• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٢٣ی فێڤریەی ٢٠١٨ی زایینی - ٠٤ی رەشەمەی ١٣٩٦ی هەتاوی  

ده‌قی وته‌کانی به‌ڕێز مسته‌فا هیجری لە کۆنفڕانسی نێوده‌وڵه‌تیی یادی دوکتور سادق شه‌رفکه‌ندی له فه‌ڕانسه

زایینی: ١٨-٠٩-٢٠١٢ - هەتاوی: ١٣٩١/٠٦/٢٨ - ١٩:٠٨ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
ده‌قی وته‌کانی به‌ڕێز مسته‌فا هیجری  لە کۆنفڕانسی نێوده‌وڵه‌تیی یادی دوکتور سادق شه‌رفکه‌ندی له فه‌ڕانسه
دێموکراسی له‌ ئێران، ئاشتی و سوبات له‌ رۆژهه‌ڵاتی ناوه‌ڕاست!

خوشک و برایانی هێژا!

له‌ لایه‌ن حیزبی دێمۆکراتی کوردستانی ئێرانه‌وه‌ به‌خێرهاتنێکی گه‌رمتان ده‌که‌م بۆ ئه‌م کۆنفرانسه. پێم خۆشه‌ سپاسی ئه‌نستیتۆی کورد له‌ پاریس بکه‌م بۆ ئاماده‌کاری ئه‌م رێوڕه‌سمه‌ و هه‌روه‌ها بۆ دانی ده‌رفه‌ت بۆ ئاخفتنی من لێره.


ئه‌مڕۆ لێره‌ کۆبووینه‌ته‌وه‌ که‌له‌ ساڵڕۆژی مه‌رگی دکتور سادق شه‌ره‌فکه‌ندی، فه‌تاح عه‌بدولی، هومایون ئه‌رده‌لان و نووری دێهکوردی یادی ئه‌و مرۆڤه‌ ئازادیخوازانه‌ بکه‌ینه‌وه. په‌یوه‌ست بوونی دکتور شه‌ره‌فکه‌ندی به‌ ریزه‌کانی حیزبی دێمۆکراتی کوردستانی ئێران‌ ده‌گه‌رێته‌وه‌ بۆ کۆتایی‌یه‌کانی ١٩٧٠، ئه‌و کاته‌ی قوتابی دکتورا بوو له فه‌رانسه. ئه‌و شانازییه‌م پێ بڕابوه که‌ ساڵانێک هاوکاری بم. دکتور شه‌ره‌فکه‌ندی تێکۆشه‌رێکی به‌ئه‌مه‌گی مافی کورد و دێمۆکراسی و ئازادی له‌ ئێراندا بوو. پاش تێرۆری دکتور قاسملوو له‌ ١٣ی ژوئیه‌ی ١٩٨٩، دکتور شه‌ره‌فکه‌ندی رێبه‌رایه‌تی حیزبی دێمۆکراتی وه‌ئه‌ستۆ گرت. تێرۆری دوکتور قاسملوو، خه‌سارێکی مه‌زن بۆ کورد بوو، به‌ڵام له‌م رۆژه‌ سه‌خت ‌و دژوارانه‌دا دکتور شه‌ره‌فکه‌ندی به‌ رێبه‌رایه‌تی لێبڕاوانه و ژیرانه‌ی خۆی توانی هیوا و هومێد له‌ نێو ریزه‌کانی حیزب و له‌ نێوی خه‌ڵکی کورددا بێنێته‌ ئاراوه.


دکتور شه‌ره‌فکه‌ندی و سێ هاوڕێ تری، به‌ ده‌ستی رێژیمی ئێران له‌ ١٧ى سێپتامبری ١٩٩٢دا له‌ بێرلین تیرۆر کران. ئه‌گه‌ر بڕیاری بوێرانه‌ی به‌شی دادوه‌ری ئه‌ڵمان بۆ راکێشانی بکوژان بۆ به‌رده‌م دادگا نه‌بووبایه‌، دۆسیه‌ی تێرۆری دکتور شه‌ره‌فکه‌ندی و هاوڕێیانی بێ ئاکام ده‌مایه‌وه. تێرۆری دوکتور شه‌ره‌فکه‌ندی یه‌ک له‌و کۆمه‌ڵه‌ تیرۆرانه‌ی رێژیمی ئێران بوون که‌ له‌ ناو خاکى ئورووپادا ئه‌نجام دران.


به‌پێی ناوه‌ندی به‌ڵگه‌کانی مافی مرۆڤی ئێران که‌ رێکخراوێکی سه‌ربه‌خۆیه‌ و له‌ ساڵی ٢٠٠٤ له‌لایه‌ن چه‌ند پارێزه‌ر و پسپۆر دامه‌زراوه، رێژیمی ئێران ١٦٢ جیابیری خۆی له‌ ١٩ وڵات له‌ سه‌رانسه‌ری جیهان تیرۆر کردووه. زێده‌ له‌مه، بۆ ئاگاداری ئێوه‌ ته‌نیا له‌ ساڵه‌کانی ده‌یه‌ی ٩٠دا، رێژیمی ئێران ١٥١ ئه‌ندامی حیزبی دێمۆکراتی کوردستانی ئێرانی له‌ کوردستانی عێراق تیرۆر کرد.


ئه‌گه‌رچی هیندێک له‌ وڵاتانی دیکه‌ش جیابیران و دژبه‌رانی خۆیان له‌ ده‌ره‌وه‌ی سنووره‌کانی خۆیان کردۆته‌ مه‌به‌ست، به‌ڵام رێوشوێنی تیرۆری رێژیمی کۆماری ئیسلامی به‌یانگه‌ری ئه‌و راستییه‌یه‌ که‌ تیرۆریزم به‌شێکی جیانه‌بووه‌ی ستراتیژیی ئه‌م رێژیمه‌یه‌ بۆ درێژه‌دان به‌ دیکتاتوریه‌ت له‌ نێوخۆ و په‌ره‌پێدانی توندئاژۆیی و خۆف له‌ ده‌ره‌وه. پشتیوانی رێژیمی ئێران له‌ تیرۆریزم، نه‌ ته‌نیا هاووڵاتییانی ئێرانی کردۆته‌ مه‌به‌ست، به‌ڵکوو هاووڵاتیانی بیانی و له‌ نێو ئه‌واندا ئوروپایی‌یه‌کانیشى لێ بێبه‌ش نه‌کردووه.


تێگه‌یشتن له‌م راستییانه‌ ــ که‌ تیرۆریزم به‌شێکی جیانه‌کراوه‌ی ستراتیژیی رێژیم له‌ نێوخۆ و له‌ ده‌ره‌وه‌یه‌ و قوربانییانی ته‌نیا ئێرانی نین ــ کاردانه‌وه‌ی سیاسی گرینگی هه‌یه.


له‌مێژ ساڵه، ئێمه‌ له‌ نێو ئوپۆزسیۆنی دێمۆکراتی ئێرانیدا پێداگریمان کردووه‌ له‌سه‌ر ئه‌وه‌ی که‌ به‌رژوه‌ندی درێژخایه‌نی خه‌ڵکی ئێران و کۆمه‌ڵگای نێوده‌وڵه‌تی یه‌ک شتن: ئێرانێکی ئازاد و دێمۆکرات. به‌ڵام، به‌له‌به‌رچاوگرتنی هه‌وڵی کۆماری ئیسلامی بۆ به‌ده‌ستهێنانی چه‌کی ناوکی، پشتیوانی له‌ تیرۆریزمی جیهانی و هه‌روه‌ها هه‌وڵی ئه‌م رێژیمه‌ بۆ سه‌یته‌ره‌ی ته‌واو به‌ سه‌ر ناوچه‌ی رۆژهه‌ڵاتی ناوه‌ڕاستدا، ئه‌مه‌ له‌ جاران زۆر روونتره.


به‌ له‌به‌رچاوگرتنی ئه‌م راستییه، پشتیوانی کردن له‌ خه‌باتی له‌مێژینه‌ بۆ ئازادی و دێمۆکراسی له‌ ئێراندا نه‌ ته‌نیا ئه‌خلاقه‌ن دروسته، به‌ڵکوو له‌ روانگه‌ی ئاشتی ناوچه‌یی و سوباتی به‌واتا پرسێکی ستراتژیکی حه‌یاتی‌یه.


به‌ شێوه‌ی سروشتی، ئه‌وه‌ به‌و واتایه‌ دێ که‌ سوبات پێویسته‌ پێناسه‌کی نوێى بۆ بکرێت. سوبات نابێت ته‌نیا به‌ واتای نه‌بوونی شه‌ڕ، یان بوونی ئاڵۆزی و ناکۆکی به‌رته‌سک لێکبدرێته‌وه، به‌ڵکوو پێویسته‌ به‌ باری ئه‌رینیدا بخوێندرێته‌وه‌ و به‌ بوونی دێمۆکراسی به‌رده‌وام گرێ بدرێ ــ وه‌ک ئورووپای رۆژئاوا. له‌ حاڵێکدا واتای زاڵی "سوبات" له‌ رۆژهه‌ڵاتی ناڤیندا بووه‌ته‌ تراژیدیایه‌کی مرۆڤایه‌تی سه‌لمێندراوه. چالاکانی مافی مرۆڤ له‌ سه‌رانسه‌ری ناوچه‌که‌دا ده‌یان ساڵه‌ هاوار ده‌که‌ن که‌ سوباتی به‌رهه‌م هاتووی داموده‌زگای سه‌رکووت نه‌ته‌نیا تراژیدیایه‌کی مرۆڤایه‌تییه‌ به‌ڵکوو ئاکامیشی هه‌ر شکسته.


رێژیمه‌ دیکتاتۆرییه‌کانی رۆژهه‌ڵاتی ناوه‌ڕاست، حکوومه‌ته‌کانی ناوچه‌یان کردۆته‌ دوژمنی گیانی هاووڵاتییانیان و به‌هاری عه‌ره‌بی جارێکی دیکه ئه‌م راستییه‌مان وه‌بیر دێنێته‌وه. که‌وابوو، نابێ جێگای سه‌رسووڕمان بێت که‌ مه‌زن‌ترین هه‌ڕه‌شه‌ بۆ رێژیمه‌ نامه‌شروع ‌و سه‌رکوتکه‌ره‌کانی رۆژهه‌ڵاتی ناوه‌ڕاست ده‌ره‌کی نین، به‌ڵکوو نێوخۆیین. ئه‌و "سوباته‌ی" ئه‌وان پێیان وابوو پێی گه‌یشتوون ‌و به‌ پێشێل کردنی سیستماتیکی مافی مرۆڤ رایان گرتبوو له‌ ئاکامدا به‌ رووخان و له‌به‌ین چوونیان ته‌واو بوو ــ هه‌روه‌ک له‌ تونیس و میسر و لیبی و یه‌مه‌ن شاهیدی بووین. ئه‌م پرۆسه‌یه‌ ئیستا سووریه‌شی گرتووەته‌وه‌، گه‌رچی رێژیمی ده‌سه‌ڵاتدار به‌ هاوکاری ته‌واوی رێژیمی ئێران و به‌ به‌کارهێنانی ماشینی کوشتار له‌ هه‌وڵی به‌ره‌نگار بوونه‌وه‌ له‌گه‌ڵ ئه‌م پرۆسه‌یه‌ دایه. ئه‌وانه‌ی که‌ پێشتر له‌و بڕوایه‌دا بوون که‌ دیکتاتۆره‌کان له‌ رۆژهه‌ڵاتی ناڤین توانایی راگرتنی سوباتیان هه‌یه، و هه‌ر به‌م هۆکاره‌ش چاویان له‌م تراژیدیایه‌ ئه‌خلاقی و مرۆڤاییه‌تى نووقاند بوو، ده‌بێ خوێندنه‌وه‌ی ئه‌رێنی سوبات ره‌چاو بکه‌ن.




خوێندنه‌وه‌ی سەقامگیری به‌م چەشنه‌ نوێیه‌ نه ‌ته‌نیا ئه‌خڵاقه‌ن دروسته، به‌ڵکو له‌ روانگه‌ی ئاسایشی ناوچه‌یی له‌ رۆژهه‌ڵاتی ناوه‌ڕاست بایه‌خی ستراتژیشی هه‌یه. بۆ سه‌لماندنی ئه‌م راستییه‌ ته‌نیا پێویسته‌ سه‌یری پێوه‌ندییه‌کانى ئورووپاى رۆژئاوا، ئه‌مریکا، ئوسترالیا و ژاپۆن پاش شه‌ڕی دووهه‌می جیهانی بکه‌ین. سەقامگیریی واتادار و ئاسایشی ناوچه‌یی و نێوده‌وڵه‌تی به‌رده‌وام ته‌نیا له‌ رێگای دێمۆکراسییه‌وه‌ به‌ئاکام ده‌گات.


ئێرانێکی دێمۆکراتیک که‌ رێز له‌ مافه‌کانی نه‌ته‌وه‌یی، کولتووری و ئاینی کۆمه‌ڵگای خۆی بگرێ، ئه‌و رێبازه‌ بوو که‌ دکتور شه‌ره‌فکه‌ندی خه‌باتی بۆ ده‌کرد. ئه‌و باوه‌ڕی به‌وه‌ بوو که‌ ئێرانی ئازاد و دێمۆکراتیک نه‌ک هه‌ر له‌گه‌ڵ خۆی به‌ڵکوو له‌گه‌ڵ دونیای ده‌ره‌وه‌ش له‌ ئاشتیدا ده‌بێ. ئێران هه‌موو ئه‌و پتانسیه‌لانه‌ی تێدا به‌دی ده‌کرێ که‌ وڵاتێکی گرنگ و ئه‌ندامێکی کارامه‌ی کۆمه‌ڵگای نێوده‌وڵه‌تی بێت گه‌ر بێت و رێگای به‌ره‌وه‌ سه‌ربه‌ستی و دێمۆکراسی بگرێته‌ به‌ر.


به‌ڵام هه‌تا هه‌نووکه‌ رێژیمه‌ ده‌سه‌ڵاتداره‌کانی ئێران مافی هاووڵاتییانیان به‌ شێوه‌یه‌کی سیستماتیک ژێرپێ ناوه. گه‌رچی به‌ میلیونان له خه‌ڵکی ئێران، به‌بێ‌ له‌به‌رچاوگرتنی ره‌گه‌ز و جنسیه‌ت، سه‌رکوت کراون، به‌ڵام ناکرێ ئه‌م راستییه‌ نه‌بینین که‌ هه‌رکام به‌ هۆکارێکه‌وه‌ سه‌رکوت ده‌کرێن. کورد، ئازه‌ری، به‌لوچ، تورکمان و عه‌ره‌به‌کان و که‌سانی سه‌ر به‌ که‌مایه‌تییه‌ ئاینییه‌کانی به‌هایی و یارسان به‌ هۆی شوناسی نه‌ته‌وه‌یی، زمانی و ئایینییانه‌وه‌ سه‌رکوت ده‌کرێن. تێگه‌یشتن له‌م راستییه‌ گرینگییه‌کی ئه‌ساسیی هه‌یه‌ له‌ داڕشتنی سیستمێکی سیاسی نوێ له‌ ئێراندا که‌ به‌ راستی دێمۆکراتی بێ.


له‌ کوردستانی ئێران سه‌رکوت نه‌هادینه‌ کراوه‌ و لایه‌نی سیاسی، کولتووری، ئابووری و کۆمه‌ڵایه‌تی هه‌یه. له‌ گشتیان گرینگتر، کورد مافی خوێندن به‌ زمانی زگماکی و مافی خۆبه‌رێوه‌به‌ری بۆ پاراستنی که‌له‌پووری نه‌ته‌وه‌یی و کولتووری لێ زه‌وت کراوه‌ که‌ بۆته‌ هۆی ئه‌وه‌ که‌ کولتووری کوردی به‌رده‌وام له‌ ژێر مه‌ترسیدا بێ. زێده‌ له‌مه، ده‌سبه‌سه‌ر کرانی سه‌ره‌ڕۆیانه، به‌ند و شکه‌نجه‌ کردنی چالاکانی مافی مرۆڤ، بیرمه‌ندان و بگره‌ خه‌ڵکی ئاساییش کرده‌وه‌گه‌لێکی رۆژانه‌ن له‌ کوردستانی ئێران. بێجگه‌ له‌وانه‌ ئاکامی ره‌وشی به‌ڕێوه‌ بردنی ئه‌م سیاسه‌ته‌ کوردستانی له‌ دۆخی خوارگه‌شه‌ی ئابووری هێشتووه‌ته‌وه ‌و کاردانه‌وه‌ی نه‌رێنی وه‌ک نه‌بوونی هه‌لی گونجاوی په‌روه‌رده‌ و کار، دڵه‌ڕاوکیی به‌ربڵاوی کۆمه‌ڵایه‌تی، به‌رز بوونی ئاستی خۆکوژی (به‌تایبه‌تی له‌ نێو ژناندا) گیرۆده‌ بوون به‌ ماده‌ هۆشبه‌ره‌کان و گه‌لێک دیارده‌ی ناحه‌زی کۆمه‌ڵایه‌تی دیکه‌ی به‌دواوه‌ بووه.



ئه‌م هۆیانه‌ن که‌ پشتیوانی به‌ربڵاوی کۆمه‌ڵانی خه‌ڵکی کوردستانی ئێرانی بۆ گۆڕینی رێژیم راکێشاوه. به‌شداریی که‌می خه‌ڵک له‌ هه‌ڵبژاردنه‌ شانۆییه‌کان، ته‌نانه‌ت بایکوت کردنی ئه‌و هه‌ڵبژاردنانه‌ی که‌ رێژیم ئاخووندی له‌ کوردستان به‌ڕێوه‌یان ده‌بات به‌ڵگه‌ی ئه‌م راستییه‌ن. ئێمه‌ دڵنیان که‌له‌ ئه‌گه‌ری له‌ ئارادا بوونی هه‌ڵبژاردنی ئازاد و دادپه‌روه‌رانه‌ ــ که‌ به‌ بڕوای ئێمه‌ له‌ژێر سێبه‌ری رێژیمی ئێستادا مومکین نییه‌ ــ خه‌ڵکی کورد ده‌نگ به‌ دێمۆکراسی فێدارڵی و سێکولار ده‌ده‌ن. جێگای وه‌بیرهێنانه‌وه‌یه‌ که‌له‌ کوردستانی ئێراندا بۆ راپرسى گشتى دیاری کردنی چه‌شنی حکوومه‌ت له‌ ساڵی ١٩٧٩دا بایکوت کرا. بڕوامان وایه‌ که‌ داخوازی سیستمێکی سیاسیی نوێ له‌ سه‌رانسه‌ری وڵاتدا پشتیوانی به‌ربڵاوی خه‌ڵکی له‌ گه‌ڵه. به‌ڵگه‌ی ئێمه‌ بۆ ئه‌م بۆچوونه‌ له‌م پرسیاره‌دا ده‌رده‌که‌وێ: ئه‌گه‌ر رێژیمی ئێستای تاران لای وایه‌ که‌ پشتیوانی زۆربه‌ی حه‌شیمه‌تی ئێرانی له‌ پشته، بۆچی رێگا به‌ هه‌ڵبژاردنی ئازاد و دادپه‌روه‌رانه‌ به‌ ئاماده بوونی چاوه‌دێرانی نێوده‌وڵه‌تی ناده‌ن؟ وڵامی ئه‌م پرسیاره‌ روونه‌ و ئاشکرایه.
له‌ نیهایه‌تدا ئه‌وه ئه‌رکی سه‌رشانی خه‌ڵکی ئێرانه ــ به‌ هه‌موو جیاوازیی‌یه‌کانیانه‌وه‌ ــ که‌ ده‌سه‌ڵاتێکی دێمۆکراتیک له‌ وڵاته‌که‌یان بێننه‌ ئاراوه‌ که‌ ئاوێنه‌ی ویست و داخوازه‌کانیان بێت و رێز له‌ مافه‌‌کانی تاک و کۆمه‌ڵ بگرێت. بۆ سه‌رکه‌وتن له‌و خه‌باته‌یه که ئێمه له ساڵی٢٠٠٦دا به هاوپه‌یمانی له‌گه‌ڵ ژماره‌یه که‌له رێکخراوه‌کانی باقی نه‌ته‌وه‌کانی ئێرانی کۆنگره‌ی نه‌ته‌وه‌کانی ئێرانی فیدراڵمان پێکهێنا هه‌تا هه‌موو پێکه‌وه له راستای به ئه‌نجام گه‌یاندنی ویست و داخوازه نه‌ته‌وه‌ییه‌کانی گه‌لانی ئێران تێبکوشین له‌هه‌مان کاتدا بۆ سه‌رکه‌وتن له‌م خه‌باته‌ پشتیوانی سیاسی و ئه‌خلاقی کۆمه‌ڵگای نێوده‌وڵه‌تیمان پێویسته. به‌شێک له‌و هۆکارانه‌ بوو که‌ دوکتور شه‌ره‌فکه‌ندیی هان دا که‌له‌ ساڵی ١٩٩٢دا سه‌فه‌ری بێرلین بکات و کۆبوونه‌وه‌ له‌گه‌ڵ سیاسه‌تڤانانی ئورووپایی پێک بێنێ بۆ شێ کردنه‌وه‌ی روانگه‌ی خۆی له‌سه‌ر داهاتوویه‌کی دێمۆکراتی بۆ ئێران و کۆکردنه‌وه‌ی پشتیوانی بۆ ئه‌م رێبازه.


دکتور شه‌ره‌فکه‌ندی و رێبه‌ران، سیاسه‌تڤانان و چالاکانی بێ ئه‌ژماری کورد ژیانیان پێشکه‌شی ئه‌م رێبازه‌ کردووه. حیزبی دێمۆکراتی کوردستانی ئێران، خه‌باتی خۆی بۆ وه‌دی هێنانی مافی نه‌ته‌وایه‌تی کورد و ئازادی و دێمۆکراسی له‌ ئێراندا درێژه‌ پێ ده‌دا. ئێمه‌، وه‌ک هه‌میشه، بۆ وه‌ئه‌ستۆ گرتنی به‌رپرسایه‌تی بۆ گواستنه‌وه‌یه‌کی دیمۆکراتی له‌ ئێراندا حازرین و قوربانیشی بۆ ده‌ده‌ین.

سپاس بۆ سرنجتان
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧١٩ لەم ژمارەیەدا:

ــ خەباتی ڕۆژهەڵات بەردەوامە
ــ پرسی رێفراندۆم
ــ لە سەروەری نەتەوەییەوە هەتا کلۆنی بوون
ــ ژن پڕۆسەی ژێر دەستی سیاسەتە؟
  • پرسی رێفراندۆم پرسی رێفراندۆم
    تەنیا رێفراندۆمی دێموکراتیک و واقیعی دوای رووخانی کۆماری ئیسلامی و نووسینی یاسایەکی بنەڕەتی لەسەر ئەساسی پرەنسیپەکانی دێموکراسی و ژیانی ئازاد و یەکسانی هەموو نەتەوەکانی نێو ئێران دەکرێ، کە لەو گشتپرسییەدا ئەو یاسایە بخرێتە دەنگدانەوە و ببێ بە پەیمانی پێکەوە ژیان، نەک ئامرازی پیرۆزکردنی وەهمەکان و شمشێری کوشتاری خەڵک.
  • زستان لە کولتووری کوردەواریدا زستان لە کولتووری کوردەواریدا
    ئەو ڕۆژهەڵاتناس و نووسەرە گەڕیدانەی کە لەبارەی مێژوو، جوگرافیا و فەرهەنگی کورد و کوردستان نووسیویانە، هەموویان لە سەفەرنامەکانی خۆیاندا جەختیان لەسەر زستانی سەخت و تەڕ و تووشیی ناوچە جیاجیاکانی کوردستان کردووە. هەرچەند ئێستا لەژێر کاریگەریی گۆڕانی کەشوهەوای جیهانیدا و بە گەرمدا هاتنی کۆی گۆی زەوی، کەشی کوردستانیش، گۆڕانی بەسەردا هاتووە.
  • عەبدوڵا حیجاب: هه‌نگاو و سیاسه‌ته‌كانی ڕووحانی هیچ جیاوازییه‌كی له‌گه‌ڵ كرده‌وه‌كانی باقی كاربه‌ده‌سته‌ هه‌ره‌ توندڕه‌وه‌كانی ڕێژیم نه‌بووه‌ عەبدوڵا حیجاب: هه‌نگاو و سیاسه‌ته‌كانی ڕووحانی هیچ جیاوازییه‌كی له‌گه‌ڵ كرده‌وه‌كانی باقی كاربه‌ده‌سته‌ هه‌ره‌ توندڕه‌وه‌كانی ڕێژیم نه‌بووه‌
    پشتیوانی لە ڕاپەرینی گەلانی ئێران لە دژی ڕێژیمی ئیسلامی ئەو وڵاتە و هەروەها مەسەلەی "بەرجام" دوو تەوەری سەرەکیی یەکەم وتاری ساڵانەی سەرکۆماری ئامریکا بوون, کە بەرچاوترین جیاوازی لە سیاسەتی دەرەکیی ئەو وڵاتە بە نیسبەت ئیدارەی پێشووتری ئامریکا بەهەژمار دێن؛ بۆ شرۆڤەی زیاتری ئەو وتار و سیاسەتە کە هاوکاتە لەگەڵ بەردەوامیی ناڕەزایەتییەکان لە نێوخۆی ئێراندا، سەرنجتان بۆ ئەم وتووێژەی کوردستان لەگەڵ بەڕێز عەبدوڵا حیجاب، چالاکی سیاسی ڕادەکێشین.
  • خۆپیشاندانەکان چیمان لێدەخوازن؟ خۆپیشاندانەکان چیمان لێدەخوازن؟
    ئەوەتا دیسان دروشمگەلی وەک مردن بۆ دیکتاتۆر، نەمان بۆ خامنەیی، رێفۆرمخوازان ـ بناژۆخوازان ئیتر بەسە لەگەڵتان سازان( اصلاح طلب، اصولگرا، دیگر تمام است ماجرا) سەری هەڵداوەتەوە. رەنگە سەرکوت و گرتن و لێدان و کوشتن رەوتەکە هەندێ جار کز بکا، بەڵام وەستانی بۆ نییە. ئەگەر شەپکە هێندە بۆ رێژیمی ئاخوندی توندە، ئێمەی کورد دەبێ چی بکەین؟
  • تارماییەکان لەنێو سۆشیال‌میدیادا تارماییەکان لەنێو سۆشیال‌میدیادا
    سۆشیال میدیا چ وەک دیاردە و چ وەک دەرفەت زۆر بەستێنی بۆ کۆمەڵگای رۆژهەڵاتی‌نێوەراست خوڵقاندووە.
  • گوڵوەنی، هێمای خۆڕاگری نەتەوەیەکه گوڵوەنی، هێمای خۆڕاگری نەتەوەیەکه
    فەرهەنگ هەموو بەها، رەوت و نموونە ڕەفتارییەکانی نێو کۆمەڵگەیەک لەخۆ دەگرێت و وڵات و نەتەوەکان لە یەک جیا دەکات، ئەگەرنا هەموو کۆمەڵگەکانی ئەم جیهانە دەبوو وەکوو یەک بن.
  • ئەدەب لە سیاسەتی بەرپرسانی ڕێژیمدا ئەدەب لە سیاسەتی بەرپرسانی ڕێژیمدا
    "ئەدەب"، وشەیەکە کە بیسەر یان خوێنەر بە بیستنی چ بە شێوەی "شهودی" و چ بە جۆری "منطقی" کۆمەڵێک نۆرمی پڕ بەهای دەکەوێتە مێشک کە هەر مرۆڤێک بە بوونی ئەو بەهایە، کەسایەتییەکی قورس و جێگەی متمانە پەیدا دەکات و لە لای خەڵکی دیکە وەک مرۆڤێکی باش سەیری دەکرێت و حورمەتی لێدەگیرێت؛ ئەدەب بەنرخترین سەرمایە و میراتی ژیانی مرۆڤایەتییە کە مرۆڤ لەگەڵ ژیانی خۆیدا بە کۆڵی دەکێشێت.
  • ژن و سیاسەت ژن و سیاسەت
    دەرکەی سیاسەت لە ڕێگەی بنەماڵە، قوتابخانە، ڕۆژنامەکان، تەلەفزیۆن و هەروەها ململانێیە سیاسییەکانەوە بە ڕووی تاکدا دەکرێتەوە و تاک لە سەر ڕۆڵی دەوڵەت و دەزگا و دامەزراوەکانی سەر بە دەسەڵات هەرچی زۆرتر ئاگایی پەیدا دەکات. هێنانەکایەی سیستمێکی دێمۆکراتیک لەو وڵاتانەدا کە حکوومەتێکی نادێمۆکرات و سەرکوتکەریان ئەزموون کردووە، ئەنجامەکەی تەنیا بە شکست خواردن و سەرکوت کردن گەیشتووە؛ لەم جۆرە وڵاتانەدا بنەماڵەکان بەردەوام ئەوە بە گوێی منداڵەکانیاندا دەچرپێنن کە کاریان بە سیاسەتەوە نەبێت و بەشداریی تێدا نەکەن، نموونەی بەرچاوی ئەم وڵاتانە و ئەم کۆمەڵگەیانە، کۆمەڵگەی کوردەوارییە.
  • تویتێک کە ترامپ هیچکات ناتوانێ بینێرێت تویتێک کە ترامپ هیچکات ناتوانێ بینێرێت
    لە ٨ی ژانویەدا، "تهران تایمز" راپۆرتی دا، کە بەپێی راپۆرتی بەرپرسی بەشی بەڕێوەبەریی ویشکەساڵی و قەیرانەکان لە دامەزراوەی کەشوهەواناسی ئێراندا، "نزیک بە ٩٦ لە سەدی سەرانسەری ناوچەکانی ئێران بەدەست ئاستی جیاوازی ویشکەساڵی درێژەکێشراوەوە دەناڵێنن".
  • خەباتی ڕۆژهەڵات بەردەوامە خەباتی ڕۆژهەڵات بەردەوامە
    خومەینی لە فتواکەیدا بڕیاری بە هەموو هێزە چەکدارەکانی دا، کە تا کۆتایی هاتنی کێشەی کورد لە کوردستان نەکشێنەوە؛ دوابەدوای ئەم بڕیارە ئایینییە بۆ ڕشتنی خوێنی کورد، کارەساتبارترین قۆناغی شۆڕش لە کوردستان دەستی پێکرد و خەڵک لە شار و گوندی کوردستان کەوتنە بەرپەلاماری هێزە دژی گەلییەکانی ڕێژیم. بە هاتنە ئارای ئەم دۆخەش، گەلی کورد بە ڕێبەرایەتی حیزبی دێموکراتی کوردستانی ئێران ناچار بوو بۆ پاراستنی کەرامەت و شەرافەتی نەتەوەکەی و پارێزگاری کردن لە نیشتمانی ئەهورایی کوردان، دەس بۆ چەک ببات و فازی خەباتی چەکداری دەستی پێکرد.
  • ڕاسان و پێشمەرگە ڕاسان و پێشمەرگە
    لە وەڵامی ئەو داوا و چاوەڕوانیەدایە کە پێگەی دروستی پێشمەرگە لە راساندا دەدۆزرێتەوە: ئامادەبوونی پێشمەرگە لە نێو دڵی خەڵک بۆ ورەدان بە خەبات و پاراستنی خەڵک لە ئاگری ڕێژیم؛ ئەمە ئەرکی نوێی پێشمەرگەی سەردەمی راسانە.
  • فەرەیدوون ئەرشەدی: شێعر و هونەری کوردی له ڕۆژهەڵات، بە هەر ڕێباز و شێوە و دەربڕینێکەوە کە بێتە بەرهەم، هونەر و شێعر و ئەدبیاتی مقاومەت و بەرگرییە! فەرەیدوون ئەرشەدی: شێعر و هونەری کوردی له ڕۆژهەڵات، بە هەر ڕێباز و شێوە و دەربڕینێکەوە کە بێتە بەرهەم، هونەر و شێعر و ئەدبیاتی مقاومەت و بەرگرییە!
    هەر تەوژم و تەکانێکی ئەدەبیی، هونەری و هزریی،کاردانەوەیەکی عەقڵانی، ئەخلاقی و جوانیناسانەیە بەرانبەر بە تەکان و تەوژمی کۆمەڵگە، یان لانیکەم ئەو تەوژمە نادیار و شاراوە کە لە ژێر پێستی هەست و نەستی کۆمەڵگە، یا بەشێکی زۆر حەساس و کارای دا، دەژیت و درز دەخاتە پێستی قەتماغەبەستووی ژیانی رۆژانە.
  • مستەفا هیجری: خۆپیشاندانەکانی ئێران، ئاکامی بێزاری و ناڕەزایەتیی خەڵک لە ٤٠ ساڵ دەسەڵاتداریی ئەو ڕێژیمەیە مستەفا هیجری: خۆپیشاندانەکانی ئێران، ئاکامی بێزاری و ناڕەزایەتیی خەڵک لە ٤٠ ساڵ دەسەڵاتداریی ئەو ڕێژیمەیە
    دەقی وتووێژی رۆژنامەڤان (ئەکرەم ئاڵتوون) لەگەڵ مستەفا هیجری، سکرتێری گشتیی حیزبی دێموکرات بۆ ئاژانسی "سپوتنیک کوردستان"
  • شەڕی هەمەلایەنەی رێژیم بە دژی ئێمە، پێویستی بە بەرپەرچدانەوەیەکی هەمەلایەنە هەیە شەڕی هەمەلایەنەی رێژیم بە دژی ئێمە، پێویستی بە بەرپەرچدانەوەیەکی هەمەلایەنە هەیە
    لەو ساڵانەی دواییدا رێژیم هەم لەکوردستان و هەم لە دەرەوەی وڵات لە رێگەی چالاکییە سیخورییەکانییەوە خەریکی کۆکردنەوەی زانیاری بووە لە سەر ئوپۆزسیۆن بە گشتی و لە سەر حیزبی دێموکرات بە تایبەتی؛ یەکێک لە سەرەکیترین ئامانجەکانی رێژیم لەو چالاکییانە دەسنیشانکردنی کەسایەتییە چالاکەکانە بۆ ئەوەیکە بە پیلان هەوڵی تێکدانی باڵانسی ئەوان بدات لە بواری سایکۆلۆژییەوە تاکوو نەتوانن هاوسەنگی فیکریی خۆیان ڕابگرن و فوکووسی خۆیان بخەنە سەر بەربەرەکانی لەگەڵ رێژیم.