Selah Muradî

Piştî lawazbûna peywendiyên navbera Tirkiye û Îsraîlê, Serok Wezîrê Tirkiyê, Receb Teyîb Erdoxan di rojên 27 û 28ê Cotmeha 2009an serdana Îranê kir.
Serok Wezîrê Tirkiyê berî wê seferê di hevpeyvînekê de digel Rojnameya ‘Guardian’ de, piştgirî li bernameya navikî a rejîma Komara Îslamî a Îranê kir û siyaseta welatên 5+1 di vê derbarê de bê wijdanane binav kir.
Tirkiye take welatê Îslamî yê endamê Nato û hevalbendê giring ê Amerîka di Rojhilata Navîn de ye. Ev helwêsta Erdoxan dikare di siyaseta Nato de li hemberî bernameya Etomî a Îranê valahiyê pêk bîne û herwiha bandora neyênî bike ser têkiliyên navbera Turkiye û welatên Ewrûpa û Amerîka.
Tirkiye di demekê de bo endambûn di Yekîtiya Ewrûpayê de hewlê dide ku dewleta Erdoxan zêdetir dixwaze ber bi

 aliyê cîhana Îslamê biçe. Ev jî yek ji wan sedeman e ku welatên Ewrûpayê li wergirtina Turkiyê wek endamek YEê nigeran kiriye.
Piştgiriya Tirkiyê li programa navikî a Îranê û rejîma Komara Îslamî û dewleta Ehmedînejad bi tevahî digel siyasetên Yekîtiya Ewrûpayê û nirx û bihayên vê yekîtiyê di warê demokrasî û mafê mirovan de dijber û ne teba ye.
Tirkiye nikare ji rejîmeke dîktator û serkutker ku li dijî hemû bihayên Rojavayî ye, piştevaniyê bike û di heman çaxê de çaverê be di Yekîtiya Ewrûpayê de wek endam bê wergirtin.
Erdoxan di wê hevpeyvîna xwe a digel Rojnameya ‘Guardian’ de, rasterast Îsraîlê bi wê yekê tawanbar dike ku dixwaze Îranê ji holê rake û bi vî awayî piştgiriyê li siyaseta Komara Îslamî bermaberî Îsraîlê dike. Heta diçe siyaseta Tirkiyê ji siyaseta Komara Îslamî nêzîk dibe. Nêzîkbûna Tirkiyê digel rejîma Meleyên desthilatdar ên Îranê, bi heman radeyê wî welatî ji Îsraîl û welatên Rojavayî dûr dixe.
Dewleta Erdoxan hinek hewl bo çareserkirina pirsa Kurd li Turkiyê dest pê kiriye û nêzîkbûna vî welatî li rejîma Komara Îslamî bandora neyênî dike ser wî welatî. Rejîma Meleyan bixwe digel pirsa neçareserkirî a Kurdên Îranê rûbirû ye û naxwaze çareserkirina pirsa Kurd li Tirkiyê bandora rasterast li ser Kurdên Îranê bike û wan bo bidestxistina mafên neteweyî ên xwe han bide.
Turkiye di navbera ragirtina mîrata Ata Turk û nirxên Îslamî ên cîhana Îsalmê de û endamebûn di Yekîtiya Ewrûpayê û wergirtina nirx û bihayên demokratîk û mirovî de helwêsta xwe yekalî ne kiriye. Hilbijartina cîhana Îslamê û dostîniya digel rejîmên dîktator ên Îslamî wek Komara Îslamî a Îranê ji aliyê Tirkiyê, dibe sedema pêkhatina astengan li hemberî pêvajoya demokratîzasyona Rojhilata Navîn û herwiha çareserbûna pirsa Kurd di vê herêmê de. Ger Turkiye berevajî wê rewşê kar bike, dikare bibe alîkareke xurt û bihêz yê cihgirbûna aştî û demokrasiyê di Rojhilata Navîn de.