Lokman Polat
Partiya Demokrat a Kurdistana Rojhilat, partiya damezrevanê Komara Kurdistanê a Mahabadê ye, partiya serokê nemir Qazî Mihemed, Qasimlo û Şerefkendî ye. Di dîroka siyasî ya kurd û Kurdistanê de ciheke taybetî ya Hizba Demokrat heye.
Ev sî salin ku ez tevgera azadîxwaz ya siyasî ya kurd li her çar parçeyên Kurdistanê dişopînim, Hizba Demokrat heta niha tu tişteke xirab pêk neaniye, tu çalakiyeke nebaş nekiriye û herweha tu dem

zirarê nedaye doza netewa kurd. Hizba Demokrat partiyeke modern e û kar û xebata xwe de, di siyaseta xwe de partiyeke serketî ye.
Dema ez pê hesiyam ku Ebdula Hesendade û hinek kadirên partiyê ji partiyê veqetiyane, ez li ber ketim. Nakokiyên nav partiyê û veqetandin partiyê qels dike û tu faydeyeke nade têkoşîna azadiya gel û rizgariya welat, berevajê wê zirarê dide doza netewa kurd.

Di nav van sî salên ku min tevgera siyasî ya kurd şopandiye û ez bi xwe bûme şahidê gelek tiştan û herweha ji nêz ve ji cudabûn û veqetandinên di nav partiyên kurd de bûme xwedî agahdariyan, bi kurtahî tecrûbeyên sî salan dide nîşandan ku gelek caran di nav partiyên kurd de cudabûn û veqetandinên grûpî çê bûne û zirarê dane hêza tevgerên siyasî yên kurd. Veqetandin û parçebûna partî û rêxistinên kurd hêza siyasî û rêxistinî ya kurd zeîf kiriye, xebat sar kiriye, têkoşîn pasîf kiriye, pêşveçûn lawaz kiriye û di her warî de qelsî pêk aniye.
Kes û grûpên ku ji partiyên xwe vediqetin, ji partiya xwe ya berê bihêztir, moderntir û çalaktir partiyekê danamezrînin. Veqetandina wan qelsiya wan e û ew di serî de li siyasetê hinek germ dibin û paşî anku piştê demeke sar dibin, li hemberê bûyeran xemsar dibin û gelek kadirên siyasî ku veqetiyane bi şêweyeke xemsarî xwe dikşînin kuncika xwe û li mala xwe rûnî dikin, têkilê tiştên siyasî nabin yan jî di siyasetê de gelek pasîf dimînin.

Dîroka siyasî ya partî û rêxistinên kurd û Kurdistanê û bi taybetî jî yên kurdên bakur vê rastiya ku min anî zimên bi gelek cureyan û hercar raxistiye ber çavên mirov. Kurd bi hevre xurtir in. Ji hev veqetandin wan bi hêz nake, qels dike.
Di nav partî û rêxistinên siyasî de helbet dê nakokiyên şexsî û pirsgirêkên îdeolojîk, siyasî û rêxistinî hebin. Ya girîng ev e ku; mirov bi bêhneke fereh, bi tolerans û bi metoda îqnayê hevûdu serwext bike, bi hev bawer bike û pirsgirêkan çareser bike. Tu pirsgirêkeke ku çareseriya wê tunebe nîn e. mirov bixwaze dikare ji hemû pirsgirêkan re çareserî bibîne û nakokiyên şexsî ji holê rake.
Binêrin, qeslbûn û hêzbûna Hizba Demokrat tenê Kek Mistefa û Ebdula Hesenzade û Hesen Restigar û endamên partiyê eleqeder nake, hemû kurdên welatperwer yên herçar parçeyên Kurdistanê eleqeder dike. Bi qelsbûna Hizba Demokrat tenê hûn naêşin, em jî diêşin anku hemû kurdperwer pê diêşin. Bi qelsbûna Hizba Demokrat dijminê dagirker, olperestên paşverû şad û bextiyar dibin, keyfa wan tê. Di herçar parçeyên Kurdistanê de serketin û pêşketin keyfa hemû kurdperweran tîne, kurdperwer şad dibin, dagirker qehr dibin.

Bawer bikin, dema Xanî Bilûryan ji Hizba Demokrat veqetiya û çû mil da partiya sosyal şoven –Tudeh-ê ez pê êşiyam, gelek aciz bûm. Herweha dema Kek Celîl Gadanî veqetiya dîsa ez aciz bûm, lêbelê dema gotin Kek Celîl Gadanî û hevalên xwe vegeriyane û bi Hizba Demokrat re bûne yek, keyfa min hat û ya tev kurdperweran hat.
Lê mixabin carek din girûpa Celîl Gadanî û Hesen Restgar ku sala 1988’an ji PDK Îranê veqetiyan û bi xurtî dijberiya Dr. Qasimlo û Dr. Şerefkendî jî dikirin, piştî vegeriyana xwe di sala 1996’an vê care rihet nerûniştin û Ebdula Hesenzade jî bi xwe re birin û me dît ku wan roja 06.12.2006’an cudabûna xwe ji PDK Îranê îlan kirin. Bi vî karê xwe, wan careke din derdek giran ji xebata siyasî û neteweyî ya azadîxwazên Kurdistana Rojhilat bi serkêşiya PDK Îranê xistin û dilê dijminên Kurd ji xebatkarên Kurd xweş û şad kirin.