|
Di vê derbarê de Civata Senfî a
Rojnamevanên Îranê raporek weşand û serbarê bangewaza vê saziyê bona rêzgirtin
ji vê rojê, diyar kir: “Roja Cîhanî a Azadiya Çapemeniyan di
demekê de tê ku kêmbûna
çapemeniyan di welat me de her didome û roj bo rojê astengên li hember
rojnamevanan ji bo rêvebirina erkên pîşeyî û exlaqî ên wan zêdetir dibin”.
Rêxistina Neteweyên Yekbûyî jî bi
vê hencetê, zext û givaşên bo ser rojnamevanan bi xurtî şermezar kir. “PIC”,
Kampayna Navneteweyî a Berevanî ji rojnamevanan, rêxistinek navdewletî ye ku
binkeya wê li Jenevê ye û berevaniyê ji nûçegihanan di wan herêman de dike ku
şer, pevçûn û tund û tûjî heye, derbarê rewşa nûçegihanan ya îsal ragihand: “Di
cîhanê de rewş her weke berê aloz û tevlihev e. Ji destpêka sala 2008’an hetanî
niha aliyê kêm 28 nûçegihan di 17 welatên cîhanê di dema bicihanîna erkên xwe
de, jiyana xwe ji dest dane”.
Li gor rapora vê rêxistinê, Mekzîk
bi kuştina 6 nûçegihanan di meha borî de, welatê herî bitirs yê cîhanê ye û Îraq
bi 4 nûçegihanên kuştî, welatê duyemîn e û Pakistan û Rûsiya jî sêyem û çarem
in.
Xameneyî yek ji dijminên sereke
ên azadiya çapemeniyê ye
Bi hinceta Roja Cîhanî a Azadiya
Çapemeniyan ve, Rêxistina Nûçegihanên Bêsînor ku binkeya wê li Parîsê ye,
lîsteya dijminên Azadiya Çapemeniyan weşand. Di rapora nû a vê saziyê de, Elî
Xameneyî, Serokê Olî yê rejîma Melayên Îranê, Mehmûd Ehmedînejad, Serok Komarê
rejîma han, Rabert Mîgabe, Serok Komarê Zîmbaweyê, Hû Cîn Taw, Serok Komarê Çînê
dijminên sereke ên çapemeniyan di cîhanê de hatine naskirin.
Di vê raporê de, girûpên çekdar jî
di vê lîsteyê de hatine bicikirin, ji wana girûp û destekên çekdar ên Îslamî li
Îraq û Efxanistanê, hêzên ewlekarî ên alîgirê Hemasê li Xezeyê, hêzên Felestînî
ên bin desthilata Mehmûd Ebas, Serokê Hıkûmeta Otonom a Filistînê.
Vê dawiyê jî, Xaniyê Azadiyê
(Freedom House) di rapora xwe a salane de ragihand ku azadiya çapemeniyê li sala
2007’an di cîhanê de, her wekî berê pêvajoyek serjêr hebûye. Li gora wê raporê,
rewşa Îranê di vê derheqê de, di asta herî nizim de ye û eva jî vedigere bo
serkut û çewisandinên yek li pey hev ên ku rejîma Komara Îslamî a Îranê
dimeşîne.
Her wiha Rêxistina Parêzvanî ji
Nûeçgihanan, Rêxistina Berevanî ji Maf Rojnamevanan ku binkeya wê li bajarê “New
York”ê ye, di rapora xwe a salane de, Îran weke çaremîn girtîgeha rojnamevanan
di cîhanê de nasandiye.
Hêjayî gotinê ye, Îran yekemîn
girtîgeha rojnamevanan di Rojhilata Navîn de ye û Kurdistana Îranê jî, girtîgeha
herî sereke a rojnamevanên Kurd di Îranê de ye û heta niha rejîma Komara Îslamî,
serbarê girtina çend rojanamevanên Kurd wekî Mihemedsidîq Kebûdvend,
Îclal Qewamî û wd... û Ednan Hesenpûr û Hîwa Botîmar du
rojnamevanên Kurd her di bin tirsa birêveçûna biryara daliqandinê de ragirtiye.
|
