کوردستان میدیا

ماڵپەڕی ناوەندیی حیزبی دێموکراتی کوردستانی ئێران

ڕاگەیەندراو/ یەکیەتیی پیشەیی مامۆستایانی کوردستانی ئێران هەڵبژاردنەکانی مەجلیسی ڕێژیمی ئێرانی بایکۆت کرد

22:17 - 17 رێبەندان 2715

کوردستان میدیا: یەكیەتیی پیشەیی مامۆستایانی كوردستانی ئێران لە ڕاگەیەندراوێکدا، هەڵبژاردنەکانی مانگی ڕەشەمەی ڕێژیمی ئیسلامیی ئێرانی بایکۆت کرد.

دەقی ڕاگەیەندراوەکە:

ڕاگەیەندراوی یەكیەتیی پێشەیی مامۆستایانی كوردستانی ئێران
بە بۆنەی هەڵبژاردنەكانی مەجلیسی شوورای ئیسلامی و مەجلیسی خوبرەگانی ڕێبەری


هەروەك دەزانین، بڕیارە هەڵبژاردنی خولی دەیەمی مەجلیسی شوورای ئیسلامی و خوبرەگانی ڕێبەریی، لە ڕێكەوتی ٧ی ڕەشەمەی ئەمسال دا، بەڕێوە بچێت. بەم بۆنەوە، دەزگا تەبلیغاتییەكانی نیزامی ئیسلامی، بە هەموو ئیمكاناتێكەوە كەوتوونەتە گەڕ و دەیانەوێ بە هەر نرخێك كە بۆیان بگونجێ، سەرنجی بەشێكی بەرچاوی خەڵك بۆ لای سندووقەكانی دەنگدان ڕابكێشن. بەرپرسانی دەسەڵات لە هەوڵی ئەوە دان كە، لەم ڕێگایەوە دەرفەتێكی دیكە بدۆزنەوە تا هەم گەلانی بەشخوراو چاوترسێن بكەن و هەم قەناعەت بە دنیای دەرەوەش بێنن كە، كۆمەڵانی خەڵك لە گەڵ ئەوان و سیاسەتەكانیان‏دان. دیارە لێرەدا بۆ ڕێژیم ئامانجی سەرەكی زاتی هەڵبژاردن نیە، بەڵكوو ئەوان دەیانەوەێ وا نیشان بدەن كە گەلانی ئێران هەمیشە لە مەیدان‏دان و هەركات ئاخوندەكان بە پێویستی بزانن حازرن كە پێداگری لە ڕەوایی سیاسەتەكانی نیزام بكەن. مەبەستی ڕێژیم لە بەڕێوەبردنی ئەم هەڵبژاردنانە، تەنها كۆكردنەوەی بە كۆمەڵی خەڵك لە ناوەندەكانی دەنگدانە و هیچی دیكە. ئەگینا وەك دەزانین و دیتوومانە، دام و دەزگاكانی نیزام، پێشتر لە ڕێگەی سرویسەكانی ئیتلاعات و شوورای نیگەهبانەوە، هەڵبژاردنی خۆیان بە كردەوە بە ئەنجام گەیاندووە و هیچ كارێكیان بۆ خەڵك نەهێشتۆتەوە، كە پێوەندی بە قازانجی ئەوانەوە بێ.

ئێمە وەك یەكیەتیی پێشەیی مامۆستایانی كوردستانی ئێران، بە خوێندنەوەی ڕابردوو، لەبەرچاوگرتنی وەزعی ئەمڕۆكە، داهاتووی بارودۆخەكەمان هێناوەتە پێش چاومان و لێكدانەوەی وردمان لە سەر ئەم نمایشە ئەنجام داوە. لە كۆتایی‏دا، بۆمان ڕوون بۆتەوە كە قازانجی گەلە بەشخوراوەكەمان لەوەدایە كە بە دەم بانگەوازی ڕێژیمەوە نەچێت و بە دوورەپەرێزی لەم كردەوە بێ مانایە، شەرافەت و كەرامەتی تاكەكانی خۆی بپارێزێت.

مامۆستایانی بەڕێز! قوتابیانی خۆشەویست و خەڵكی تێكۆشەری كوردستان

هەر وەك ئاگادارن، دۆخی نالەباری ژیان و پێگەی مامۆستایان، بەرنامە و پرۆگرامی كۆنی خوێندنگەكان و هەل و مەرجی قەیراناویی كۆمەڵگای كوردستان، بۆ هەموو لایەكمان ڕوون و ئاشكرایە و لەوپەڕی ئاڵۆزیی و خراپی‏دایە. بۆ وێنە، كار و چالاكییەكانی ڕێكخراوەیی مامۆستایان بە گشتی بەربەست كراون. ئەو مامۆستا و دڵسۆزانەی كە دەیانەوێ داكۆكی لە داخوازییەكانی خۆیان و قوتابیانی كوردستان بكەن، پەروەندەیان لە شوێنە ئەمنییەتییەكاندا بۆ دەكرێتەوە و نەهادە نیزامییەكان بە تووندترین شێوەی مومكین بەرەوڕوویان دەبنەوە. بەرنامەی ئامووزشیی قوتابخانەكان و ناوەرۆكی بابەتە دەرسییەكان بە بەراورد لە گەڵ بارودۆخی سەردەم، لە نزمترین ئاستی خۆیان دان.

لە حاڵێكدا كە دەبێ ئەركی وەزارەتی پەروەردە و فێركردن بێ، كە خەرجی خوێندن و كەلوپەلی پێویست بۆ قوتابخانەكان دابین بكات، بەڵام وەك هەموو لایەك شاهیدین، ئەوە ماوەی چەند ساڵە كە سەرانەكان بڕدراون و قورسایی ئەم بارەیان بە ناڕەوا خستۆتە سەر شانی خەڵكی هەژاری كوردستان، كە ئەمەش بەپێی هەموو یاساكان، یاساغ و قەدەغەیە. ئەوە لەكاتێكدایە كە دەوڵەت تەنانەت بەپێی یاساكانی خۆیشی، دەبێ خەرجی خوێندن و قوتابخانەكان لە ئەستۆ بگرێ.
ئێستا پرسیاری ئێمە بۆ ئەو كەسانەی كە دنەی خەڵك بۆ بەشداری كردن دەدەن ئەوەیە كە، كام بەند یا مادە لە یاسای كۆماری ئیسلامی ڕێگە بە نوێنەرانی مەجلیس دەدا كە لە بەرانبەر ئەم هەموو كێشەگەلەدا هەڵوێست بگرن و دیفاع لە مافی خەڵك و چارەسەری گرفتەكانیان بكەن؟ بێ‏گومان، ئەگەر ئەو نوێنەرە خۆی بە خەڵكیی و دڵسۆزیش بزانێ، ناچارە كە دەبێ یاساكانی نیزام لەبەرچاوبگرێ و بەكردەوە پێی دەسەلمێنن كە ئەو نوێنەری حكوومەتە لە ناو خەڵكدا و دەبێتە مۆرەیەك كە تەنها بۆی هەیە بەرگری لە سیاسەتەكانی ڕێژیم، لە ناو خەڵكدا بكات و بڕایەوە.

خەڵكی خەباتكاری كوردستان

یەكێك لە سەرەكیترین مافەكانی منداڵانی ئێمە، خوێندن بە زمانی زگماكی و ئاشنابوون بە فەرهەنگ و كولتووری خۆیەتی. منداڵ دەبێ لە تەمەنی ٥ ساڵییەوە، بە زمانی دایكیی خۆی دەست بە خوێندن بكات و لە سەر هەمان بنەما بە گەشە و نەشەوە پەروەردە ببێ. بەڵام وەك دەزانین شەرت و مەرجەكانی یاسای كۆماری ئیسلامیی ئێران بۆ نوێنەرانی مەجلیسی فەرمایشی، بە ڕادەیەك زۆرن كە بە هیچ جۆر توانای باس كردن لەم پرسگەلەیان نیە.

هەروەها نابێ لە بیرمان بچێ كە پۆستی نوێنەرایەتیی مەجلیسی شوورای ئیسلامی، لە باری مادییەوە زۆر پڕبەهرەیە و ئەو نوێنەرانە لە ڕێگەی دروست كردنی پێوەندیی ناسالمی ئیداری، قازانجێكی زۆر بە خۆیان و كەس و كاریان دەگەیەنن. هەر بۆیە ئەوان لە گەرمەی بانگەشە و تەبلیغاتەكانیان‏دا، حازرن و ڕێگەشیان بۆ خۆش كراوە كە بە ئاشكرا قامك بخەنە سەر دەرد و ئازارەكانی كۆمەڵگەی كوردستان و خەڵكیان پێ فریو بدەن. بەڵام ئاشكرایە كە نوێنەران بەر لەوەی دەست بەكار ببن، دەبێ سوێندی پایبەندی بە نیزامی ویلایەتی فەقیهـ‌ بخۆن و هەوڵی پاراستنی بەرژەوەندییەكانی ئێرانی ئیسلامی بدەن. ئەمەش بە واتای پووچەڵ بوونەوەی تێكڕای وەعدە و بەڵێنەكانی پێشوەختن كە بە خەڵكی دەنگدەریان داوە.

مامۆستایانی ئازیز و نیشتمان‏پەروەر

پێویستە زۆر باش بزانین كە ئەوە ئەركی سەرشانی مامۆستایانی ڕووناكبیرە كە لەم بارەوە بەرچاوی قوتابیان و بنەماڵەكانیان ڕوون بكەنەوە، ورە و غیرەتیان وەبەر بنێن كە بە هەڵوێست گرتنی ژیرانە، لە بەرانبەر چارەنووس و مافەكانی خۆیاندا بێ‏تەفاوەت نەبن. گەلی ئێمە نابێ خۆی تێكەڵ بە گێژاوێكی سیاسی بكا كە شوێنەوارە نەرێنییەكانی لە دواڕۆژێكی نزیكدا، نێوچاوی خۆی دەگرێتەوە. هاوكێشەی هەڵبژاردن لە نێوان خراپ و خراپتردا، لە مەنتق‌دا هاوكێشەیەكی هەڵەیە و تەنها دروشمی لاوازی كەسانی كورتبین و بەرژەوەندخوازی سەردەمی ئێمەن.

ئێمە وەك یەكیەتیی پێشەیی مامۆستایانی كوردستانی ئێران، چاوەڕوانین كە مامۆستایانی بوێر و ئازای گەلەكەمان، ڕێگە نەدەن كە بانگەشەی درۆیین و چەواشەكارانەی دەسەڵاتی داسەپاو بە سەر ئیرادەی خەڵكدا زاڵ ببێت. تەوەهومی مەسەلەی یارانە و دیاردەی لەمجۆرە، هیچ پێوەندییان بە پرۆسەی هەڵبژاردنەوە نیە و نابێ بهێڵین كە وەها فڕوفێڵێك ببێتە هۆی ڕاكێشانی سەرنجی كۆمەڵانی خەڵكی كوردستان بۆ لای سندووقی جادوویی ئاخوندەكان.

قوتابیانی ژیر و وشیاری كوردستان

ئێوە وەك چینی خوێندكار و نەوەی تێگەیشتووی داهاتوو، خزم و كەس و دەوروبەرتان ئاگادار بكەنەوە كە دەنگ نەدان گەلێك سەربەرزانەتر لەوەیە كە فریوی درۆ و دەلەسەی حكوومەتێكی دیكتاتۆری ئیسلامی بخۆی، كە هیچ مافێك بە گەلی كورد ڕەوا نابینێ.

كۆمەڵانی خەڵكی ئازادیخوازی كوردستان

ئێمە لە ڕۆژی ٧ی ڕەشەمەدا، بە نیشانەی ناڕەزایەتی بە سیاسەتی هەڵەی هەڵبژاردن و دژایەتی كردن لەگەڵ درێژەی سەركوت و جینایەتەكانی ڕێژیمی كۆماری ئیسلامی لە كوردستان، بەشداری نمایشی فریوكارانەی دەنگدان نابین و ئەم هەڵوێستەش بە ئەركی نیشتمانی و نەتەوەیی خۆمان دەزانین. ئێمە بەم جۆرە ڕادەگەیەنین كە تا وەدیهاتنی ویست و داواكارییە ڕەواكانمان دەست لە خەبات هەڵناگرین و نابین بە داردەستی ئامرازی ستەم و نابەرابەری لە ناو دزگایەكی كۆنەپەرەستی ناسەردەمیانە.

لە كۆتاییدا، یەكیەتیی پێشەیی مامۆستایانی كوردستانی ئێران جەخت لە سەر ئەو ڕاستییە دەكاتەوە كە مەجلیسی شوورای ئیسلامی و مەجلیسی خوبرەگان، تەنها نمادی سەمبوولیكیان بۆ ڕەوایی‏دان بە دەسەڵاتی ئاخوندەكان هەیە و تەنها لە خزمەت پاراستنی قازانج و بەرژەوەندییەكانی نیزامی ویلایەتی فەقیهـ دان. كە واتە بەشداریی كردن لەم هەڵبژاردنەدا، دەبێتە هۆی زۆر بوونی زوڵم و ستەم و بێ عەداڵەتی زیاتر لە جاران و لە ئاكامدا بە دەستی خۆمان ڕێگەی دز و جەردە بۆ نێو ماڵ و سامانی خۆمان نیشان دەدەین.

یەكیەتیی پێشەیی مامۆستایانی كوردستانی ئێران
٦ی فێڤریەی ٢٠١٦ی زایینی
١٧ی ڕێبەندانی ١٣٩٤ی هەتاوی