Rêxistina Mafê Mirovan li Kurdistanê di nûçeyekî de eşkere kir ku hejmara kuştiyên pevçûna di navbera xelkê bajarê Îwan Xerb a Îlamê û hêzên rejîma Komara Îslamî gihîşte 4 kesan û çendîn kes jî bi xurtî birîndar bûne.
Li gor vê nûçeyî, piştî ragihandina encama dengên gerra duyem a bi nav hilbijartinên Meclîsa rejîmê, di nava komek ji xelkê Îwan Xerb û hêzên rejîmê pevçûn pêk hat û 4 kes bi navên Kesra Mîrî, Eşkan Bîbak, Mêhdî Kerîmî û Hamid Esedî hatin kuştin û çendîn kesên din jî birîndar bûn.
Tê gotin pevçûna han seba nerazîbûna alîgirên yek ji berbijêrên bi nav hilbijartinên rejîmê yê bi nav Daryûş Qenberî, di encama dengan de pêk hatiye.
Navhatî ku weke sêyemîn kes yê vê herêmê hatiye ragihandin, piştî pevçûna Îwan Xerbê û kuştin û birîndarbûna çend kesan, bi fermî ji aliyê Wezareta Navxwe a rejîma Îslamî, weke nûnerê yekem yê bi nav hilbijartina herêma Îwan Xerb a Îlamê hate ragihandin.