• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
١٨ی ژانویەی ٢٠١٨ی زایینی - ٢٨ی بەفرانباری ١٣٩٦ی هەتاوی  

پێشمه‌رگه‌ هه‌ڵگری فه‌لسه‌فه‌ی ژیانێكی ئازاد و یه‌كسانه‌

زایینی: ١٦-١٢-٢٠١٧ - هەتاوی: ١٣٩٦/٠٩/٢٥ - ٢٠:١٩ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
پێشمه‌رگه‌ هه‌ڵگری فه‌لسه‌فه‌ی ژیانێكی ئازاد و یه‌كسانه‌
پەیامی کۆمیسۆنی سیاسی ـ نیزامیی حیزبی دێموکراتی کوردستانی ئێران بە بۆنەی ساڵڕۆژی پێشمەرگەی کوردستان.

دەقی پەیامەکە:

هاوڕێیانی خۆشه‌ویست!

به‌شدارانی به‌ڕێزی ڕێوڕەسمی ڕۆژی پێشمەرگەی کوردستان!

پێشمه‌رگه‌ ئازاكانی كوردستان!


ئه‌مڕۆ، ٢٦ی سه‌رماوه‌ز له‌ مێژووی خه‌باتی ڕزگاریخوازانه‌ی نه‌ته‌وه‌ی كورد دا، ڕۆژێكی گرینگ و ده‌ستپێكی وه‌رچه‌رخانێكی مێژووییه‌. ٧٢ ساڵ له‌مه‌وبه‌ر له‌ وه‌ها ڕۆژێكدا، واتە لە ٢٦ی سەرماوەزی١٣٢٤ی هەتاویدا بەرانبەر بە ١٩٤٥ی زایینی بوو كه‌ خه‌ڵكی ڕاپه‌ڕیوی شاری مهاباد، بۆ ڕاماڵینی داموده‌زگای داپڵۆسێنه‌ری ده‌سه‌ڵاتدار هێڕشیان كرده‌ سه‌ر دوا بنكه‌ی سته‌م، واتە شاره‌وانیی شار وئاسه‌واری سته‌میان له‌و ده‌ڤه‌ره‌ی كوردستان تێكه‌وه‌پێچا و ئاڵای کوردستانیان لێ هەڵکرد. به‌ له‌نێوچوونی دوا بنكه‌ی ده‌سه‌ڵاتی پاشایه‌تی، گه‌لی كوردستان چاره‌نووسی خۆی به‌ده‌سته‌وه‌ گرت و به‌ كرده‌وه‌ بوو به‌ سه‌روه‌ری نیشتمانه‌كه‌ی. له‌و كاته‌دا، گه‌لی كورد له‌ کوردستانی ڕۆژهه‌ڵات نه‌ هێزێكی ڕێكوپێكی چه‌كداری بوو و نه‌ش له‌ بواری ڕێكخراوه‌ییه‌وه‌ به‌ ته‌واوی له‌‌گه‌ڵ قه‌واره‌ی ڕێكخراو ئاشنا ببوو. به‌ڵام به‌ ئیلهام وه‌رگرتن له‌ پێشه‌نگانی خه‌باتی نه‌ته‌وه‌یی خۆی، به‌پێی به‌رنامه‌ی حیزبی دێموكرات كه‌ كه‌م ئه‌زموون به‌ڵام به‌ بڕیار بوو،و له‌ ژێر رێنوێنێکانی پێشه‌وای زانا قازی محه‌ممه‌د دا توانی بە خێرایی ڕیزه‌كانی خۆی ڕێك بخاته‌وه‌ و به‌ره‌و دامه‌زراندنی سوپایه‌كی نه‌ته‌وه‌یی هه‌نگاو هه‌ڵنێته‌وه‌.

به‌پێی گێڕانەوەی سه‌رچاوه‌ زاره‌كییه‌كانی مێژووی نه‌ته‌وه‌ییمان، له‌ كاتی گفتوگۆ له‌ سه‌ر ناوی سوپای كوردستان له‌ دیوانی سه‌رۆك كۆمار قازی محه‌ممه‌ددا، باسی ناو و نازناوی جیاواز ده‌كرا. له‌ گه‌رماوگه‌رمی باسه‌كاندا كه‌سێكی به‌ده‌ر له‌ بازنه‌ی سه‌ركردایه‌تی حیزبی دێموكرات و به‌ڕێوه‌به‌رایه‌تی كوردستان پێشنیارێک بە سەرۆک کۆمار و هاوڕێیانی دەکات و دەڵێ:"قه‌دیم و زه‌مانان به‌ پیاوچاك و كه‌سانی به‌جه‌رگیان ده‌گوت "پێشمه‌رگه‌". له‌و كاته‌دا هه‌موو به‌شداران گوتیان؛ "ئه‌وه‌ پێشنیارێکی گونجاو و بەجێ‌یە". بۆیە هەموو نەو پێشنیارە قبووڵ دەکەن و ناوی به‌رزی پێشمه‌رگه‌ بۆ ئه‌ندامانی سوپای نه‌ته‌وه‌یی كوردستان هه‌ڵبژێردرا.

به‌ دیاریكردنی ناوی پێشمه‌رگه‌، ڕه‌وتی شكڵ پێدانی قه‌واره‌یه‌كی پێشكه‌وتوو بۆ سوپای كوردستانیش ده‌ستی پێكرد. له‌ ماوه‌یه‌كی كورتدا، سوپای كوردستان لق و پۆپه‌كانی له‌ هه‌موو هه‌رێمه‌كانی ژێر ده‌سه‌ڵاتی به‌ڕێوه‌به‌ریی نه‌ته‌وه‌ییدا بڵاو كرده‌وه‌ و وه‌كوو هێزێكی هاوچه‌رخی خاوه‌ن ئامانجی سیاسی شكڵی گرت. به‌ڕێوه‌به‌ران و فه‌رمانده‌كانی پێشمه‌رگه‌ كه‌وتنه‌ ژێر فه‌رمانی فه‌رمانده‌یی گشتی‌یه‌وه‌ و به‌پێی پێوانه‌كانی ئەرتەشێكی ڕێكوپێك و تەکوزمەند كاریان كرد. ئه‌و هه‌نگاوه‌ بۆ ئه‌و سه‌رده‌مه‌ی كوردستان، به‌ بێ ئه‌زموونی به‌ڕێوه‌به‌ریی و دروست كردنی یه‌كه‌ی سه‌ربازیی ڕێكوپێك، وه‌رچه‌رخانێكی مێژوویی و سه‌ره‌تای به‌دامه‌زراوه‌ كردنی ئۆرگانه‌كانی ده‌سه‌ڵات بوو. به‌ كرده‌وه‌ش ئه‌و هه‌نگاوه‌ بوو به‌ نموونه‌ی هه‌ره‌ سه‌ركه‌وتووی ده‌سه‌ڵاتداری، كه‌ تا ئێستاش به‌ ده‌گمه‌ن نموونه‌ی له‌ ناوچه‌كانی ئێمه‌دا ده‌بیندرێ. چوونكه‌ هێزی پێشمه‌رگه‌ی كوردستان، له‌ هه‌موو ماوه‌ی ژیانی كۆماردا، توانیی نه‌زم و ئارامیی نێوخۆیی بپارێزێ، ڕێگا له‌ بشێوی و كه‌س‌به‌كه‌سی بگرێ و به‌پێی بڕیاره‌كانی سه‌ركردایه‌تی سیاسیی و‌ڵات بجووڵێته‌وه‌.له‌و كاته‌وه‌، پێشمه‌رگه‌ بووه‌ به‌ پارێزه‌ری نرخ و هیوا نه‌ته‌وه‌ییه‌كانمان.

حیزبی دێموكراتی كوردستانی ئێران كه‌ شانازیی دامه‌زراندنی یه‌كه‌ سه‌ره‌تاییه‌كانی هێزی پێشمه‌رگه‌ی به‌ ناوی خۆی تۆمار كردووه‌، هه‌ر پاش ده‌ستپێكردنه‌وه‌ی قۆناغی نوێی خه‌باتی نه‌ته‌وه‌یی له‌ ڕۆژهه‌ڵاتی كوردستان له‌ ساڵی ١٣٥٧ی هه‌تاوییه‌وهبەرانبەر بە ١٩٧٩ی زایینی،‌ لە به‌رنامه‌یدا بوو تا ڕۆژێك بۆ ئه‌مه‌گناسی و ڕێزگرتن له‌ ناو و یادی پێشمه‌رگه‌ دیاری بكات. هه‌ل و مه‌رجی سه‌ختی خه‌بات و سه‌رقاڵ بوونی هه‌موو ڕێكخراوه‌كانی حیزب به‌ خۆڕاگری له‌ به‌رانبه‌ر ڕێژیمی دژی گه‌لی كۆماری ئیسلامیدا، جێبه‌جێ كردنی ئه‌و بڕیاره‌ی وه‌دوا خست،تا ئه‌وه‌ی كه‌ له‌ ساڵی ١٣٦٣ی هەتاوی، بەرانبەر بە ١٩٨٤ی زایینی‌دا ئه‌و ده‌رفه‌ته‌ ڕه‌خسا و لە کۆبوونەوەی ڕێبەریی حیزب، ڕۆژی ٢٦ی سەرماوەز بەهۆی ڕوودانی ئەو ڕووداوە مێژووییانەی کە لەو ڕۆژەدا هاتبوونە ئاراوە، ئەو ڕۆژەیان وەکوو ڕۆژی پێشمەرگە پێشنیار کرد و بە تێکڕای دەنگ پەسەند کرا و یه‌كه‌م ڕێوڕه‌سمی ڕۆژی پێشمه‌رگه‌ له‌ بنكه‌ی ده‌فته‌ری سیاسی حیزبی دێموكرات له‌ گوندی گه‌وره‌دێی باشووری كوردستان ساڵی ١٣٦٣(١٩٨٤)م به‌ڕێوه‌ چوو. لەو کاتەوە هەموو ساڵێک خەڵکی کوردستان لەو ڕۆژەدا لە نێوخۆی وڵات بە بڵاو کردنەوەی تراکت و پۆستێری تایبەت بەو ڕۆژە و گەلێک چالاکیی دیکە ڕێز لە ڕۆڵە بەئەمەگ و دەروەستەکانی خۆیان دەگرن و لە بنکە و بارەگاکانی حیزبیش ڕێوڕەسمی تایبەت بەو ڕۆژە دەگیرێت. ئەوەش هەوڵێکە بۆ ڕێزگرتن له‌ خه‌بات و خۆڕاگریی ڕۆڵه‌كانی نیشتمان و هانده‌ری به‌ره‌ی نوێیە بۆ به‌شداری كردن له‌ خه‌باتی نه‌ته‌وه‌ییدا. هه‌نگاوێكە كه‌ كاریگه‌رییه‌كانی بۆ هه‌تا هه‌تایه‌ له‌ مێژووی نه‌ته‌وه‌ییماندا به‌ زیندوویی ده‌مێنێته‌‌وه و ده‌بێته‌ سه‌رچاوه‌ی هێز بۆ به‌رده‌وامیی خه‌بات تا گه‌یشتن به‌ هه‌موو مافه‌ نه‌ته‌وه‌ییه‌كانی گه‌لی كورد‌. پێوه‌ست بوونی پۆل پۆل ڕۆڵه‌ی به‌ئه‌مه‌گ به‌ ڕیزه‌كانی پێشمه‌رگەی حیزب و باقی هێزه‌ خه‌باتگێڕه‌كانی كوردستان، نموونه‌ی هه‌ره‌ به‌رچاوی كاریگه‌رییه‌كانی ئه‌و هه‌نگاوه‌ مێژووییه‌ن.

هاوڕێیانی پێشمه‌رگه‌!

ئه‌گه‌ر چه‌مكی پێشمه‌رگه‌ هه‌ر ته‌نیا ناوێك، چه‌كێك، جلوبه‌رگێكی له‌شكری و قه‌تاره‌یه‌كی فیشه‌ك و ته‌قه‌مه‌نی بوایه‌، بێگومان ئێستا ڕیزه‌كانی پێشمه‌رگه‌ به‌ئه‌ژمار نه‌ده‌هاتن. به‌ڵام پێشمه‌رگه‌ ته‌نیا چه‌كهه‌ ڵگرێكی به‌ڕێوه‌به‌ری هه‌ر فه‌رمانێك نیه‌. پێشمه‌رگه‌ پێشه‌نگی خه‌بات بۆ ژیانێكی باشتر بۆ نه‌ته‌وه‌كه‌یه‌تی. واتە هاوكات له‌گه‌ڵ هه‌ڵگرتنی چه‌ك، هه‌ڵگری بیر و باوه‌ڕێكی مرۆڤدۆستانه‌ی سیاسیه‌ كه‌ بۆ نرخه‌ به‌رزه‌كانی مرۆڤایه‌تی، وه‌ك یه‌كسانی، مافه‌كانی مرۆڤ، مافی تاك و كۆمه‌ڵ بۆ ژیانێكی شایان، به‌ دوور له‌ چه‌وسانه‌وه‌ و هه‌ڵاوا‌ردن تێده‌كۆشێ. هه‌ر كام له‌و نرخانه‌، پێكهێنه‌ری قه‌واره‌یه‌كی هزری و سیاسین كه‌ فه‌لسه‌فه‌ی هه‌بوون و ژیانی پێشمه‌رگه‌ له‌ هه‌بوون و ژیانی باقی هێزه‌ چه‌كداره‌كانی به‌ڕێوه‌به‌ری هه‌ر فه‌رمانێك جیا ده‌كاته‌وه‌.

پێشمه‌رگه‌ هه‌ڵگری فه‌لسه‌فه‌ی ژیانێكی ئازاد و یه‌كسانه‌. ڕوانگه‌ی پێشمه‌رگه‌ بۆ مرۆڤایه‌تی، ماف، ژیان و ئازادی به‌ ته‌واوی له‌ ڕوانگه‌ی هه‌ڵگرانی فه‌لسه‌فه‌ی به‌رژه‌وه‌ندیخواز، داخراو، ویشكه‌ڕۆ و كۆنه‌پارێز جیاوازه‌. بۆ پێشمه‌رگه‌ هه‌موو مرۆڤێك خاوه‌نی هه‌ر ڕه‌نگ، زایه‌ند، دین، كولتوور، زمان یا هه‌ڵگری هه‌ر بیروڕایه‌كی سیاسی، فیكری یا ئاینی بێ، هیچ جیاوازییه‌كی نیه‌. دین و ئایین پێوه‌ندی به‌ بڕوای تاكە‌وه‌ هه‌یه و‌ له‌ فه‌لسه‌فه‌ی پێشمه‌رگه‌دا نابێته‌ ئامرازی هه‌ڵاواردن، دانی ئیمتیاز یا لێ زه‌وت كردنی ماف و ئیمتیاز له‌ كه‌س یا پێكهاته‌یه‌ك. هه‌ر به‌و پێیه‌ش، زمان، كولتوور یا باقی جیاوازییه‌كانی به‌رچاو یا زه‌ینی، نابنه‌ هۆكاری دانانی جیاوازی. ئه‌و ڕوانگه‌یه،‌ هێزی پێشمه‌رگه‌ی وا په‌روه‌رده‌ كردوه‌ كه‌ ده‌رگای بۆ هه‌موو پێكهاته، تاك و گرووپێك بكاته‌وه‌ كه‌ بۆ ڕزگاربوون له‌ ویشكه‌ڕۆیی و توندئاژۆیی تێده‌كۆشن.

نموونه‌ی پێبه‌ندبوونی پێشمه‌رگه‌ به‌ نرخه‌ به‌رزه‌كانی مرۆڤایه‌تی‌ ئه‌وه‌نده‌ زۆرن كه‌ ڕیزكردنی ته‌نیا به‌شێكی بچووكیان له‌ توانادا نیه‌. به‌ڵام نه‌ ته‌نیا گه‌لی كورد، به‌ڵكوو هه‌موو مرۆڤایه‌تی ئه‌مڕۆ شاهێدی بۆ ئه‌وه‌ ده‌دا‌ كه‌ ئه‌وه‌ پێشمه‌رگه‌ی كوردستان بوو كه‌ له‌ به‌رانبه‌ر ئایدۆلۆژیای بۆگه‌نی پر له‌ مه‌ترسی بۆ مرۆڤایه‌تی، واتە ڕوانگه‌كانی ویلایه‌تی فه‌قیه‌ و خه‌لافه‌تی دینی له‌ شكڵی كۆماری ئیسلامیی ئێران و ده‌وڵه‌تی ئیسلامی ناسراو به‌ داعش و بیری شۆوینیستی لایک ڕاوه‌ستا. ئه‌و هه‌ڵوێسته‌ی گه‌لی كورد و هێزی پێشمه‌رگه‌ بوو كه‌ ناوی به‌رزی پێشمه‌رگه‌ی، له‌ شاخه‌ سه‌ركێشه‌كانی كوردستانه‌وه‌ بۆ سه‌ر لووتكه‌ی ناوه‌نده‌كانی بڕیاردان له‌ سیاسه‌تی نێونه‌ته‌وه‌یی وه‌كوو كۆشكی سپی، كۆشكی ئێلیزه‌، كرێملین و باره‌گای نه‌ته‌وه‌یه‌كگرتوه‌كان برده‌وه‌ و كردی به‌ ناوبانگێكی به‌رزی نێونه‌ته‌وه‌یی.

هه‌ر له‌و ڕووه‌شه‌وه‌یه‌ كه‌ ئه‌مڕۆ ده‌بینین له‌دایكبوونی چه‌مكی پێشمه‌رگه‌ له‌ ڕاستیدا له‌دایكبوونی هیوایه‌ك بوو. هیوا به‌ داهاتوو، هیوا به‌ ئازادی، هیوا به‌ یه‌كسانی و هیوا به‌ ژیانێكی به‌دوور له‌ سته‌م و نادادپەروەری.

پێشمه‌رگه‌ بوو به‌ سه‌مبولی ئازادی، پێشه‌نگی ژیانێكی جیاواز له‌ ژیانی ژێرده‌ستی و نموونه‌ی خۆڕاگری له‌ به‌رانبه‌ر بێدادیدا. پێشمه‌رگه‌ بوو به‌ ڕه‌نگ و دیمه‌نێكی نوێ بۆ شاخه‌ سه‌ربه‌رزه‌كانی و‌ڵات و باڵای هه‌ر شاخێكی به‌رزتر، ڕیشه‌ی قووڵتر، توانایی خۆڕاگریی زیاتر و جوانییه‌كانی دڵڕفێن تر كرد. له‌و ڕۆژه‌وه‌ كه‌ ناوی پێشمه‌رگه‌ ناودێر بوو، نه‌ته‌وه‌ی كوردیش دڵنیایی په‌یدا كرد كه‌ ئیدی بێكه‌س و بێ پشت نیه‌ و هه‌ر كات ئیڕاده‌ بكا، ده‌توانێ پێگه‌ی ده‌سه‌ڵاتی زۆرداران و داگیركه‌ران وه‌له‌رزین بخات.

به‌رزیی ناو و پێگه‌ی پێشمه‌رگه‌، به‌ هێزبوونی هیواكانی گه‌لی كورد و مرۆڤایه‌تی و ئه‌و ئه‌ركه‌ قورس، به‌ڵام پڕ له‌ شانازییه‌ی كه‌ هێزی پێشمه‌رگه‌ بەتایبەتی لەم قۆناغە هەستیارەی گریدانی خەباتی شاخ و شارماندا واتە ڕاسانی کوردستانی ڕۆژهەڵات، لە‌ ئه‌ستۆی گرتووه،‌ حوكم ده‌كا كه‌ هێزی پێشمه‌رگه‌ و هه‌ر تاكێكی هه‌ڵگری ناوی پێشمه‌رگه‌، به‌ر له‌ ده‌ستبردن بۆ چه‌‌كه‌كه‌ی بیر له‌ به‌رپرسایه‌تی و پێگه‌ی پێشمه‌رگه‌ بكاته‌وه‌. ده‌بێ هه‌موو ئه‌و نرخانه‌ی كه‌ پاراستنیان له‌ ڕۆژهه‌ڵاتی نێوه‌ڕاستدا به‌ ناوی به‌رزی پێشمه‌رگه‌وه‌ تۆمار كراوه‌‌ و به‌و ناوه‌وه‌ ده‌ناسرێ،‌ له‌ هه‌ڵسوكه‌وت و ئیڕاده‌ی یه‌كایه‌كی پێشمه‌رگه‌كانماندا خۆی بنوێنێ. چوونكه‌ پێشمه‌رگه‌ی کوردستان‌، وێڕای هه‌ڵگرتنی چه‌كی پارێزگاری له‌ نرخه‌كانمان،پێشه‌نگێكی سیاسیه‌ كه‌ بۆ هه‌ڵسوكه‌وت و بڕیاره‌كانی،لەگەڵ ئەوەدا کە دەستوور و بڕیاراتی سەرووی خۆی بەڕێوەدەبات،لە هەمانکاتدا ئه‌و تاكێكه‌ كه‌ توانای هه‌ڵبژاردنی هەیە، بڕیار ده‌دا، پاك و ناپاک به‌پێی ئه‌و نرخانه‌ی كه‌ پێبه‌ندیه‌تی لێك ده‌كاته‌وه‌ و له‌ به‌رانبه‌ر نادروستیدا له‌ هه‌ر هه‌لومه‌رجێكدا و له‌ هه‌ر شوێنێك بێ، هه‌ڵوێست ده‌گرێ و‌ تێده‌كۆشێ.

ئه‌مڕۆ هاوسانی گه‌لی كورد، هه‌موو گه‌لانی وشیاری جیهان به‌ ڕێزه‌وه‌ سه‌یری پێشمه‌رگه‌ و ئه‌و بەهاگەلە ده‌كه‌ن كه‌ پێشمه‌رگه‌ ده‌یانپارێزێ. هه‌ر چه‌ند به‌رژه‌وه‌ندییه‌ ته‌سكه‌كانی ده‌سه‌ڵاتداران ئێستا ڕێگا نا‌ده‌ن نه‌ته‌وه‌ی كورد به ویست و ئیڕاده‌ی خۆی، چاره‌نووسی خۆی دیاری بكات، به‌ڵام گومان له‌وه‌دا نیه‌ كه‌ ڕاسان و خه‌بات و خۆڕاگریی هێزی پێشمه‌رگه‌ داهاتوویه‌كی گه‌شی بۆ نه‌ته‌وه‌كه‌مان مسۆگه‌ر كردووه‌ كه‌ دره‌نگ یا زوو ده‌رگای ئازادیمان بۆ ده‌كاته‌وه‌. بۆیه‌ ده‌بێ ئه‌مڕۆ به‌ دڵنیاییه‌كی زیاتره‌وه‌، به‌ ئیڕاده‌یه‌كی پته‌وتره‌وه‌ و به‌ بڕوایه‌كی پۆڵایینه‌وه‌ هه‌نگاوه‌كانمان بۆ یه‌كخستنه‌وه‌ی توانا‌كان و ریزی ناو بزوتنەوەی كۆمه‌ڵگای كورد له‌ کوردستانی ڕۆژهه‌ڵات خێراتر و گورجتر بكه‌ین. چونكه‌ نه‌ته‌وه‌كه‌مان شیاوی داهاتوویه‌كی باشتره‌ و چاوه‌ڕوانی ئیڕاده‌ی هێزی پێشمه‌رگه‌ بۆ مسۆگه‌ركردنی ئه‌و داهاتووه‌یه‌.

بەڕێزان!

وەك دەبینین ئیكسیری ژیانی ئەبەدی بە گشتی خەونی هەمیشەیی مرۆڤ بووە. مرۆڤ‌و بەگشتی هیچ گیانلەبەرێك هەتا ئەمڕۆ نەیتوانیوە خۆی لە بازنەی مەرگ دەرباز بكات‌و وەك چۆن لەدایك بوون دەچێتە خانەی جەبرەوە، مردنیش لە بازنەی جەبر دەرناچێت ‌و ژیانی تاهەتاییش خەونێكی هەمیشەیی وەدی نەهاتووە. بەڵام كاردانەوی مەرگ لە ماناكانی ژیاندا، دەبێتە هاندەر‌و هۆكاری كراوەیی دەستی مرۆڤ بۆ داڕشتنی پلان‌و گەڵاڵەی درێژخایەن لە ژیانیدا بۆ ئەوەی جیاوازییەك لە باری مانا‌و ناوەرۆكدا لە نێوان (ژیان‌و مەرگ)‌و (مان‌و نەمان)دا بدۆزێتەوە‌و لەو سۆنگەوە ‌و وەكوو مرۆڤێكی دەربازبوو لە بێ هیوایی بازنەی جەبری سەپاو، مامەڵە لەگەڵ ژیان‌و چارەنووسی خۆی بكات. جەبر بە چۆكدا بێنێت، بە مەرگ پێبكەنێت‌و بڵێت، بەپێی جەبری سروشت لەدایكبووم‌و بەپێی ئەو جەبرەش دەمرم، بەڵام ئەوە خۆمم كە بڕیاردەرم لە چۆنیەتی مانم‌و كە بڕیاریش بێت جەبری نەمان قبووڵ بكەم، ئەوا وەها مردنێك هەڵدەبژێرم كە بارتەقای ئیكسیری ژیان بێت. ئەوە منم كە سنووری خۆفی مەرگ‌و نەمانم تێپەڕاندووە. ئەوە منم كە لەوپەڕی ژیان خۆشەویستیدا بۆ ژیانی ئاسوودەی خۆم، نەتەوەكەم‌و بەگشتی ئاسایشی مرۆڤ تێدەكۆشم‌و گەر لەو رێبازەدا گیانی خۆیشم بەخت بكەم باكم نییە. ئەوە منم كە پێش مەرگ دەكەوم، بە ڕوویدا پێدەكەنم‌و دەڵێم من نازناوی پێشمەرگە بۆ خۆم هەڵدەبژێرم‌و جەبری مەرگ بە ئیرادەی خۆم دیاری دەكەم‌و مانا بە مانم دەبەخشم‌و دەڵێم، هەتا من هەم مردن نییە ‌و كەمن مردم مانا بە نەمانم دەبەخشم‌و دەگەمە قۆناغی هەرمان، بەڵام هەرمانێك لە ناخی ویژدانی مرۆڤایەتی، گەلەكەم‌و لەدووتوێی مێژوویەكی پرشنگداردا. ژیان‌و مەرگ، مان‌و نەمان واتای سروشتیی خۆیان لەدەست دەدن‌و چۆن مان‌و چلۆن ژیان دەبنە واتای سەرەكیی ژیان. ئەوەش فەلسەفەی مانەوەی ناو‌و پێگە ‌و خۆشەویستیی پێشمەرگەیە.

هاوڕێیانی پێشمه‌رگه

ڕۆژتان پیرۆز، كاتتان باش و ژیانتان پڕ له‌ شانازی

یاد و ڕێبازی شەهیدانی گەل و نیشتمان، بە تایبەت شەهیدانی ڕاسان بەرز و بەڕێز بێت.

سەرکەوێ خەباتی ڕزگاریخوازانە و نەتەوەیی کورد.

مەرگ و نەمان بۆ دوژمنانی گەلی کورد، بەخاسما کۆماری ئیسلامی.

کۆمیسیۆنی سیاسی نیزامیی حیزبی دێموکراتی کوردستانی ئێران

٢٦ی سەرماوەزی ١٣٩٦ی هەتاوی
بەرانبەر بە ١٧ی دێسامبری ٢٠١٧ی زایینی
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧١٦ لەم ژمارەیەدا:

ــ دەنگی راسانی گەلان نابیستن
ــ خەباتی ڕۆژهەڵات بەردەوامە
ــ خۆپێشاندانەکانی ئێران و پرسی کورد
ــ کاوە ئاهەنگەری: ئیرادەی گشتی کوردەکان لە ئێران، بە هەبوونی ڕێبەرییەکی شیاو و لێوەشاو بۆ ئەم قۆناغە دەتوانێ بەشێک لە هاوکێشەکان بە قازانجی کوردستان بگۆڕێ
  • شەپۆلەکانی شار شەپۆلەکانی شار
    شەپۆلەکانی شار پڕە لە هەست و سۆزی نیشتمانپەروەری و نەخشێنەری ئەو جووڵە و راچەنینانەیە کە لە نێو کۆمەڵی کوردەواریدا بە نهێنی و دوور لە چاوی داگیرکەر، بەردەوام لە گەشە و هەڵچووندان.
  • تەیموور مستەفایی: هێزە نیزامییەکانی ئێران نەتەنیا نابێت لە سەرکوتی خۆپێشاندەراندا بەشداری بکەن، بەڵکوو دەبێت هاوکاری بەئەنجام گەیاندنی ئەو حەرەکەتە بن کە بە قازانجی هەموو لایەکە تەیموور مستەفایی: هێزە نیزامییەکانی ئێران نەتەنیا نابێت لە سەرکوتی خۆپێشاندەراندا بەشداری بکەن، بەڵکوو دەبێت هاوکاری بەئەنجام گەیاندنی ئەو حەرەکەتە بن کە بە قازانجی هەموو لایەکە
    دەقی وتووێژی کاک تەیموور مستەفایی، ئەندامی دەفتەری سیاسیی حیزبی دێموکراتی کوردستانی ئێران و بەرپرسی کۆمیسیۆنی تەشکیلاتی حیزب لەسەر خۆپێشاندانە سەرانسەرییەکانی ئێران و بڵاوکردنەوەی ڕاگەیەندراوی ئەم کۆمیسیۆنە لەم پێوەندییەدا، لەگەڵ تەلەفزیۆنی تیشک.
  • کاوە ئاهەنگەری: ئیرادەی گشتی کوردەکان لە ئێران، بە هەبوونی ڕێبەرییەکی شیاو و لێوەشاو بۆ ئەم قۆناغە دەتوانێ بەشێک لە هاوکێشەکان بە قازانجی کوردستان بگۆڕێ کاوە ئاهەنگەری: ئیرادەی گشتی کوردەکان لە ئێران، بە هەبوونی ڕێبەرییەکی شیاو و لێوەشاو بۆ ئەم قۆناغە دەتوانێ بەشێک لە هاوکێشەکان بە قازانجی کوردستان بگۆڕێ
    خوێنەرانی بەڕێزی "کوردستان"، سەبارەت بە دوایین بارودۆخی ئێران و کوردستان و هەروەها نەخش و دەوری کورد و حیزبی دێموکرات لە هاوکێشەکاندا، ماڵپەڕی "کوردستان میدیا" وتووێژێکی لەگەڵ بەڕێز "کاوە ئاهەنگەری" چاودێری سیاسی و ئەندامی حیزبی دێموکرات ئەنجام داوە کە لێرەدا دەخرێتە بەر دیدی ئێوەی خۆشەویست.
  • ئێمە و وێژمانەکانی داگیرکراوی و هەڵاوێردراوی ئێمە و وێژمانەکانی داگیرکراوی و هەڵاوێردراوی
    ئەم گوتارە ئەگەرچی لای گرووپ، ڕێکخراو و حیزبی سیاسیشەوە هەڵگیراوە، بەڵام بەوپێیەی کە ئەم دامەزراوەگەلە لە عەرزی واقیعدا کار دەکەن و پێویستیان بە دانوستان و دانیشتن و وەرگرتنی پووانی جیاواز هەیە، ئەم ڕێکارەیان هەتا ئیستە تا رادەیەک پاساو هەڵگرە؛ وەکوو تر لە ئاستی یەکانگیریی نەتەوایەتی و دینامیزمی کۆمەڵایەتییەوە هەندێک خەساریشی هەبووە کە لێرە ناگونجێ بەسەریاندا بێینەوە.
  • کۆمەڵگەی ئازاد لە سێبەری دێموکراسیدا کۆمەڵگەی ئازاد لە سێبەری دێموکراسیدا
    "ژان ژاک ڕۆسۆ"یش لە وتارێکیدا بە ناوی "ڕێککەوتنی کۆمەڵایەتی" دەقەکەی بەم ڕستەوە دەست پێ دەکات: "مرۆڤ سەرەڕای ئەوەیکە بە سەربەستی لە دایک دەبێت، بەڵام لە هەموو شوێنێکی ئەم دنیادا بندەست و دیلە".
  • خۆپێشاندانەکانی ئێران و پرسی کورد خۆپێشاندانەکانی ئێران و پرسی کورد
    لەو قۆناغەدا کە هێزەکانی رێژیم باوەڕیان بە خۆیان نەماوە و ترسی رووخان هێزی سەرکووتکەری بێ هیوا کردووە، راسانی شارەکانی کوردستان دەتوانێ زۆرترین دەسکەوت و کاریگەریی هەبێ. ئەوە دەرفەتێکە کە گەلی کورد دەتوانێ بۆ پێشخستن و نزیک بوونەوە لە ئامانجەکانی، کەڵکی شیاوی لێ وەربگرێ؛ بە تایبەتی کە لە قۆناغی نوێی خەباتدا، هۆشیاری نەتەوەیی و بەرینایی خەبات لە جاران بەرزتر و بەربڵاوترە.
  • پیلانەکانی بەسیج لە نێو زانکۆکانی کوردستاندا پیلانەکانی بەسیج لە نێو زانکۆکانی کوردستاندا
    لەم نێوانەدا، بەسیج، وەکوو ئامرازی سیخوڕیی حکومەت بەکار براون. بەسیج لە هەموو فەرمانگەیەکی حکومەتی و ناحکومەتی و لە واتایەکی بەربڵاوتر: لە هەموو شوێنێکدا وەکوو ڤایرۆسێک بڵاوبووەتەوە. قوتابخانەکان و زانکۆکانیش لە فیلترینی ئەم شوێنانەن. بەسیجی کوردیش، یان خۆماڵیتر بڵێم: جاشە کوردەکان، وەک باقی بەسیجییەکانی ئێران، ئەرکی تایبەتیان پێ ڕادەسپێردرێت کە بەرچاوترینیان، فرۆشتنی نیشتمان و هاوزمانەکانیانە.
  • خەباتی ڕۆژهەڵات بەردەوامە خەباتی ڕۆژهەڵات بەردەوامە
    زلهێزەکان هاتن و بێ لەبەرچاوگرتنی مافی گەلان، نەخشەی ناوچەکەیان گۆڕی؛ لە ئاکامی ئەم داڕشتنە نوێیە یەکلایەنە و نادادپەروەرانەشدا، هەندێک لە نەتەوەکان لە مافی دامەزرانی دەوڵەتی خۆیان بێبەش کران کە بەرچاوترینیان نەتەوەی کورد بوو. کورد بوو بە یەکەم قوربانی ڕەوتی نوێی نادادپەروەرانەی مێژوو، تەنیا لەبەر ئەوەیکە دروست بوونی دەوڵەتێکی کوردی لەگەڵ بەرژەوەندی ئەم زلهێزانە یەکی نەدەگرتەوە.
  • دەنگی راسانی گەلان نابیستن دەنگی راسانی گەلان نابیستن
    لە رۆژی ٧ی بەفرانباری ١٣٩٦ی هەتاوی و لە دوایین رۆژەکانی ساڵی ٢٠١٧ی زانییندا، بزاڤی مافخوازیی نەتەوەکان و خەڵکانی ئێران دوای چەندین و چەند کۆبوونەوەی ناڕەزایی دەربڕین، وەکوو ڕووبارێکی بەلرفە، بەنداوی کۆت و بەندی هەمەڕەنگی ڕێژیمی رووخاند و لافاوێکی سەرتاسەریی لە ئێراندا وەڕی خست.
  • لوقمان ئەحمەدی: هۆکاری سەرەکی ناسەقامگیری و شەڕ لە ڕۆژهەڵاتی ناویندا گرێدراوە بە بوونی فرە جەمسەری و نەبوونی هاوسەنگی هێز لە لایەک و ڕەقابەتی نێوان وڵاتانی ڕۆژهەڵاتی ناڤین و بەکارهێنانی ئەم شەڕ و ئاڵۆزیانە لە لایەن ئێلیتەکانی نێو وڵاتانی بەشدار بۆ پارستنی لوقمان ئەحمەدی: هۆکاری سەرەکی ناسەقامگیری و شەڕ لە ڕۆژهەڵاتی ناویندا گرێدراوە بە بوونی فرە جەمسەری و نەبوونی هاوسەنگی هێز لە لایەک و ڕەقابەتی نێوان وڵاتانی ڕۆژهەڵاتی ناڤین و بەکارهێنانی ئەم شەڕ و ئاڵۆزیانە لە لایەن ئێلیتەکانی نێو وڵاتانی بەشدار بۆ پارستنی
    زلهێزەکانی جیهان، بە تایبەت ڕوسیە و ئامریکا دەیانهەوێ پارسەنگێکی هێز لە ڕۆژهەڵاتی ناوین پێکبهێنن کە سەقامگیر بێ و تێیدا بەرژەوەندی و نفوزی خۆیان پارێزراو بێ. رۆڵی ئامریکا و روسیە چارەنووسساز دەبێ بۆ بارودۆخی داهاتووی ناوچەکە، ئەگەر یەک یان هەردوو لەم وڵاتانە گەرەنتی سەقامگیری و پارسەنگی هێز بدەن بە هاوپەیمان و دۆستەکانی خۆیان لە ناوچەکە ئەو کات ئیمکانی هەیە شێوەیەک لە سەقامگیری دروست بێ.
  • ئاو، کۆڵەکەی ستراتیژی داهاتووی کوردستان ئاو، کۆڵەکەی ستراتیژی داهاتووی کوردستان
    بنەمای گەشەی ئێران لە ڕووی جوغرافییەوە، لەسەر دوو پاژی ناوەندی _فارس و قەراغی _نافارس داندراوە، چون دەوڵەتی مۆدێڕن پێی وابوو تەنیا رێگەی مانەوەی، خوڵقاندنی یەک نەتەوەیە و لە پێناو ئەو ئامانجەش جوغرافیای پاشکەوتوو و پێشکەوتووی خوڵقاند.
  • کرماشان له پەنای بێپەناییدا کرماشان له پەنای بێپەناییدا
    ئەم دۆخە نالەبارە لەپاش زیاتر لە یەک مانگ، هاوکاتە لەگەڵ دەسپێکی سەرما و سۆڵە و بارینی بەفر؛ لەمبارەوە "ئەکبەر سەنجابی" فەرمانداری سەرپێڵی زەهاو باسی لە دۆخی نەشیاوی ژیانی هاووڵاتییان لە نێو خێوەتەکاندا کردووە و وتوویەتی: بەرپرسان دەبێ درک بە بارودۆخی لێقەوماوان بکەن؛ خەڵک بە دژوارییەوە لە ژێر خێوەتی ١٠ میتریدا دەژین!
  • دوکتور قاسملوو، بزاڤی راسیۆنالیزمی سیاسەت لە کوردستاندا دوکتور قاسملوو، بزاڤی راسیۆنالیزمی سیاسەت لە کوردستاندا
    ئەو تایبەتمەندییەی هزری سیاسی کە لە بۆڵەبۆڵ و تەنانەت خواستی سیاسیش جیای دەکاتەوە ئەوەیە کە سیستمێکی واتادارمان پێ دەبەخشێت کە کێشەی کورد لە پێوەندی لەگەڵ کێشەکانی دنیای مودێڕن و لە چوارچێوەی چەمک و دەستەواژەکانی تایبەت بەو دنیایە دووبارە پێناسە دەکاتەوە.
  • داهاتوی ڕەشی ئێران لە دەلاقەی بوودجەی ساڵی داهاتوودا داهاتوی ڕەشی ئێران لە دەلاقەی بوودجەی ساڵی داهاتوودا
    ئەگەر ئەرکی سپای قودس بە دەرکەوتنەکانی قاسم سلێمانی لە ناوچەدا هەژمار بکەین ڕوون و ئاشکرایە کە لە هەر کوێ شەڕ و نائارامی هەبێت، ناوبراویش لەوێیە؛ واتە سامانی وڵاتێکی وەک ئێران و کوردستان بۆ شەڕئەنگێزی و تیرۆر کەڵکی لێوەردەگیرێت و ئەوەش بەئاشکرا و بەیاسا دەیکەن.