Selah Muradî
Rêxistina Berevanî ji Mafê Mirovan li Kurdistanê (RMMK) li jêr navê 'bila partî û grûpên Kurd ji tundûtûjiyê xwe biparêzin', ligel tometbarkirina PDKÎ û çend rêxistin û aliyên din bi bikaranîna 'tundûtûjiyê', daxwaza ji wan kiriye ku " ji destbirin bo her cure kiryarekî leşkerî an çirîkî ku derfetê ji bo êrîş bo ser mafê mirovan û binpêkirina berfireh a wan mafan bi taybet bo aliyê hember pêk tîne, xwe biparêzin."
Mafê RMMK ye ku li hember her 'tundûtûjiyekê' ku

 bibe sedema binpêkirina mafê mirovan, helwêstê bigre. Lê mixabin di wê daxuyaniya îşarepêkirî de, RMMK tûşî şaşiyê bûye û ne tenê sebebkarê eslî û bingehîn yê 'tundûtûjiyan' li Kurdistanê ji bîr kiriye, belku wisa nîşan daye ku ew partî û rêxistinên Kurdistanî ên dijberên Komara Îslamî ne ku 'tundûtûjiyê' pêk tînin. Ev yek şîrove û berhevdana hinek binav lêkolînvan û rewşenbîrên Kurd tîne bîr û fikra mirov ku hebûna partiyên Kurd wek sebebkarê paşketina Kurdistanê û qirkirina xelkê Kurdistanê ji aliyê rejîma Meleyan dizanin û wilo didan xuyakirin ku rejîma Komara Îslamî a Îranê di reftar û siyasetên xwe de li hember xelkê Kurdistanê û daxwaziyên wan tu şaşî û tawanek nekiriye.
PDKÎ herdem di wê baweriyê de bûye ku pirsa Kurd li Îranê rêçareya leşkerî tune û ne Kurd ji wê rêyê ve dikarin Rejîma Meleyan bihiloşînin û ne ew rejîma jî ji rêya 'tundûtûjî', kuştin û qirkirin û wd... dikare Kurdan teslîm bike. Lewra PDKÎ li ser çareseriya pirsê bi rêya 'gotûbêj' û 'aştîxwazane' ve tekez kiriye. PDKÎ her ji destpêka hatinserkara Komara Îslamî di çarçoveya şanda nûneriya Kurd de, rêçareya 'gotûbêjê' hilbijart.
Partiya Demokrat ya Kurdistanê di rêya çareserkirina pirsa Kurd de bi awayekî aştîxwazane, digel Komara Îslamî gotûbêj kir, lê Komara Îslamî her wek di axaftinên Xomeynî û Pasdar Çemran de derket holê, bi armanca bidestxistina hêz û derfet bo qirkirina Kurdan û binpêkirina daxwaziyên wan, rêya 'gotûbêj'ê hilbijartibû. Di wê serdemê de Çemran radigehîne ku divê em ji 'gotûbêj'ê bo 'qirkirin'a Kurdan mifahê bistînin, yan Xomeynî dibêje: di destpêkê de wan dorpêç bikin, piştre bi wan re gotûbêjê bikin. Di wê demê de ku PDKÎ digel Fetwaya Cîhad a Xomeynî û êrîşa hêzên çekdar ên rejîmê bo ser xelkê sivîl û bêberevan yê Kurdistanê û mafê rewa yê Kurd rûbirû bibû, rêya berxwedan û parastina xelkê Kurdistanê li hember êrîşên rejîma Komara Îslamî hildibijêre. Ev helwêsta PDKÎ diçe çarçoveya 'berxwedana rewa' û mafê hemû takekes, civat û partiyekê ye li hember êrîş û destdirêjî ya dagirker berevaniyê ji xwe bike û xwe biparêze. Ligel berdewambûna siyaseta rejîma Meleyan li hember pirsa Kurd, wate mifahstandin ji 'gotûbêj'ê bo qirkirina Kurdan, PDKÎ wek berê dubare li ser çareserkirina aştîxwazane a pirsa Kurd pêdagirî kir. Belgeya herî mezin jî bo aştîxwazbûna PDKÎ û şerxwazbûna Komara Îslamî, gotûbêja navebra şehîd Dr. Qasimlo, Sekreterê Giştî yê partiyê û nûnerên vê rejîmê li Viyen, paytexta Otrîşê di sala 1989an de ye ku di wan gotûbêjan de rejîma Meleyan ji 'gotûbêj'ê bo 'teror'a
Pêxemberê aştiyê mifah wergirt.
Heyamekê berî niha tîmek ji Pêşmergên PDKÎ bo rêvebirina karûbarê rêxistinî vegeriyabûn ser axa bav û kalên xwe. Piştî ku rejîma Komara Îslamî ji hebûna wê tîmê di herêmê de agahdar dibe, bi hêzek gelek mezin êrîşê dike ser tîmekî 4 kesî û mixabin her çar xebatkarên PDKÎ piştî du rojan berxwedan û xweparastinê qehremanane şehîd bûn.
Wan pêşmergan êrîş nekiribû ser tu paygeh û organekî rêjîma Komara Îslamî û tenê bo berevanî ji can û jiyana xwe çek bikar anîbûn. Lê mixabin ji aliyê Rêxistina Berevanî ji Mafê Mirovan li Kurdistanê ve ne tenê Komara Îslamî wek sebebkarê tenê yê pêkhatina 'tundûtûjiyê' di Kurdistanê de nehatiye mehkûmkirin, belku wan bi bikaranîna 'tundûtûjiyê' tometbar dike.
Di vê derbarê de hewce ye RMMK bi awayekî hûrbînane helwêstê bigre, ger nikare di helwêstên xwe de tenê sebebkarê 'tundûtûjî'yan (Rejîma Meleyan) mehkûm bike, aliyê kêm PDKÎ ku nirxên herî mezin bi sedema 'tundûtûjî'yên rêjîma Komara Îslamî daye, bi bikaranîna 'tundûtûjiyê' tometbar neke.

Çavkanî: Duheftînameya Agirî