|
Li hundira welat de jî ew rejîmane sansoreke xurt li ser
weşanan
dimeşînin û berahiya her terze azadiyeke raman û raderbirînê digirin û li wê
derheqê de mafên hevwelatîbûnê û mafên mirovan jî binpê dikin. Yek ji van
rejîmane, rejîma kevneperest a Komara Îslamî ya Îranê ye ku dixwaze di serdemê
enformatîk û cîhanîbûnê de desthilata sedsalên navîn a xwe li ser gelên Îranê
birêve bibe û welat di bin perdê cehl û nezanînên xwe de li cîhana derve bê hay
û xeber bike. Gişt kesek ji wê yekê haydar e ku ew rejîma kevneperest bona ber
lêgirtin ji pêlên zaniyariyan û bêparkirina xelkê welat ji torên cîhanî, salane
çendîn milyaran ji bo danana parazîtan li ser tora cîhanî a înternetê û
şêlokirin û danîna parazîtan li ser torên televîzyon û radyoyan terxan dike. Li
navxweyê welat jî, gişt belge şahidiya vê yekê didin ku heftî nebûye ku weşanek
ji aliyê dezgeha sansora wê rejîmê ve nehê daxistin. Tîxa sansora wê rejîmê ji
meha Rêbendanê heya niha, 21 weşan di sernaserê Îranê de girê dane. Rejîmek ku
rêberê wê yek ji dijmin û neyarên çapemeniyê di cîhanê de hatiye nasîn.
Van siyasetên rejîmê bona berbendkirina torên zaniyarî û pêwendiyan bo hundirê
welat, serbarê vê çendê ku di warê aborî de, buhayek yekcar zaf bixwe ve digire,
gellek caran ji bo jîngeh û saxlemiya mirovan jî ziyan û xisarên berfireh hebûne
ku yek ji van avêtina parazîtan bona şêlokirina torên pêwendiyan bûye.
Vekolînên bijîşkî yê dane zanîn ku belavkirina pêlên parazîtan li bajarên Îranê
dibe sedema jidayîkbûna zarokên siqet û nekemil. Di van çend salên borî de, em
şahîdê vê yekê li bajarên Kurdistana Îranê de ne. Bi sedema şopandina wê
siyaseta gemar ji aliyê rejîma kevneperest a Melayan di bajarên Kurdistanê de,
jidayîkbûna zarokên nivîşkan û nekemilî ber bi zêdebûnê çûye û roj li pey rojê
jî hejmara zarokên han zêde dibe. Her li gor hin nûçeyan, liberçûna zarokan û
mirina jinên ducan û pêgiran û zarokên van li gor salên borî ber bi zêdebûnê
çûye. Piraniya bijîşkên pispor, sedema zêdebûna ji qasê zêde a jidayîkbûna
zatokên nekemilî û her wiha diyardeya liberçûna zarokan û mirina jinan, di
bajarên Kurdistanê de çavkanîgirtî ji bandor û kartêkirina dezgehên parazîtan li
bajarên Kurdistanê ji aliyê rejîmê ve bona pêşîgirtin ji belavbûna torên
satelîtî daye zanîn.
Hêjayî gotinê ye ku di van gundên Kurdistanê de ku dezgehên han nehatine
damezrandin, diyardeya bi vî awayî nahê mêzekirin û ew faktore zêdetir raya
bijîşkan di vê derheqê de îsbat dike.
Pirsa sereke ku li vir tê holê, eva ye ku gelo ev rejîme bi siyasetên han
dikare ber ji pêlên cîhanîbûn û torên televîzyonî bigire? Yan ji vê rêyên ve
gelê Kurd û xebata mafxwazane a wî gelî biçûk de bîne? Gelo cinayetên rejîma
Komara Îslamî a Îranê di heyama borî de mîna êrîşên leşkerî, îdamên bikom,
îşkenceyên hovane, wêrankirina bajar û gundên Kurdistanê, belavkirina madeyên
bêhişker û dehan û sedan cinayetên din bi wê siyasetê bigihîne armancên xwe yên
gemar? Bêşik pêvajoya dîrokê daye hole ew rejîma kevneperwer li vê rêyê ve jî
nikare bizava gelê Kurd û gelên din yên Îranê biçûk de bîne. |
