کوردستان میدیا: بەمەبەستی ڕێزگرتن لە ڕۆژی پێشمەرگەی کوردستان، ڕۆژی ٢٦ی سەرماوەز، ڕێوڕەسمێک لە وڵاتی سۆئێد بەڕێوە دەچێت.

بەپێی هەواڵی گەیشتوو بە ماڵپەڕی کوردستان میدیا؛ کۆمیتەکانی ئۆرێبرۆ، ڤێسترۆس و ئیسکیلستوونای حیزبی دێموکراتی کوردستانی ئێران، بەمەبەستی ڕێزگرتن لە ڕۆژی ٢٦ی سەرماوەز، ڕۆژی پێشمەرگەی کوردستان، ڕۆژی شەممە ڕێکەوتی ١٧ی دێسامبر، ڕێوڕەسمێک لە گڵۆبێن برون سپارکێن بە بەشداریی هونەرمەندان شێرکۆ مەریوانی و هەژار دهۆکی بەڕێوە دەبەن.

٢٦ی سەرماوەزی ساڵی ١٣٩٥ی هەتاوی، ٣٢ ساڵ بەسەر دیاریکرانی ٢٦ی سەماوەز وەکوو ڕۆژی پێشمەرگەی کوردستان تێپەڕ دەبێت.

ئەندامان و لایەنگرانی حیزبی دێموکراتی کوردستانی ئێران، ساڵانە لە ڕۆژی ٢٦ی سەرماوەز، ڕۆژی پێشمەرگەی کوردستان، چالاکیی تەبلیغی بەڕێوە دەبەن و ڕێز لەو گیانفیدایی و خەباتە دەگرن کە پێشمەرگەکانی کوردستان دژ بە داگیرکەرانی کوردستان کردوویانە و دەیکەن.

شایانی باسە کە لە پلینۆمی دووهەمی كۆمیتەی ناوەندیی هەڵبژێردراوی كۆنگرەی شەشەمی حیزبی دێموکراتی کوردستانی ئێران، ڕۆژانی ١٥تا ٢٤ی گەلاوێژی ١٣٦٣ی هەتاوی، ڕۆژی٢٦ی سەرماوەز وەكوو ڕۆژی پێشمەرگەی كوردستان دیاری كرا.