• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٢١ی ئاوریلی ٢٠١٨ی زایینی - ٠١ی بانەمەڕی ١٣٩٧ی هەتاوی  

بەیاننامە/ حیزبی دێمۆكرات: رێژیم دەیهەوێ‌ خەڵکی بەدوو دەستەی دەنگدەر و تەحریم كردوو دابەش بكات و یەکگرتووییان بشێوێنێ

زایینی: ٢٠-٠٦-٢٠١٣ - هەتاوی: ١٣٩٢/٠٣/٣٠ - ١٧:٤١ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
بەیاننامە/ حیزبی دێمۆكرات: رێژیم دەیهەوێ‌ خەڵکی بەدوو دەستەی دەنگدەر و تەحریم كردوو دابەش بكات و یەکگرتووییان بشێوێنێ
كوردستان میدیا: دەفتەری سیاسیی حیزبی دێمۆكراتی كوردستانی ئێران لەپێوەندیی هەڵبژاردنەكانی سەركۆماریی و ئەنجامەكەی بەیاننامەیەكی بڵاو كردەوە و تێیدا هاتووە، پێویستە بەشدارانی هەڵبژاردن و تەحریم كردووەكان رێز لەیەكتری بگرن.

دەقی بەیاننامەكە:

بەیاننامەی دەفتەری سیاسی حیزبی دێمۆكراتی كوردستانی ئێران لەپێوەندی لەگەڵ بەنا‌و هەڵبژاردنی سەركۆماریی ‌و ئاكامەكانی

هاونیشتمانانی بەڕێز!

ئازادیخوازانی ئێران!

كۆمەڵانی خەڵكی كوردستان!

رێژیمی كۆماری ئیسلامی ئێران بە پێی بەرنامەی دارێژراو رۆژی ٢٤ ی جۆزەردانی ساڵی ١٣٩٢ی هەتاوی بەناو هەڵبژاردنی سەرۆك كۆماری ‌و هەڵبژاردنی شۆراكانی شار ‌و دێی بەڕێوە برد.
ئەو هەڵبژاردنە لە هەلومەرجێكدا بەڕێوە برا كە تاقیكاری ئەمجۆرە هەڵبژاردنانە‌و بێ‌ئاكام بوونەكانی بۆ زۆربەی خەڵك ‌و هێز ‌و لایەنە سیاسییەكانی ئۆپۆزیسیۆن ‌و تەنانەت ناڕازییانی نێو دەسەڵاتیش دەركەوتبوو ‌و هەر بۆیەش بە شێوەیەكی كەم وێنە ‌و بە رادەیەكی نزیك بە تەواوی لایەنەكانی ئۆپۆزیسیۆن ‌و بەشێك لەناڕازیانی نێو دەسەڵات شانۆسازی هەڵبژاردنی سەرۆك كۆماریان تەحریم كرد.

بەرین بوونی ئەو تەحریمە بە رادەیەك بوو كە رێژیمی بە تەواوی نیگەران كرد ‌و رێبەری رێژیمی ناچار كرد داوا بكا ئەوانەش كە پشتیوانی لە رێژیم ناكەن بە خاتری وڵات بەشداری لە هەڵبژاردندا بكەن. بە كردەوەش جۆرێك موهەندیسی بەنا‌و هەڵبژرادنەكەی كرد ‌و پلانی وای داڕشت كە تا رادەیەك ناڕازییانی نێو بازنەی رێژیم بە بەشداری كردن ‌و ئامادەبوون لەسەر سەندوقەكانی دەنگدان رازی بكا. ئەوەش لە حالێكدا بوو كە پێشتر شۆرای نیگابان تەنیا ٨كەس لەوانەی تەئیدی سەلاحییەت كردبوو، كە هەموویان لە مۆرە دەست چێنكراوەكانی خامنەیی بن ‌و دەرچوونی هەركامیان بۆ ناوبراو فەرقی نەبێ، بۆ ئەوەی كە لەرەوتی هەڵبژاردنەكاندا ناچار بە راسپاردە بۆ كەسێكی تایبەتی نەبێ ‌و پێویستیش بەدەست بردن لەسندووقەكان ‌و گۆڕینی دەنگەكان نەكا. جیا لەوە بۆ ئەوەی خەڵك بەرە ‌و سندوقەكانی دەنگدان هان بدا ‌و پەلكێشان بكا شانۆی هەڵبژاردنی سەرۆك كۆماریی هاوكات ‌و لە هەر شار ‌و شوێنێك لە یەك شوێن ‌و لە یەك كاتدا لەگەڵ هەڵبژاردنی شۆرای شار ‌و دێدا بەڕێوەی برد، هەتا وا نیشان بدا كە بەشداری خەڵك پێشوازی لە هەڵبژاردنی سەرۆك كۆماری ‌و پشتیوانی لەرێژیمە، هەر بۆیە لە رواڵەتدا دەنگ وەرگرتن ‌و دەنگ بژاردنێكی بێ كێشە ‌و لە واقیع ‌و لەناوەرۆكدا هەڵبژاردنێكی نادێمۆكراتیك بەڕێوە چوو.

رێژیمی كۆماری ئیسلامی ‌و شەخسی خامنەیی لە بێ كێشە بەڕێوە چوون ‌و بەشداری بەشێكی زیاتر لەخەڵك لەو شانۆسازییەدا رەزامەندی خویان دەڕبڕی ‌و بەشداریی ٣٦میلیون كەسیان لەو هەڵبژرادنەدا بە پشتیوانی خەڵك لەو رێژیمە نیشاندا ‌و بە پوچەڵكردنەوەی هەڵویستی تەحریم دانا.
پێویستە بگوترێ بە پێ ئاماری خودی رێژیم ٥٦ میلیون كەس لەئێران خاوەنی مەرجی دەنگدان بوون كە لەو رێژەیە ٣٦ میلیون كەس چوونە سەر سەندوقەكانی دەنگدان ‌و دەری خست كە نزیك بە ٢٠ میلیون كەس لەوانەی خاوەنی مەرجی دەنگدان بوون لەبەشداری كردن لەو هەڵبژاردنە خۆیان بواردوە.

لەو ٣٦ میلیون دەنگەش هەر بە پێ راگەیاندنی وەزارەتی ناوخۆ نزیك بە یەك میلیون ‌و سێ سەد هەزار دەنگی باتڵ هەبوو كە ئەم رێژانە ناتوانن ئیدعای رێژیم بۆ بەشداری ٧٢لە سەدی خەڵك لەو هەڵبژاردنەدا بسەلمێنێ‌.
ئەوەش روونە كە بەشی زۆری ئەوانەی بەشداری هەڵبژاردنیان كرد نە بۆ پشتیوانی لەرێژیم، بەڵكوو بۆ ناگووتن بە رێژیم ‌و دەنگدان بە كاندیدایەك بوو كە ئەو مەبەستە دەربخا.

لە رەوتی پڕوپاگەندەی هەڵبژاردندا كاندیداكان وێڕای رەخنە لە كردەوەكانی دەوڵەتی پێشوو، هێندی وادە ‌و بەڵینیاندا كە گۆیا دۆخی نالەباری ئابووری وڵات ‌و بژێویی خەڵك باش دەكەن ‌و كێشەكانیان لەگەڵ دونیای دەروەوە چارەسەر دەكەن. ئەوەش لە حالێكدایە كە هەر لە رەوتی پڕوپاگەندەكانی هەڵبژاردندا بە چەند جار كاندیدا دەستچین كراوەكان وریا دەكرانەوە كە بەڵێنی وا نەدەن ‌و لە مەسەلەیەك نەدوێن كە لە دەسەڵاتی سەرۆك كۆمار بەدەرن، بە كردەوەش ‌و تارادەیەكیش بەپێی یاسا سەرۆك كۆمار لەرێژیمی كۆماری ئێسلامی ئێراندا تەنیا بەڕێوەبەری ئەمری رێبەرە ‌و دەوری لە سیاسەتدانان ‌و بڕیاری گرنیگدا نیە.

خۆ ئەگەر وا دابنێن ئەوەی رێژیم لە پێوەندی لەگەڵ بەشداری خەڵك لە هەڵبژاردندا ئیدعای دەكا راستن، دەبێ‌ئەوەش لەبەرچاو بێ‌كە هەم لە ئێران ‌و لە رێژیمی پێشووشدا ‌و هەم لەوڵاتانی دراوسێ‌‌و لەژێرحاكمییەتی دیكتاتۆریدا زۆر هەڵبژاردن بەڕێوەچوون كە ئاكامی زیاتر لە 90 لەسەدیان بۆ رێژیمەكان لێدەكەوتەوە، بەڵام كاتێك هەڵوێستی دژ بە دیكتاتۆری هاتە ئاراوە لەو رێژانە نەك خەبەرێك نەبوو راست بە پێچەوانەوە دەرچوون.

ئەوانەی بەم وەزعەوە ‌و بە سەركەوتنی هەڵبژاردنی موهەندیسی كراوی رێژیم دڵخۆشن ‌و تانە لە تەحریم ‌و لە تەحریم كردووەكان دەدەن پێویستە ئەوەیان لەبەرچاو بێ‌كە دابەشكردنی خەڵك بە دەنگدەر ‌و تەحریمكردوو كە هەر دووكیان هەڵوێستی ناگووتن بە رێژیمیان مەبەست بووە، زەربە لە یەكگرتوویی خەڵك دەدەن ‌و داهاتووش دەری دەخا كە ئەم جۆرە شانۆسازیانە شوێنێكی ئەرێنی لەسەر كرانەوی كەش ‌و هەوای سیاسی دانانێن، چوونكە بڕیاردەری سەرەكی لە رێژیمی كۆماری ئیسلامی ئێراندا شێوازێكی لەو چەشنە بە قازانجی رێژیم ‌و درێژەی دەسەڵاتەكەی نازانێ‌.

ئاكامی ئەو هەڵبژاردنە ‌و براوە دەستنیشان كراوەكەی، یانی ئاغای رووحانی كە لایەنگریی ئیسلاح تەڵەبانی لە پشت بوو، بێ‌ئەوەی خۆی بە ئیسلاحتەڵەب بزانێ‌، لەلایەن هێندی وڵاتانی رۆژئاواییەوە پێشوازی لێكرا، بەو هیوایە كە دەرگا داخراوەكانی كێشە بنەڕەتییەكانی رێژیم لەگەڵ دونیای دەرەوە بكاتەوە‌و لەئاكامدا فشارە ئابوورییەكان سووك ببن، ئەو چاوەڕوانییە بێجگە لەوەی هەڵوێستێكی بە پەلەیە، مانای ئەوەیە كە گیر وگرفتی ئەو وڵاتانە لەگەڵ رێژیمی كۆماری ئیسلامی ئێران فەرقی هەیە لەگەڵ ئەم داخوازیانە كە كۆمەڵانی خەڵكی ئێران لە ئازادی، دێمۆكراسی، مافی نەتەوایەتی، عەداڵەت ‌و دادپەروەری ‌و بەرابەری ژن ‌و پیاو لە خێزان ‌و لە كۆمەڵدا هەیانە ‌و ئەوانەش شتێكن كە لەگەڵ ئیدئولوژیەك كە كۆماری ئیسلامی پێی پابەندە لە ناتەباییدان، هەر چەند وێ ناچێ رێژیم لەم سیاسەتەی پێشووی پاشگەز بێتەوە ‌و پێشوازی وڵاتان بكاتە واقعیێەت.

ئەوەی بۆ نەتەوەكان ‌و خەڵكی ئێران گرینگە ئەوەیە كە تەحریم كردووەكان رێز بۆ ئیرادەی بەشدار بووانی هەڵبژاردن دابنێنن ‌و دەنگدەرانیش رێز بۆ ئەو كەس ‌و حیزب ‌و لایەنە سیاسییانە دابنێن كە ئەوانیش بە مەبەستی "نا" گووتن بە رێژیم هەڵوێستی بایكۆتی شانۆسازی هەڵبژاردنیان گرتە بەر.

سەركەوتنی رووحانی لەو هەڵبژاردنەدا هەرچەند مانای ناگووتن بە رێبەر ‌و هاوفكرانی دەبەخشی، بەڵام ئەگەر ئیرادەی خامنەیی بۆ ئاڵوگۆڕێكی بەرتەسك ‌و قبوولی قەیرانی بوونی وەزعی وڵات ‌و دەرچوون لەو وەزعەی لە پشت نەبێ‌وێ ناچێ‌بتوانێ‌سەرچاوەی تەنانەت ئەو ئاڵوگۆڕە بەرتەسكەش بێ‌كە ئیدیعای دەكا. هەر وەك رەفسنجانی‌و خاتەمیش لە سەردەمی سەرۆك كۆماری خۆیاندا چیان بۆ نەكرا ‌و دانیان بە بێ‌دەسەڵاتی خۆیان نا.


ئەركی خەڵكی ئێران بە گشتی پاش ئەو بەناو هەڵبژاردنە ئەوەیە كە بە شێوەیەكی تێكرایی ‌و بە جیددی لەسەر داخوازە سیاسی ‌و ئەساسییەكانی خۆیان سوور ‌و پێداگر بن ‌و ئەو واقعییەتە لەبەرچاو بگرن كە لەمپەڕی سەر رێگای دێمۆكراسی ‌و مافە نەتەوایەتییەكان ‌و عەداڵەت ‌و ئابوورییەكی سالم ‌و خوشگوزەرانی خەڵك ‌و لە نێوبردنی جیاوازی دانان ‌و هەڵاواردن بە ئاڵوگۆڕی مۆرەكانی نێو دەسەڵات ‌و یەك لەوان سەرۆك كۆمار نایەتە دیی، بەڵكوو یاسای بنەڕەتی، دەسەڵاتی بێسنووری رێبەر، وەڵامدەر نەبوونی رێبەر لە بەرانبەر خەڵكدا، دەوری سوپای پاسداران ‌و دەسەڵاتی فرەرەهەندی ‌و دەست بەسەرداگرتنی سامانی وڵات لە لایەن ئەو سوپایەوە ‌و دەوری شۆرای نیگابان ‌و بەگشتی بوونی ئەو رێژیمە لە تەواوییەتی خۆیدا لەمپەڕی ئەسلین لەسەر رێگای دێمۆكراسی ‌و بەداخەوە هیچ بەناو ئیسلاحتەڵەبێكیش بەرنامەی بۆ لا بردنی ئەو لەمپەرانە نییە ‌و تەنانەت لێیشی نادوین و باوەڕیان بە سووڕانەوە لە بازنەی ناچاربوون لە هەڵبژاردن لە نێوان خەراپ ‌و خەراپتردا هەیە كە ئەوە ویستە ئەسڵییەكانی خەڵكی ئێران ناهێنێتە دی.

ئەوەش كە بەشی زیاتری خاوەن مەرجەكانی دەنگدان چوونە سەر سندووقەكانی دەنگدان حقانیەتێكی ئەوتۆ بۆ رێژیم ناسەلمێنێ‌، بۆ مەگەر لە رێفراندومی ساڵی ١٣٥٨دا كە بێجگە لە كورد ‌و هێزە سیاسییەكانی كە ریفراندومیان بە هۆی نادێمۆكراتیك بوون تەحریم كرد، بە قسەی رێژیم ٩٠ لە سەدی خەڵك دەنگیان بە دامەزراندنی نیزامی كۆماری ئیسلامی نەدا؟ كە ئەمرۆ هەڵوێستی كورد بۆتە هەڵوێستێكی مێژوویی ‌و زۆربەی دەنگدەران بەو رێژیمەش، ئێستا لێی بێزران ‌و لەو دەنگە كە داویانە پەشیمانن.

رووحانی براوەی ئەو هەڵبژاردنە لەپڕوپاگەندەی هەڵبژاردندا لە ئاشتی نەتەوەیی دەدوا كە دیارە مەبەستی ئاشتی لە چوارچێوەی لایەنەكانی نێو رێژیم دایە بۆ ئەوی دردۆنگییەكانی نێوانیان بڕەوەێنێتەوە‌و لە ناكۆكیەكانیان كەم بكرێتەوە كە ئەگەر لەو پێوەندییەدا سەركەوتوو بێ‌چ خێرێكی بۆ خەڵك لێدەكەوێتەوە؟

داوەری لەسەر ئەوە كە رووحانی لە نێوان وەفادار بوون بە بەڵێنییە بەرتەسكەكانی ‌و وەفادارمانەوەی وەك رابردوو بە خامنەیی قورسایی بەكام لادا دادەخا رەنگە زوو بێ‌‌و داهاتوو ئەوەمان پتر ‌و روونتر بۆ دەردەخا ‌و تاقیكاریەكی دیكە دەخاتە بەرچاوی كۆمەڵانی خەڵكی ئێران ‌و بیروڕای گشتی جیهانی.

بەگشتی ئاكامی هەڵبژاردنی سەرۆك كۆمار لە ئێراندا شتێك نییە كە حقانیەتی بەشداریی لە هەڵبژاردندا بسەلمێنێ‌یا هەڵوێستی بایكوت كردن بە نەشیاو دەربخا، چوونكە لە هەردوو حاڵەتدا مەبەست ناگووتن بە رێژیمێك بوو كە لەو هەڵبژاردنەدا خۆی بە سەركوتوو دەزانێ‌.

حیزبی دێمۆكراتی كوردستانی ئێران
دەفتەری سیاسی
٣٠‌ی جۆزەردانی ١٣٩٢‌ی هەتاوی
٢٠ی ژوئەنی ٢٠١٣‌ی زایینی
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧٢٣ لەم ژمارەیەدا:

ــ نان، ئازادی، کەرامەتی ئینسانی
ــ تارمایی لە چاویلکەی فاشیزمەوە
ــ کۆڵبەر یان کۆڵنەدەر
ــ د.سەربەست نەبی: دەریای سپی بە هەناسەی ڕووسیه دەژمێردرێت
  • ئەدەبیاتی کوردی و کۆماری جیهانیی ئەدەبیات ئەدەبیاتی کوردی و کۆماری جیهانیی ئەدەبیات
    مێژووی سەرهەڵدانی ئەدەبی جیهانی لەلایەن پاسکال کازانۆڤا لە کتێبی کۆماری جیهانیی ئەدەبیات(ز١٣٩٢) سێ رەوتی فۆرم، گەشەسەندن و رەوتی کێبڕکێی نێودەوڵەتی لەخۆ گرتووە و هەر رەوتێکی لەگەڵ گۆڕانکاریی بنەڕەتی لە سەرهەڵدان و پەرەسەندنی زمانە رەسەنەکانی ئەورووپا لێکداوەتەوە و مانای کردۆتەوە.
  • د.سەربەست نەبی: دەریای سپی بە هەناسەی ڕووسیه دەژمێردرێت د.سەربەست نەبی: دەریای سپی بە هەناسەی ڕووسیه دەژمێردرێت
    مەسەلەی عەفرین جودایە لەگەڵ ئەو مەسەلەیە؛ ئەجێندای سیاسیی گەورە لە پشت ئەو هێرشە هەبوو، بۆیە ئەورووپا ئامادە بوو هێرش بکات، بەڵام بۆ عەفرین نا.
  • کۆڵبەر یان کۆڵنەدەر کۆڵبەر یان کۆڵنەدەر
    ئەوەیکە لە گۆشە و کەناری وڵاتدا هێندێک خەمخۆری لەلایەن خەڵک یان خەڵکانێکدا دەبیندرێ یان هێندێک پێشکەوتن لە چەند بواری جیاجیادا دێتە ئاراوە، ئەوە هیممەت و بەرخۆدانی خەڵکە لە بەرامبەر کۆنەپەرەستی رێژیم و بە هیچ شێوەیەک پەیوەندی بە رێژیمەوە نییە .
  • \ "هوزمانەوەن" نمونەی بەرچاوی له نێوبردنی سروشتی کوردستان
    کاتێک ئێمه دەڵێین حکوومەته داگیرکەرەکانی کوردستان به بەرنامەیەکی داڕێژراو، سەرەکیترین سەرچاوەی ژیانی نەتەوەی کوردیان کردووەتە ئامانجی هێرشەکەیان، تەنیا له ڕووی هەستی خۆشەویستی خاک و کوردبوونەوە نییه، بەڵکوو لەم ڕاستایه‌دا بەڵگه ئەوەنده زۆره که تەنیا لێکوڵینەوەیەکی کورت دەتوانێ زۆر شت ڕوون بکاتەوە، بەڵام بەداخەوه لەم بوارەشدا ئێمەی کورد کەمکارییەکی ئێجگار زۆرمان کردووه.
  • دوژمنانی ئازادی چ ڕەوتە فیکرییەکیان بەدڵە دوژمنانی ئازادی چ ڕەوتە فیکرییەکیان بەدڵە
    ئەگەر ئاوڕێک لە مێژووی فەلسەفە و زۆربەی زانستە فیکرییەکان بدرێتەوە، هێندێ خاڵ بەرچاو دەکەوێت، کە وڵامی زۆربەی قەیرانە هزرییەکان دەدرێتەوە. ئەگەر لە بابەتێکدا دوو لایەن و هێڵی فیکری جیاواز دەکەونە ململانێیەوە، ئاکامەکەی یان دەبێتە هۆی بەزینی یەکیان، یان دەبێتە هۆی سەرهەڵدانی فکرێکی سێهەم کە ڕەنگە دڵخوازی هیچ لایەکیان نەبێت، بەڵام کۆتاییهێنەری ململانێیەکانە.
  • تارمایی لە چاویلکەی فاشیزمەوە تارمایی لە چاویلکەی فاشیزمەوە
    بنەماییترین تایبەتمەندییەکانی فاشیزم بریتییە لە پیرۆزمەندیی پەتی و سەرۆکێکی بێ هەڵە. لەلای فاشیستەکان ئەوەی هەمیشە وەک داردەست ئاپۆرەی پێ کۆنترۆڵ دەکرێ، تارماییەکی تۆقێنەرە کە بەپێی هەڵکەوتەیەکی تایبەت ئەم تارماییە لە شێوازی دوژمن، لایەن یان ئەگەرێک خۆی دەردەخات.
  • نان، ئازادی، کەرامەتی ئینسانی نان، ئازادی، کەرامەتی ئینسانی
    مرۆڤێك كه له هەژاریدا ڕاگیراوه، مرۆڤێك كه نكۆڵی له ناسنامه ئێتنیكی، ئایینی یان نەتەوەییەكەی دەكرێ یان دەكەوێته بەر تەوژمی سیاسەتی تواندنەوه و سووكایەتی پێكردن یان لەژێر ستەمی جنسیدا دەژی، مرۆڤێكه كه كەرامەتی لێ زەوت كراوه.
  • شەریف هەژاری: کورد خۆی دەرفەتەکان وەک پێویست ناقۆزێتەوە. بەشێک لە ھێزەکوردییەکان بوونەتە داردەستی ئێران و بە بێ ھیچ شەرمێک، فەرمانەکانی جێبەجێ ئەکەن شەریف هەژاری: کورد خۆی دەرفەتەکان وەک پێویست ناقۆزێتەوە. بەشێک لە ھێزەکوردییەکان بوونەتە داردەستی ئێران و بە بێ ھیچ شەرمێک، فەرمانەکانی جێبەجێ ئەکەن
    گۆڕانکارییەکانی ناو کابینەی ترامپ و کاریگەرییان لە سەر سیاسەت و رووداوەکانی ناوچە، تەوەری گفتوگۆی ئەم ژمارەیەی رۆژنامەی کوردستانە لەگەڵ شەریف هەژاری، مامۆستای مێژوو لە زانکۆی سلێمانی، کە سەرنجتانی بۆ ڕادەکێشین:
  • پاژنەی ئاشیلی ڕێژیمی ئێران پاژنەی ئاشیلی ڕێژیمی ئێران
    لە دوو بابەتی پێشوودا، "شەڕی ئێران و ئیسرائیل"و بەشی یەکەمی "پاژنەی ئاشیلی ڕێژیمی ئێران"، هێڵی بەهێزی ڕێژیمی تاران (دەرەوەی سنوورەکان و کەڵک وەرگرتن لە ملیشیا و لایەنگرە شێعەکانی لە وڵاتانی ناوچە) و خاڵی لاوازی ئەو ڕێژیمە (خەڵکی ناڕازی و وەزاڵەهاتووی نێو شارەکانی ئێران) خرایە بەر باس و لێک درایەوە.
  • بێستوون، شوێنی خودای خوداکان بێستوون، شوێنی خودای خوداکان
    شاری بێستوون، یەکێک له شارەکانی کرماشانه که له باکووری رۆژهەڵاتی ئەو گەورەشاره جێگای خۆش کردووه و له سەر رێگای کرماشان - هەمەدان که سەردەمانێک پێتەختی ئیمپراتوری کوردان بوو، هەڵکەوتووه.
  • مانیفێستی ڕزگاری مانیفێستی ڕزگاری
    هەتا لاپەڕەکانی مێژووی کورد زیاتر هەڵدەدەینەوە، تابلۆی تراژێدیای کورد زیاتر دەردەکەوێت. لە پەنای ئەم تابلۆیە سەربوردەی قارەمانیەتی، فیداکاری، کاریگەری بلیمەت و ڕێبەرەکانمان لەسەر زیندوو مانەوەی کورد وەکوو نەتەوە زۆر ڕوونە. لە لایەک پرسیاری بۆچی تا ئێستا سەرنەکەوتووین دەبێتە خۆرەی مێشک، لە لایەک جێ داخە بۆچی ئەم ڕێبەرە زانا و لێهاتووانە بە ڕادەی پێویست لە لایەن تاکی کورد بەرجەستە نەکراون.
  • پەیامی کۆمیسیۆنی کۆمەڵایەتی حیزبی دێموکرات بەبۆنەی ٧١ەمین ساڵیادی لەسێدارەدرانی پێشەوا قازی محەممەد و ڕۆژی شەهیدانی کوردستان پەیامی کۆمیسیۆنی کۆمەڵایەتی حیزبی دێموکرات بەبۆنەی ٧١ەمین ساڵیادی لەسێدارەدرانی پێشەوا قازی محەممەد و ڕۆژی شەهیدانی کوردستان
    ئەوان کۆتاییان بە کۆمار هێنا، بەڵام نەیانزانی ئامانجەکانی کۆمار و گیانفیدایی ڕێبەرەکانی، چ بەهایەکی مەزنن و چۆن بۆ نەوەکانی داهاتوو دەگوازرێنەوە، دوای حەفتاو یەک ساڵ لەو ڕووداوە، داستانی مەرگی سەربەرزانەی پێشەوا، هێشتا خاوەنی بەهێزترین وانەی خۆنەویستی، خەڵکویستی، ئازادیخوازی و سەرفرازییە و ئەوینێکی بەهێزیشە بۆ بە چۆکداهێنانی هەموو مەترسی و ناخۆشییەکان.
  • سووکایەتی، ئامرازی تواندنەوە سووکایەتی، ئامرازی تواندنەوە
    لە وڵاتێکدا کە چەند کەلتوور و نەتەوە و ئایینی جیاواز دەژین، حکوومەتی دەسەڵاتدار لەگەڵ هەڕەشە و دەرفەتی جۆربەجۆر بەرەوڕوویە؛ لەو جۆرە وڵاتانەدا، بەهۆی چەندنەتەوەیی و چەندکولتووری و پێکهاتەی ئاڵۆزی کۆمەڵگاوە، ژیانی کۆمەڵایەتی - سیاسی و هەروەها ئیدارەکردنی حکوومەت و دابەشکردنی دەسەڵات و سامان و ئیمتیازەکان لە نێو خەڵکدا ئەرکێکی ئاڵۆز و پڕمەترسییە، کە هەرجۆرە هەنگاو و کردارێک کە نیشان لە هەڵاواردن و بێبەشکردنی کەس و کەسانێک و پێکهاتەیەک بدا، دەبێتە هۆکارێک بۆ رووخانی ئێعتمادی خەڵک بەرامبەر بە دەسەڵاتدار و حکوومەت.
  • پانۆڕامای ساڵ پانۆڕامای ساڵ
    خوێنەرانی خۆشەویست، ڕۆژنامەی کوردستان وەک نەریتی ساڵانە لە دوایین ژمارەی ساڵدا پوختەیەک لە ڕووداو و هەواڵە گرینگە حیزبییەکانی ساڵ دەخاتە بەر دیدی ئێوەی ئازیز؛ لێرەدا بەشێک لەم هەواڵ و ڕووداوانە دەخەینە بەر چاوی ئێوەی هێژا: