misoger bû û bi awayekî demokratîk, şoreşgirane û bi têgihîştin ve li ser hemû kar û biryarên kongreyê bas û qal dihat kirin. Herweha hilbijartinek azad û bi tevahî demokratîk birêve çû ku di encam de rêveberiyek jêhatî û bişiyan ji bo rêxistinê hate hilbijartin. Herweha di basên nav kongreyê de jî pê li ser ceribîn û bihayên girîng yên serdem û yek ji wan jî demokrasîxwaziyê hate çeqandin û rêbaza rêxistinê bi rêbaza netewî- demokratîk hate binavkirin û pesendkirin. Herwha kongreya Yekîtiya Xwendekarên Demokrat jî qewl û soz da ku girêdayî û pabend bi rêbaza demokrat be û şanaziyê dike ku şagird û xwendekarê mekteb û bîra mamostayê demokrasiyê, Dr. Qasimloyê nemir be.

Kongreya Yekemîn çi piroje, stratejî yan mekanîzmek ji pêşeroja Yekîtiya Xwendekarên Demokrat yên Kurdistana Îranê destnîşan kir?

Di kar û xebatên kongreyê de bi hûrî bas li ser pênaseya xwendekar, nasnameya xwendekarên kurd û bizava xwendekarî a kurd hate kirin û tekoşîn û xebata Yekîtiya Xwendekaran di vê derheqê de bilind hate nirxandin. Herweha pê li ser gavên dîrokî yên wê hate çeqandin. Yek ji wan gavên ku Yekîtiya Xwendekarên Demokrat avêtibû, diyarîkirina rojek ji salê bi navê Roja Xwendekarên Kurd bû ku roja 12’ê Banemerê, salroja şehîdbûna Şehîd Simayîl Şerîfzade wekî Roja Xwendekarên Kurd diyarî kir. Herweha biryar hat girtin ku li ser pênasekirina xwendekarê kurd û xurt û berçavkirina nasnameya wan, çi li Îran û çi jî li derveyî Îranê de gavan bavêje û kar û xebat bona bihêz û xurtbûna baştir a bizava xwendekarî bike. Herweha li ser karên vê rêxistinê di warên cur bi cur yên rêxistinî, ragihandin, pêwendî û hînkirinê de biryarên girîng hatin dayîn. Bi hêviya ku rêberiya nû ya hilbijartiya kongreya yekemîn a Yekîtiya Xwendekarên Demokrat yên Kurdistana Îranê erk û wezîfeyên xwe bi başî bi cî bîne û di pêxema hêvî û armancên xwendekarên azadîxwaz yên kurd de xebat û tekoşîna berbiçav û xurt hebe.

Birêz Kerîm Perwîzî, Sekreterê Yekîtiya Xwendekarên Demokrat yên Kurdistana Îranê, pirr spas ji bo beşdariya we di vê gotûbêjê de. Her bijî û serkevtî bin.

Spas û serkevtin ji we re jî.