• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٢١ی نوامبری ٢٠١٧ی زایینی - ٣٠ی خەزەڵوەری ١٣٩٦ی هەتاوی  

سەگەكان بۆ كێ هەڵدێن؟

زایینی: ٢٢-٠٤-٢٠١٢ - هەتاوی: ١٣٩١/٠٢/٠٣ - ١٨:٠٧ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
سەگەكان بۆ كێ هەڵدێن؟
كەیهان یووسفی

لەم جیهانەی كە ئێمە تێیدا دەژین و لە رێڕەوی پێچاوپێچی مێژوودا، مرۆڤگەلێكی زۆر هاتوون و رۆیشتوون و هەر كەس بە رادەی بەهرە و توانایی و تێگەیشتنی لە بەرپرسایەتیی بوونی، توویەكی چاندووە.

كەسانێك شوناس و چییەتی و جەوهەری مرۆیی خۆیان ناسیووە و رێگای دژوار و تاقەتپڕوكێنی هەقیقەتخوازی و ئازاد ژیان كردنیان هەڵبژاردووە، دژواری، ژان و رەنجەكانیان بە گیان سەندووە و كەوتوونەتە بەر هێرش و تووڕەیی دەسەڵاتداران و زاڵمان و كەسانێكی دیكەش ویژدانی خۆیان لە سێدارە داوە و بوونەتە كۆیلە و گوێڕایەڵ و خزمەتگوزاری دەسەڵاتداران و دیكتاتۆرە سەرەڕۆكان.

مێژووی مرۆڤایەتی هەمیشە گۆڕەپانی شەڕی نێوان ئەم دوو گرووپە بووە، گرووپێك كە دەنگی مافخوازی خەڵكە و لە ناخی كۆمەڵگاوە هەستاوە و ئاڵای ئازادیخوازی بەرز كردۆتەوە و ئەوانەی كە گوێكانیان كەڕ و چاوەكانیان كوێر كردووە و بوونەتە كۆیلەی پارە و دەسەڵات.

لە كوردستانیش خۆفرۆشان و فریوخواردووانێك بوون كە كەڵەوە (یوغ) ی بێ‏شوناسییان بە ملیان هەڵواسیوە و رێگای خزمەت بە داگیركەرانی ئەم خاكە و خیانەت بە وڵات و نەتەوەی خۆیان هەڵبژاردووە، ئەگەرچی زۆربەی ئەمانە بە هۆی نائاگاییەوە كەوتوونەتە نێو ئەم بۆسەیە بەڵام گوێ لە مستان و قەڵەم بە كرێگیراوانێكی بێ‏شوناسیش هەن كە ئاو بە جۆگەی داگیركەران و دەسەڵاتدارانی زاڵمدا دەكەن و دژی رۆڵە دەروەست و لە خۆبردووەكانی ئەم گەلە، شان بە شانی داگیركەران شەڕ دەكەن.

یەكێك لەو گوێ لە مست و خۆۆفرۆشانە لەم قۆناغە زەمەنییەدا كەسێك نیە بێجگە لە بەناو «لێكۆڵەر»ێكی خۆخواز بە ناوی عیرقانی قانعی‏فەرد.

قانعی‏فەرد چەند رۆژ لەمەوبەر میوانی بەرنامەی «همصدایی» لە كاناڵی ئاسمانی فارسی ئەندێشە بە پێشكەشكاریی «فرامرز فروزندە» بوو. لە بەرنامەیەكی ئەندازیاریكراو دووپاتكردنەوەی هێندێ قسەی بێ‏بنەما و گێڕانەوەگەلی بێ‏بەڵگە و نامەعقوول بە گومانی خۆی دەیەویست مێژووی خەباتی گەلی كورد بە پێكۆڵ بكێشێ یان بەوتەی خۆی رەخنەی لێ بگرێت و راستییەكانی بزووتنەوە و سیما خۆشەویستەكان و بەها نەتەوەییەكانی ئەم نەتەوە، روون بكاتەوە. بەڵام رەخنەگرتن لە مێژوو و دۆزینەوەی هەقیقەت بەرپرسایەتییەكە رەوتی مێژوو هەر كەسێك بە شیاوی ئەوە نازانێت و بە وتەی ئیدوارد سەعید ئەوەی كە لەمەڕ دەوری توێژەرێكی هەقیقەتەوە گرینگە، سەربەخۆیی و ئارمانجی ئەوە.

سەربەخۆیی توێژەری هەقیقەت لە ناوەندەكانی دەسەڵات كە مەبەستێك جیا لە وەرگرتنی كەسەكان بۆ ئامانجگەلێك وەكوو سڕینەوەی دژبەران و خوازراو نیشاندانی نەخوازراو و پاساوهێنانەوە و پشتگوێ خستنی كردەوەكانی ئەم ناوەندانە بە هۆگەلێك وەكوو «مەسڵەحەت» یان «شانازی نەتەوەیی» نیە و خستنە بەرباسی دوو ئارمانجی «ئازادی» و «عەداڵەت» كە پێوەری هەڵسەنگاندنی گشت كردەوەی حكوومەتەكانە، بنەمای سەرەكی بوونی توێژەری هەقیقەت نیشان دەدات.

توێژەری هەقیقەت رەخنە لە واقیع دەگرێت كە خوڵقێنەری واقعییەتیش بێ‏گومان دەسەڵاتە. بەڵام ئایا كەسانێك وەكوو قانعی‏فەرد لە ریزی ئەم كەسانەدا جێ دەگرن؟

ئایا قانعی‏فەرد رەخنە لە حكوومەت و كردەوەكانی دەگرێت؟ ئایا ئارمانجی قانعی‏فەرد عەداڵەت و ئازادی و بەرگری لە مافە پێشێلكراوەكانی نەتەوەكەیە؟ قانعی‏فەرد لە چوارچێوەی كامە سیاسەتدا بە وتەی خۆی لێكۆڵینەوە و توێژینەوە دەكات؟

قانعی‏فەرد مێژووی خەباتی ئازادیخوازانە و مافەكانی نەتەوەیەكی زوڵملێكراو هەرزان فرۆش دەكات، خەباتی خوێنینی ئەم گەلە بە وڵاتانی بیانیەوە پێوەند دەدات، بۆچوون و قسەگەلێك كە ئاغاوەتەكانی وی لە جەماران و قوم سێ دەیەیە كە دەیڵێنەوە و ژاوەژاوێكی وەها بۆ خەڵكی كوردستان قسەیەكی تازە نییە.

قانعی‏فەرد بەپێی ئەو مەئمووریەتەی پێى سپێردراوە هەوڵ دەدات سەرپۆش لەسەر كردەوە و جینایەتەكانی ناوەندێكی دەسەڵاتدا بنێ كە ئەویان بە كرێ گرتووە. بە وتنی گێڕانەوەگەلێكی بێ‏بەڵگە و نامەعقوول لە هەوڵی درووستكردنی شك و گومان لەمەڕ تیرۆری رێبەرانی شەهیدی حیزبی دێموكرات و بەتایبەت دوكتور قاسملوو لە لایەن رێژیمی ئاخوندیدایە. ئەو دەیهەوێت كۆماری ئیسلامی لە پێوەندیی لەگەڵ ئەنجامدانی گشت جینایەتەكانی لە كوردستان بێ‏تاوان نیشان بدات. قانعی‏فەرد حیزبەكان بە ئامیانی شاد و زیندوویی هەر كۆمەڵگایەك دەزانێت و لە هەمان حاڵدا پێكهێنانی حیزبە كوردییەكان بە كاری بیانییەكان دەزانێت. لاوان و چالاكانی كوردی هان دەدات بۆ بەشداریی سیاسی، بەڵام ئایا پێكهێنانی حیزب و چالاكی لە نێو ئەو حیزبەدا بە واتا بەشداری سیاسی نییە؟ ئایا رێژیمی خوازراوی ئەو (كۆماری ئیسلامی) ئیزنی چالاكی و بەشداریی سیاسی بە دەر لە چوارچێوە دیاریكراو و كۆنترۆڵكراوەكانی خۆی بە كەس دەدات؟

قانعی‏فەرد تیرهاویشتن بەرەوڕووی سەربازە ئێرانییەكان (پاسدارەكانی كۆماری ئیسلامی) بە كردەوەیەكی قیزەون ناو دەبات؟

بەڵام ئایا لە سێدارەدانی رۆڵەكانی كورد، قەڵاچۆ و كوشتاری ژنان، منداڵان و بە ساڵا‏چووانی كورد و هەزاران جینایەتی دیكەی كۆماری ئیسلامی لە كوردستان چ لە رابردوو و چ لە ئێستادا پاساوهەڵگرە و ناكرێت رەخنەی لێ بگیردرێت كە ئەم لێكۆڵەرە شازە! ئاوڕی لێ ناداتەوە؟

ئەم پیاو ماقووڵە خۆی بە لایەنگری مودێرنیتە و و ئەندێشەی مودێڕن دەزانێت، ئەو مافی دیاریكردنی چارەنووسی نەتەوەكان(نەتەوەی كورد) بە كارێكی دوا كەوتووانە دەزانێت بەڵام بەشداری لە حكوومەت و هاوكاری لەگەڵ رێژیمی سەدەنێوەڕاستی كۆماری ئیسلامی بە كارێكی مودێڕن و سەردەمیانە ناو دەبات!

یەكێكی لەو مەئموورییەتانەی بە قانعی‏فەرد سپێردراوە، چاندنی تووی رق و دووبەرەكی لە نێوان حیزب و رەوتە كوردییەكانی لە بەشەكانی كوردستانە.

گێڕانەوەگەلی زارەكی بێ‏بنەما و بێ‏بەڵگە كە لەمەڕ دژایەتیی نێوان شەهید قازی محەممەد و خوالێخوشبوو مەلا مستەفای بارزانی لە كۆماری كوردستاندا باس دەكات. باسگەلێك لە پێوەندی لەگەڵ بەستراوەبوونی بزووتنەوە كوردییەكان لەگەڵ دامودەزگای زانیاری وڵاتانی بیانی، قسەیەكی نوێ نیە كە عیرفانی قانعی‏فەرد ئەمڕۆ وەكوو «توتی» دووپاتی دەكاتەوە، وەها قسەگەلێك هەر ئەو میكانیزمەی حكوومەتە داگیركەرەكانی كوردستانە بۆ سەركوتی بێ‏بەزەییانەی بزووتنەوە ئازادیخوازەكانی نەتەوەی كورد لەم ساڵانەدا. ئەوان لە جیاتی وەدیهێنانی خواست و داواكارییەكانی رەوای گەلی كورد، لە رێگەی وەها میكانیزمگەلێكەوە ئەم بزووتنەوانەیان سەركوت كردووە. كردەوەكانی قانعی‏فەرد من دەخاتە بیر چیرۆكێكی بەناوبانگ، «دەڵێن رۆژێك لە دەشتێكدا سەگێك بە شوێن كەروێشكێكدا هەڵ دەهات، و نەیدەتوانی بیگرێ، كەروێشك سەری هەڵگەڕاندە دواوە و بە سەگی وت: خۆت ماندوو مەكە قەت ناتوانی من بگری؟ چونكو تۆ بۆ كەسانی‏تر هەڵ دێت و من بۆ خۆم».

بەڕێز! قانعی‏فەرد تۆ بۆ كەسانی دیكە ... و ئێمە بۆ خۆمان.
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧١٢ لەم ژمارەیەدا:

ــ شکستی کەرکووک کۆتایی ڕێگا نییە!
ــ ڕەوایی چەک و ڕەوایی خەڵکی
ــ ئیمپراتوریی نافەرمی ئێرانی
ــ دەسەڵات و کۆمەڵگا