کوردستان میدیا: دەورەی ٢٢٠ی سەرەتایی پێشمەرگە، لە سنوورەکانی کوردستانی ڕۆژهەڵات کۆتایی پێهات، و جێژنی تایبەت بە دەورەی سەرەتایی پێشمەرگە لەو شوێنە بەڕێوە چوو.

بەپێی ڕاپۆرتی هەواڵنێری ماڵپەڕی کوردستان میدیا، ڕۆژی یەکشەممە ڕێکەوتی٧ی خەرمانانی ١٣٩٥ی هەتاوی، دەورەی ٢٢٠ی سەرەتایی پێشمەرگە، لە سنوورەکانی ڕۆژ‌هەڵاتی کوردستان کۆتایی پێهات، و پۆلێک لە لاوانی شۆڕشگێڕی کوردستان پەیوەست بە ڕیزەکانی حیزبی دێموکراتی کوردستانی ئێران بوون.

ئەو ڕێوڕەسمە سەرەتا بە خوێندنی سروودی نەتەوایەتی \'\'ئەی رەقیب\'\' و خولەکێک بێدەنگی بۆ ڕێزگرتن لە گیانی پاکی شەهیدانی کوردستان دەستی پێکرد.

پاشان ئومید مەندومی کادری فێرگەی سیاسی نیزامیی حیزبی دێموکراتی کوردستانی ئێران، بەخێرهاتنی میوانانی بەشداربووی ئەو ڕێوڕەسمەی کرد.

دواتر دوکتور میرۆ عەلیار ئەندامی دەفتەری سیاسیی حیزبی دێموکراتی کوردستانی ئێران، و بەرپرسی کۆمیسیۆنی پەروەردەی حیزبی دێموکرات، پەیامێكی تایبەت بە ڕێوڕەسمی دەورەی ٢٢٠ی سەرەتایی پێشمەرگەی پێشکەش بە بەشداربووانی جێژنەکە کرد.

عەلیار لە قسەکانیدا باسی لە سەر ڕاسان و گرێدانی خەباتی شاخ و شار کرد و گوتی؛ ئەم حەرەکەتە هەڵقوڵاوی دڵی کۆمەڵانی خەڵکە و ویستی خەڵکی کوردستانە.

ناوبراو لە بەشێكی دیکەی قسەکانیدا باسی لەوە کرد: پێشمەرگە مرۆڤێکی ئازادیخوازە کە هەستی بە چەوسانەوەی نەتەوەکەی کردووە و بۆ ڕزگاریی نەتەوەکەی هاتووەتە مەیدان و ئامادەیە گیانی خۆی لەو ڕێگایەدا بەخت بکات.

هەروەها دواتر پەیامی دەورەی ئامووزشیی دەورە لەلایەن \'\'فەریاد دروودی\'\' مامۆستای فێرگەوە پێشکەش کرا و پاشان پەیامی دەورەی بەشداربووان لەلایەن سەباح نیکخا یەکێک لە بەشدارانی دەورەکەوە خوێندرایەوە.

لە نێوئاخنی بەرنامەکەدا سروودی مەڕێژن بۆم فرمێسکی غەم لە لایەن بەشداربووانی دەورەوە پێشکەش کرا.

پاشان شێعری سەنگەری بەرز لە لایەن عومەر فەخرەدین‌فەر ەوە خوێندرایەوە.

لە کۆتایی ڕێوڕەسمەکەشدا خەڵات بە سەر بەشداربووانی دەورەی سەرەتایی پێشمەرگە، کە لە بواری نەزم و دیسیپلین و هەروەها وانەکان، نێونجی نمرەکانیان بەدەست هێنابوو، دابەش کرا.

کۆتایی ڕێوڕەسمەکە بە شایی و هەڵپەڕکێی بەشداران کۆتایی پێهات.