• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٢٤ی نوامبری ٢٠١٧ی زایینی - ٠٣ی سەرماوەزی ١٣٩٦ی هەتاوی  

حەسەن شەرەفی: هەر میللەتێك نەیهەوێ لەنێو بچێ، لەنێو ناچێ

زایینی: ٢٤-٠٨-٢٠١٢ - هەتاوی: ١٣٩١/٠٦/٠٣ - ١٣:١٦ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
حەسەن شەرەفی: هەر میللەتێك نەیهەوێ لەنێو بچێ، لەنێو ناچێ
هاوڕێیانی خۆشەویست!
خوشك و برایانی بە ڕێز!
میوانانی ئازیز!


ئەمڕۆ 25 ی گەلاوێژی 1391ی هەتاوی، 67مین ساڵرۆژی دامەزرانی حیزبی دێموكراتی كوردستان و لە هەمان كاتدا 70مین ساڵرۆژی دامەزرانی كۆمەڵەی ژ.ك، ئەو رێكخراوەیە كە 67 ساڵ لەومەوپێش حیزبی دێموكراتی كوردستان لەسەر بناغە تەشكیلاتییەكەی ئەو رێكخراوەیە دامەزرا. بەو بۆنەوە، بەناوی دەفتەری سیاسی و رێبەرایەتی حیزبەوە و ئیجازە بدەن بە ناوی هەموو ئێوەشەوە، پیرۆزبایی لە یەك یەكی لایەنگران، ئەندامان، كادر و پێشمەرگەكان، رێبەرایەتی حیزبی دێموكراتی كوردستانی ئێران و سەرجەم كۆمەڵانی خەڵكی كوردستان بكەم ئەوانەی كە لە هەموو شەرایەتێكدا پاڵپشتی بەهێزی حیزبە خۆشەویستەكەیان، حیزبی دێموكراتی كوردستانی ئێران بوون. هەروەها بەو بۆنەوە سەری رێز و نەوازش دابنوێنین بۆ دامەزرێنەرانی حیزبی دێموكرات لە سەرووی هەمووانەوە، پێشەوا نەمر قازی محەممەد و ئەو رێبەرانەی كە دواتر لە بووژانەوەی حیزبدا لە بەرەو رێبازی درووستر و سەردەمیانەتری حیزبدا، دەستیان هەبووە و ئەركیان بەڕێوە بردووە.



67 ساڵ لەمەوپێش، لە رۆژێكی وەك ئەمڕۆدا بە هەوڵ و هیمەتی پێشەوای نەمر قازی محەممەد و هەموو ئەو تێكۆشەران و نیشتمانپەروەرانەی كە هەوڵی ئازادی و رزگاریی نەتەوەی كوردیان دەدا، حیزبی دێموكرات ساڵی 1324 هەتاویدا دامەزرا. زەروورەتی دامەزرانی حیزبی دێموكرات چ بوو؟ ئێمە ئەگەر ئاماژە بە یەك یەكی ئەو مەورد و ئەو لایەنانە بكەین كە زەروورەتی دامەزرانی حێزبێكی بەو شێوەیەی مۆدێرن و پێشكەوتووی هەڵدەگرت، رەنگە پێویست بێ ئاماژە بە زۆر لایەن بكرێ و كاتی زۆر هەڵبگرێ. بەڵام ئەگەر وا دابنێن كە حیزبی دێموكراتی كوردستان لەو هەلومەرج و لەو كاتەدا دانەمەزرابا، تۆ بڵێی كۆماری كوردستانێك لە دایك بووبا و كیانێكی كوردی، بۆ یەكەمجار لە شێوەی كۆماریدا و بۆ یەكەمجار لە مێژووی كوردیدا سەری هەڵدابا و لاپەڕەكانی مێژووی بزووتنەوەی كوردی پێ رازاباوە، یان ئەگەر بەبێ حیزبی دێموكرات دامەزرابا، تۆ بڵێی ئەو كیانە نێوەڕۆكێكی ئاوا دێموكراتیكی هەبا كە بە هۆی حیزبی دێموكراتەوە دامەزرا و هەیبوو. دوای رووخانی كۆماری كوردستان ئەگەر حیزبی دێموكراتی كوردستان دانەمەزرابا، تۆ بڵێی دوای كۆمار، تێكۆشانی ئەو حیزبە كە بە هیمەتی تێكۆشەرانی ئەو حیزبە و بە پڕكردنی زیندانەكانی رێژیم لە وجوودی خۆیان و لە هەموو شەراییەتێكدا زیندوویی ئەو حیزبەیان پاراست، ناوی ئەو حیزبەیان پاراست و نەیانهێشت بزووتنەوەی كورد رەورەوەكەی لە حەرەكەت بوەستێت، هەروا بە هاسانی وەدی هاتبا. یان خەون و خەیاڵی ئێرانی بە ئیستڵاح دوورگەی ئارامی زەمانی حەمەڕەزای شای پەهلەوی لە ساڵەكانی 46 و 47 ئاڵۆز بووبا، تا سەركەوتنی شۆڕشی گەلانی ئێران. تۆ بڵێی ئەگەر حیزبی دێموكراتی كوردستانی ئێران دانەمەزرابا، لە رۆژەكانی سەركەوتن و شۆڕش و مانگەكانی پێش و دواتریدا، حیزبێك دامەزرابا، بە پەلە بیتوانیبا سەدان هەزار كەس و بە میلیۆن ئەندام و لایەنگری لە چەند مانگدا بۆ كۆ ببێتەوە، ئەگەر ئەو حیزبە ریشەی لە دڵی خەڵكدا نەبا و لە بیر و مێشكی كۆمەڵانی خەڵك و رۆڵەكانی نەتەوەی كوردا نەبا. تۆ بڵێی دوای ئەوەش كە كورد داوای مافی خۆی كرد و رێگای ئاشتییانەی گرتە بەر، بەڵام سەركوتی رێژیمی كۆماری ئیسلامی و گەمارۆكانی دەستی پێكردوو و كوردی خستە حاڵەتێكی زۆر تەنگانە و سەختەوە كە بێجگە لە دیفاع لە مان و مەوجوودییەتی خۆی رێگایەكی بۆ نەماوە، ئەگەر حیزبی دێموكرات كاتی خۆی دانەمەزرابا و ئەو رەوتە چەندین ساڵەی نەپێواوتبا، دەیتوانی لە بەرانبەر ئەو هەموو هێرش و گەمارۆ و پیلانەدا، كە بەداخەوە بەشێكیشیان سەركەوتن و سەری رێبەرانی ئێمەیان تێدا لە دەست چوو، رابوەستێ، بەڵام ئەو حیزبە هەر بەو قامەتەیەوە، هەر بەو نێوەڕۆكە دێموكراتیكەیەوەكە هەیبوو لە بەرابەر ئەمەدا راوەستا. كەوابوو لە رۆژی یەكەمی دامەزرانی ئەو حیزبەوە تا ئێستا ئەگەر سەیری رووداوەكان و سەیری حەرەكەتی ئەو حیزبە بكەین و سەیری شوێندانەری ئەو حیزبە لە بزووتنەوەی كورد لە كوردستانی ئێراندا بكەین، خۆی پێمان دەڵێ كە زەروورەتی دامەزرانی ئەو حیزبە چ بوو. گرینگ هەر دامەزرانێك نیە، گرینگ مانەوەی ئەوەیە كە دادەمەزرێت. ئێمە هەموومان بەتایبەت ئەوانەی كە لە مێژووی ئێران و كوردستان زیاتر لەوانەی دیكە شارەزان و دەزانن، لە ئێراندا و تەنانەت لە ناوچەدا هەبوون حیزب و رێكخراوی وا كە پێش حیزبی دێموكراتی كوردستان و یان هاوكات لەگەڵ حیزبی دێموكراتی كوردستان دامەزران، بەڵام لە رەوتی مێژوودا یا لەنێوچوون و نەماون یان ئەگەر ماون تەنیا نێوێكی بێ‏نێوەرۆك و بە بێ‏شوێندانەری لەسەر رەوتەكان ماون. بەڵام حیزبی دێموكرات كە پێكهات، مایەوە وەك خۆی و قایمتر و شوێندانەرتر لە پێشویش مایەوە. هۆی ئەوە چیە؟ ئەگەر تماشای ژیانی ئەو حیزب و رێكخراوانە دەكەین كە بوون و نەماون و یان ماون و بێ‏نێوەڕۆك و بێ‏شوێندانەری ماون، دەبینین ئەوان لە دوو شتدا كەمیان هەبوو. یەكەمیان لەو باوەڕەی كە بۆی پێكهاتوون لە درێژایی زەماندا هەر لەسەری پێداگر بوون و نەگۆڕان و نەیانتوانی خۆیان لەگەڵ سەردەم رێك بخەن و نەیانتوانی لەگەڵ ویستی خەڵكەكان و خەڵكی خۆیان بەرەوپێش بچن. هەر لەسەر بۆچوونەكەیان پێداگر بوون و هیچ شتێك نەیتوانی ئاڵوگۆڕیان تێدا پێك بێنێ. دووهەم لە باری پێوەندییەوە، پێوەندییەكانیان ناسالم بوو. واتە ئەوەندە لە پێوەندیدا بێ مشوور بوون كە وەكوو پێڕەو وەكوو دونبالەڕەوی وڵاتێك و لایەنێك سەیریان كراوە. بۆیە ئەگەر لە واقێعدا سەربەخۆیی سیاسیی خۆیان لە دەست دا، زەمینەی تەتبیقی خۆیان لەگەڵ رەوتی سەردەم و لەگەڵ گۆڕانكارییەكانی دنیا نەبوو، توانەوە و نەمان و یان تەنیا بە نێو مانەوە. بەڵام حیزبی دێموكرات چوونكە سەربەخۆیی سیاسی خۆی پاراست چوونكە لەگەڵ رەوتی گۆڕانكارییەكانی دنیادا چووە پێش و خۆی لەگەڵ ئەو گۆڕانكارییانە تەتبیق دا لە هەر سەردەمێكدا، سوارچاكی مەیدانی ئەو سەردەمە بووە، چ ئەوكات و چ لە دەیەكانی دواتردا و تا ئێستاش. وە ئەوەش كە مانەوەی خۆی مسۆگەر كردووە بەو تایبەتمەندییانە، تایبەتمەندییەكانی هەر ئەوەندە نەبوون، بەڵكوو تایبەتمەندییەكانی حیزبی دێموكرات بەتایبەتی دوای ئەوەی كە لە هێندێك بڕگەدا، سەربەخۆییەكەی كەمێك بۆ لایەك لار بۆتەوە، دەستبەجێ رێبەران و تێكۆشەرانی ئەو حیزبە كەوتوونە كار بۆ ئەوەی كە بێگێڕنەوە سەر رێبازی ئەساسی خۆی و بەتایبەتی لە4 دەیەی دوایی تەمەنی ئەو حیزبەدا نەك نابینین زەڕەیەك لە سەربەخۆیی سیاسی ئەو حیزبە كەم یا خەشدار بوو بێ، بەڵكوو بۆتە تایبەتمەندییەكی ئەوتۆ كە حیزبی دێموكراتی پێ دەناسرێتەوە.


لە لایەكی دیكەشدا دەبینین لە هەموو دەورێكدا ئەو حیزبە خۆی لەگەڵ رەوتی رووداوەكان و لەگەڵ سەردەم و بەرەوپێشچوونەكان بەرەوپێش چووە و خۆی تەتبیق داوە. ئەوەی كە كۆمەڵەی ژ.ك دادەمەزرێ و پاش 3 ساڵ هەمان رێبەری و هەمان ئەندام و هەمان رۆژی لەدایكبوون تەبدیل بە رۆژی دامەزرانی حیزبی دێموكرات دەكرێت، نیشانەی جۆرێك خۆتەتبیقدان لەگەڵ گۆڕانكارییەكان و بارودۆخی سەردەمە. یان ئەوە كە دەبینین لە جەوی غالبی بیروباوەڕی چەپدا، سۆسیالیزمی ـ دێموكراتیك لە لایەن حیزبی دێموكراتی كوردستانی ئێرانەوە دێتە ئاراوە و هەر ئەوەش لەگەڵ هێرش بەرەوڕووی دەكات و تۆمەتی لێ دەدرێت، بەڵام پێداگر دەبێ و بە دنیای نیشان دەدات، ئەوڕۆ دەردەكەوێ كە چەندە درووست بۆی چووە، ئەوڕۆ نەك بۆ هەموو خەڵك بەڵكوو بۆ ئەوانەی كە بە دژی ئەو بۆچوونە بوون و لە دژی پروپاگەندەیان دەكرد، ئەوڕۆ ئێعترافی پێ دەكەن و ئەمانە شانازییە بۆ حیزبی دێموكرات یان لەو كاتانەدا كە پێویستە ئێمە هەڵوێستی خۆمانمان هەبێت. تایبەتمەندییەكی دیكەمان، واقێعبینی لە سیاسەتدا بووە. لەو حیزبەدا، ئێمە ئەگەر رووداوێك بووبێ، ئەگەر مەسەلەیەك بۆ ئێمە مەترەح بووبێ، وەك حیزبی دێموكراتی كوردستانی ئێران، چاومان لەوە نەبووە فەزای غاڵب لە كۆمەڵگادا و لە نێو بە شێك لە ریزەكانی حیزبەكەماندا چیە، ئێمە لێكدانەوەی خۆمانمان هەبووە و بە ناسین و بە لێكدانەوەی درووست هەڵوێست و رای خۆمان دەربڕیوە و كارمان بۆ كردووە. لەو پێوەندییەدا هێندێك جار وا هاتووەتە بەرچاو یان وا تاوانبار و تۆمەتبار كراوین كە لە دوایەین و یان هەڵوێستمان دڕەنگ گرتووە یان هەڵوێستەكەمان درووست نیە، بەڵام ئەگەر بۆ نموونە هێندێك شت باس بكەم دەریدەخات لە هەموو ئەو مەقتەعانەدا لە پێش زۆربەی هەرە زۆری حیزب و لایەنەكان بووین. كاتێك ئاخوندەكان دەسەڵات بە دەستەوە دەگرن و شۆڕشی خەڵكی ئێران بە لاڕێدا دەبەن، ئازادییەكان دەخنكێنن و دەیانهەوێ رێژیمێك لە ژێر ناوی ئەوەی كە ئێستا هەیە، دابمەزرێنن، زۆر كەس و لایەن بە ئینقلابی و بە دژی ئیمپریالیزم و بە ئازادیهێنەریان دەزانی، حیزبی دێموكرات بوو كە گوتی رفراندۆمەكە تەحریم دەكەم، نە رفراندۆمەكە ئازاد و دێموكراتیكە و نە ناوەڕۆكی رێژیمێكی ئیدئۆلۆژیك كە بێتە سەر كار، ئەتوانێ دابینكەری دێموكراسی و مافی نەتەوەكان بێ. ئەوكاتە حیزبی دێموكرات زۆر كەسی دیكەی لە پەنا نەبوو لەو هەڵویستەدا، بەڵام ئەوڕۆ دەردەكەوێت كە ئەو هەڵوێستە چ بوو و چەندە درووست بوو. واقێعبینی بە ئێمەی ئیجازە نەداوە كە تابێعی جەوی درۆیینی سیاسی بین لە هەلومەرجەكاندا. كاتێك جەریانی ئیسڵاحتەلەبی وەڕێدەكەوێ، زۆر كەس دڵی پێ دەبەستێ و درووشمی بۆ دەدات، حیزبی دێموكرات دەڵێ كە لەو قوڕە تۆز هەڵناسێت. لەو رێژیمەدا ئیسڵاحات مومكین نیە، وەدوای ناكەوێت و ئەوانەی كە بەدوای كەوتن ، ئێستا ئەگەر نەڵێم وەدوای سیاسەتی حیزبی دێموكراتی كوردستانی ئێران كەوتوون، دەبێ بڵێم كە بوونە موئەیدی سیاسەتی حیزبی دێموكراتی كوردستانی ئێران. ماوەیەك سەوز سەری هەڵدا كە گۆیا ئێران رزگار دەكات، زۆر كەس وەدوایان كەوتن و تەنانەت زۆر كەس ئێمەیان تاوانبار دەكرد وەدواكەوتووین لە هەنگاونان و لە تەئیدی ئەو حەرەكەتە. ئێمە دووبارە نەچووینە ژێر كاریگەرییەی ئەو جەوە و لێكدانەوەی خۆمانمان هەبوو، لەسەر ئەو كەسانەی كە دەیانەویست گۆیا لە ئێراندا چاككاری بكەن، پێمان وابوو ئاخر ئەوانە نە كارنامەیەكی باشیان هەبوو ئەوكاتە كە لە دەسەڵاتدا بوون نە بەرنامەیەكی باشیان هەبوو بۆ دواڕۆژ كە بوونە ناڕازی. كەوابوو كەسێك كە كارنامەی باشی نەبوو، ئێمە چۆن ئێعتمادیان پێ دەكەین. كەسێك كە بەرنامەی نیە، چۆن دڵی پێ خۆش دەكەين بە كەسێك لە دەسەڵاتدا توندڕەویشی كردووە، ئێستا لە جەهەتی چاكسازیدا دڵی پێ ببەستم، بێ ئەوەی رابردوویەكی لەو بابەتەوە هەبێ یان بێ ئەوەی بەرنامەیەكی لەو پێوەندییەدا هەبێ. بە گشتی ئەوانە نموونەن بۆ ئەوە نیشان بدەین حیزبی دێموكراتی كوردستانی ئێران، حیزبێكە سیاسەت لەسەر ئەساسی واقێعبینی و لەسەر ئەرزی واقیعی دەكا، نە لە خەون و خەیاڵات و ئارەزوو و لە جەوی ناساغی سیاسیدا. حیزبی ئێمە نەك هەر تایبەتمەندیی خۆی هەبووە، بەڵكوو بەپێچەوانەی ئەوە كە دەڵێن سیاسەت دایك و باوكی بۆی نیە و هەمووی فریودانە، باوەڕی بە ئەخلاق لە سیاسەتدا هەیە. رێبەرانی ئێمە فێریان كردین كە لە سیاسەتدا ئەخلاق دەتوانێ دەورێكی ئەساسی بگێڕێت. سیاسەتێك كە لەگەڵ ئەخلاق نەبێ ئەو هێزەی كە باوەڕی بە ئەخلاق لە سیاسەت دا نیە، ناتوانێ بۆ هەمیشە جێگای متمانەی هەموو كەس بێ. نەك هەر تایبەتمەندیی خۆی، حیزبی دێموكرات هێندێك دیاردەی نوێی لە بزوتنەوەی كوردیشدا باو كرد وەك رێبەریی جەمعی. لەو ئەزموونە كە لە بزووتنەوەكانی دیكەی كورد بوویان، بە دامەزرێنەرانی حیزبی ئێمە، بە پێشەوا، بە بووژێنەرەوەی حیزبی ئێمە دوكتور قاسملوو و دوكتور شەرەفكەندی تێگەیبوون كە ئەو بزوتنەوانە بۆ ئەوەی تووشی ئەو گێرەوكێشانە بوون، خۆ رەنگە هەر سەریش نەكەوتبان، بەڵام لانیكەم درێژەیان هەبایە، ئاكامی ئەوە بووە كە خەڵكەكە لە جیاتی ئەوە كە وە دوای حیزبی سیاسی و بەرنامەی روونی سیاسی بكەون، لە دوای كەسێك یان كەسایەتییەك كەوتوون و ئەوەش شكستی هێناوە. بۆیە حیزبی ئێمە رێبەرایەتیی بەكۆمەڵی هێنا بۆ نێو بزووتنەوەی كورد كە ئەگەر لە سەری بدرێ، بەدەنە سەرلەنوێ سەر درووست بكاتەوە. هەرواش بوو، لە داوی پێشەوا، لە دوای دوكتور قاسملوو، لە دوای دوكتور شەرەفكەندی، بێجگە لەوە كۆمەلانی خەڵكی بار هێنا و ڕای هێناوە بۆ ئەوەی كە لە جیاتی بیر لە كەس بكاتەوە، بیر لە بەرنامەی سیاسی بكاتەوە و ئەوە جیاوازییەكە كە ئێمە نەتەنیا لەگەڵ بزووتنەوەكانی پێشووی نەتەوەی خۆمان هەمانە، لەگەڵ خەڵكی ئێرانیش هەمانە، ئێستاش بەشێكی زۆر لە خەڵكی ئێران چاویان لە كاریزمایێكە كە وەدوای كەون، مونتەزری بێ، مووسەوی بێ، كەرووبی بێ، خومەینی بێ، رەزاشا بێ، موسەدیق بێ. ئەو مەسەلە ئێستا شكڵی نەگرتووە لە ئێراندا بەو جۆرەی كە لە كوردستاندا بەدوای بەرنامەی سیاسیدا بوون و شكڵی گرتووە. حیزبی ئێمە داهێنەری ئەوانەیە. ئەو سیاسەتە درووستە و واقعبینییە، ئەو هەموو خوێنە كە تێكۆشەرانی حیزبی ئێمە داویانە، ئەو هەموو زیندانە كە لە تێكۆشەرانی ئێمە پڕ كرابوون، ئەو درێژەدەرییە لە خەباتدا، لەسەر یەك ئەو حیزبەیان لە نێو دڵی خەڵكی كوردستاندا جێ كردووەتەوە و ئەو خەڵكەش هەر بۆیە بەردەوام سەنگەر بوون بۆ تێكۆشەرانی ئەو حیزبە، ماڵیان، مەزرا و شوێنیان و بۆیە خۆیان موئەیدی ئەو حیزبەن لە هەموو بارودۆخێكدا. ئەوە تایبەتمەندییەكی حیزبە كە هەر حیزبێك رەنگە بە زەحمەتێكی زۆر زیاتر لە حیزبی دێموكراتیش ئەگەر سیاسەت و بۆچوونەكانی وەك حیزبی دێموكرات نەبێ، ناتوانێ بە دەستی بێنێ. ئێمە ئێستا ئەو حیزبەی كە بۆ ئەو مەبەستەی بۆی دامەزرا، بەو رەوتە لە مێژوو كە بە سەربڵندییەوە هێناویەتی، بەو بارودۆخەی كە تێدایە، بەو زەرفییەتەی بەرەو سەردەم چوون كە هەیەتی، ئێستا لە بارودۆخێكدایە كە لە نێو خودی كوردستانی ئێراندا، لە ئێراندا و لە كۆمەڵگای نێونەتەوەییدا حیسابی لەسەر دەكرێ. بەڵام بارتەقای ئەو گەورەییەش چاوەڕوانییان لێ هەیە. چاوەڕوانییان لێ هەیە لەو بارودۆخە‎دا دەورێكی ئەساسیتر، زیندووتر، فەعالتر و بەچاوتر بگێڕێ. لە كام بارودۆخدا؟ لە بارودۆخێكدا كە لە وڵاتەكەمان لە ئێراندا رێژیمی كۆماری ئیسلامی زیاتر لە هەموو كاتێك بۆ خەڵك ناسراوە و بێزراوە، نەك پێگەی سیاسی، بارودۆخی ئابووریشی شپرزەیە. تەنانەت پێگەی ئایینی و مەزهەبیشی وەك جاران نیە و پێڕەوی خۆبەكوشتدەری هێندە لە پشت نەماوە. كێشە نێوخۆییەكانیان، بارودۆخی خراپی خەڵكی، هەموو ئەوانە شەرایەتێكن كە رەوەندی موبارزەكەمان و رەوتی خەباتەكەمان رەنگە هەمووارتر بكا. لە پێوەندی لەگەڵ وڵاتانی دەرەوەشدا هەموو ئەو گیروگرفتانەی هەیە كە هەمووتان هەموو رۆژى لە سایتەكان، لە هەواڵەكاندا دەیانبینین كە چەندە رێژیمێكی بێزراوە و چۆن ناسراوە لە بیروڕای گشتیدا، ئەوەش بۆ خۆی رێخۆشكەرێكە بۆ تێكۆشانی ئێمە. لە لایەكی دیكەوە دەبینین رەوتێك لە ئاڵۆگۆڕ لە دونیا، لە ناوچەدا و لە دەوروبەری ئێمە هاتووتە كایەوە. ئاڵۆگۆڕ لە هێندێك وڵات رووی داوە، ئاڵۆگۆڕ لە هەندێك وڵات لە گۆڕێدایە و ئاڵۆگۆڕ لە هێندێك شوێن بەڕێوەیە و ئێمە دەبێ چاوەڕوان بین و هەموو ئەگەرەكان هەروەك تا ئێستاش كردوومانە هەموو ئەگەر و تێبینییەكان پێشبینی بكەین و خۆمان بۆ هەر یەك لەو شەرایتانە ئامادە بكەین و خۆمان لەگەڵ وەزعییەتەكە جۆرێك تەتبیق بدەین كە لە هەر حاڵەتێكدا و لە ئەگەری روودانی هەر ئەگەرێكدا ئێمە وەزنەیەكی قورس لە پێناو بەدیهێنانی بەرژەوەندیی نەتەوەی خۆماندا بین. بۆ ئەو مەبەستە پێمان وایە نەتەوەی ئێمەش و بە تایبەت هێزە سیاسییەكانی ئێران پێویستیان بە یەكدەنگی و یەكڕیزیی زیاتر هەیە بۆ ئەو مەبەستە ئێمە بیستان لە چەند رۆژی رابردوودا، لە پلۆنیۆمی ئەخیرماندا و بە پێی بریاری ئەو پلۆنۆمە ئێمە بە پێی ئەوەی كە ئەو هاورێیانەی كە 6 ساڵ لەمەوپێش لە حیزب جیابوونەوە، لەگەڵ ئەوەی كە ئەو كات زۆرمان هەوڵ دا جیابوونەوە نەبێ، لەگەڵ ئەوەی كە دوای جیابوونەوە زۆرمان هەوڵ دا یەكڕیزی دەستەبەر بێتەوە، بەڵام سەر نەكەوتین، بەڵام دیسان بە باشمان زانی دەستپێشخەرییەكی دیكەش بكەین و ئەو دەستپێشخەرییەش كرا و لە راگەیەندراوێكدا پێشنیاری دیالۆگ و دانیشتنی راستەوخۆمان لەگەڵ ئەو هاوڕێیانە كە پێشتر جیابوونەوە راگەیاند. ئەوەمان بە نیازپاكییەوەش كردووە ئێستا هەر كەس چۆنی لێكدەداتەوە و هەر كەس بە چ رەشبینییەكەوە تەماشای دەكا، كەیفی خۆیەتی، گرینگ ئەوەیە ئێمە بە نیەتێكی خاوێن و پاك ئەو كارەمان كردووە ، تەنیاش بۆ دەستەبەركردنی یەكڕیزی. ئەو هاوڕێیانەی پێشووش لە راگەیەندراوێكدا وڵامیان داوەتەوە. وڵامەكەیان هەم جێگای دڵخۆشییە، چونكە پێشوازی لەو بانگەواز و كراوە و بە شتێكی باش زانراوە، بەڵام لە هەمان كاتیشدا وشە و رستەی وای تێدایە كە وەهمی ئەوەی لێدەكرێ كە ئەوە شەرت بێ.
چونكە هیچ شەرتێك ناتوانێ یارمەتی بەو رەوتە بكات. ئەگەر قەرار بێ هێندێك شت كە خۆیان مەوریدی ئیختلافن، پێش دانیشتن و دیالۆگ حەل بن، دانیشتن و دیالۆگ مانای نامێنێ. ئێمە ئومێدەوارین ئەوە هەر ئیبهام بێ و پێشوازییەكەیان بێ مەرج بێ و بە زووترین كات و لە شەرایتی موناسیبدا زەمینەیەك بۆ ئەو دیدار و دیالۆگانە خۆش بكرێ، بەڵكوو ئەو زەروورەتەی كە دەخوازێ یەكڕیزییەكانی حیزبی دێموكراتی كوردستانی ئێران دەستەبەر بێتەوە، دەستەبەری بكاتەوە. ئێمە ئومێدەوارین جوابی ئەو نیازپاكییەمان بە نیازپاكییەوە وەربگرینەوە و ئەو رەوتەی تا سەر بەرین و بە سەركەوتن بیگەیێنین.

تێكۆشانی ئێمە تەنیا بەوەش مەحدوود نەبووەتەوە، ئێمە لەگەڵ لایەنەكانی دیكە لە هێزە كوردستانیەكانش دانیشتنمان هەبووە، لێكنزیككردنەوەی بیروڕامان هەبووە. مەسایلی هاوبەشمان دەستنیشان كرد و ئومێدەوارین ئەو رەوتە كە لە كۆتایی نزیكە ئەویش بە كۆتایی بگات و لە موناسبەتێكی دیكەدا بە ئاگاداری ئێوەی خۆشەویست بگا. ئێمە لە دروشمی خۆماندا لە هەر رەوتێكدا هەر دروشمێكی ئەساسیمان هەڵگرتبێ، دوو شتی ئەساسیمان لەبەر چاو گرتووە، مەسەلەی نەتەوایەتیی كورد لە كوردستانی ئێران و دێموكراسی، بەڵام لە بڕگەی جۆراوجۆر و لە رەوتی بزووتنەوەدا هەر جارە جۆرێك فۆرمولە كراوە، لە قاڵبی خۆدموختاریدا، لە قاڵبی فێدرالیزمدا، بەڵام هەر جۆرێك بووبێ مەبەستەكە یەكە، دابینبوونی مافی نەتەوایەتی و تەئمینی دێموكراسی. تازە ئێمە وەك حیزبی دێموكرات لە نێو كۆمەڵگای خۆماندا و هەتا لەنێو ریزەكانی حیزبی خۆماندا هێندێك جار، لە نێوان ئەو دوو مەقوولەدا تەقابولمان دیوە و حیزبی ئێمە بە وردبینی و زەرافەتەوە توانیویەتی تەوازوون و هاوسەنگی و زەروورەتی هەردووكیان وەك یەك بپارێزێ. جاری وا هەبووە لە حیزبی ئێمەدا فەزای ناسیۆنالیزم ئەوەندە بە توندی غالب بووە كە گەیاندوویەتەناسیۆنالیزمێكی بەرچاوتەنگ. حیزبی دێموكرات بە دیققەت و زەرافەت و بە زەروورەتێكی كە دێموكراسی هەیەتی وەك پاڵپشت و تەزمینی مافی نەتەوایەتی بە جۆرێك پاراستوویەتی كە نەیهێشتووە بێ رەنگ بێ لە موقابیل ناسیۆنالیزمی بەرچاوتەنگدا. ئەو كاتەی كە ئیدئۆلۆژی جۆراوجۆر بە ئیسلامییەوە، بە چەپییەوە، بەسەركۆمەڵگادا یان لە نێو ریزەكانی حیزبی ئێمەدا غالب بووە و ویستوویەتی مەسەلەی نەتەوایەتی كەمڕەنگ بكات و بڵێ هەموومان موسڵمانین و هەموومان براین و لە ئیدەی چەپ و پێشكەوتوودا هەموو شتێك خۆی دێتە دی و ئەو شوعارانەی ناوێ، حیزبی دێموكرات لەو حاڵەتەدا مەسەلەی نەتەوایەتی لەبەرامبەر شتەكانی دیكەشدا كە ئەوانەش زەروورین بۆ حیزبی دێموكرات و كۆمەڵگا، پاراستوویەتی و رایگرتووە و هاوسەنگی لە نێوان ئەو دووانەدا راگرتووە لەبەر ئەوەی زانیویەتی بە بێ دێموكراسی مافی نەتەوایەتی دابین نابێ، ئەگەر دابین بێ تەزمینێك بۆ تەمەندرێژییەكەی نیە و ئەگەر مافی نەتەوایەتیش لە ئێراندا بە تایبەتی هی كورد دابین نەبێ، دێموكراسی نە مانای هەیە نە مەفهومی واقعیی خۆی دەبەخشێ، سەرەڕای هەموو ئەوانە ئەو چاوەڕوانییانەی كە لە حیزبی ئێمە هەیە هەمووی هەقە، بەڵام لەو موناسیبەتە و لە رۆژی دامەزرانی حیزبدا ئێمەش چاوەڕوانیی خۆمان رادەگەیەنین لە كۆمەڵانی خەڵكی كوردستان كە هەمیشە بە دەنگ بانگەوازمانەوە هاتوون كە چاوێك لە رەوتی ئەو رووداو و ئاڵۆگۆڕانە بكەن كە رۆڵی خەڵك لە پەنا حیزبە سیاسییەكانیان چۆنە و ئیزن بدەن حیزبی ئێمەش ئەو چاوەڕوانییانەی لەوان هەبێ بۆ ئەوەی كە چاوەڕوانیی ئەوان لە لای ئیمە بەدی بێ و هی ئێمەش لە لای كۆمەڵانی خەڵك كە دیارە هیچمان لە یەك جودا نین، هەموومان رۆڵەی یەك نەتەوەین و بۆ یەك ئامانج خەبات دەكەین، بێتە دی و سەركەوتنەكەمان مسۆگەر بێ. ئێمە لەگەڵ هێزە ئیرانییەكانیش هەر لە تەبادولی نەزەر و گفتگۆداین، زۆر هاسان نیە هەموو خواستی ئێمە بە كەسانێك كە ئەو شتانەیان بۆ گرینگ نەبووە یا تەنانەت بە مەترسیداریان سەیر كردووە، چەند رۆژە بێتە دی، بەڵام بەرەوپێشچوونمان لە تەسبیتی نەزەراتی خۆمان، لە تەلقینی ئەوەی كە ئێمە باوەرمان پێیە بە ئەوان، هەنگاوێكی زۆر گەورە چووینە پێش، شت ماوە بەڵام زۆر شتیش قەبووڵ كراوە و چووینە پێش. من جارێكی دیكە رۆژی دامەزرانی حیزبە خۆشەویستەكەمان، حیزبی خۆشەویستی خەڵكی كوردستان، حیزبی دێموكراتی كوردستانی ئێران بە هەمووتان پیرۆزبایی دەڵێم، سەركەوتن بۆ ئەو حیزبە تێكۆشەرە كە ئەو هەموو قوربانی داوە و ئەو هەمووە رەنجەی كێشاوە، ئەو رێبەرە گەورانەی لە پێناو ئامانجی خەڵكی كوردستاندا لە دەست داوە، سەركەوتن بە ئاوات دەخوازم. من دڵنیام هەر میللەتێك نەیهەوێ لەنێو بچێ، لەنیو ناچێ. هەر میللەتێك بیهەوێ مافی خۆی بە دەست بێنێ، رۆژێك پێی دەگا، درەنگ یان زوو، رەنگە شەرایەت شوێنەواری لە بواری زەمانییەوە لەسەر دابنێ بەڵام لە مەسیری سەركەوتنەكە لای نادا، ئەو سەركەوتنە بۆ كورد بە گشتی و بۆ كورد لە كوردستانی ئێران، بۆ حیزبی خۆشەویستەكەمان بەتایەبتی بە ئاوات دەخوازین، لەشساغی و تەمەندرێژی بۆ هەمووتان، سەركەوتن بۆ حیزبەكەمان و بۆ نەتەوەكەمان.
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧١٣ لەم ژمارەیەدا:

ــ بوومەلەرزەی سیاسی
ــ لە خەبات دژ بە ئەپارتایدەوە بۆ ڕاسان
ــ ئەمن چی بكەم، خۆتان دروستی بكەنەوە
ــ دانیشتن لەگەڵ ئۆپۆزیسیۆنی ئێرانی و چەند سەرنجێک