ڕۆژی یەکشەممە ٢٦ی خاکەلێوە کاک سەربەست کەریم کەسایەتییکی خۆشناو و دۆستی لەمیژینەی حیزبی دێموکراتی کوردستانی ئێران خەڵکی شاری قەڵادزێ لە تەمەنی ٦٥ ساڵیدا کۆچی دوایی کرد.
کاک سەربەست لەنێو خەڵکی ناوچەکانی پشدەر لە باشووری کوردستان و سەردەشت، ڕەبەت و بانە لە ڕۆژهەڵاتی کوردستان کەسایەتییەکی خۆشناو و ناسراو بوو.
کاک سەربەست دۆستێکی لەمێژینەی حیزبی دێموکراتی کوردستانی ئێران بوو، بۆ ھەموو ئەو ڕووداو و کارەساتە ناخۆشانەی بەسەر حیزبی دێموکراتدا دەھاتن نیگەران و خەمخۆر بوو و لە ھەموو دۆخێکدا لە نزیکەوە سەردانی بنکەکانی حیزبی دێموکراتی دەکرد.
ناوبراو لە هەر کۆڕ و کووبوونەوەیەکدا باسی پێشمەرگە و حیزبی دەکرد و بە ڕاشکاوانە و بێ ترس بەرگری لە سیاسەتەکانی حیزب دەکرد. ھەر ئەوەش بوو لە کاتی سەفەرکردن بۆ ڕۆژھەڵات لەلایەن ئیتلاعات و دەستوپێوەندییەکانی ڕێژیمی ئێرانەوە کۆسپ و بەربەستیان بۆ دروست دەکرد.
کاک سەربەست خزم و کەسوکارێکی زۆری لە ڕۆژهەڵاتی کوردستان هەیە و لەگەڵ زۆرێک لە بنەماڵەکانی حیزبی تێکەڵاوی و گەرموگوڕی ھەبووە.
ناوەندی ڕاگەیاندنی حیزبی دێموکراتی کوردستانی ئێران بەم بۆنەوە سەرەخۆشی لە بنەماڵە و خزم و کەسوکاری ناوبراو دەکات و خۆی بە هاوبەشی خەمیان دەزانێت.
