• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٢٢ی نوامبری ٢٠١٧ی زایینی - ٠١ی سەرماوەزی ١٣٩٦ی هەتاوی  

دركاندنی راستییەكان یان خیانەت دەرحەق مێژوو؟!

زایینی: ٠٦-٠٤-٢٠١٢ - هەتاوی: ١٣٩١/٠١/١٧ - ٠١:١٠ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
دركاندنی راستییەكان یان خیانەت دەرحەق مێژوو؟!
زمزیران

وتەیەك لە نێو توێژی رووناكبیر و قەڵەمبەدەستدا هەیە كە پێموانیە كەس تا ئێستا نەیبیستبێت، ئەویش ئەوەیە كە مێژوو مامۆستایە بۆ گشت مرۆڤەكان، مامۆستایە هەم لەم بارەوە كە رووداوەكان دەخاتە ڕووی ئەمڕۆكە و هەڵەكان بۆ كۆمەڵگای سەردەم دەخاتە ڕوو تاكوو پەندیان لێ وەرگرن و ئەو هەڵانە دووپات نەكەنەوە و هەروەها مامۆستایە بۆ ئەوەی كە داهاتوو لەسەر بناغەی راست و بێكەندولەند دابڕێژین و خۆمان دوور بگرین لە لاڕێكانی رابردوو. بەڵام سەرەڕای ئاگاداربوونی گشت توێژی پێنووس بەدەست لەم بۆچوونە گرینگەی نێو كۆمەڵگای مرۆڤایەتی، دووبارە و چەندین بارە شاهیدی روودانەوەی هەڵەكان لە لایەن تاقمێك لە كۆمەڵگا هەین كە خۆیان دەبێ لە پێشەوەی گشت كۆمەڵانی خەڵك پەند لە مێژوو وەربگرن، ئەوانیش كەس نین بێجگە لە قەڵەمبەدەستان.

لە مێژووی گەلەكەماندا هەموو كات كەسانێك هەبوون كە لە بەرامبەر شەپۆلی مافویستیی گەلەكەیان ڕاوەستاون و پشتیان بە دووژمنانی گەلەوە داوە، هەر بۆیە بوونی خائین و خۆفرۆش لە نێو كورددا شتێكی نوێ نیە كە بمانهەوێت ئاماژەی پێ بدەین، بەڵام لەو نێوەدا قەڵەمی خائین دیاردەیەكە كە دەتوانین بڵێین دیاریی سەردەمی پێشكەوتن و راگەیاندنە گشتییەكانە كە بەداخەوە لێرەولەوێ وەبەرچاو دەكەوێت.

چەند ساڵ لەمەوبەر بەرنامەیەكی تەلەفزیۆنی لە كاناڵی سەحەری ئێران، بەشی كوردی بڵاو بۆوە بەناوی «دیار و نادیار» كە لەودا بە چەواشەكردنی كۆمەڵێك لە ڕاستییەكانی مێژووی خەباتی نەتەوەكەمان ، ویستیان بە خەیاڵی خۆیان خزمەتێك بە خەڵكی كوردستان بكەن و راستیگەلێك كە حیزبە سیاسییەكان و بەتایبەتی حیزبی دێموكراتی كوردستانی ئێران شاردیانەتەوە، بێن و بۆ خەڵكیان ئاشكرا بكەن. لەم بارەوە حیزبی دێموكراتی كوردستانی ئێران لە پێوەندی لەگەڵ تەواوی بابەتەكانی ئەم بەرنامەیە وەڵامی پێویستی لە رێگای تەلەفزیۆنی «تیشك»ەوە بە بەڵگەو شاهید دایەوە و ئیتر ئێمە قەستی ئەوەمان نیە كە شتێك بە وەڵامەكەی حیزب زیاد بكەین، بەڵكوو درووستكردنی ماڵپەڕێكی ئینتێرنێتی هەر بەم ناوە واتا «دیار و نادیار» وای كرد كە لەم بارەوە چەند دێرێك بێنینە سەر پەڕەی كاغەز و ئاماژە بە چەند خاڵ بكەین. رووداوەكانی مێژووی خەباتی گەلەكەمان بە رادەیەك روون و ئاشكران كە پێویست ناكات كەس یا كەسانێك بێن و خەڵكێك كە خۆیان بەشی سەرەكیی ئەو خەباتە بوون، تێبگەیەنن، بەڵام با بزانین كە چ هۆكارگەلێك بۆتە هۆی ئەوەی كە كەسانێك وەك ئاغای عیرفانی قانعی فرد كە پێش لەمەش خزمەتیان بە دوژمنانی گەلی كورد بۆ هەمووان ئاشكرا بووە و وەكوو دەورگێڕی سەرەكیی ئەم ماڵپەڕە ئەركی لەئەستۆیە، ئیزنی ئەوە بە خۆیان بدەن كە خەڵكی كوردستان ساویلكە بە حەسێب بێنن و خۆیان بە ئەركدار بزانن كە ئەو خەڵكە وەخەبەر بێننەوە.

ئاـ پووچەڵبوونەوە و شكستی گشت سیاسەتەكانی كۆماری ئیسلامی دەرحەق خەباتی گەلی كورد:

هەروەك ئاگادارین هەر لە سەرەتای هاتنەسەركاری كۆماری ئیسلامی، ئەو رێژیمە بە هەموو شێوازەكانەوە ویستوویەتی هەرەس بە خەباتی میللی ـ دێموكراتیكی گەلی كورد بێنێت، لە شەڕفرۆشی ئەو ڕێژیمەوە بگرە تاكوو تێرۆری رێبەرانی مەزنی گەلی كورد و شەهیدكردنی هەزاران كەس لە لاوان و پیران و مناڵانی كورد، ئەشكەنجە، زیندان و ئێعدام و سووتاندنی گوندەكان بەشێكی بچووكن لە هەوڵەكانی رێژیم كە لەو پێوەندییەدا داویەتی. سەرەڕای هەموو ئەو هەوڵانە، هەڵخەڵتاندنی كەسانی سادە و ساویلكە و هەلپەرەست و چەكداركردنیان لە بەرامبەر هێزی خەباتگێڕی كورد بەشێكی دیكە لە پیلانەكانی دەسەڵاتدارانی تاران بووە بۆ دژایەتیكردن و ڕاوەستان لە بەرامبەر ئیرادەی پۆڵایینی گەلی كورد، بەڵام بە خۆشییەوە هیچكام لەم پیلانانەی سەریان نەگرتووە و و بەئاشكرابوونی هەر كام لەو پیلانانەی رێژیم، خۆشەویستیی خەباتگێڕانی كورد زیاتر لە نێو دڵی كۆمەڵانی خەڵكدا ریشەی داكوتاوە. بەتایبەت ئەمڕۆكە لە سەردەمی مۆڵتی مێدیادا و بەجیهانیبوون كە خەڵك زیاتر لە هەردەم بە مافەكانی خۆیان ئاشنا بوون و بۆ وەدەستهێنانیان هەوڵ دەدەن، رێژیم هاتووە و لە رێگای مێدیای سەردەمدا خۆفرۆشانی گەلی كوردی وەگەڕ خستووە تا بە خەیاڵی خاوی خۆیان خۆشەویستیی حیزب لە نێو كۆمەڵگای كورد كەم بكەنەوە، بەڵام وا دیارە بێخەبەرن لەوەی كە ئەو كەسانەی كە ئەوان بە دوای تێرۆری شەخسیەتییانن، لە ناخی دڵی ئەم خەڵكەوە هەڵقوڵاون و تا ئەوان تۆمەتی زیاتریان وەپاڵ بنێن، لە نێو خەڵكدا خۆشەویستییان زیاتر دەبێت، چوونكە ئەم كارەی ئەوان نیشان دەدات كە هەر هەنگاوێكی شۆڕشگێڕانی گەلەكەمان گورزێكی جەرگبڕە كە وەپەیكەری‌ كۆماری ئیسلامی دەكەوێت.

ب- بێئاگایی قەڵەمبەدەستانی ماڵپەڕی بەناو «دیار و نادیار» لە بیروڕای خەڵك بەنیسبەت خەبات:

یەكێكی دیكە لەو هۆكارانەی كە بۆتە هۆی ئەوەی كە ئەم قەڵەمفرۆشانە قەڵەمەكەیان بۆ خیانەت بە مێژووی گەلەكەیان بەكار بێنن، دووربوونیانە لە نێو جەرگەی كۆمەڵگای كوردستان. لە ڕاستیدا ئەگەر ئەو بەناو رووناكبیرانە لەناو كۆمەڵگادا دەبوون و بە جێگای دەستوروەرگرتن لە ئەربابەكانیان لە تاران و بەسەربردنی ژیان لە نێو باڵەخانەكانی تاران و سەفەركردن بۆ وڵاتە جۆراوجۆرەكان بۆ چەند رۆژێك دەهاتنەوە نێو شەقامەكانی شارەكانی كوردستان و لە بەردەم شوێنی كۆبوونەوەی خەڵكی ئاواییەكان لە نێو گوندەكاندا رادەوەستان، دەیانبیست و دەیانبینی كە چۆن تاكەكانی كۆمەڵگای كوردستان بە هیوا و ئاواتەوە باسە سیاسییەكانی ئێران و جیهان و ناوچە لە مینبەری راگەیەنە كوردیییەكانەوە دەگوێزنەوە بۆ نێو كۆڕی خۆیان و وەك كارناسێكی سیاسی و كۆمەڵایەتی هەڵیاندەسەنگێنن، هەروەها دەیانبینی كە چلۆن لە نێو ماڵەكاندا كاناڵە تەلەفزیۆنییەكانی هێزە سیاسییەكان بوونەتە بەشێك لە ژیانی هەر كامیان و بە بێ ئەو ئەندامە خۆشەویستەی ماڵەكەیان هیچ شەوێك رۆژ ناكەنەوە. ئەو بەناو دیار و نادیارانە كە بە چەندین ساڵە دوور لە كوردستان دەژین و خۆیان بە پیاوچاكی گەلەكەیان دەزانن، ئەدی لە كوێن ئەو كاتانەی كە سینگی لاوانی كورد بۆ پەیداكردنی پاروەنانێك دەكەوێتە بەر گوللەی ئەربابەكانی ئەوان و قەڵەمفرۆشان متەقیان لێ‌ نایێت و تەنانەت دێرێكیش لە بارەیەوە نانووسن، ئاخۆ ئەو هەژارانەش سەر بە ئەمریكا و ئیسرائیلن و دەیانهەویست تەناهیی نەتەوەیی تێك بدەن! ئەگینا لە وڵاتی ژێر دەسەڵاتی وەلی ئەمری موسوڵمانانی جیهان كەس بۆ نان ناكوژرێت!!، سەرنجڕاكێشتر ئەوەیە كە ئەو بەناو قەڵەمبەدەستانەی دیار و نادیار بە تەواوی مێژووی گەلەكەمان دەشێوێنن و زیاتر لە ئەربابەكانیان، نكۆڵی لە خەباتی رۆڵەكانی گەلەكەمان دەكەن و بۆ وێنە كۆماری پیرۆزی كوردستان و رێبەرانی ئەم كۆمارە ساوایە بێ هێنانەوەی هیچ بەڵگە و دۆكۆمێنتێكی مێژوویی سەر بە ئەم و ئەو لە قەڵەم دەدەن و گوایا هیچ كەس راستییەكانی تاكوو ئەمڕۆ نەزانیوە بێجگە لەوان و ئەوە ئەوانن كە ئەو ئەركە قورسەیان كەوتۆتە سەرشان و دەبێ خەڵك ئاگادار بكەنەوە، خەڵكێك كە كۆمار لە خۆیانەوە هەڵقوڵاوە و خۆیان بەشی سەرەكیی كۆمار بوون. لە ڕاستیدا ئەو تاقمە بۆ خۆیشیان باش دەزانن كە كەس حەسێب بۆ قسەكانیان ناكات و تەنیا ئامانجیان شێواندنی راستییەكان و هەوڵدان بۆ خستنی شك و دوودڵی لە نێو توێژی تازەپێگەیشتووی كۆمەڵگا و خەباتە تاكوو بە چەواشەی راستییەكانی مێژووی گەلەكەمان و خەباتەكەی خەوشدار بكەن.

ج ـ وەدەستهێنانی ناو و ناوبانگ لە نێو خەڵك:

یەكێكی دیكە لە ئامانجەكانی ئەم قەڵەمفرۆشانە وەدەستهێنانی ناو و ناوبانگە لە نێو كۆمەڵگای كوردستاندا. ئەو تاقمە كاتێك دەبینن وشیارترین رۆڵەكانی گەلەكەمان لە سەنگەری خەباتدان و دژ بە دەسەڵاتی دیكتاتۆری راوەستاون و رۆژ لەدوای رۆژ حوڕمەتی تێكۆشەران لە نێو خەڵكدا زیاتر دەبێت، بەڵام ئەوان هەرچی پەلەقاژە دەكەن و مێژوو دەشێوێنن كەس ناویان لێناهێنێت، كەوتونەتە خۆ تا رەنگە بە چەواشەكاری و سازكردنی درۆ بتوانن لە نێو خەڵكدا ناوبانگێكیان هەبێ‌. بە واتایەكی دیكە، ئەو تاقمە بە تۆمەتلێدان و هەڵبەستنی بوختان و تیرۆری شەخسییەتی رێبەرانی گەل بە تەمای ئەنگاوتنی دوو نیشانن كە لە لایەكەوە ناوێك بۆ خۆیان لە نێو خەڵكدا وەدەست بێنن و لە هەمان كاتیشدا خزمەتێكی مەزن بە ئەربابەكانیان لە تاران بكەن، ئەگەر جیا لەم ئامانجە ئامانجێكی دیكەیان هەیە، ئاخۆ كاتێك دۆست و دوژمنی كورد دان بە خەباتگێڕبوون و پاكبوونی پێشەوای ناودار و دوكتور قاسملووی شەهید و حیزبی دێموكرات دادەنێن، هەڵبەستنی تۆمەت و قسەی نابەجێ چ بنەمایەكی هەیە.

د ـ تێكدانی ریزەكانی خەباتی گەلەكەمان:

یەكێك لە ئەركە هەرە گرینگەكانی ئەو سیاسەتە نوێیەی رێژیم كە لە لایەن كۆمەڵێك قەڵەمی خائین بەڕێوە دەچێت، تێكدانی یەكیەتیی ریزەكانی خەباتگێڕان بەتایبەت لە نێو حیزبی دێموكراتی كوردستانی ئێراندایە. ئەگەر سەیرێكی ئەو ماڵپەڕە بكەین، دەبینین كە ئەگەر خوێنەر جیا لەو ماڵپەڕە هیچ زانیارییەكی بەنیسبەت تێكۆشەرانی حیزبی دێموكرات نەبێت، وا هەست دەكات كە شەڕێكی توند لە نێو كادر و ئەندامانی حیزبی دێموكراتی كوردستانی ئێران لە ئارادایە كە نیزیكە چەك لێك بكێشن، بە واتایەكی دیكە بەڕێوەبەرانی «دیار و نادیار» بە درووستكردنی قسە و قسەڵۆك بۆ ئەندامانی سەرەوەی حیزب و نواندنی ئەوەی كە گوایا هەر كەس بەتەمای هەڵخەڵەتاندنی ئەوی دیكەیە و هەروەها نیشاندانی كەشوهەوایەكی باند و باندبازی دەیانهەوێت ریزەكانی خەبات تێك بدەن و بە خەیاڵی خۆیان لە ئاوی ڵێڵ ماسی بگرن، بەڵام ئاخۆ ئەگەر وابێت چۆنە تەنیا ئەوان ئاگاداری ئەم وەزعەن و كەس خەبەری لێ نیە، یان ئاخۆ چۆنە كە كاروباری حیزبی ئاوا بە باشی دەچتە پێش و رۆژ نیە پۆلێك لە لاوان تێكەڵ بە كاروانی خەبات نەبن؟؟.

لە كۆتاییدا دەبێ بڵێین كە ئەگەر ئەو قەڵەمفرۆشانە تەنیا ئەو وتە بەنرخەی پێغەمبەری ئاشتییان بكردبایەتە ئاوێزەی گوێچكەیان، ئیتر نەدەهاتن و دەستیان نەدەكرد بە چەواشەكردنی ڕاستییەكان و هەوڵدان بۆ لێك دووركردنەوەی خەڵك و خەباتگێڕان. قاسملووی رێبەر دەفەرمێت «حیزب و خەڵكی كوردستان وەك ماسی و ئاو وان، چۆن ماسی دەبێ لە نێو ئاودا بێت و بێ ئاو ناژیت، حیزبی دێموكراتیش ئاوا لە نێو كۆمەڵگای كوردستاندا جێگای گرتووە و تاكوو خەڵكی كوردستان هەبێت حیزبیش هەر ماوە و درێژە بە خەبات دەدات». تاكوو تاكەكانی كۆمەڵگای كوردستان حەز و ئاواتەكانیان لە نێو حیزبی دێموكراتدا دەبیننەوە و حیزبی دێموكرات خۆی بە رۆڵەی خەڵكی كوردستان دەزانێت، هیچ پیلانێكی دوژمنان بۆ لێكدابڕانی ئەم گیانە كە لە نێو دوو جەستەدایە سەرناگرێت، هەر وەك مێژوو نیشانی داوە كە دێموكرات یانی خەڵكی كوردستان و خەڵكی كوردستان یانی دێموكرات.
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧١٣ لەم ژمارەیەدا:

ــ بوومەلەرزەی سیاسی
ــ لە خەبات دژ بە ئەپارتایدەوە بۆ ڕاسان
ــ ئەمن چی بكەم، خۆتان دروستی بكەنەوە
ــ دانیشتن لەگەڵ ئۆپۆزیسیۆنی ئێرانی و چەند سەرنجێک