• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٢٤ی نوامبری ٢٠١٧ی زایینی - ٠٣ی سەرماوەزی ١٣٩٦ی هەتاوی  

چەواشەكاریی مێژوویی

زایینی: ٠٦-٠٤-٢٠١٢ - هەتاوی: ١٣٩١/٠١/١٨ - ١٣:١٠ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
چەواشەكاریی مێژوویی
كەریم پەرویزی

رێژیم و دەسەڵاتە سەرەڕۆ و پاوانخوازەكان، لە پێناوی سەقامگیركردن و مانەوەی حوكم و دەسەڵاتەكەیاندا دەست دەدەنە چەندین شێوازی جۆربەجۆری بەلاڕێدابردن و فریودانی رای گشتی، تاكوو واقیع و راستییەكان بشێوێنن و ئامانجی دەستكردی خۆیان، لە رای گشتی بكەن بە هەقیقەت و راستیی رەها.

زۆربەی هەرە زۆری ئەو جۆرە دەسەڵاتانە، دوژمنێكی وەهمی دەخوڵقێنن و بەردەوام باس لە مەترسییەكانی ئەو دوژمنە و ئەو ركەبەرە ناواقیعی و گەورەنوێندراوە دەكەن، تاكوو خەڵكی پێ بترسێنن و لە ترسی ئەژدەها پەنا ببەنە بەر مار! ئێستە رەنگە رێژیمەكە و دەسەڵاتدارەكە جێگای مار و ئەژدەهای لە خەڵك گۆڕی بێ و سیماكەیانی شێواندبێ!

رێژیمی ویلایەتی فەقیهی یەكێك لە نموونە هەرە ئەساسییەكانی وەها دەسەڵاتێكە و بەردەوام ئەو جۆرە پڕوپاگەندەیە بڵاو دەكاتەوە كە «دوژمن خەریكی پیلانگێڕانە» و هەن ئەو كەس و لایەنانەش كە هاوكات لەگەڵ رێژیم ئەژدەهایەك بە ناوی «دابەشبوونی ئێران» درووست دەكەن تاكوو خەڵك واز لە داواكاریی مافەكانی خۆی بێنێ و دەنگ هەڵنەبڕێ و پەنا بباتە ژێر عەبای ویلایەتی فەقیه.

یەكێك لەو چەواشەكارییە گرینگ و مێژووییانە كە هەموو دەسەڵاتدارانی پاوانخواز دەیكەن و كۆماری ئیسلامیش لە سەرەتاوە ئەنجامی دا و تاكوو ئێستا بەڕێوەی دەبا، بەلاڕێدابردنی بیری خەڵك بەوەیە كە بژاردە و رێگاكانی بەردەم ون بكرێن و خۆڵیان بە سەردا بكرێت و تەنیا رێگای خوازراوی پاوانخواز و ملهوڕ بهێڵرێتەوە و لە بەرامبەریشدا رێگایەك كە خەڵك بە هیچ شێوەیەك قبووڵی ناكەن وەكوو ركەبەر دابنرێ و لە چەواشەكارییەكی مێژووییدا، خەڵك ناچار بە هەڵبژاردن لە نێوان «خراپ و خراپتر» یان «مار و ئەژدیها» بكرێن و هەمیشەش روونە كە خەڵك لە وەها دۆخێكدا خراپ هەڵدەبژێرن و پەنا دەبەنە بەر «مار»!

رۆژی 12ی خاكەلێوەی 1358 ی هەتاوی، ئەو رۆژەیە كە كۆماری ویلایەتی فەقیهی گەورەترین چەواشەكاریی مێژوویی تێدا ئەنجام دا و خەڵكی ناچار كرد كە لە نێوان رێژیمی خومەینی و گەڕانەوە بۆ رێژیمی تازە رووخاوی پاشایەتیدا، یەكێكیان هەڵبژێرن، لەوەها رۆژ و هەلومەرجێكدا هەرچەند حیزبی دێموكرات و گەلی كورد بە هەڵوێستێكی وشیار و سیاسییانە، فریوی ئەو درۆ مەزنەیان نەخوارد و گوتیان كە ئەوە خۆڵ لە چاوی خەڵك كردنە و بایكۆتی رێفراندۆمەكەیان كرد، بەڵام زۆربەی خەڵكی باقی شوێنەكانی ئێران كڵاویان لە سەر كرا و وێنەیەكی درۆینەی دەستكردیان لە باتی هەتاوی هەقیقەت پێ قەبووڵ كرا.
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧١٣ لەم ژمارەیەدا:

ــ بوومەلەرزەی سیاسی
ــ لە خەبات دژ بە ئەپارتایدەوە بۆ ڕاسان
ــ ئەمن چی بكەم، خۆتان دروستی بكەنەوە
ــ دانیشتن لەگەڵ ئۆپۆزیسیۆنی ئێرانی و چەند سەرنجێک