• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٢١ی نوامبری ٢٠١٧ی زایینی - ٣٠ی خەزەڵوەری ١٣٩٦ی هەتاوی  

خوێندنەوەى ڕاسان لە هەڕەشەکانى سپاى پاسداران بۆ سەر حکوومەتى هەرێمى کوردستان

زایینی: ٢١-١١-٢٠١٦ - هەتاوی: ١٣٩٥/٠٩/٠١ - ١٧:١٤ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
خوێندنەوەى ڕاسان لە هەڕەشەکانى سپاى پاسداران بۆ سەر حکوومەتى هەرێمى کوردستان
ئەلبورز ڕوئینتەن

ئه‌مساڵ هەڕەشەکانى سپاى پاسداران کەوتۆتە قۆناغێکى نوێوە، چوونکە ڕەنگى هەڕەشەکان جیاوازییەکى زۆرى لەگەڵ ساڵانى پێش هەیە، ئەو هەڕەشانە سەرەڕاى ترس، پیلانەکانى ڕێژیمیش نیشان دەدات.

- بۆچى دەبێ سپاى پاسداران وا بە ئاشکرا بەرانبەر بە هەرێمى کوردستان و هێزەکانى ڕۆژهەڵات و بەتایبەتى ڕێبەرایەتیى ڕاسان واتە حیزبى دێموکراتى کوردستانى ئێران کە بە "لەنێوچوو" ناوی دەبات، هەڕشە بکات؟

- بۆچى ئەو هەڕەشانە ڕاستەوخۆ ئاراستەى حکوومەتى هەرێم و سەرۆکایەتیى هەرێم بکات، لە کاتێکدا ئەوە لە دەرەوەى ڕیسا و عورفى دیپلۆماسییە؟

_ پیلانى پشتى پەردەى ئەو هەڕەشانە چین؟

وەڵامدانەوەى پرسیارەکانى سەرەوە تابلۆیەکى ڕوونى سیاسەتى سپاى پاسداران بەرانبەر بە کورد وێنا دەکات. وەڵامى پرسیارى یەکەم دەگەڕێتەوە بۆ سەرکەوتنى ڕاسان لە پلان و جێبەجێ کردنى. چوونکە هەڕەشەى سپاى پاسداران وەک لە ناوەکەی دیارە، گرنگترین ناوەندى پاراستنى ڕێژیم لە مەترسیی هەبوونى ڕاسان بۆ سەر هەبوونى ڕێژیم دەگەڕێتەوە، ئەگەر وا نەبا هۆکارى هەڕەشە کردنى هێزێک کە خۆى بانگەشەى نەمانى دەکات، مانای نەبوو.

بەڵام ناچار بوونیان بە پەنا بردنە بەر هەڕەشە و گوڕەشە، ڕاستیى مه‌زنیی و شوێندانەر بوونى ڕاسان دووپات دەکاتەوە، ئەویش لە زمانى دوژمنەوە. کە واتە گرنگیى پشتیوانیى کورد بەگشتى بۆ ڕاسان جارێکى دیكه‌ بۆ هەمووان دەردەکەوێت، چوونکە دوژمن بە هەموو شێوەیەک دژایەتی دەکات و کوردیش دەبێ بە هەموو شێوەیەک پشتیوانیى لێ بکات.

وەڵامى پرسیارى دووەم لە هێزى سپاى پاسداران لە دەستێوەردان لە وڵاتانى ناوچە سەرچاوە دەگرێت. چوونکە هەڕشە بۆ سەر دامەزراوەیەکى یاسایى کە پێوەندیى دیپلۆماسیی لەگەل ئێران هەبێت بە شێوەیەک کە ئەو هەڕشانە باس لە هێرش کردنە سەر و دوژمنایەتى کردنى ئەو هەرێمە بکات، نیشان دەدات کە سپاى پاسداران لە هەموو ئەو پیلانانەى ده‌یهه‌وێ لە حکومەتى هەرێمى کوردستان جێبەجێی بکات بە جۆرێک بێ‌هیوا بووە، بۆیە دەیهەوێ بە شێوەیەکى ڕاستەخۆ گوشار بهێنێت بۆ ئەوەى حکومەتى هەرێمیش بە گوشارى خۆى ڕێبەرایەتیى ڕاسان لە ڕاسان و بەرنامەکانى پاشگەز بکاتەوە.

تەنانەت چۆنیەتیى ئەو هێرشانەى خۆشیان لەکاتى هەڕەشەدا ناو دەبەن، وەکوو هێرشی مووشەکى و هێرشی دەوڵەتى مەرکەزیى عێراق بۆ سەر کوردستان و تەنانەت جوداکردنەوەى بەشێک لە هەرێمى کوردستان و پشتیوانیى ئاشکرا لە هێزیکى کوردى لە ڕێگەى لایەنگرانى خۆیان لە وڵاتانى دیكه‌، بۆ ئەوەى دژایەتیى حکومەت و سەرکردایەتیى سیاسیی باشوورى کوردستان بکەن. واتە بەرەوپێش چوونى ڕاسان گوشارى بۆ سپاى پاسداران هێناوە تا بەو شێوەیە ڕاستەوخۆ هەڕەشەکانى خۆى ئاراستەى باشووری کوردستان بکات.

وەڵامى پرسیارى سێیەم دەتوانرێت لە وشەکانى نێوئاخنی هەڕەشەکاندا دیارى بکرێت. سەرەتا کە پاسدار سەلامى لە تریبوونى فەرمیى کۆمارى ئیسلامى واتە لە مینبەرى نوێژى هه‌ینی بۆ هێرشی ڕاستەوخۆى ئێران بە هێزى مووشەکى و زەوینی بۆ سەر ناوەندەکانى شۆڕش کە دەکەونە دەرەوەى سنورى ئێران لەخۆ دەگرێت، هەڵبەت ترس لە وەڵامى حیزبی دێموکراتى کوردستان لە نێوخۆى وڵات بە شێوەیەک کە دۆخەکە ئیتر کۆنتڕۆڵ نەکرێت و هەروەها دروست بوونى هاوپەیمانییەکى نێونەتەوەیى لە دژایەتى کردنى ئێران لە کاتێکدا کە بانگەشەیەکى زۆر بۆ بەرنامەى بەرجام واى کرد کە بەشێوەیەک لە شێوەکان ئەو بەرنامەى خۆى بۆ پیلانى کۆتایی بەجێ بێڵێت.

هەڕەشەى دووهەم کە سەفەوى ڕاویژکارى خامنەیی بۆ کاروبارى سەربازى کردى و باسی لە پێکەوە لکانى باشوور و ڕۆژئاواى کوردستان کرد. زۆر شیکارى سیاسی و ڕۆژنامەوانى ئەو هەڕەشانەیان وا شی کردەوە کە مەبەست لێی دروست کردنى حکومەتێکى وا لە باشوورە کە نزیک بێت لە پەکەکە، بۆئەوەی بتوانێ لە ڕۆژئاوا نزیک بێت و بە شێوەیەک یەک بگرن کە هیلالى شیعەى ئێرانى کامڵ بکات.

بەڵام ئەوەى من لەو هەڕەشەیە تیگەیشتم ئەوە نەبوو، چوونکە ڕاوێژکارى خامنەىی بە باشی دەزانێت کە پارتى و سەرۆکى هەرێم بە هۆى سیاسەتیان لەو هاوکێشەیەدا جێگایان نابێتەوە، کەواتە مەبەستیان لەو هەڕەشەیە پێکەوەلکاندنى شنگال و ڕۆژئاوایە کە لە ڕووى جوگرافی و دەست ڕۆیشتوویى هێزێکى نزیک لە ئیران بۆ ئەو مەبەستە گونجاوە. هەر دواى ئەو هەڕەشانە بوو کە تورکیەش ئەو پیلانەى خوێندەوە و بە فەرمى ڕایگەیاند کە؛ ئێمە ڕێگە بە دروست بوونى قەندیلێکى دیكه‌ لە شەنگال نادەین.

لە دوایین هەڕەشەى خۆیاندا کە دیسان سەفەوى کردویەتى، باس لەوە دەکەن کە کوردستانى عێراق ناتوانێ هەنگاو بەرەو سەربەخۆىی بهاویژی چوونکە ئەو کات تەنیا ئاسمانى دەمێنێ. ئەوە بەو مانایەیه‌ کە ئێمە هەرێمى کوردستانمان لە هەموو لایەکەوە کۆنتڕۆڵ کردووە و تەنیا ڕیگەى ئاسمانى بەدەستەوە ماوە.

ئەگەر سەیرى دابەش بوونى هێزەکانى دۆستى ئیران بکەین، لەوانەیە ڕاست بێت، بەڵام بەشێکى زۆری ئەو گەمارۆیە لەلایەن هێزى کوردییەوەن کە ئێران ئەوانیش بە بەشێک لە خۆیان دەزانێ، بۆیە تەنیا ڕێگەى ئاسمان بۆ کورد لە باشوور جێدێڵێ. کەواتە پیلانى ئێران بۆ گوشار هێنان و وەشاندنى گورز له‌ حکوومەتى هەرێم لە ڕێگەى هێزە کوردییەکانەوه‌یە کە ئەگەر بێتو ئەو هێزانە گوڕانکارى لە سیاسەتى خۆیان بۆ پاراستنى بەرژەوەندیى نەتەوەیى بکەن، هەموو ئەو پیلانانە سەرناگرێت و ڕاسان زۆر ئاسانتر سەردەکەوێ و کورد و دونیا لە دوژمنێکى دڕەندە نەجاتى دەبێت. سەرئەنجام ئەوەى لە هەڕەشەکانى سپاى پاسداران دەردەکەوێ، سەرەتا لە ترسی ڕاسانە دواتر لە دیتنى سەرکەوتنى ڕاسانە، لە کۆتاییشدا نیشاندانى پلانەکانیەتى بۆ دژایەتیى کورد و ڕاسان. ئەوە نیشان دەدات ئەرکى ڕاسان چەند قورسە، بەو قورسییە کە توانیویەتى چەندە بەهێز بێت کە دوژمن توشی پەلاقاژە بکات، هیوامان بۆ ڕزگارى دوو ئەوەندە زیاد دەکات.
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧١٢ لەم ژمارەیەدا:

ــ شکستی کەرکووک کۆتایی ڕێگا نییە!
ــ ڕەوایی چەک و ڕەوایی خەڵکی
ــ ئیمپراتوریی نافەرمی ئێرانی
ــ دەسەڵات و کۆمەڵگا