ڕێکخراوەی فەرهەنگیی هیوای زانست ٨٥ بڕوانامەی کۆتاییهێنانی خولی ڕێنووسی زمانی کوردیی پێشکەش بە فێرخوازانی ئەم ڕێکخراوە فەرهەنگییە کرد.
ڕێکخراوەی فەرهەنگیی هیوای زانست لە درێژەی چالاکییە فێرکارییەکانی خۆیدا بە کردنەوەی خولی ڕێنووسی زمانی کوردی، لە وەرزی زستاندا ژمارەیەکی بەرچاو لە فێرخوازانی فێری ڕێنووسی زمانی کوردی کرد.
ڕێکخراوەی فەرهەنگیی هیوای زانست لە زستانی ئەم ساڵدا لە کتێبخانەی ژیلا حسەینی و لە دوو خولی جیاوازدا ٢٠ کەس، لە کتێبخانەی نەشمیلان لە سێ خولدا ٣٠ کەس، لە کتێبخانەی کانی عاشقان و لە دوو خولدا ١٥ کەس و هەروەها لە کتێبخانەی موفیدە مەزهەر لە سێ خولدا، ٢٠ کەسی فێری خوێندن و نووسین بە زمانی کوردی کرد.
لە کۆتاییدا و لە دوای تاقیکردنەوە، فێرخوازەکان لە ڕێوڕەسمێکی پڕشکۆدا بڕوانامەی تێپەڕاندنی خولی ڕێنووسی کوردییان لە دەستی مامۆستایانی خۆیان وەرگرت.
لەم ڕێوڕەسمەدا جگە لە وتاری ڕێزدار دوکتور فاتێح سەعیدی مامۆستای زانکۆ، هەموو وتار و بەرنامەکان لەلایەن فێرخوازانەوە بەڕێوە چوو.
ئەنجومەنی زانست بە بەردەوامی هەوڵی داوە لە ڕێگەی چالاکییەکانی خۆی و بەتایبەت فێرکاریی زمانی کوردییەوە خزمەت بە نەتەوەکەی بکات.
