• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٢٨ی مارسی ٢٠١٧ی زایینی - ٠٨ی خاکەلێوەی ١٣٩٦ی هەتاوی  

وتاری مستەفا هیجری لە کۆنفڕانسی سەربەخۆیی کوردستان لە داهاتوودا،ڕووبەڕووبوونەوە و دەرفەتەکان

زایینی: ٢١-١٢-٢٠١٦ - هەتاوی: ١٣٩٥/١٠/٠١ - ١٠:٤٨ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
وتاری مستەفا هیجری لە کۆنفڕانسی سەربەخۆیی کوردستان لە داهاتوودا،ڕووبەڕووبوونەوە و دەرفەتەکان
له‌ پانێلەکانی پێشوودا باسگه‌لێكی ده‌وڵه‌مه‌ند هاتنە ئارا و دیبه‌یتێكی شارستانیانە و دێموكراتیك بەڕێوەچوو. هه‌ركه‌سه‌و بیر و بۆچوونی خۆی له‌پێوه‌ندی له‌گه‌ڵ كێشه‌یه‌كی گه‌وره‌ كه‌ ئه‌مڕۆ هه‌موومان له‌گه‌ڵی به‌ره‌وڕووین و ئه‌ویش بابه‌تی ڕاگه‌یاندنی سه‌ربه‌خۆییه‌ و چۆنیه‌تیی ڕاگه‌یاندنی، باسی لێوه‌ كرا و سەرجەم باسەکان جێگای لێ‌فێربوون بوون‌.

پێش له‌وه‌ی باس لە بۆچوونی خۆم له‌پێوه‌ندی له‌گه‌ڵ ئه‌و‌ بابه‌ته‌ گرنگه‌دا بکەم، پێمخۆشە هه‌ڵكه‌وتێكی مێژووییتان بۆ باس بكه‌م كه‌ ئه‌مڕۆ ئێمه‌ تێیداین. ئه‌مڕۆ ٢٦ی سه‌رماوه‌ز، ساڵڕۆژی دوو بۆنه‌ی گرنگی مێژووییه لە ‌حیزبی دێموكراتی كوردستانی ئێراندا. ئه‌و ڕۆژه‌ له‌ سه‌رده‌می كۆماردا، به‌ گرتنی دوایین پایه‌گاكانی ڕێژیمی پاشایه‌تی، كۆماری كوردستان له‌ مه‌هاباد ده‌سه‌ڵاتی ئه‌و ڕێژیمه‌ی پاك كرده‌وه‌، بۆیه‌ حیزبی دێموكراتی كوردستان ئه‌و ڕۆژهی‌ ناو ناوه‌ ڕۆژی پێشمه‌رگه‌ی كوردستان. لێره‌ له‌ كوردستانی باشوور، ئه‌و ڕۆژه‌ به‌ ڕۆژی ئاڵای كوردستان ناسراوه‌.

پێشمه‌رگه‌ و ئاڵا، هه‌ردووكیان دوو ده‌سكه‌وتی مێژوویی كۆماری كوردستانن كه‌ ئێستا بوونه‌ته‌ سیمبۆلی كوردایه‌تی و ده‌توانم بڵێم له‌ هه‌موو به‌شه‌كاندا ڕێزی بۆ داده‌نرێ. بۆیه‌ ئیزن ده‌خوازم له‌لایه‌ن هه‌موومانه‌وه‌ له‌و ڕۆژه‌دا سڵاوێكی گه‌رم و پیرۆزبایی پێشكه‌ش به‌ هه‌موو ئه‌و پێشمه‌رگانه‌ بكه‌م كه‌ زۆر قاره‌مانانه‌ به‌رگرییان له‌ خاكی كوردستان كردووه‌ و ئێستاش به‌رگریی لێده‌كه‌ن و له‌و ڕێگایه‌دا گیانی خۆیان پێشكه‌ش كردووه‌. سڵاو بۆ بنه‌ماڵه‌كانیان و هه‌روه‌ها ڕێزی دووباره‌ بۆ ئاڵاكه‌مان، ئاڵای كوردستان.

هاوڕێیانی به‌ڕێز من له‌پێوه‌ندی له‌گه‌ڵ بابه‌تی ئه‌و كۆنفڕانسه‌دا‌، ئه‌وه‌ی كه‌ ده‌مهه‌وێ قسه‌ی له‌سه‌ر بكه‌م،‌ ئه‌وه‌ نییه‌ كه‌ بڵێم له‌ باری یاساییه‌وه‌ كورد مافی خۆیه‌تی ده‌وڵه‌تی سه‌ربه‌خۆی خۆی ڕاگه‌یه‌نێ، چوونكە له‌پێوه‌ندی له‌گه‌ڵ ئه‌و پرسه‌دا خۆشه‌ویستانی دیكه‌ له‌ پانێله‌كانی دیكه‌دا باسیان كرد. هه‌روه‌ها ئه‌وه‌ش باس ناكه‌م کە ئوسوله‌ن پرسی سه‌ربه‌خۆیی كوردستان بۆ كورد جێگای پرسیاره‌ یا قابیلی قبووڵه‌ یان نا، چوونكە پرسی سه‌ربه‌خۆیی و بوونی ده‌وڵه‌تی كوردستان له‌ ئێستادا هێنده‌ بووەته‌ شتێكی ڕۆژانه‌ و بووەته‌ ویست و داخوازی بنه‌ڕه‌تیی گه‌لی كورد له‌ هه‌موو به‌شه‌كاندا، کە ته‌نانه‌ت ئه‌گه‌ر كه‌س یا كه‌سانێكیش هەبن كه‌ بڕوایان پێی نه‌بێ، شه‌رم ده‌كه‌ن له‌وه‌ی كه‌ باسی بیروبۆچوونی خۆیان بكه‌ن. به‌ڵام ئه‌وه‌ی زۆر گرینگه‌، هێندێ له‌ هاوڕێیان له‌ پانێله‌كانی دیكه‌دا ئیشاره‌یان پێكرد و منیش ده‌مهه‌وێ بچمه‌وه‌ سه‌ر ئه‌وانه،‌ ئه‌ویش؛ ده‌رفه‌ته‌كان و گرفته‌كانه‌. هه‌ردووكلای ئه‌و پرسه‌، له‌ڕاستیدا جێگای توێژینه‌وه‌ و خوێندنه‌وه‌ی وردن كه‌ پێویسته‌ به‌ بێ موجامله‌، به‌دوور له‌ هه‌ست و سۆز بخرێته‌ به‌ر توێژینه‌وه‌ بۆ ئه‌وه‌ی كه‌ باشترین و كه‌م تێچووترین ڕێگاچاره‌ی بۆ دەستنیشان بکەین تاكوو بتوانین له‌پێوه‌ندی له‌گه‌ڵ ڕاگه‌یاندنی سه‌ربه‌خۆیی كوردستان به‌ شێوه‌یه‌كی دروست بچینه‌ پێشێ. ئه‌وه‌ی كه‌ ئه‌وڕۆ ده‌توانین وه‌كوو ده‌رفه‌ت باسی بكه‌ین، یه‌كێك له‌وانه‌ ئه‌وه‌یه‌ كه‌ نێو و نێوبانگی كورد له‌و ساڵانه‌دا به‌ شێوه‌یه‌كی ئیجابی به‌ هه‌موو دونیادا بڵاو بووه‌ته‌وه‌. پێشتر دوژمنانی ئێمه‌ زۆر شتی نه‌رێنی و خراپیان له‌سه‌ر ئێمه‌ باس ده‌كرد، به‌ گوێی دونیایان ڕاده‌گه‌یاند، به‌ڵام ڕووداوه‌كانی ئه‌و چه‌ند ساڵه‌ی دوایی، ئه‌و فیداكارییه‌ی پێشمه‌رگه‌ كردی تاكوو خاكی خۆی بپارێزێ، له‌ به‌رانبه‌ر هێرشی دواكه‌وتووترین و دڕنده‌ترین مرۆڤه‌كانی سه‌رده‌م كه‌ داعشن، هه‌روه‌ها تۆلێرانس و قبووڵی بۆچوونی جیاواز و نه‌ته‌وه‌ی جیاواز له‌ هه‌رێمی كوردستاندا، نموونه‌یه‌كی یه‌كجار زۆر جوان و ئه‌رێنی و قابیلی قبووڵ بووه‌ كه‌ به‌ هه‌موو دونیا نیشان درا، و له‌ هه‌مووی گرینگتر ئەوە بوو كه‌ هه‌موو دونیا بۆخۆیان له‌ كوردستاندا شاهێدی ئه‌و مه‌سه‌له‌یه‌ن. ئه‌وانه‌ بوونه‌ هۆی ئه‌وه‌ی حكوومه‌تی هه‌رێم ڕێزی تایبه‌تیی لێ بگیرێ، سه‌رۆكی هه‌رێم وه‌ك سه‌رۆک‌كۆماره‌كان پێشوازیی گه‌رمی لێ كرا، یارمه‌تیی ده‌وڵه‌ته‌كان هه‌رچه‌نی ئه‌وه‌ی كه‌ دوێنی برای به‌ڕێز كاك نێچیروان ئیشاره‌ی پێكرد و من پێی ده‌ڵێم به‌شێوه‌ی قه‌تره‌ چكان درا به‌ پێشمه‌رگه،‌ تاكوو به‌رگری بكا له‌ به‌رانبه‌ر هێزی ڕه‌شی داعشدا، به‌ڵام سۆز و خۆشه‌ویستیی بۆ لای كورد ڕاكێشا. ئه‌وه‌ ده‌رفه‌تێكی یه‌كجار باش بوو كه‌ بۆ كورد هاته‌ پێشێ. به‌ڵام له‌ڕاستیدا ده‌رفه‌ته‌كه‌ هه‌ر ئەوه‌ نه‌بوو كه‌ له‌و چه‌ند ساڵه‌دا هاته‌ پێشێ، چوونكە هه‌ر له‌ سه‌ره‌تای دامه‌زرانی حكوومه‌تی هه‌رێمی كوردستانه‌وه،‌ له‌ڕاستیدا تاقیكارییه‌كی باش له‌ پێوه‌ندی له‌گه‌ڵ شێوه‌ی ئیداره‌كردنی وڵات، به‌ خه‌ڵك نیشان درا. ئه‌و شێوه‌ به‌ڕێوه‌بردنه‌ له‌ نێو وڵاتانی داگیركه‌ری كوردستاندا بوو به‌ جێگای مه‌ترسی چوونكه‌ له‌ هه‌موو ناوچه‌دا و له‌ ئێران و خه‌ڵكی ئێران و كورد له‌ ئێران و سووریه‌ و توركیه‌ كه‌ هاتن بۆ هه‌رێمی كوردستان، سیستمێكی جیاوازیان دی له‌چاو حكوومه‌ته‌كانی خۆیان، بۆیه‌ ئه‌و عه‌لاقه‌ له‌ نێو هه‌موو كورده‌كاندا چووه‌ سه‌رێ كه‌ ئه‌وانیش له‌سه‌ر خاكی خۆیان بتوانن حكوومه‌تێكی له‌م چه‌شنه‌ دامه‌زرێنن. ئه‌وه‌ یه‌كێك له‌ هۆكاره‌كانی دوژمنایه‌تیی وڵاتانی داگیركه‌ر بوو له‌ پێوه‌ندی له‌گه‌ڵ پرسی هه‌رێمی كوردستان و پێشكه‌وتنی هه‌رێمی كوردستان چ له‌ باری ئابووری، چ خزمه‌تگوزاری و چ سیاسییه‌وه‌. بۆیه‌ گیروگرفت و كێشه‌كان ده‌ستی پێكرد و ده‌ستی ئه‌و وڵاتانه‌ی تێدا هه‌بوو و له‌ڕاستیدا مه‌به‌ستم ئه‌وه‌ نییه‌ بڵێم خۆمان بێ كه‌موكووڕی بووین، به‌ڵام ده‌ستی ئه‌وانی تێدا بوو بۆ ئه‌وه‌ی ڕوخسارێكی ناشیرین دروست بكه‌ن‌ له‌سه‌ر كورد و دیسان به‌ خه‌ڵكی پیشان بده‌ن كه‌ ئه‌وه‌ ئاكامی حكوومه‌تداریی كورده‌. ئه‌وه‌ش بۆ خۆی كۆسپێك بوو. ئێستا له‌ ئێران، حكوومه‌تی كۆماری ئیسلامیی ئێران و داروده‌سته‌كه‌ی له‌م پێوه‌ندییه‌دا به‌ شێوه‌یه‌كی به‌ربڵاو پڕوپاگاندا ده‌كه‌ن كه‌ ئەگه‌ر كورد و نه‌ته‌وه‌كانی دیكه‌ حكوومه‌تیان ده‌وێ، ئه‌وه‌ نموونه‌كه‌ی له‌ باشووری كوردستاندا ببینن كه‌ حیزبه‌كان پێكه‌وه‌ ناسازن، نازانن ڕێگاچاره‌ی دێموكراتیك بۆ گیر و گرفته‌كانیان ببیننه‌وه‌، له‌ باری ئابوورییه‌وه‌ كۆسپیان هه‌یه‌ و هه‌زاران كێشه‌ی دیكه‌ی ئاوا دێننه‌ به‌رچاوی خه‌ڵك تاكوو ئه‌و ڕوخساره‌ جوانه‌ بشارنه‌وه‌. هه‌رچه‌ند به‌خۆشییه‌وه‌ ئێستا خه‌ڵك چاوی كراوه‌یه‌، ڕاگه‌یه‌نه‌كان هه‌موو هه‌واڵه‌كان بڵاو ده‌كه‌نه‌وه‌ و حكوومه‌ته‌ داگیركه‌ره‌كان ناتوانن وه‌كوو ڕابردوو چه‌واشه‌كاری‌ بكه‌ن. له‌ پانێله‌كانی پێشوودا زۆر باسی ئه‌وه‌ كرا كه‌ كۆسپ له‌سه‌ر ڕێگاماندا هه‌یه‌ و گرنگترینی ئه‌و كۆسپانه‌ وڵاته‌ داگیركه‌ره‌كانن. ئه‌وانه‌ هه‌مووی ڕاسته‌ و له‌ جێی خۆیه‌تی. باس له‌وه‌ ده‌كرێ كه‌ ئه‌گه‌ر سه‌ربه‌خۆیی كوردستان ڕاگه‌یه‌ندرێ، دۆخی ئابووریی خه‌ڵك خراپتر ده‌بێ؟ چۆن ده‌كرێ ئێستا كه‌ خه‌ڵك له‌گه‌ڵ گرفتێكی مه‌زنی ئابووری به‌ره‌وڕووه‌، گرفتێكی دیكه‌شی پێ زیاد بكرێ؟ یا ئه‌و گرفتانه‌ی دیكه‌ كه‌ ئێستا له‌ حكوومه‌تی كوردستاندا هه‌یه‌. ئه‌وانه‌ هه‌مووی درووسته‌ به‌ڵام، پرسی سه‌ره‌كیی ئێمه‌ پرسی نێوخۆیی خۆمانه‌. واتە له‌ هه‌رێمی كوردستانی عێراقدا، ئه‌وه‌ی كه‌ بنه‌مای سه‌ره‌كیی پرسه‌كه‌یه‌ له‌پێوه‌ندی له‌گه‌ڵ ڕاگه‌یاندنی سه‌ربه‌خۆییدا، دیاره‌ كه‌ ده‌بێ ئه‌و گرفتانه‌ی وڵاتانی دراوسێ بۆمانی پێكدێنن له‌به‌رچاو بگرین، به‌ڵام بنه‌ڕه‌تی پرسه‌كه‌ خۆمانین. ئه‌گه‌ر بۆ خۆمان له‌ چوارچێوه‌ی ئه‌و هه‌رێمه‌دا بتوانین یه‌كگرتوو بین و هێندێ هێڵی ستراتیژی و هێڵی سوور دیاری بكه‌ین كه‌ لێی تێپه‌ڕ نه‌بین، ده‌توانین به‌سه‌ر هه‌موو كۆسپه‌كاندا زاڵ بین. بنه‌ڕه‌ت خۆمانین، به‌ڵام ئه‌گه‌ر ئه‌وه‌ نه‌بێ، ئابووریمان ببووژێته‌وه‌ و گرفته‌كانی ئێستاش لاچن، به‌ڵام ئه‌گه‌ر گیر و گرفتی نێوخۆمان بمێنێ، دوژمنانمان له‌ درزی ئه‌و گرفتانه‌وه‌ دێنه‌ ناوه‌وه‌ و قڵش پێكدێنن و كۆسپه‌كانمان گه‌وره‌ ده‌كه‌نه‌وه‌ له‌نێو خۆماندا. ئه‌وه‌ یه‌كێك له‌ بابه‌ته‌ سه‌ره‌كییه‌كانه‌. به‌ڵام ده‌رفه‌تی دیكه‌شمان كه‌ ده‌بێ ئیشاره‌ی پێ بكه‌ین، ئه‌وه‌یه‌ كه‌ له‌ مێژووی دابه‌شكردنی كوردستانه‌وه‌ تا ئێستا قه‌ت نه‌بووه‌ دوژمنان و داگیركه‌رانی كورد به‌قه‌د ئێستا گیروگرفت و كێشه‌یان هه‌بێ و لاواز بووبێتن ته‌نانه‌ت به‌ ئێرانه‌وه‌. به‌ڕێز پڕۆفیسۆر عه‌لائودین باسی هێز و توانای ئێرانی كرد، من به‌ پێچه‌وانه‌ ئه‌و مه‌سه‌له‌ ده‌بینم. جگه‌ له‌و پێسته‌ ڕواڵه‌تییه‌ی له‌ ئێراندا هه‌یه‌ كه‌ له‌ ڕواڵتدا ئه‌مه‌یە‌ و ده‌نگی لێوه‌ نایه‌، له‌ قووڵایی كۆمه‌ڵگای ئێراندا ئه‌و ناڕه‌زایه‌تی و ده‌ردیسه‌رییانه‌ی خه‌ڵك هه‌یه‌تی، له‌ ماوه‌ی ٣٧ ساڵی ڕابردوودا ڕۆژ به‌ ڕۆژ زیادی كردووه‌ و ئێستا له‌ هه‌موو كاتێكی ئه‌و ٣٧ ساڵه‌ زیاتره‌. بۆ هێز یا حكوومه‌تێك چ ئێران و توركیه‌ و چ كوردستان بێ، گرنگ ئه‌وه‌ نییه‌ چه‌نده‌ چه‌كی هه‌یه‌ و چۆن خه‌ڵك داده‌پڵۆسێ و به‌ندی ده‌كا و ئیعدام ده‌كا بۆ ئه‌وه‌ی بێده‌نگییه‌كی نیسبی له‌ نێو خه‌ڵكدا پێكبێنێ، گرنگ ئه‌وه‌یه‌ قووڵایی ئه‌و كۆمه‌ڵگایه‌ چی تێدایه‌. ئێران قووڵایی كۆمه‌ڵگاكه‌ی ده‌كوڵێ. ئه‌و زانیارییانه‌ی ئێستا له‌به‌رده‌ستدان جگه‌ له‌ سیاسه‌تێك كه‌ ئێستا ترامپ و ئورووپا و وڵاتانی ده‌وروبه‌ر باسی ده‌كه‌ن، وا نیشان ده‌دا كه‌ داهاتووی ئێران به‌ره‌و خراپ بوونه‌. له‌بیرمان نه‌چێ ئه‌و ده‌وڵه‌تانه‌ی ڕووخان، له‌ سۆڤیه‌ته‌وه‌ بگره‌ تا به‌هاری عه‌ره‌بی، هیچکامیان له‌ داپڵۆسین و ئێعدامی خه‌ڵك كه‌میان نه‌هێنابوو، به‌ڵام هیچان بایه‌خی ناڕه‌زایه‌تیی قووڵایی كۆمه‌ڵگای خۆیان نه‌دیت. هه‌ر ئه‌و كۆمه‌ڵگایه‌ی ئه‌وان دایانده‌پڵۆسی و پێیان وابوو ده‌توانن بێده‌نگی بكه‌ن، ئه‌و كۆمه‌ڵگایه‌ بوو كه‌ دیكتاتۆره‌كانی ڕووخاند و كۆماری ئیسلامیش له‌وه‌ به‌دوور نییه‌. به‌تایبه‌تی حكوومه‌تێك كه‌ له‌گه‌ڵ ڕه‌وتی ئه‌مڕۆی دونیادا ناته‌بایه‌. بۆیه‌ گه‌ر زۆر كورتی بكه‌مه‌وه‌، ئه‌وه‌یه‌ كه‌ پشت به‌ خه‌ڵكی خۆمان ببه‌ستین، هه‌وڵ بده‌ین له‌ چوارچێوه‌ی قازانج و به‌رژه‌وه‌ندیی خه‌ڵكه‌كه‌ماندا هه‌نگاو بنێین، ئه‌و گیر و گرفتانه‌ی له‌ باری سیاسییه‌وه‌ له‌ كوردستانی عێراقدا هه‌یه‌، كۆتایی پێ بێنین. زۆرجار باس له‌وه‌ ده‌كرێ له‌ شێوازی دێموكراسیدا گیروگرفت ده‌بێ، به‌ڵێ، له‌ شێوه‌ی دێموكراسیشدا ده‌نگی جیاواز هه‌یه‌. به‌ڵام به‌ڕێزان ئه‌وه‌ی له‌ كوردستاندا ڕوو ده‌دا، كاره‌ساته‌ دێموكراسی نییه‌. دێموكراسی ڕێڕه‌وێكه‌ كه‌ ڕێگاچاره‌ بۆ دیتنه‌وه چاره‌سه‌ری‌ كێشه‌كان ده‌دۆزێته‌وه‌. ئه‌و شێوازانه‌ی كه‌ به‌ جێگای دیتنه‌وه‌ی ڕێگا بۆ چاره‌سه‌ری كێشه‌كان، كێشه‌كان كه‌ڵه‌كه‌ ده‌كه‌نه‌وه‌، ئه‌وانه‌ دێموكراسی نین، دژی دێموكراسین. بۆیه‌ من هیوادارم له‌و هه‌لومه‌رجه‌ ناسكه‌دا كه‌ هه‌رێمی كوردستانی عێراق پێیدا تێپه‌ڕ ده‌بێ و له‌ ڕاستای بڕیارێكی چاره‌نووسسازدا هه‌نگاو هه‌ڵده‌گرێ، له‌پێش هه‌موو شتێكدا، له‌پێش ڕاگه‌یاندنی سه‌ربه‌خۆییدا، گیروگرفته‌كانی خۆی له‌ باری سیاسییه‌وه‌ چاره‌سه‌ر بكات و به‌و شێوه‌ بتوانێ هێزی هه‌موو خه‌ڵكه‌كه‌ له‌پێوه‌ندی له‌گه‌ڵ ئه‌و ئامانجه‌ به‌رز و پیرۆزه‌دا ته‌یار و تۆكمه‌ بكات. هیوادارم له‌و ئاراسته‌یه‌دا سه‌ركه‌وتوو بن.
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٦٩٧ لەم ژمارەیەدا:

ــ پەیامی نەورۆزیی سکرتێری گشتیی حیزب
ــ بۆ ناتوانین خۆمان به خۆمان بناسێنین
ــ نەورۆز، ڕسکانەوە و ڕاسان
ــ پانۆرامای ڕاسان
  • داهاتووى کورد لە پەنجەرەى نەورۆزەوە داهاتووى کورد لە پەنجەرەى نەورۆزەوە
    مێتولۆژیش وەک میژوو لە هەگبەى بیرەورىی هەر نەتەوەیەکدا جێگەى تایبەتی خۆى هەیە، تەنانەت بەشێک لەوانە بوونەتە بەشێکى دانەبڕاو لە پێناسەى نەتەوەکان. وەک هەر دابێکى دیکە کە لە ژیانى ڕۆژانەدا دووبارە دەبنەوە و فەرامۆش ناکرێن و پەرەیان پێ دەدرێن.
  • شان به شانی یەک بەرەو داهاتوویەکی ڕوون شان به شانی یەک بەرەو داهاتوویەکی ڕوون
    باشووری زاگرۆس له درێژەی یەک ساڵی ڕابردوودا، بیست و چوارەمین ژمارەی خۆی خستووەتە بەر ڕاو بووچۆنی خوێنەرانی بەڕێز و بیست و پێنجەمین ژمارە‌ی خۆیشی پێشکەشی هەموو ئەو کەسانە دەکات کە تەنانەت بە یەک ڕستەش له جێبەجێ کردنی ئەرکی ئەم لاپەڕەیەدا هاوبەش و هاوکار بوونه. بێ‌شک به بێ یارمەتیی ئەو بەڕێزانه لاپەڕەی باشووری زاگرۆس قەت نەیدەتوانی پێ بنێتە دووهەمین ساڵی چالاکیی خۆی و درێژه به ئەرکه نەتەوەییه‌کەی خۆی بدات.
  • بۆ ناتوانین خۆمان به خۆمان بناسێنین بۆ ناتوانین خۆمان به خۆمان بناسێنین
    هەڵبەت دەبێ ئاماژه بکرێت که؛ ئەمه تەنیا کێشەی چالاکی کرماشانی نیه، بەڵکوو به‌داخەوه به هۆی نەبوونی مێژوویەکی نووسراو، خەڵکانی ئەو ناوچانەش لەو فکره‌دان که له کرماشان و ئیلام بزاڤی کوردیمان نەبووه و شۆڕش لەوێ ڕنگ و بۆنی نەبووه، ڕاستییەک که نیشاندەری نامۆیی کورد له کورد و مێژووی خۆیەتی، پرسێک که تاڵیەکەی ئەوەندەیه که بووەته هۆی گەشه‌نەسەندنی بزاڤی ڕزگاریخوازانەی کوردستان له بست به بستی وڵاتەکەمان.
  • پانۆرامای ڕاسان (٢) پانۆرامای ڕاسان (٢)
    ٣ی ڕەزبەر: یەكیەتیی خوێندكارانی دێموكراتی كوردستانی ئێران داوای لە خوێندكاران كرد پشتگیریی لە ڕاسان بكەن.
  • پانۆرامای ڕاسان (١) پانۆرامای ڕاسان (١)
    ٢٨ی ڕەشەمەی ١٣٩٤: لە ڕێوڕەسمێكی پڕشكۆی نەورۆزیدا لە سنوورەكانی كوردستانی ڕوژهەڵات، بە ئامادەبوونی ئەندامانی ڕێبەری، كادر، پێشمەرگە و ئەندامانی ئاشكرا و ژمارەیەك لە ئەندامانی نهێنیی حیزبی دێموكراتی كوردستانی ئێران و هەواڵنێرانی چەندین دەزگای میدیایی و تەلەڤیزیۆنی كوردی، بەڕێز مستەفا هیجری، سكرتێری گشتیی حیزبی دێموكرات دەستپێكی قۆناغێكی نوێی لە خەباتی خەڵكی كورد لە كوردستانی ڕوژهەڵات ڕاگەیاند كە دواتر بە "ڕاسان" ناوی دەركرد.
  • نەورۆز، ڕسکانەوە و ڕاسان نەورۆز، ڕسکانەوە و ڕاسان
    سروشت لە دیاردە دژبەر و پێکناکۆکەکاندا دەناسرێتەوە، ئەو کاتەی تاریکی و ڕووناکی، شین بوونەوە و وشکاندن، تینی هەتاو و سەهۆڵبەندان و سەرما، ڕەشەبا و شاخ، جووڵە و ڕاوەستان و .... لەبەرانبەر یەکدا ڕادەوەستن و پێکەوە و لە پێکهاتەیەکی پڕ لە داهێنان و نوێبوونەوەدا بە هەزاران سیماوە دەردەکەونەوە و ژیان دەنەخشێنن.
  • زانکۆ، یەکلاکەرەوی رەوتی سیاسی له کرماشان زانکۆ، یەکلاکەرەوی رەوتی سیاسی له کرماشان
    به بێ ناسینی سایکۆلۆژیای سیاسی‌-کۆمەڵایەتیی هەر کۆمەڵگایەک نه دەتوانین پلان و بەرنامەمان بۆی هەبێ، نه هیچ پلانێکی داڕێژراویش لەوێ سەردەکەوێ، ئەمه ئەسلێکی موتلەقه. ئێمەیش دەبێ ئەو ئەسله بۆ بەڕێوە بردنی چالاکییەکانمان و گەیشتن به ئامانجی دیاریکراومان لەبەرچاو بگرین و ڕەچاوی بکەین.
  • نیزامی پیاوسالار و پرسی ژن نیزامی پیاوسالار و پرسی ژن
    ئەوەی لە نووسراوە مێژووییەكاندا لەهەمبەر بابەتی فیمینیستیەوە بەرچاو دەكەوێ ‌‌و هەروەهاش لە قسە ‌و باسە فیمینیزمییەكاندا هەموو كاتێك بە شێوەیەكی جیدی ئاوڕی لێدەدرێتەوە، پێویستیی فێركردن ‌و بارهێنانی بوارە جۆراوجۆرەكان بۆ ژنان ‌و كچانە. مافی خوێندنیش گرینگترین مژار بووە ‌و ئیستاكەش هەر بەردەوامە.
  • مستەفا هیجری: با بیر بكه‌ینه‌وه‌ بۆ داهاتوومان مستەفا هیجری: با بیر بكه‌ینه‌وه‌ بۆ داهاتوومان
    دیاره‌ ئه‌وانه‌ باسێكی دوور و درێژن و ده‌كرێ كتێبیان له‌سه‌ر بنووسرێ، به‌ڵام ئه‌گه‌ر به‌ كورتی باسی بكه‌ین، ڕێكخستنی نوێ، به‌و واتایه‌ی كه‌ ئه‌و خه‌ڵكه‌ وه‌كوو هێزی تاك، تاكی ڕۆژهه‌ڵات، بتوانین كۆیان بكه‌ینه‌وه‌ و بیانكه‌ین به‌ هێزی شوێندانه‌ر. ئه‌وه‌ به‌ ڕێكخستن، ئه‌رك پێ ئه‌سپاردن، لێپرسینه‌وه‌ و زانیاری پێدانی ڕۆژ به‌ ڕۆژ ده‌چێته‌ پێشێ. ئه‌وه‌ ئه‌ركی بنه‌ڕه‌تیی حیزبی ئێمه‌ ده‌بێ.
  • ڕاسان، مۆتەكەی كۆماری ئیسلامیی ئێران! ڕاسان، مۆتەكەی كۆماری ئیسلامیی ئێران!
    واتە ئەگەر ئاژاوەنانەوەی ڕێژیم لە دەرەوە بۆ پاراستن و مانەوە و ئەمنییەتی ڕێژیم "تێز" بێت، ئەوە ڕاسان "ئانتی تێز"ە! لە پێكدادانی نێوان ئەم دوانەدا "سەنتێز" دێتە ئاراوە كە هەمان ڕزگاریی نەتەوەییە!
  • نیشانەناسیی ڕاسان وەک شەڕی نوێ نیشانەناسیی ڕاسان وەک شەڕی نوێ
    زمان وەک شتێکی دۆزراوە هەمان ئەمری بابەتێکی کۆمەڵایەتییە و زمانناسیی ڕاسان لە شەڕ "ساختارزدایی" (Deconstruit) لە خۆی دەکات و ئەو "ساختارزدایی"ە زمان ناسییە کە ئێمە بە نۆبەی خۆمان ئەوە وەک نیشانەشناسیی هەستانەوە دەزانین.
  • خورافە، ڕێگاخۆشکەرێک بۆ دواکەوتوویی کۆمەڵگا خورافە، ڕێگاخۆشکەرێک بۆ دواکەوتوویی کۆمەڵگا
    منداڵە ساواکەت لەسەر تاق دامەنێ شوومە و باش نییە! شەوان چاو لە ئاوێنە مەکە، تەمەنت لە غەریبی دەبەیتە سەر! شەوان بنێشت مەجاوە، شوومە و باش نییە! و....هتد.
  • ئەرکی تاکی کورد لە دژی خیانەت و جاشایەتی ئەرکی تاکی کورد لە دژی خیانەت و جاشایەتی
    خیانەت بە وڵات یانی خیانەت لە سەبەخۆیی و پاراستنی وڵات. خیانەت لە کاتی شەڕدا، یانی هاوکاری و بەشداری کردن لە گەڵ دوژمن لە کاتی شەڕدا.
  • مەرگی براکوژی مەرگی براکوژی
    بەڵام لەم سەردەمە نوێیەدا دۆخ و هەلومەرجی سیاسی و تێگەیشتنی کۆمەڵگا گەیشتۆتە ئاستێک کە چیدیکە ئەو جۆرە کردەوانە قبووڵ ناکا و هەرجۆرە پەنابردنە بەر شەڕێکی خۆکوژی مەحکووم دەکا.