• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٣٠ی مەیی ٢٠١٧ی زایینی - ٠٩ی جۆزەردانی ١٣٩٦ی هەتاوی  

ئاسۆ سالح له‌ وتووێژ له‌گه‌ڵ كوردستان سه‌باره‌ت به‌ كۆبوونه‌وه‌كه‌ی پارله‌مانی ئۆرووپا: ئەم جۆره‌ كۆبوونه‌وانه‌، ته‌واوكه‌ری خه‌باتی خه‌ڵك له‌ شار و پێشمه‌رگه‌ له‌ شاخن

زایینی: ٢١-١٢-٢٠١٦ - هەتاوی: ١٣٩٥/١٠/٠١ - ١٠:٥٠ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
ئاسۆ سالح له‌ وتووێژ له‌گه‌ڵ كوردستان سه‌باره‌ت به‌ كۆبوونه‌وه‌كه‌ی پارله‌مانی ئۆرووپا: ئەم جۆره‌ كۆبوونه‌وانه‌، ته‌واوكه‌ری خه‌باتی خه‌ڵك له‌ شار و پێشمه‌رگه‌ له‌ شاخن
وتووێژ: ئۆمید عه‌بدی

ڕۆژی چوارده‌ی مانگی دێسامبر، له‌ پارله‌مانی ئورووپا له‌ شاری ستراسبوورگی فه‌ڕانسه‌ كۆبوونه‌وه‌یه‌ك به‌ به‌شداریی پارله‌مانتارانی دێسكی ئێران به‌ڕێوه‌ چوو. نوێنه‌ری حیزبی دێموكراتی كوردستانی ئێرانیش بانگهێشتی ئه‌و كۆبوونه‌وه‌یه‌ كرابوو. ئاسۆ ساڵح وه‌كوو نوێنه‌ری حیزب له‌و كۆبوونه‌وه‌یه‌دا‌ به‌شداری كرد و وتارێكی پێشكه‌ش كرد. له‌م وتووێژه‌دا هه‌وڵ ده‌ده‌ین زۆرتر سه‌باره‌ت به‌و كۆبوونه‌وه‌ و ئامانجه‌كانی بزانین.

پرسیار: چ لایەنێک ئەو كۆبوونه‌وه‌یەی‌ ڕێكخستبوو و ئه‌و كه‌سانه‌ی‌ له‌ كۆبوونه‌وه‌كه‌دا به‌شدارییان كرد كێ بوون؟

وەڵام: كۆبوونه‌وه‌كه‌ به‌ هه‌وڵ و تێكۆشانی ڕێكخراو‌ی نه‌ته‌وه‌ بێ ده‌وڵه‌ته‌كان UNPO ڕێكخرابوو كه‌ حیزبی دێموكراتی كوردستانی ئێران یه‌كێك له‌ ئه‌ندامه‌ چالاكه‌كانی ئه‌و ڕێكخراوه‌یه‌. نزیك یه‌ك ساڵ ده‌بێت كه‌ ئه‌و ڕێكخراوه‌‌ به‌ پێوه‌ندی گرتن به‌ لایه‌نه‌ جۆراوجۆره‌كانی پارله‌مانی ئورووپا، هه‌وڵی دا كۆبوونه‌وه‌یه‌ك له‌و چه‌شنه‌ ڕێكبخات كه‌ به‌ خۆشحاڵیه‌وه‌ ئامانجی باشی بوو.

له‌ كۆبوونه‌وه‌كه‌دا‌ جگه‌ له‌ پارله‌مانتارانی دێسكی ئێرانی پارله‌مانی ئورووپا، نوێنه‌رێك له‌ كۆتله‌ گرینگه‌كانی پارله‌مان به‌شدار بوون. بۆ وێنه‌ له‌ گرووپی پارته‌ دێموكرات مه‌سیحییه‌كان، گرووپی حیزبه‌ سۆسیال دێموكراته‌ پێشكه‌وتووه‌كان، گرووپی حیزبه‌ كۆنسێرڤاتیڤه‌كان و نزیك حه‌وت كۆتله‌ی دیكه‌ی پارله‌مانی ئورووپا. به‌پێی نامه‌یه‌ك كه‌ به‌ده‌ستی ئێمه‌ گه‌یشتبوو بڕیار بوو كه‌ نوێنه‌ری ئێران و هه‌ندێ وڵاتی ناوچه‌ش وه‌كوو ئیسرائیل له‌و كۆبوونه‌وه‌دا به‌شداری بكه‌ن. به‌ڵام له‌ سه‌ره‌تای كۆبوونه‌وه‌كه‌ ڕایانگه‌یاند كه‌ باڵوێزی ئێران له‌ كۆبوونه‌وه‌كه‌ زۆر تووڕه‌یه‌ و به‌شداریی تێدا ناكات.

جگه‌ له‌ حیزبی دێموكراتی كوردستانی ئێرانیش، نوێنه‌ری حیزبی گه‌لی به‌لووچستان، نوێنه‌ری حیزبی ته‌زامۆنی دێموكراتیكی ئه‌حواز و نوێنه‌ری حیزبی لیبراڵ دێموكراتی ئازه‌ربایجان به‌شداری كۆبوونه‌وه‌كه‌ بوون.

پرسیار: نوێنه‌ری ئێران بۆچی تووڕه‌ بوو؟ چ دژ كرده‌وه‌یه‌كی پیشان دابوو؟

وەڵام: دیاره‌ كۆبوونه‌وه‌یه‌كی له‌و ئاسته‌ بۆ ئێران و ئه‌و پڕوپاگه‌نده‌یه‌ی كه‌ بۆ خۆی و دژ به‌ ئێمه‌ ده‌یكات، زۆر خراپ بوو. بۆ وێنه‌ پێشتر له‌م كۆبوونه‌وه،‌ هه‌یئه‌تێكی مه‌جلیسی ئێران سه‌ردانی پارله‌مانی ئورووپایان كردبوو و له‌ كۆبوونه‌وه‌یه‌كی هاوشێوه‌دا به‌شدارییان كردبوو. هه‌یئه‌تی مه‌جلیسی ئێران پێكهاتبوو له‌ كه‌مایه‌تییه‌ نه‌ته‌وه‌یی و ئایینیه‌كانی ئێران، بۆ وێنه‌ ئه‌رمه‌نی، یه‌هوودی و... هتد. نوێنه‌رانی مه‌جلیسی ئێران هه‌رچه‌شنه‌ هه‌ڵاواردنیان له‌ ئێران ڕه‌د كردبووەوە و حیزب و ڕێكخراوه‌ دژبه‌ره‌كانیان وه‌كوو تێرۆریست ناساندبوو. ئه‌وه‌ش تاڕاده‌یه‌ك بۆ باش پیشاندانی ڕووی ئێران بۆ ئورووپاییه‌كان كاریگه‌ریی هه‌بوو. كاتێك ئێمه‌ له‌و كۆبوونه‌وه‌دا به‌شداریمان كرد و هه‌ندێ ئامارمان سه‌باره‌ت به‌ ئێعدامییه‌كان، گیراوه‌كان، كوژرانی كۆڵبه‌ره‌كان و باروودۆخی ئابووری و سیاسی باس كرد و ناو و وێنه‌ی هه‌موو ئه‌و كه‌سانه‌ کە به‌ ئامار وترابوو، له‌ نێو پارله‌مانتاره‌كان بڵاو كرده‌وه‌، زۆر كاریگه‌ریی هه‌بوو كه‌ لە ڕووی ڕاستی ڕێژیمی ئێران تێبگه‌ن. ئێرانیش له‌وه‌ تووڕه‌ بوو. دیاره‌ تووڕه‌یی خۆشی ده‌ربڕیبوو و له‌گه‌ڵ زۆر پارله‌مانتار پێوه‌ندیی گرتبوو و هه‌وڵی دابوو كه‌ كۆبوونه‌وه‌كه‌ هه‌ڵوه‌شێنێته‌وه‌. ته‌نانه‌ت هەڕەشەی كردبوو كه‌ ئه‌وانیش له‌ سه‌ر پێشلكارییه‌كانی مافی مرۆڤ له‌ وڵاتانی ئورووپایی كۆبوونه‌وه‌ به‌ڕێوه‌ ده‌بەن. بهڵام كۆبوونه‌وه‌كه‌ زۆر به‌ باشی به‌ڕێوه‌ چوو و توانیمان تا ڕاده‌یه‌ك ئه‌و پڕوپاگه‌نده‌یه‌ی ئێران بۆ خۆی ده‌یكات، پووچه‌ڵ بكه‌ینه‌وه‌.

پرسیار: هیچ باسێك سه‌باره‌ت به‌ ڕاسان و ده‌س پێكردنی قۆناغی نوێی خه‌بات له‌ لایه‌ن حیزبی دێموكراتی كوردستانی ئێرانه‌وه‌‌ كرا؟

وەڵام: ئه‌و كه‌سانه‌ كه‌ وتاریان پێشكه‌ش كرد باسی بارودۆخی سیاسیی و گۆڕانكارییه‌كانی ناوچه‌كانی خۆیانیشیان كرد. ته‌نیا گۆڕانێك كه‌ له‌ ئاستی خه‌باتی سیاسی و جه‌ماوه‌ری له‌ هه‌موو ئێران هاتۆته‌ ئاراوه‌، مه‌سه‌له‌ی ڕاسانه‌. ئێمه‌ش وه‌كوو حیزبێك كه‌ ئه‌ركی به‌ڕێوه‌بردنی ئه‌و قۆناغە نوێیەی خه‌بات و دووباره‌ زیندوو كردنه‌وه‌ی ئه‌و ژیله‌مۆیه‌مان پێ‌سپێردراوه‌، به‌ شێوه‌ی به‌رین باسی ئه‌و قۆناغه‌مان كرد. ئێران زۆر هه‌وڵ ده‌دات كه‌ خۆی وه‌كوو ناوچه‌یه‌كی ئارام و سه‌قامگیر له‌ ده‌ره‌وه‌ پیشان بدات كه‌ گوایه‌ هه‌موو خه‌ڵك ڕازین و هیچ مه‌سه‌له‌یه‌ك له‌ نێوخۆی ئێران له‌ ئارادا نیه‌.

به‌ڵام ڕاسان ئه‌و درۆیه‌ ڕه‌د ده‌كاته‌وه‌ و باس له‌ سه‌ر ڕاسان پروپاگه‌نده‌ی ڕژیم پووچه‌ڵ ده‌كاته‌وه‌. له‌ به‌شێكی وتاره‌كه‌ی منیشدا، پاش باسی ڕه‌وشی مافی مرۆڤ، سیاسی و ئه‌منی ڕۆژهه‌ڵاتی كوردستان، ئاماژه‌م به‌وه‌ كرد كه؛‌ دژ به‌م سیاسه‌ته‌ كۆلۆنیالیستی و ڕاسیستییەی كۆماری ئیسلامیی ئێران، حیزبی دێموكراتی كوردستانی ئێران، له‌ دوو ساڵ پێش ئێستاوە قۆناغی نوێی خه‌باتی ڕاگه‌یاندووه‌ كه‌ له‌ لایه‌ن خه‌ڵك و به‌تایبه‌ت گه‌نجانی كوردستانەوە پێشوازیی زۆری لێكراوه‌. هه‌روه‌ها باسی پێكدادانه‌كانی نێوان هێزی پێشمه‌رگه‌ و سپای پاسداران كرا. له‌ كۆتاییشدا داوامان كرد بۆ خه‌بات بۆ پێكهێنانی سیستمێك له‌سه‌ر ئه‌ساسی مافی مرۆڤ، ئازادی، سێكۆلاریسم و دێموكراسی هاوكاریمان بكه‌ن.

پرسیار: ئه‌وان سه‌باره‌ت به‌ ڕاسان چ بۆچوونێكیان هه‌بوو؟

وەڵام: دیاره‌ به‌داخه‌وه‌ زانیاری كه‌متر به‌وان ده‌گات. مه‌به‌ست له‌ زانیارییش زۆرتر ڕاپۆرتی میدیاكانه‌ كه‌ جێی باوه‌ڕی ئه‌وانن. بۆ وێنه‌ پرسیاریان كرد كه‌ بۆچی زانیاریی كه‌متر به‌ ئێمه‌ ده‌گات. منیش ئاماژه‌م به‌ سێ خاڵ كرد: یه‌كه‌م ئه‌وه‌ كه‌ لە كوردستان ڕۆژنامه‌وان ناتوانن ئازادانه‌ كار بكه‌ن و پێوه‌ندی به‌ ده‌ره‌وه‌ بگرن، دووهه‌م ڕۆژنامه‌وانه‌ ده‌ره‌كییه‌كان ته‌نیا ده‌توانن له‌ تاران بمێننه‌وه‌ و ئیزنی ئه‌وه‌یان نیه‌ كه‌ بۆ كوردستان و ناوچه‌كانی دیكه‌ی نه‌ته‌وه‌كان سه‌فه‌ر بكه‌ن و ڕاپۆرت بنووسن، سێهه‌م ئه‌گه‌ر هه‌ندێ وڵات وه‌كوو ئامریكا و بڕیتانیا میدیایان به‌ زمانی فارسی هه‌یه‌، ئه‌و میدیایانه‌ هه‌واڵی ناوچه‌كانی ئێمه‌ ناگوازنه‌وه‌ و ئه‌وانیش وه‌كوو میدیاكانی ڕژیم تا ڕاده‌یه‌ك ئێمه‌ بایكۆت ده‌كه‌ن.

كاتێك باسی ئه‌و چه‌ند خاڵه‌مان كرد و به‌ شێوه‌ی چاپ كراو هه‌موو زانیاریه‌كانمان پێدان، زۆر سپاسیان كرد و وتیان كه‌ له‌ كۆبوونه‌وه‌كانی خۆیان له‌ سه‌ر ئه‌و مه‌سه‌له‌ زۆرتر كار ده‌كه‌ن. به‌ڵام به‌گشتی‌ ده‌گه‌ڕێته‌وه‌ بۆ سیاسه‌تی یه‌كێتی ئورووپا كه‌ ئایا له‌ به‌رانبه‌ر كۆماری ئیسلامی ده‌گۆڕدرێت؟ ئایا پاش ئه‌و گۆڕانكارییانه‌ كه‌ له‌ سیاسه‌تی نێونه‌ته‌وه‌یی و ناوچه‌ییدا له‌ ئارادایه‌، هه‌ڵسوكه‌وتی ئه‌وان چۆن ده‌بێت؟

پرسیار: به‌ گشتی سه‌باره‌ت به‌ خه‌باتی نه‌ته‌وه‌كانی ئه‌ران دژ به‌ كۆماری ئیسلامیی ئێران ڕایان چۆن بوو؟

وەڵام: پارله‌مانتارانی ئورووپا باسی ئه‌وه‌یان ده‌كرت كه‌ بۆچی ئۆپۆزیسیۆنی ئێران كه‌متر یه‌كگرتووه‌. ئێمه‌ش له‌ وه‌ڵامدا ئاماژه‌مان به‌ كۆنگره‌ی نه‌ته‌وه‌كانی ئێرانی فێدراڵ كرد كه‌ گه‌وره‌ترین و به‌ ئه‌زموونترین هاوپەیمانیی نێو ئۆپۆزیسیۆنی ئێرانه‌. به‌ خۆشحاڵیه‌وه‌ سێ ئه‌ندامی ئه‌و كۆنگره‌یه‌ش له‌و كۆبوونه‌وهدا‌ به‌شدار بوون كه‌ جه‌ختیان له‌ سه‌ر پۆتانسیێله‌كان و گرینگیی ئه‌و كۆنگره‌ له‌ ئێستا و داهاتوودا كرد. ئه‌مه‌ خاڵێكی به‌رچاو بوو بۆ زۆرتر ئاشنا بوونی ئه‌وان به‌ خه‌باتی نه‌ته‌وه‌كانی ئێران.

پرسیار: وه‌كوو پرسیاری كۆتایی پێتان وایه‌ ئه‌و كۆبوونه‌وه‌ چ ده‌سكه‌وتێكی هه‌بوو؟

وەڵام: من پێم وایه‌ ئه‌م كۆبوونه‌وه‌ یه‌كێك له‌ گرینگترین كۆبوونه‌وه‌كان بوو كه‌ به‌ به‌شداری ئۆپۆزیسیۆنی ئێران و سه‌باره‌ت به‌ ڕه‌وشی نه‌ته‌وه‌كانی ئێران به‌ڕێوه‌ چووه‌. گرینگیه‌كه‌ش له‌وه‌وە ده‌رده‌كه‌وت كه‌ تا چه‌ند خوله‌ك پێش كۆبوونه‌وه‌كه‌ ئێران له‌ ڕێگه‌ی جۆراوجۆرەوە هه‌وڵی دەدا ئه‌و كۆبوونه‌وه‌ هه‌ڵوه‌شێنێته‌وه‌. به‌داخه‌وه‌ هه‌ندێ هه‌وڵیشیان ئاكامی هه‌بوو. بۆ وێنه‌ بۆ ئێمه‌ پرسیار بوو كه‌ بۆچی درگای كۆبوونه‌وه‌كه‌ داخرا؟ بۆچی نه‌یانهێشت كه‌ میدیاكان له‌ نێو هۆڵی پارله‌مان بوونیان هه‌بێت؟ به‌ڵام ئه‌و خاڵانه‌ له‌ به‌رانبه‌ردا هیچ كاریگه‌رییه‌كی له‌ سه‌ر ناساندنی خۆمان، سیاسه‌تمان و خه‌باتمان بۆ پارله‌مانی ئورووپا نه‌بوو. تا ئه‌و جێگه‌یه‌ی ده‌كرا، توانیمان بیسه‌لمێنین كه‌ كۆمه‌ڵگای ئێران خه‌ریكه‌ ده‌كوڵێ، خه‌ڵك سه‌ركوت ده‌كرێن، خه‌باتی گه‌لانی ئێران خه‌ریكه‌ دووباره‌ په‌ره‌ ده‌ستێنێته‌وه‌، ڕاسان نموونه‌ی بوونی ئێراده‌یه‌كه‌ كه‌ له‌ ناو نه‌ته‌وه‌كانی ئێران خۆی به‌ شێوه‌ی كرده‌وه‌ پیشان داوه‌، هه‌موو ئه‌م خاڵانه‌ له‌م كۆبوونه‌وه‌دا باس كران ده‌توانێ له‌ سه‌ر ڕوانینی پارله‌مانتارانی ئورووپا و ئه‌و كه‌سانه‌ كه‌ سیاسه‌تی ده‌ره‌كیی یه‌كێتی ئورووپا داده‌ڕێژن، كاریگه‌رییان هه‌بێت. هه‌روه‌ها كه‌ ده‌بینین له‌ ئاستی سیاسه‌تی جیهانیدا خه‌ریكین هه‌ندێ گۆڕانكاری ده‌بینین، له‌ ناوچه‌شدا ئه‌و گۆڕانكارییانه‌ له‌ سه‌ر عه‌رز ده‌بیندرێن. ئێمه‌ پێویسته‌ بۆ هه‌رچه‌شنه‌ گۆڕانێك ئاماده‌ بین، ڕاسان ئه‌گه‌رچی خۆی گۆڕان پێكدێنێت، هاوكاتیش ئاماده‌ بوون بۆ ئه‌و گۆڕانكارییانه‌ و گواسته‌نه‌وه‌ی ده‌رفه‌ته‌كان به‌ قازانجی گه‌لی كورد له‌ ڕۆژهه‌ڵاتی كوردستانە. به‌شداری له‌ ئه‌و جۆره‌ كۆبوونه‌وانه‌ش ته‌واوكه‌ری خه‌باتی خه‌ڵك له‌ شار و پێشمه‌رگه‌ له‌ شاخن.
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧٠١ لەم ژمارەیەدا:

ــ کورتە وەڵامێک بۆ ئەو کەسە ئاکادمییانەی بەلارێ‌دا چوون
ــ لە دیکتاتۆری‌دا پەروەردە کەرەستەیەکە بۆ ژێردەستەیی
ــ ئابووری چەکی دەستی بەربژێرەکان بۆ فریودانی خەڵک
ــ ژێستی سیاسی و خەباتکاری
  • هەڵبژاردن لە ڕێژیمی كۆماری ئیسلامی، ئەزموونێكی ئەزموون كراو هەڵبژاردن لە ڕێژیمی كۆماری ئیسلامی، ئەزموونێكی ئەزموون كراو
    یەكەم: ئەوەی كە كۆڵەكە ڕووخاوەكانی ئابووری و سیاسی نۆژن كەنەوە تا شانۆگەریی هەڵبژاردنێكی هێمن و بێ‌كێشە وە پشت سەر بنێن.
  • کورد فاکتەرى یەکلاکەرەوە لە ئاڵۆزییەکانى ڕۆژهەڵاتى نێوەڕاست کورد فاکتەرى یەکلاکەرەوە لە ئاڵۆزییەکانى ڕۆژهەڵاتى نێوەڕاست
    لەبەرچاوگرتنى ئەو هەنگاوانە بۆ دەستەبەرکردنى مافى کورد پێویستە و زۆر ڕوونە ئەگەر خۆمان پێشقەدەم نەبین لە کار کردن لە ئاراستەى ئەو ستراتیژییە، سەرکەوتنى کاتى یا بانگەشەى ڕاگەیاندن ناتوانن داهاتوویەکى ڕوون بۆ کورد دابین بکەن.
  • پەرویز ڕەحیم قادر: ڕاسان، پێویستی به‌ هاتنه‌ئارای عه‌قڵیه‌تێكی فره‌ڕه‌هه‌ند و نوێ و مۆدێڕنه‌ پەرویز ڕەحیم قادر: ڕاسان، پێویستی به‌ هاتنه‌ئارای عه‌قڵیه‌تێكی فره‌ڕه‌هه‌ند و نوێ و مۆدێڕنه‌
    یه‌كێك له‌ كێشه‌كانی كورد نه‌بوونی یه‌كگرتووییه‌كی عه‌ینی له‌ چوارچێوه‌ی ده‌سه‌ڵات، دامه‌زراوه‌ یاخود ڕێكخراوێكی سه‌راسه‌ری بووه‌. له‌ ڕاستیدا ئه‌مه‌ش بۆ نه‌بوونی ڕه‌گه‌زه‌ مۆدێڕنه‌ ناسنامه‌ییه‌كان(مادی و نامادی) ده‌گه‌ڕێته‌وه‌ له‌و سه‌رده‌مه‌دا كه‌ درێژكراوه‌ی میژووی سیاسی-كولتووری و كۆمه‌ڵایه‌تی بارودۆخی كورد/كوردستان بووه‌ له‌ هه‌موو به‌شه‌كاندا، به‌تایبه‌ت له‌ ڕۆژهه‌ڵاتی كوردستان.
  • سەرۆک کۆمارێکی کۆیلە یان تەداروکاتچی؟ بە چ نرخێک؟ سەرۆک کۆمارێکی کۆیلە یان تەداروکاتچی؟ بە چ نرخێک؟
    ڕۆمییەکان لە نیوان کۆیلەکان و بەکرێگیراواندا جیاوازی دادەنێن و بە گوێرەی بیر و باوەڕی ئەوان، کۆیلە کە کەرەستەیەکە، لە نووسینی وەسیەتنامە بێ‌بەشە و ناتوانێ وەک شاهێد لە دۆسیەیەکدا شاهێدی بدات یان سکاڵا تۆمار بکات، بەڵام ئەگەر سەرپێچییەک بکات یان یاسایەک بخاتە ژێ پێ، دەبێ سزا بدرێ.
  • ئابووری چەکی دەستی بەربژێرەکان بۆ فریودانی خەڵک ئابووری چەکی دەستی بەربژێرەکان بۆ فریودانی خەڵک
    ڕۆژنامەی کەیهان لە ژمارەی چەند ڕۆژ پێشی خۆیدا ڕایگەیاند؛ کەسانێک لە گوند و شار و شارۆچکە بێبەش کراوەکانی ئێراندا، هەڕەشەیان لە خەڵکی بێ‌دەرەتان و کەم‌داهات و هەژار کردووە کە ئەگەر دەنگ بە ڕۆحانی نەدەن بوودجە و یارانەکانتان لێ دەبڕین.
  • کۆماری ئیسلامی – حەتمیەتی لە ناوچوون کۆماری ئیسلامی – حەتمیەتی لە ناوچوون
    ستراتیژی ئیدارەدانی نێوخۆییان بۆ جڵەوگیرکردنی کۆمەڵگا لەسەر دوو بنەمای سەرەکی خۆی دەبینێتەوە، یەکەم : سیاسەتی زەبر و زەنگ و تێرۆری دەوڵەتی. دووەم : کارکردن لەسەر ستراتیژێکی پەروەردەیی زەمینەساز بۆ بێ‌ئاگاکردن و جڵەوگیرکردن و دەستەمۆکردنی کۆمەڵگا لەڕێگای خستنەگەڕی فاکتەرە فەرهەنگی و ئابوورییەکان.
  • لە دیکتاتۆری‌دا پەروەردە کەرەستەیەکە بۆ ژێردەستەیی لە دیکتاتۆری‌دا پەروەردە کەرەستەیەکە بۆ ژێردەستەیی
    لە کۆماری ئیسلامی‌دا بەناو "پەروەردەی ئیسلامی"یان بەرز کردوەتەوە، هەموو شتێکیان بەستووەتەوە بەو تەوەرە لە بەر ئەوەی تەنیا بە خەڵکی بسەلمێن کە "وەلی فەقیهـ"، نوێنەری خودایە لە سەر زەوی.
  • کورتە وەڵامێک بۆ ئەو کەسە ئاکادمییانە کە بە لارێ‌دا چوون کورتە وەڵامێک بۆ ئەو کەسە ئاکادمییانە کە بە لارێ‌دا چوون
    ڕەنگە بەئەنجام گەیشتنی ئەم پڕۆسە ماوەیەکی زەمەنیی زۆری پێویست بێت کە بە ئاکام گەیشتنی زۆر ئەستەم دەبێت، بەڵام لە ئاکامدا بیر و هزری داگیرکەر تووشی ڕەپاڵدان (فرافکنی) دەبێت کە تەنانەت خۆیشی لە تەنیایی خۆیدا ناتوانێت کارە ناڕەواکەی ڕۆژی یەکەمی خۆی بە ناڕەوا بزانێت!!!
  • ژێستی سیاسی و خەباتکاری ژێستی سیاسی و خەباتکاری
    ئەم جۆرە سیمایانە کە ڕەنگە لێرە و لەوێ نموونەیان پەیدا ببێ، دەیانەوێ هەم لە ئاسوودەیی کایەکردن لە چوارچێوەی ڕێژیم بەشدار بن و هەم سیمای خەباتکارییان هەبێ، کە لە ڕاستیدا بوونەوەرێکن کە سیمای خەباتیان پێ ناشیرین دەکرێ و لە کاتی هەڵهاتنی هەتاوی ئازادی‌دا دۆڕاوییان زیاتر دەردەکەوێ.
  • ‌ئامانجی ئێمە ‌ئامانجی ئێمە
    ئەم قەڵایە کە حیزبی دێموکراتی کوردستان دایمەزراند و بناغەی دانا، ٧٠ ساڵە کە بەپێوەیە و نەک مەترسیی ڕووخانی لەسەر نیە، بەڵکوو لەگەڵ تێپەڕینی ڕۆژ و مانگ و ساڵدا، پتەوتر و قایمتر لە جاران، دەبێ بە قەڵای بەرخۆدانی ڕووناکبیری و هزری و چاوی وشیار و تیژی کۆمەڵگای کوردستان.
  • ئەمریکای ترامپ و دیکتاتۆرەکانی سەردەم ئەمریکای ترامپ و دیکتاتۆرەکانی سەردەم
    سەرەڕای تێپه‌ڕبوونی ماوەیەکى کورت لە ده‌سه‌ڵاتداریی ترامپ، پەیوەندیی نێوان ئەمریکا و دیکتاتۆرەکانی سەردەم زۆر ئاڵۆز بووە و تەنانەت زۆر لایەن كاتژمێری سفری ده‌ستپێكی شەڕی جیهانی کە لایەکی ئەمریکا بێت، ڕادەگەینن. ئەو جیاوازییەکی زۆری لەگەڵ حکوومەتی پێشووی ئۆباما هەیە کە خه‌ڵاتی نۆبێلی ئاشتیی وه‌رگرتبوو، بەڵام زۆر کێشەی چارەسه‌ر نەکراوی لە ڕۆژهەڵاتی نێوەڕاستدا بەجێهشت.
  • تاوتوێ کردنی هەڵبژاردن لە چەند پرسیاردا تاوتوێ کردنی هەڵبژاردن لە چەند پرسیاردا
    بابەتی هەڵبژاردن وەک چەمکێک کە لە دەسەڵاتێکی دێموکراتیکەوە، چۆتە نێو کۆماری ئیسلامی و هەر وەها بوونی دوو باڵی جیاواز لە پێكهاتەی سیاسی ڕێژیمدا، وای کردووە، کە لە ئێراندا هەم کۆمەڵگا و هەم لایەنە سیاسییەکانی دەرەوەی پێکهاتەی ڕێژیم لە هەڵوێست گرتن، لەسەر هەڵبژاردن تووشی جۆرێک دڕدۆنگی و ڕاڕایی بێن، و دەرئەنجامی ئەو ڕاڕا بوونەش، دەبێتە ئاوێک و دەچێتە ئاشێ کۆماری ئیسلامییەوە.
  • ڕۆستەم جەهانگیری: کورد بە بێ پارێزگاکانی ورمێ، کرماشان و ئیلام جەستەیەکی كه‌مئه‌ندامه‌ ڕۆستەم جەهانگیری: کورد بە بێ پارێزگاکانی ورمێ، کرماشان و ئیلام جەستەیەکی كه‌مئه‌ندامه‌
    کاتێک ئێمه باسی "ستەمی نەتەوەیی" دەکەین، ئاماژه به مێژوویەکی زۆرتر له ٢٥٠٠ساڵ لێوانلێو له داگیرکاری، ژینۆساید، ئاسمیلاسیۆن، داگیرکەر،چەوساندنەوه، هەڵداشتن، زیندان و له‌نێوبردنی ژینگەی نه‌ته‌وه‌یه‌ك دەکەین که وێڕای ئەو هەموو جینایەته، مێژوویه‌کی لێوانلێو له بەرخۆدان و شۆڕشی بۆ مانەوە و به‌دەستهێنانی ژیانێکی ئینسانی و سەروەریی سیاسی له بازنەی جوگرافیای خۆیدا تۆمار کردووه.
  • دەنگ‌دان بۆ بەردەوامیی ڕاووڕووت و جینایەت؟ دەنگ‌دان بۆ بەردەوامیی ڕاووڕووت و جینایەت؟
    بۆ شی کردنەوەی وەڵامی ئەو دوو پرسیارە سەرەکییە، پێویستە کە لە پێشدا بە کورتی لە سەر مانای هەندێک کۆنسێپتی سەرەکی کە لەو وتارەدا بە کار دەبردرێن، ڕاوەستین؛ بۆ نموونە: دێموکراسی، هەڵبژاردن، بەشداری کردن، سیستمی تەواویەتخواز، تێۆلۆژی.