کوردستان میدیا

ماڵپەڕی ناوەندیی حیزبی دێموکراتی کوردستانی ئێران

وتووێژی ماڵپەڕی كوردستان میدیا لەگەڵ بەڕێز حەسەن شەرەفی لەپێوەندیی پێكهاتنی كۆمیتەی كورد لە SI

22:17 - 1 بانەمەڕ 2713

كوردستان میدیا بەمەبەستی تاوتوێ‌كردنی پێك هاتنی كۆمیتەی كورد لە ئینترناسیوناڵ سوسیالیست وتووێژیكی لەگەڵ جێگری سكرتێری گشتیی حیزبی دێمۆكراتی كوردستانی ئێران پێكهێنا.
لەو وتووێژەدا هەوڵ دراوە زانیاری زیاتر لەبەڕێز حەسەن شەرەفی بەمەبەستی ئاگادار بوونی زیاتری بەردەنگانمان لە كاروباری كۆمیتەی كورد، وەربگرین و تیشك بخەینە سەر چۆنیەتی پێكهاتنی ئەو كۆمیتەیە.


دەقی وتووێژەكە:
كوردستان میدیا: مێژووی ئەندامیەتی یان چوونی حیزبی دێمۆكراتی كوردستانی ئێران بۆ ئینترناسیوناڵ سوسیالیست بۆ كەی دەگەڕێتەوە؟

حەسەن شەرەفی: مێژووی حیزبی دێمۆكرات لەگەڵ ئینترناسیوناڵ سوسیالیست دەگەڕێتەوە بۆ زیاتر لە ٢٠ ساڵ لەوە پێش كە لەرێگای دكتور قاسملوو سكرتێری گشتیی ئەو كاتی حیزبەوە دامەزرا. دواتر و لەدرێژەی ئەو پێوەندییەدا ساڵی ١٩٩٦ی زایینی (١٣٧٥)هەتاوی حیزبی دێمۆكراتی كوردستانی ئێران وەك ئەندامی چاودەدێر لەو رێكخراوەیەدا وەرگیرا و بە فەرمی پێوەندیی حیزب لەگەڵ ئەو رێكخراوە نێودەوڵەتییە پتەوتر بوو لەدرێژەی ئەو ئەندام بوونەدا دواتر پلەی ئەندامەتییەكەی لە چاوەدێرەوە بۆ ئەندامی راوێژكار بەرز بووە و لەهەموو ئەو ماوەیەدا حیزبی دێمۆكرات وەك ئەندامێكی چالاكی ئینترناسیوناڵ سوسیالیست خۆی دەرخستووە و لەرێگای ئەو رێكخراوەشەوە هەوڵی ناساندنی كورد بەگشتیی و كورد لە كوردستانی ئێرانی بەتایبەتی بەئەندامانی دیكەی ئەو رێكخراوەیە كەئێستا ١٦٨ ئەندامی لەنزیك لە ١٢٠ وڵات هەیە، داوە و لە زۆربەی هەرە زۆری كۆنگرە و كۆبوونەوەكانی ئەو رێكخراوە جیهانییەدا بەشدار بووە و زۆر جار بڕیارنامەی سەبارەت بە دۆزی كورد و پشتیوانی لەداخوازەكانی بەپەسندی ئەو كۆنگرە و كۆبوونەوانە گەیاندووە هەتا ئەو جێگایەی كە گرینگی دانی مەسەلەی كورد لەلایەن ئینترناسیوناڵ سوسیالیستەوە گەیشتە شوێنێك كە گرووپێكی كاری كوردان لەو رێكخراوەیەدا پێك بێ‌.
ئەو گرووپە كە چەند رێكخراوی رۆژئاوایشی تێدا بەشدار بوو سەرەتا چالاكتر لەپێوەندیی لەگەڵ مەسەلەی كوردا هەنگاوی نا، بەڵام لەم دوو ساڵەی دواییدا بەهەر هۆیەك چالاكییەكانی لەكزی دا، بۆیە كار كرا بۆ ئەوەی كە نەتەنیا ئەو گرووپە چالاك بكرێتەوە، بەڵكوو لەگرووپیش بەرەو كۆمیتە هەڵكشێ‌كە بە خۆشیەوە ئەو هەوڵە بەئاكام گەیشت، دیارە بێجگە لە حیزبی دێمۆكراتی كوردستانی ئێران لەم ساڵانەی دوایشدا یەكیەتی نیشتمانی كوردستان و پارتی ئاشتی و دێمۆكراسیش BDP بوون بە ئەندامی ئەو رێكخراوەیە و جێگای كورد قایمتر بوو، بەتایبەت كە بەڕێز جەلال تاڵەبانی سەرۆك كۆماری عێراقی فیدراڵیش بوو بە جێگری سەرۆكی ئینترناسیوناڵ سوسیالیست، ئێمە هیوادارین كە بە پێك هاتنی كۆمیتەی كورد لەو رێكخراوەیەدا كە یەكیەتی نیشتمانی سەرۆك و حیزبی دێمۆكراتی كوردستانی ئێران و BDP ش كە هاوجێگری سەرۆكی ئەو كۆمیتەیەن پتر لە پێشوو مەسەلەی كورد لەهەر چوار پارچەی كوردستان لە رێكخراوی ئینترناسیوناڵ سوسیالیست و لەرێگای ئەویشەوە لەكۆڕ و كۆمەڵە جیهانییەكاندا بهێنێتە گۆڕێ‌و كاری شوێنداری بۆ بكا.
كوردستان میدیا: وەرگرتنی حیزبی دێمۆكرات لە SI هەتا چەندە پێوەندیی بەسیاسیەت و نزیكایەتیەكانی دكتور قاسملوو بەو رێكخراوەیەوە هەبووە؟

حەسەن شەرەفی: بێگومان بەرنامەی سیاسی، سیاسەتەكان و رابردووی پڕ لەشانازی حیزبی دێمۆكرات و كەسایەتی ناسراوی دكتور قاسملوو بۆ كۆڕ و كۆمەڵە جیهانییەكان و راو بۆچوونە پێشكەوتووەكانی ئەو كەسایەتییە لەوەرگرتنی حیزبی دێمۆكراتی كوردستانی ئێران لە SI شوێندانەر بوون.
كوردستان میدیا: ئایا لەو دانیشتانەی كە ئێوە لەو رێكخراوەیەدا هەتانبووە هەتا چەندە توانیوتانە پرسی نەتەوەیی كە كێشەی سەرەكیی كوردە لەوێدا باس بكەن و ئەگەریش كراوە دەسكەوتەكانی چی بوون؟

حەسەن شەرەفی:
بوونی حیزبی دێمۆكرات وەك ئەندام SI دا و چالاك بوونی ئەو حیزبە لەو رێكخراوەیەدا یارمەتی بە دۆزی كورد و ناساندنی زیاتری دا و هەر وەك پێشتر لە وڵامی پرسیارێكدا ئاماژەم پێداوە بۆتە هۆی پەسند كرانی كۆمەڵێك بڕیار و هەڵویستی ئەرێنی ئەو رێكخراوەیە سەربارەت بە دۆزی كورد و رێ خۆشكەر بوون بۆبە ئەندام بوونی لایەنی دیكەی كوردیش، كەهیوادارم لەداهاتوودا هێز و لایەنی كوردی دیكەش بگرێتەوە.
كوردستان میدیا: لە پێوەندیی پێكهێنانی كۆمیتەی كورد دەكرێ‌چۆنیەتی دروست بوون و شێوازی كاركردنی بۆ بەردەنگای كوردستان میدیا باس بكەن؟

حەسەن شەرەفی: پاش كەمتر چالاك بوونی گرووپی كاری كوردان لە SI هەوڵ درا كە ئەو گرووپە ببوژێتەوە و پلەكەشی لە گرووپەوە بۆ كۆمیتە بەرز ببێتەوە كە ئەوە دەرەتانی زیاتر بۆ كورد دەخوڵقێنێ‌هەتا لەداهاتوودا لەو رێكخراوەیەدا بە بەرینی و شوێندارنەریی زیاترەوە كار بۆ دۆزی كورد لەهەر چوار پارچەی كوردستان بكرێ‌، ئێستا كە ئەو كۆمیتەیە لە دانیشتنی رێكەوتی ١٢ ئاوریلی ٢٠١٣ لە سلێمانی پێكهات دەكرێ‌چاوەڕوانی تێكۆشانی زیاتر بە قازانجی دۆزی كورد لە ئینتر ناسیوناڵ سوسیالیستدا بكرێ‌.
كوردستان میدیا: ئایا دەكرێ كاری ئەو كۆمیتەیە وەكوو سەكۆیەكی سیاسی هاوبەش بۆ هەموو حیزب و لایەنەكانی تر كە ئەندامەتییان لە ئینترناسیوناڵ سوسیالیستدا نیە سەیر بكرێ؟

حەسەن شەرەفی:
بێگومان كاری ئەو كۆمیتەیە خزمەت بە مەسەلەی كورد لە هەر چوار پارچەی كوردستانە و بە خۆشییەوە پێك هاتنەكەشی بە ئامادە بوونی ٢٤ حیزب و لایەنی سیاسیی لەهەر چوار پارچەی كوردستان بە ئەنجام گەیشتووە، ئەو كۆمیتەیە پێویستە كار بۆ هەموو لایەك بكا و راوێژ لەگەڵ ئەو لایەنانەش كە ئەندامی SI نین بكات، هەروەها تێ بكۆشێ‌حیزب و لایەنی دیكەی كوردیش لەو رێكخراوەدا وەك ئەندام وەربگیرێن ئەگەر خۆیان خوازراو بن.

كوردستان میدیا: لە راگەیاندنی رۆژنامەوانی كۆمیتەی كورداندا باس لە چەند خاڵ بۆ هەر چوار بەشی كوردستان كراوە و لەپێوەندیی كوردستانی رۆژهەڵات باس لە مافی دێمۆكراسی كراوە، تكایە لەو پێوەندییەدا زانیاری زیاترمان پێ‌بدەن و ئەو مافە خۆی لە چیدا دەبینێتەوە؟

حەسەن شەرەفی: لە راگەیەندراوەكەدا زیاتر ئاماژە بە مەسەلەكانی رۆژ كراوە، بەڵام هەوەك ئاماژەم پێدا كاری كۆمیتە لەخزمەت دۆزی كورد و داخوازە نەتەوایەتییەكانی كورد لەهەر چوار بەشی كوردستان دەبێ‌بەبێ‌جیاوازی.


كوردستان میدیا:
حیزبی دێمۆكرات وەكوو پارتێك كە خەبات بۆ نەتەوەی كورد لە كوردستانی ئێران دەكا وەكوو جێگری كۆمیتەی كورد دیاری كراوە و ئێوە ئەوە هەتا چەندە بەمافی ئەو بەشەی كوردستان دەزانن؟

حەسەن شەرەفی: هەر چەند لەو جۆرە هەڵبژاردن و دەست نیشان كردنانەدا ناكرێ‌باس لە ماف بكەین، بەڵام بەو رابردوویەی كە حیزبی دێمۆكراتی كوردستانی ئێران لە SI هەیەتی و بەو سیاسەت و بارودۆخە كە حیزبی دێمۆكرات خاوەنیەتی دەكرێ‌بڵێن شایانی گرینگی پێدانی لەوە زیاتریشە.


كوردستان میدیا:
ئەگەر لە كۆتاییدا شتێكی تایبەتتان لەوپێوەندییەدا هەیە دەتوانن باسی بكەن.

حەسەن شەرەفی: سپاس بۆ ئێوە بۆ ئەو دەرفەتەی كە پێتان دام من شتێكی تایبەتیم نیە ،بێجگە لەوە سەركەوتن و بەماف گەیشتنی كورد لەهەر چوار پارچەی كوردستان بە ئاوات بخوازم و رابگەیەنم كە حیزبی دێمۆكراتی كوردستانی ئێران لەو بەرپرسایەتییەدا كە بەرامبەر بە دۆزی كورد بەگشتیی دەكەوێتە ئەستۆی بەرپرسانە و چالاكانە تێدەكۆشێ‌و ئەركی خۆی بەو جۆرەی كە پێویستە بە ئەنجام دەگەیەنێت.

سپاس بۆ بەڕێز حەسەن شەرەفی