Lokman Polat 

Nexweşiyên ku di salên 70 û 80-yî de di nav partî û rêxistinên bakurê Kurdistanê de hebû, niha di nav PDKÎ de rû daye. Gruba ku ji PDKÎ veqetiyaye heman navî bi kar tîne û ev tişteke nebaş e, ne exlaqî ye, ne sîyasî ye. Çewtiyên weha berê li bakurê Kurdistanê hatin kirin û tu feydeyeke neda doza netewa kurd û herweha tu feydeyeke neda tevgera siyasî ya kurd.

Li tevahiya cîhanê pîvan û exlaqê siyasî heye.

Divê siyasetvanên kurd jî li gorê pîvanên siyasî û exlaqî tevbigerin. Nabe ku siyasetmedarekî li gor keyfa dilê xwe hiqûq û exlaqê siyasî binpê bike. Di siyasetê de hinek tişt têne kirin ku ne li gorê exlaq û hiqûqa siyasî ne. Di nav sî salan de tevgera kurd ya bakurê Kurdistanê ji ber nekemilandîbû, bi xeşîmî û zarokî gelek şaşiyan kirin. Niha hinek kurdên siyasî yên rojhilatê Kurdistanê şaşiyên ku hatine kirin, dubare dikin.

Hinek kes ji partiyeke veqetin, nabe ku navê wê partiyê bikar bînin û herweha nabe ku heman navê organa partiyê bi kar bînin. Ma nav qeteh bû. Heger dixwazin bibine partî bila naveke nû li partiya xwe daynin. Di salên berê de tevgera siyasî ya kurdên bakur şaşiya bi karanîna heman nav pêkanî û tu feydeyeke jê nedît. Ew dem bi navê ”Armanc” du kovar, bi navê ”Xebat” du kovar derdiketin. Kurdên binxetê herweha bi heman navî du kovar derdixistin. Navê partiyeke du gruban bikar dinanî. Ev jî bi xwe re keşmekeşî, bêserûberê, bêbawerî û nakokî derdixist holê.

Dema ez pê hesiyam ku Kek Hesenzade û hevalên xwe navê PDKÎ û navê organa wê ”Kurdistan” bi kar tînin, ez li ber ketim. Sekretê PDK-Î yê ku ji hêla pîvanên exlaqê siyasî û hiqûqî meşru ye anku Kek Mistefa Hicrî di beyana xwe de dibêje : ”Rojnameya KURDISTAN ku rojnameya me ye, wan navê wê danîne ser rojnameya xwe. Arma PDK Îranê ji xwe re hilgirtine. Di halekê de ew û gişt xelkê Kurdistanê baş dizanin ku ew PDK Îranê nînin. PDK Îranê ew partî ye ya ku niha di ciyê xwe de ye. Ew partiye ye ku rêberiya wê di kongireyeke demokratîk de hatiye hilbijartin. Ew partiye ye ku piraniya rêberiya wê û piraniya bedeneya partiyê tevî vê ye. Lewra nabe partiyeke eslî hebe, îca her girûpeke din cuda be, navê wê partiyê li ser xwe danê û xwe bi mafdar bizane û ên din jî neheq……... Ez hêvîdar im ku navê xwe biguherin.”

Belê, ez jî weke kurdekî welatparêz, weke dostekî 30 salan yê PDKÎ, weke birayekî hemû kurdên rojhilat hêvî û daxwaz dikim ku gruba Kek Hesenzade di şaşiya xwe de îsrar nekin, û navê xwe bigehurînin. Heta dil dixwazê ku ew bi metoda xwerexneyî şaşiyên xwe qebûl bikin û vegerin nav refên partiyê.

Li gor pîvanên exlaqî, siyasî û hiqûqî, dema partiyek bibe ducî, di organa navendî – merkezî – central- de pîranî kîjan alî be, partî ew alî ye. Ji xwe heger çend kes ji ber sedemên şexsî û yan jî siyasî ji partiyekê veqetin, nabe ku navê wê partiyê bikar bînin. Kek Hesenzade û çend kes veqetiyane, heqê wan tune navê partiyê û navê organa –weşana navendî – ya partiyê bikar bînin.

Ez bi xwe gruba ku ji PDKÎ veqetiyane şaş dibînim û helwesta rêberiya PDKÎ rast dibînim. Divê kurdên rojhilat piştevaniya xwe ji PDK Îranê û rêberiya kongireya 13-ê ya partiyê re bidine ragihandin. Partiya serokên nenir Qazî Mihamed, Qasimlo û Şerefkendî bila qels nebe, hîn bêtir xurt bibe, bi hêz bibe.