Rojên 03 – 04.05.2008’an, konferanseke navneteweyî li ser navê “Xeter û gefên Komara Îslamî a Îranê”, li Viyan, Paytexta Otrîşê birêve çû.

Di konferansa han de ku ji aliyê pilatforma “Stop The Bomb”ê ve hatibû lidarxistin, çendîn kesayetiyên zanistî ên zanîngehên Otrîşê, Alman, Kanada, Amerîka, Îsraîl û her wiha çendîn nivîskar û rojnamevanên pispor li ser pirsên Rojhilata Navîn û Îranê, gotarên xwe pêşkêş kirin. Ji aliyên opozîsyona Îranê ve, Hîwa Behramî, nûnerê PDK Îranê li Otrîşê, Keywan Kabalî, nûnerê Partiya Kesk a Îranê li Amerîkayê û her wiha çalaka warê mafê jinan Nîlûfer Beyzanî, li welatê Almaniyayê, ji bo konferansa han hatibû vexwendin.
Xala balkêş a vê konferansê, beşdarînekirina nûnerên partiyên siyasî ên Otrîşê bû ku sedema vê vedigere ser hebûna rexneyên tund li hember pêwendiyên di navbera Otrîş û Îranê de.
Hêjayî gotinê ye ku di konferansa han de pirsa terorîzma navneteweyî a Komara Îslamî ya Îranê yek ji wan mijarana bû ku bi berfirehî kete berbas û her di vê derheqê de dehan car îşare bi terora rêberê mezin, şehîd Dr. Qasmilo û hevalên wî li Viyenê hate kirin û nûnerê PDK Îranê di axavtina xwe a vê konferansê de bi berfirehî li ser dosya terorkirina şehîd Dr. Qasimlo li ser axa Otrîşê axivî.
Konferans roja duşem, 04.05-2008’an dawî bi karê xwe anî.

Hîwa Behramî di navbeyna beşên vê konferansê de çendîn hevdîtin tevî kesayetiyên beşdar weke Yûsî Mêlmen, sernivîskarê rojnameya Ha Arêts a Îsraîlê, Mîneşe Emîr, berpirsiyarê beşa Farsî a radyo Îsraîlê, Patrîk Kilawsên, cîgirê berpirsiyarê Enistîtûya Lêkolînên Rojhilata Navîn li Waşîngtonê û her wiha Pawlo Kasaka, nûnerê Partiya Sosyal Demokrat a Portogalê li Parlemantaya Ewropayê û çendîn kesayetiyên din yên konferansê de pêkanîn.