" />

  • ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٢٣ی ژانویەی ٢٠١٨ی زایینی - ٠٣ی رێبەندانی ١٣٩٦ی هەتاوی  

لوقمان مێهفه‌ر: رادیۆ ده‌نگی کوردستانی ئێران، بیرۆکه‌یه‌کی پێشکه‌وتنخوازانه‌، زانستییانه‌ و به‌ لێکدانه‌وه‌ی ئاوه‌زمه‌ندانه‌ دامه‌زرا

زایینی: ١٥-٠٦-٢٠١٢ - هەتاوی: ١٣٩١/٠٣/٢٦ - ١٣:٣٨ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
لوقمان مێهفه‌ر: رادیۆ ده‌نگی کوردستانی ئێران، بیرۆکه‌یه‌کی پێشکه‌وتنخوازانه‌، زانستییانه‌ و به‌ لێکدانه‌وه‌ی ئاوه‌زمه‌ندانه‌ دامه‌زرا
کوردستان میدیا: له‌ ٣٢هه‌مین ساڵـڕۆژیی دامه‌زرانی رادیۆ ده‌نگی کوردستانی ئێراندا، ماڵپه‌ڕی کوردستان میدیا، وتووێژیکی له‌گه‌ڵ به‌ڕێز "لوقمان مێهفه‌ر" پێکهێناوه.


وتووێژی ماڵپه‌ڕی کوردستان میدیا له‌گه‌‌ڵ به‌ڕێز "لوقمان مێهفه‌ر" ئه‌ندامی کۆمیته‌ی ناوه‌ندیی حیزبی دێمۆکرات و به‌رپرسی رادیۆ ده‌نگی کوردستانی ئێران، سه‌باره‌ت به‌ ٣٢هه‌مین ساڵـڕۆژی دامه‌زرانی رادیۆ ده‌نگی کوردستانی ئێران.


ده‌قی وتووێژه‌که‌ به‌م چه‌شنه‌یه‌:


کوردستان میدیا: رادیۆ ده‌نگی کوردستانی ئێران له‌ چ که‌ش و دۆخیکدا (بارودۆخی سیاسیی ئێران و کوردستان) دامه‌زرا؟ ئامانج له‌ دامه‌زرانی رادیۆ ده‌نگی کوردستانی ئێران چ بوو و ئایا له‌ ماوه‌ی ته‌مه‌نی ٣٢ ساڵیدا رادیۆ ده‌نگی کوردستانی ئێران به‌ ئامانجه‌کانی خۆی گه‌یشتووه‌؟


لوقمان مێهفه‌ر: له‌ هه‌ل‌ومه‌رجێکی ئه‌وتۆدا، ئه‌م رادیۆیه‌ دامه‌زارا که‌ ماوه‌ی یه‌ک ساڵ‌ونیو بوو، رێژیمی تازه‌ به‌ ده‌سه‌ڵات گه‌یشتوو به‌و په‌ڕی بێ‌به‌زییانه‌وه‌ له‌ سه‌رانسه‌ری ئێران، قۆڵی له‌ سه‌رکوت کردنی ئازادییه‌ دێمۆکراتییه‌کان هه‌ڵاماڵی بوو. کوردستان ‌و گه‌لی کورد درابوونه‌ به‌ر په‌لامار، گه‌مارۆ درابوون، رۆژ نه‌بوو له‌ گوند ‌و شار کوشتاری به‌ کۆمه‌ڵ وه‌ڕێ‌ نه‌خا. ده‌یان شار ‌و ئاوایی شه‌ڵاڵی خوێن کران. له‌شکریانی جه‌هل و نه‌زانی له‌ ژێر فتوا به‌د ناوه‌که‌ی جیهادی خومه‌ینی کوشتن و رژانی خوێنی رۆله‌کانی گه‌لی کوردیان به‌ حه‌لال، و به‌ جێ‌ هێنان و به‌رێوه‌بردنی ئه‌م جینایه‌تانه‌یان به‌ ئه‌رکێکی شه‌رعی و یاسای ده‌زانی. هه‌موو ئه‌و هه‌وڵانه‌ بۆ له‌ ناوبردنی ئازادییه‌ دیمۆکراتیکه‌کان له‌ ئێران به‌گشتی و کپ کردنی ده‌نگی مافخوازانه‌ی خه‌ڵکی کوردستان به‌تایبه‌تی بوو. له‌و که‌ش و دۆخه‌ پڕ له‌ ترس و وه‌حشه‌ته‌دا نرکه‌ی رادیۆ ده‌نگی کوردستان یه‌که‌م تریبونی کوردی بوو له‌ نێو هه‌موو رێکخراوه‌ سیاسییه‌کانی ئێرانی ‌و کوردستانیدا که‌ وه‌ک برووسکه‌ی هیوا و هومێدی به‌خشییه‌ هه‌موو گوێگرانی دوور و نیزیکی خۆی . هه‌واڵی مزگێنی خه‌باتێکی به‌ربڵاوتر و شوێندانه‌رتری به‌ هاونیشتمانی تامه‌زرۆی ئازادی دا و مۆمێکی هه‌ڵگیرساند که‌ هه‌تا ئێستا بۆته‌ مه‌شخه‌لی روون که‌ره‌وه‌ی رێی تێکۆشانی که‌م وێنه‌ی کادر و پێشمه‌رگه‌ و ئه‌ندامانی حیزب و به‌ میلیۆن ئینسانی زوڵم لێ کراو و ئازادیخواز. له‌ لایه‌کی دیکه‌وه‌ ناسینی راسته‌وخۆی تایبه‌تمه‌ندییه‌کانی کومه‌ڵی کوردستان هۆیه‌کی دیکه‌ی گرینگی راکێشانی سه‌رنج بۆ پێویستی دانانی رادیۆ بوو.


کوردستان میدیا: پێویستیی دامه‌زرانی رادیۆ ده‌نگی کوردستانی ئێران چ بوو؟ و سه‌ره‌ڕای ئه‌و هه‌موو هه‌وڵانه‌ که‌ رێژیمی ئێران له‌مه‌ڕ راگرتنی وه‌شانی ئه‌م ده‌نگه‌ وه‌ گه‌ڕی خستۆن، چڵۆن توانیویه‌تی درێژه‌ به‌ کار و تێکۆشانی خۆی بدات؟


لوقمان مێهفه‌ر: به‌ ئاوڕدانه‌وه‌یه‌ک به‌ مێژووی کۆمه‌ڵگای ئه‌و کاتی ئێران به‌گشتی و خه‌ڵکی کوردستان به‌تایبه‌تی زۆربه‌ی خه‌ڵکی نه‌خوێنده‌وار یان که‌م خوێنده‌وار بوون، هه‌ر بۆیه‌ نووسراوه‌ وچاپه‌مه‌نی به‌ کرده‌وه‌ ته‌نیا له‌ چوارچێوه‌یه‌کی بچووکدا بۆ راده‌یه‌کی که‌م له‌ تاکه‌کانی کۆمه‌ڵ ده‌یتوانی جێگای که‌ڵک لێ‌ وه‌رگرتن بێ‌. له‌ حاڵێکدا شه‌پۆلی رادیۆ، ئازاد له‌ هه‌ر جۆر به‌ربه‌ستێکی زه‌مانی، جوغرافیایی و سیاسی ده‌توانێ‌ له‌ هه‌موو کاتێکدا له‌ نه‌بوونی حوزوری پێشمه‌رگه‌دا سه‌ر به‌ هه‌موو ماڵێک و هه‌موو جێگایه‌کدا بکا و به‌ گوێی هه‌موو که‌سێک له‌ ژن و پیاو، له‌ هه‌ر ته‌مه‌نێکدا و به‌ هه‌ر پله‌یه‌کی خوێنده‌واری، زانیاری بدا. به‌م جۆره‌ به‌ ئیمکاناتێکی زۆر سه‌ره‌تایی‌یه‌وه‌ پێی نایه‌ گۆڕه‌پانی تێکۆشان له‌ پێناوی ئازادی و پێشکه‌وتنخوازی خه‌بات له‌ رێگای هێنانه‌دی دروشمی ستراتیژی ئه‌و کات "دێمۆکراسی بۆ ئێران و خودموختاری بۆ کوردستان" ده‌ستی به‌ کار کرد و له‌و رۆژه‌وه‌ بێ‌ وچان ئه‌رکی پیرۆزی خۆی که‌ گه‌یاندنی ده‌نگی حیزبی دێمۆکراتی کوردستانی ئێران به‌ گه‌لانی ئێران و به‌تایبه‌تی خه‌ڵکی کوردستان بوو، به‌ چاکی به‌ جێ‌ هێناوه‌، له‌و پێوه‌ندییه‌شدا سروشتییه‌ که‌ بێ‌ که‌موکۆڕی نه‌بووه‌. به‌ڵام ره‌نگه‌ که‌م که‌س بزانێ‌ که‌ (٣١) ساڵا به‌رده‌وام بوونی رادیۆ له‌گه‌ڵ چ گیروگرفتێک به‌ره‌وڕوو بووه‌.


کوردستان میدیا: له‌ ماوه‌ی تێکۆشانی رادیۆ ده‌نگی کوردستانی ئێراندا، ئایا هه‌تا ئێستا ــ بۆ ماوه‌یه‌کیش بووبێت ــ ئه‌و ده‌نگه‌ کپ کراوه‌؟ ئه‌گه‌ر کراوه‌ هۆکاره‌کانی چ بوون؟


لوقمان مێهفه‌ر: له‌و ماوه‌یه‌دا، به‌ده‌یان جار له‌ سه‌ر چیا به‌رزه‌کانه‌وه‌ هه‌تا پێده‌شته‌کانی کوردستان جێگای خۆی گۆڕیوه‌، ئه‌وه‌ش له‌ ژێر هێرشی په‌یتا په‌یتای دوژمندا بووه‌ که‌ هه‌وڵی بۆ کپ کردنی ده‌نگی ئه‌و رادیۆیه‌ داوه‌. به‌ڵام ئه‌و رادیۆیه‌ به‌رنامه‌کانی له‌وه‌شان نه‌که‌وت ئه‌وه‌ش زه‌حمه‌ت و فیداکاریکی زۆری ویستوه‌، ئه‌م له‌خۆبردوویه‌ هه‌وێنی له‌ به‌رنامه‌رێژی ده‌قیقی رێبه‌رایه‌تی و ئیمان و بیروباوه‌ری پته‌وی کادر و پێشمه‌رگه‌کانی حیزب و پشتیوانی خه‌ڵکی کوردستان سه‌رچاوه‌ی گرتووه‌.هه‌رچه‌ند له‌و ٣١ ساڵه‌دا به‌ ده‌گمه‌ن هه‌ڵکه‌وتووه‌ که‌ به‌رنامه‌ی ده‌نگی کوردستان له‌به‌ر هۆی تکنیکی یا هۆیه‌کی دیکه‌ دره‌نگترله‌ کاتی خۆی به‌رنامه‌ی بڵاو کردۆته‌وه‌ یا ئه‌گه‌ر بۆ ماوه‌یه‌کی کورتخایه‌ن که‌ له‌ ده‌ره‌وه‌ی ئیراده‌ی به‌ڕێوه‌به‌ر‌ و کارگێراِنی بووه‌، له‌ وه‌شان که‌وتووه‌ و له‌و پێوه‌ندییه‌دا خه‌ڵکی کوردستان نیگه‌ران بوونه‌. لێره‌دا پێویسته‌ ئاماژه‌ به‌وه‌ بکه‌ین که‌ ئه‌و پێوه‌ندی ‌و خۆشه‌ویستییه‌ به‌ خۆڕایی پێک نه‌هاتووه‌، رادیۆ ده‌نگی کوردستان خۆشه‌ویسته‌، چونکه‌ ده‌نگی حیزبی دێمۆکراته‌، حیزبی پێشڕه‌و ‌و شۆڕشگێڕی خه‌ڵکی کوردستانه‌، ده‌نگی زوڵاڵی کۆمه‌ڵانی خه‌ڵکه‌، چونکه‌ باسی ئاره‌زوو ‌و ئاواتی ئه‌وان ده‌کا. بۆ هێنانه‌ دیی ئامانجه‌کانی ئه‌وان تێده‌کۆشێ‌. بۆیه‌ ره‌وایه‌ ئه‌گه‌ر بۆی به‌ په‌رۆش بن.


کوردستان میدیا: ئایا رادیۆ ده‌نگی کوردستانی ئێران له‌ رابردوو و به‌تایبه‌ت له‌ ئیستادا توانیویه‌تی وه‌ڵامده‌ری ویست و داخوازییه‌کانی گه‌لی کورد له‌ رۆژهه‌ڵاتی کوردستان بێت؟


لوقمان مێهفه‌ر: رادیۆ له‌ سه‌رده‌مێکی تایبه‌تیدا له‌ دایک بوو، هه‌م له‌ دایک بوونه‌که‌ی زه‌روره‌تێکی مێژوویی بوو له‌و هه‌ڵومه‌رجه‌دا و هه‌م له‌و په‌ڕی بێ ئیمکاناتیدا به‌سه‌ره‌تایی‌ترین که‌ره‌سه‌ی فه‌ننی توانراوه‌ رادیۆ دابمه‌زرێ‌ و به‌رنامه‌کانی خۆی به‌ شێوه‌یه‌کی رێکوپێک بڵاو بکاته‌وه‌. مه‌به‌ست له‌ دامه‌زراندنی رادیۆ بۆ دوو مه‌به‌ستی سه‌ره‌کیی بووه‌، یه‌که‌م: بۆ گه‌یاندنی ده‌نگی مافخوازانه‌ی گه‌لی کورد به‌ رای گشتی، بۆ به‌ ده‌ست هێنانی مافی نه‌ته‌وایه‌تی‌ و شی کردنه‌وه‌ی سیاسه‌ت‌ و ستراتیژی و ئامانجه‌کانی به‌ کۆمه‌ڵانی خه‌ڵکی کوردستان. دووهه‌م: به‌رپرچ دانه‌وه‌ی نێوه‌ڕۆکی سیاسه‌تی دژی گه‌لییانه‌ی ده‌سه‌ڵاتدارانی حاکم به‌سه‌ر کوردستاندا ‌و له‌ قاودانی پیلان ‌و جینایه‌ته‌کانی ئه‌و رێژیمه‌ ده‌رحه‌ق به‌ گه‌لی کورد. هه‌رچه‌ند بێ که‌موکۆڕی نه‌بووه‌، به‌ڵام به‌ بڕوای من به‌ چاکی توانیویه‌تی له‌و ئه‌رکه‌دا سه‌ربکه‌وێ‌.


کوردستان میدیا: بابه‌ت و نێوه‌ڕۆکی به‌رنامه‌کان و هه‌واڵه‌ بڵاو کراوه‌کانی رادیۆ ده‌نگی کوردستانی ئێران له‌ چ ئاستێک دان؟ رادیۆ له‌هه‌مبه‌ر ناساندنی هونه‌مه‌ندان و شاعیران و نووسه‌رانی گه‌لی کورد چ هه‌وڵێکی داوه‌؟


لوقمان مێهفەر: هه‌واڵه‌کانی رادیۆ له‌ دوو کاناڵه‌وه‌ ئێمه‌ وه‌رده‌گرین یه‌که‌م: ناوه‌ندیی هه‌واڵده‌ری کوردستانه‌ که‌ له‌ رێگای ته‌شکیلاتی نێو خۆ و ده‌ره‌وه‌ ده‌درێن و رێک ده‌خرێن. دووهه‌م: له‌ سایت و هه‌واڵنێر و سه‌رچاوه‌ بیانییه‌کانه‌وه‌ وه‌رده‌گرین به‌گوێره‌ی گرینگی هه‌واڵ و بابه‌ته‌کان که‌ پێوه‌ندییان به‌ پرسی رۆژه‌وه‌ هه‌یه‌. ئه‌مانه‌ش به‌ دوو زمانی کوردی و فارسی، کوردییه‌که‌ به‌ له‌هجه‌ی کرمانجی ژوور و خواروو بڵاویان ده‌که‌ینه‌وه‌.هه‌روه‌ها رۆژانه‌ چه‌ند وتارێکی سیاسی له‌سه‌ر باروودۆخی وڵات و پرسه‌ پێوه‌ندیداره‌کانی جووڵانه‌وه‌ی رزگاریخوازیی کورد ده‌نووسرێن و له‌ کاتی خۆیاندا بڵاو ده‌کرێنه‌وه‌. جیا له‌وانه‌ رادیۆ چه‌ند به‌رنامه‌ی جیاواز وه‌ک: به‌رنامه‌ی به‌ختیاری کۆمه‌ڵ، خوێندکاران، لاوان، ژیاننامه‌ی شه‌هیدان و به‌رنامه‌ی کۆلکه‌ زێرینه‌ هه‌یه‌. بۆ نموونه‌ له‌ به‌رنامه‌ی کۆلکه‌ زێرینه‌دا باس له‌ ژیان و به‌ سه‌رهات و به‌رهه‌مه‌کانی شاعیرێک، هونه‌رمه‌ندێک، نووسه‌ر و ئه‌دیبێک ده‌کرێ‌ به‌ گوێره‌ی توانا و ئیمکاناتی ئه‌و زانیاریانه‌ی که‌ له‌سه‌ر ئه‌و که‌سایه‌تییانه‌ به‌ ده‌ستمان ده‌گا تیشک ده‌خه‌ینه‌ سه‌ر رابردووی زه‌حمه‌ت و تێگۆشانیان له‌ پێناو په‌ره‌ پێدان و گه‌شه‌ کردنی زمان، ئه‌ده‌بیات، فه‌رهه‌نگ و کولتووری ره‌سه‌نی نه‌ته‌وایه‌تیان.


کوردستان میدیا: رۆڵی رێبه‌رانی شه‌هیدی حیزب به‌تایبه‌ت دوکتور قاسملوو و شه‌ره‌فکه‌ندی له‌ دانان و گه‌شه‌ پێدانی وه‌کوو یه‌که‌م راگه‌یاندنی حیزب چۆن ده‌بینی؟


لوقمان مێهفه‌ر:
دوای زیاتر له‌ سێ‌ ده‌یه‌ له‌ دامه‌زراندنی رادیۆ ده‌نگی کوردستانی ئێران ئێستا زیاتر بۆمان ده‌رده‌که‌وێ‌ که‌ بیرۆکه‌ی دامه‌زراندنی رادیۆ ده‌نگی کوردستانی ئێران، له‌ هه‌لومه‌رج ‌و سه‌رده‌می له‌ دایک بوونیدا، بیرۆکه‌یه‌کی چه‌ند پێشکه‌وتنخواز، زانستییانه‌، به‌ لێکدانه‌وه‌یه‌کی عه‌قڵانی ‌و داهاتووانه‌ بووه‌، ئه‌و بیرۆکه‌یه‌ له‌ بیر و هزری بیرمه‌ندیی کورد د.قاسملووی رێبه‌رمانه‌وه‌ سه‌رچاوه‌ ده‌گرێ‌. ئه‌و یه‌که‌م جار ئه‌و بیرۆکه‌ ده‌خاته‌ به‌ر نه‌زه‌ر و رای رێبه‌رایه‌تی حیزب ودوای په‌سه‌ند کردنی ئه‌و به‌ هه‌موو تواناوه‌ بۆ دامه‌زراندنی رادیۆ ده‌نگی کوردستان که‌ به‌ ته‌واوی هه‌ستی به‌ پێویستی بوونی مێژوویی کردووه‌ له‌وسه‌رده‌مه‌دا ده‌توانرێ‌ به‌ سه‌رتایی‌ترین که‌ره‌سه‌ی فه‌ننی و که‌مترین ئیمکاناتی ماددی ئه‌و رادیۆیه‌ دابمه‌زرێنێ‌ و ده‌ست به‌ وه‌شانی به‌رنامه‌کانی بکا.ده‌نگێک که‌ له‌ سینگی چیاوه‌ ده‌رکه‌وت بوو به‌ مۆم له‌ هه‌ر ماڵێک به‌رچاو که‌وت. ئه‌و ده‌سکه‌وته‌ پڕ له‌ شانازیه‌ نه‌ته‌وه‌ییه‌ به‌ هیمه‌ت و حیکمه‌تی قاسملووی مه‌زن هاته‌ دی.ئه‌و بۆ پاراستن و دابین کردنی رادیۆ له‌ هیچ ئیمکانه‌تێکی ماددی و مه‌عنه‌وی ده‌ریغی نه‌کردووه‌. دوکتور شه‌ره‌فکه‌ندیش ماوه‌یه‌کی دوور و درێژ له‌ قۆناغێکی زۆر ئه‌سته‌م و هه‌ستیاردا به‌رپرسی رادیۆده‌نگی کوردستانی ئێرانی به‌ستۆوه‌ بووه‌.ئه‌و به‌ دڵ به‌ هه‌ست کردن به‌ به‌رپرسایه‌تییه‌کی مێژوویی که‌ حیزب له‌و سه‌رده‌مه‌دا به‌ ئه‌وی سپاردبوو به‌رپرسایه‌تی ئه‌م تریبوونه‌ زمانه‌ حاڵه‌ی حیزبی دێمۆکراتی وه‌ئه‌ستۆ گرت. به‌و په‌ڕی توانا و لێهاتوویه‌وه‌ ئه‌و ئه‌رکه‌ی به‌ڕێوه‌ برد، جیا له‌ کاری رۆژانه‌ و رێبه‌ری کردنی رادیۆ وتاره‌ زانستی و سیاسییه‌ به‌ پێزه‌کانی که‌ ره‌نگ دانه‌وه‌یه‌ک بوون له‌ سیاسه‌ت و هه‌ڵوێسته‌کانی حیزب به‌ قه‌ڵه‌می به‌ بڕشتی شه‌ره‌فکه‌ندیی ده‌نووسران و بڵاو ده‌کرانه‌وه‌. له‌ یه‌ک رسته‌دا ئه‌گه‌ر کورتی که‌مه‌وه‌ نه‌قشی ئه‌و دوو رێبه‌ره‌ له‌هه‌ر بوارێکه‌وه‌ تماشا بکه‌ین ده‌ورێکی ئه‌ساسی و سه‌رکیی بووه‌ له‌ دامه‌زراندن، به‌ڕێوه‌ بردن، به‌رده‌وام بوون و ده‌وڵه‌مه‌ند کردنی نێوه‌ڕۆکی به‌رنامه‌ سیاسییه‌کانی رادیۆ ده‌نگی کوردستانی ئێراندا. که‌واته‌ جێ په‌نجه‌ی ئه‌م دوو رێبه‌ره‌ بلیمه‌ته‌ و گه‌وره‌یه‌ی هه‌میشه‌ پێوه‌ دیاره‌.


کوردستان میدیا:
بۆ چی رادیۆ ده‌نگی کوردستانی ئێران ده‌نگی حه‌ق‌بێژی گه‌لی کورد ناسراوه‌؟ هۆکاره‌کانی چین که‌ ته‌نانه‌ت دوژمنانیش بڕوایان به‌ راستیی هه‌واڵه‌کانی رادیۆ هه‌یه‌؟


لوقمان مێهفه‌ر: ده‌نگی کوردستانی ئێران له‌ ماوه‌ی ته‌مه‌نیدا نموونه‌ی رێکوپێکی ‌و نه‌زم له‌ کاردا بووه‌. چ له‌ باری کات ‌و ساتی ده‌ست پێ‌کردن ‌و ته‌واو کردن، چ له‌ باری شێوه‌ی دابه‌ش کردن ‌و پێشکه‌ش کردنی به‌رنامه‌کانییه‌وه‌. هه‌روه‌ها ده‌نگی کوردستان تێکۆشاوه‌ هه‌ر له‌و کاته‌دا که‌ پرسی زۆر گرینگ دێنێته‌ به‌رباس، به‌ زمانی ئاسایی خه‌ڵکی کوردستان دواوه‌، که‌ زمانێکی ساکار ‌و ئه‌ده‌بیاتێکی خاوێن پاراوه‌، بۆیه‌ دۆستێکی به‌ پرنسیپ، راستگۆ ‌و نیازپاک بووه‌. گوێگرانی خۆی به‌ هه‌ڵه‌ نه‌بردووه‌، راستییه‌کانیان لێ ناشێوێنێ، هه‌رچه‌ند تاڵیش بێ‌ وازی له‌ راستی نه‌هێناوه‌. ده‌نگی کوردستانی ئێران هه‌ر هه‌واڵی خۆشی بڵاو نه‌کردوونه‌ته‌وه‌، هه‌ر باسی سه‌رکه‌وتن ‌و شادی ‌و ده‌سکه‌وته‌کانی نه‌کردووه‌ به‌ڵکوو هه‌واڵی کاره‌سات، تێرۆری رێبه‌ران، شه‌هید بوونی رۆڵه‌ خۆشه‌ویسته‌کان، ئیعدامی زیندانییه‌ سیاسییه‌کان، ده‌نگ ‌و باسی خوێن رێژی دوژمن، ژیانی پڕ له‌ کوێره‌وه‌ریی چه‌وساوه‌کان‌ و زوڵم ‌و زۆرداریی رێژیمه‌ دیکتاتۆر‌ و کۆنه‌په‌ره‌سته‌کانیشی بڵاوکردوته‌وه‌. رادیۆ به‌رگری کردووه‌ له‌ هه‌واڵی ناڕاست و شایعه‌ په‌راکه‌نی توانیویه‌تی ببێته‌ راگه‌یه‌نێکی گشتی و جێگای بڕوا و متمانه‌ی کۆمه‌ڵانی خه‌ڵکی کوردستان که‌ نه‌ک هه‌ر دۆست و لایه‌نگرانی به‌ڵکوو دوژمنانیشی وه‌ک سه‌رچاوه‌یه‌کی باوەرپێکراو ته‌ماشا ده‌که‌ن. هه‌ر ئه‌وه‌شه‌ له‌ به‌شه‌کانی دیکه‌ی ئێرانیش گوێگری هه‌بووه‌، خه‌ڵکی ئه‌و هه‌رێمانه‌ رێزیان بۆ داناوه‌، نه‌ک هه‌ر دۆست، به‌ڵکوو دوژمنانیش، وه‌ک سه‌رچاوه‌یه‌کی گرینگ له‌ نێو راگه‌یه‌نه‌ گشتییه‌کاندا سه‌یریان کردووه‌. هه‌رچه‌ند ئه‌مڕۆ له‌ سێبه‌ری ده‌سکه‌وته‌کانی تێکنۆلۆژیای سه‌رده‌م، هاتنه‌ ئارای کاناڵه‌ ئاسمانییه‌کان، راگه‌ینه‌ گشتییه‌کان پێشکه‌وتنی به‌رچاویان به‌ خۆیه‌وه‌ بینیوه‌، ئه‌وه‌ش له‌سه‌ر کارای رادیۆ شوێن دانه‌ره‌، به‌ڵام به‌و حاڵه‌ش رادیۆ گرینگی‌ و گوێگری تایبه‌تی خۆی هه‌یه‌. بایه‌خی خۆی له‌ ده‌ست نه‌داوه‌. ئه‌گه‌ر جاران رادیۆ ده‌نگی کوردستان له‌سه‌ر شه‌پۆلی ٤١ دواتریش ٧٥.٦٠ میتری له‌ ژێر پارازیتی توندی دوژمنانی گه‌ل‌ و ئازادیدا، ته‌نیا له‌ نێو چیاکانی کوردستان‌ و له‌ چه‌ند ناوچه‌یه‌کی رۆژهه‌ڵاتی ناڤین ده‌نگی ده‌بیسرا، ئه‌مڕۆ جیا له‌و فڕێکانسانه‌ رادیۆ سایتی ئینتێرنێتی خۆی هه‌یه‌ ‌و له‌سه‌ر کاناڵی ئاسمانی "تیشک TV" به‌رهه‌می خوێن ‌و فیداکاری هه‌زاران شه‌هیدی کادر ‌و پێشمه‌رگه‌‌ و ئه‌ندامانی حیزب بڵاو ده‌کرێته‌وه‌، ده‌نگی له‌ زۆربه‌ی جیهان ده‌توانرێ‌ ببیسرێ‌.
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧١٧ لەم ژمارەیەدا:

ــ خەباتی ڕۆژهەڵات بەردەوامە
ــ ڕاسان و گۆڕان
ــ ڕاسان و ڕۆڵی ژنان لەم دیسکۆرسەدا
ــ ئازادی، سەربەخۆیی و میریی و گەورەیی
  • فەرەیدوون ئەرشەدی: شێعر و هونەری کوردی له ڕۆژهەڵات، بە هەر ڕێباز و شێوە و دەربڕینێکەوە کە بێتە بەرهەم، هونەر و شێعر و ئەدبیاتی مقاومەت و بەرگرییە! فەرەیدوون ئەرشەدی: شێعر و هونەری کوردی له ڕۆژهەڵات، بە هەر ڕێباز و شێوە و دەربڕینێکەوە کە بێتە بەرهەم، هونەر و شێعر و ئەدبیاتی مقاومەت و بەرگرییە!
    هەر تەوژم و تەکانێکی ئەدەبیی، هونەری و هزریی،کاردانەوەیەکی عەقڵانی، ئەخلاقی و جوانیناسانەیە بەرانبەر بە تەکان و تەوژمی کۆمەڵگە، یان لانیکەم ئەو تەوژمە نادیار و شاراوە کە لە ژێر پێستی هەست و نەستی کۆمەڵگە، یا بەشێکی زۆر حەساس و کارای دا، دەژیت و درز دەخاتە پێستی قەتماغەبەستووی ژیانی رۆژانە.
  • مستەفا هیجری: خۆپیشاندانەکانی ئێران، ئاکامی بێزاری و ناڕەزایەتیی خەڵک لە ٤٠ ساڵ دەسەڵاتداریی ئەو ڕێژیمەیە مستەفا هیجری: خۆپیشاندانەکانی ئێران، ئاکامی بێزاری و ناڕەزایەتیی خەڵک لە ٤٠ ساڵ دەسەڵاتداریی ئەو ڕێژیمەیە
    دەقی وتووێژی رۆژنامەڤان (ئەکرەم ئاڵتوون) لەگەڵ مستەفا هیجری، سکرتێری گشتیی حیزبی دێموکرات بۆ ئاژانسی "سپوتنیک کوردستان"
  • شەڕی هەمەلایەنەی رێژیم بە دژی ئێمە، پێویستی بە بەرپەرچدانەوەیەکی هەمەلایەنە هەیە شەڕی هەمەلایەنەی رێژیم بە دژی ئێمە، پێویستی بە بەرپەرچدانەوەیەکی هەمەلایەنە هەیە
    لەو ساڵانەی دواییدا رێژیم هەم لەکوردستان و هەم لە دەرەوەی وڵات لە رێگەی چالاکییە سیخورییەکانییەوە خەریکی کۆکردنەوەی زانیاری بووە لە سەر ئوپۆزسیۆن بە گشتی و لە سەر حیزبی دێموکرات بە تایبەتی؛ یەکێک لە سەرەکیترین ئامانجەکانی رێژیم لەو چالاکییانە دەسنیشانکردنی کەسایەتییە چالاکەکانە بۆ ئەوەیکە بە پیلان هەوڵی تێکدانی باڵانسی ئەوان بدات لە بواری سایکۆلۆژییەوە تاکوو نەتوانن هاوسەنگی فیکریی خۆیان ڕابگرن و فوکووسی خۆیان بخەنە سەر بەربەرەکانی لەگەڵ رێژیم.
  • ئەرکەواز لە کوێیە و ئەرکەوازی کێن؟ ئەرکەواز لە کوێیە و ئەرکەوازی کێن؟
    ئەرکەواز لە باکوور و باکووری ڕۆژهەڵات و ڕۆژهەڵاتەوە پاڵی داوەتە داوێنی (پشتکێو)ەوە و لە باشوور و باشووری ڕۆژهەڵاتیشەوە دەبەسترێتەوە بە شاخی (بیورەواز) و لە باشوووری ڕۆژئاواشەوە پاڵی داوەتە شاخی (کەڵەک) کە بەرجەوەندی شار چەشنی دۆڵێکی بەرینی سەرسەوز بە بەرزی و نەوییەوە دەردەکەون و بینا و گەڕەک و کۆڵانەکانی لە نێوان دیمەنی سەرسەوز و داوێنی کێو و کەنار جۆگە و ئەو چەند کێوەدا بە جوانییەکی سەرنجڕاکێشەوە دەردەکەون.
  • سیستمی پەروەردە و بارهێنان لە ئێراندا بەرەو کوێ؟ سیستمی پەروەردە و بارهێنان لە ئێراندا بەرەو کوێ؟
    هیچ گیانلەبەرێک نییە کە بتوانێت بێبەش و دوورخراوە لە "پەروەردە و ڕاهێنان" بژیت و پێویستی بەو مەسەلەیە نەبێت، تەنانەت ئەگەر گیانلەبەرێک بە تەنیا لە هەر شوێنێک بژیت، بە تەنیا خۆی پەروەردە دەکات و "چۆنیەتی" ڕێڕەوی ژیانی خۆی دیاری دەکات بۆ ئەوەیکە بتوانێت لە بەردەم ئاستەنگ، کێشە و گرفتەکانی ژیاندا سەرکەوێ و ئەمنییەتی هەمەلایەنەی ژیانی دابین بکات.
  • ڕاسان و ڕۆڵی ژنان لەم دیسکۆرسە‌دا ڕاسان و ڕۆڵی ژنان لەم دیسکۆرسە‌دا
    ڕاسان لە واتای وشەییدا بە مانای هەڕەشە بۆ لێدان و هەستانەوە و ڕاسبوونەوە بەرامبەر بە هێرشبەرێک بۆ تۆقاندن و دابەزاندنی ورەی دێت.
  • \ "ئازادی، سەربەخۆیی و میریی و گەورەیی"
    ئەگەر تەنیا ئەو دوو ڕستەیەی ئەو رۆژنامەیە و سیاسەتی گشتی بەڕێوەبەرانی رۆژنامەکە و بە روونی سیاسەتی دەسەڵاتدارانی شۆڕشی سمکۆ سەیر بکەین و بیدەینە بەر سەرنج، بە روونی بۆمان دەردەکەوێت، کە خەڵکی کوردستان زۆر پێش ئەوەی ئەرتەشی سوور بۆ مەبەستی بەرگریکردن لە ئەگەری هێرشی ئاڵمان لە خاکی ئێرانەوە، رووبکاتە ئێران خۆی وەک نەتەوەیەک داناوە و باوەڕی بە بەرژەوەندی باڵای نەتەوەکەی هەبووە.
  • خەباتی ڕۆژهەڵات بەردەوامە خەباتی ڕۆژهەڵات بەردەوامە
    به‌ دوای رووخانی كۆماری كوردستان و له‌ سێداره‌درانی پێشه‌وا قازی مه‌حه‌ممه‌د له ١٠ی خاکەلێوەی ١٣٢٦ی هەتاوی‌(٣٠ی مارسی ١٩٤٧) خه‌باتی حیزبی دێموكرات كه‌وته‌ قۆناغێكی ئه‌سته‌مه‌وه‌، به‌ڵام حیزبی دێموكرات وه‌ك حیزبێكی ڕێنوێن، درێژه‌پێده‌ر و وه‌دیهێنه‌ره‌وه‌ی ئامانجه‌ به‌رزه‌كانی كۆماری كوردستان، ئه‌ركی رێكخستنی بزاڤی میللی- دێموكراتیكی كۆمه‌ڵانی خه‌ڵكی كوردستانی درێژه‌ پێدا.
  • ڕاسان و گۆڕان ڕاسان و گۆڕان
    حیزبی دێموکراتی کوردستانی ئێرانیش وەک هەر حیزبێکی دیکە، لە قۆناخی نوێدا پێویستی بە هزری نوێ و هێزی نوێ و رۆئیای دووبارە پێناسەکراو و سیستمی کاری نوێ هەیە.
  • شەپۆلەکانی شار شەپۆلەکانی شار
    شەپۆلەکانی شار پڕە لە هەست و سۆزی نیشتمانپەروەری و نەخشێنەری ئەو جووڵە و راچەنینانەیە کە لە نێو کۆمەڵی کوردەواریدا بە نهێنی و دوور لە چاوی داگیرکەر، بەردەوام لە گەشە و هەڵچووندان.
  • تەیموور مستەفایی: هێزە نیزامییەکانی ئێران نەتەنیا نابێت لە سەرکوتی خۆپێشاندەراندا بەشداری بکەن، بەڵکوو دەبێت هاوکاری بەئەنجام گەیاندنی ئەو حەرەکەتە بن کە بە قازانجی هەموو لایەکە تەیموور مستەفایی: هێزە نیزامییەکانی ئێران نەتەنیا نابێت لە سەرکوتی خۆپێشاندەراندا بەشداری بکەن، بەڵکوو دەبێت هاوکاری بەئەنجام گەیاندنی ئەو حەرەکەتە بن کە بە قازانجی هەموو لایەکە
    دەقی وتووێژی کاک تەیموور مستەفایی، ئەندامی دەفتەری سیاسیی حیزبی دێموکراتی کوردستانی ئێران و بەرپرسی کۆمیسیۆنی تەشکیلاتی حیزب لەسەر خۆپێشاندانە سەرانسەرییەکانی ئێران و بڵاوکردنەوەی ڕاگەیەندراوی ئەم کۆمیسیۆنە لەم پێوەندییەدا، لەگەڵ تەلەفزیۆنی تیشک.
  • کاوە ئاهەنگەری: ئیرادەی گشتی کوردەکان لە ئێران، بە هەبوونی ڕێبەرییەکی شیاو و لێوەشاو بۆ ئەم قۆناغە دەتوانێ بەشێک لە هاوکێشەکان بە قازانجی کوردستان بگۆڕێ کاوە ئاهەنگەری: ئیرادەی گشتی کوردەکان لە ئێران، بە هەبوونی ڕێبەرییەکی شیاو و لێوەشاو بۆ ئەم قۆناغە دەتوانێ بەشێک لە هاوکێشەکان بە قازانجی کوردستان بگۆڕێ
    خوێنەرانی بەڕێزی "کوردستان"، سەبارەت بە دوایین بارودۆخی ئێران و کوردستان و هەروەها نەخش و دەوری کورد و حیزبی دێموکرات لە هاوکێشەکاندا، ماڵپەڕی "کوردستان میدیا" وتووێژێکی لەگەڵ بەڕێز "کاوە ئاهەنگەری" چاودێری سیاسی و ئەندامی حیزبی دێموکرات ئەنجام داوە کە لێرەدا دەخرێتە بەر دیدی ئێوەی خۆشەویست.
  • ئێمە و وێژمانەکانی داگیرکراوی و هەڵاوێردراوی ئێمە و وێژمانەکانی داگیرکراوی و هەڵاوێردراوی
    ئەم گوتارە ئەگەرچی لای گرووپ، ڕێکخراو و حیزبی سیاسیشەوە هەڵگیراوە، بەڵام بەوپێیەی کە ئەم دامەزراوەگەلە لە عەرزی واقیعدا کار دەکەن و پێویستیان بە دانوستان و دانیشتن و وەرگرتنی پووانی جیاواز هەیە، ئەم ڕێکارەیان هەتا ئیستە تا رادەیەک پاساو هەڵگرە؛ وەکوو تر لە ئاستی یەکانگیریی نەتەوایەتی و دینامیزمی کۆمەڵایەتییەوە هەندێک خەساریشی هەبووە کە لێرە ناگونجێ بەسەریاندا بێینەوە.
  • کۆمەڵگەی ئازاد لە سێبەری دێموکراسیدا کۆمەڵگەی ئازاد لە سێبەری دێموکراسیدا
    "ژان ژاک ڕۆسۆ"یش لە وتارێکیدا بە ناوی "ڕێککەوتنی کۆمەڵایەتی" دەقەکەی بەم ڕستەوە دەست پێ دەکات: "مرۆڤ سەرەڕای ئەوەیکە بە سەربەستی لە دایک دەبێت، بەڵام لە هەموو شوێنێکی ئەم دنیادا بندەست و دیلە".