• ڕۆژنامەی کوردستان
  • گۆڤاری ئاگری
  • گۆڤاری بیری خوێندکار
  • گۆڤاری لاوان
  • گۆڤاری ژنان
  • کەناڵی تەلەفزیۆنی تیشک
  • گۆڤاری نەرگز
٢٢ی نوامبری ٢٠١٧ی زایینی - ٠١ی سەرماوەزی ١٣٩٦ی هەتاوی  

حیزبی دێموکرات و حکوومەتی دێموکراتیک

زایینی: ٢٤-٠١-٢٠١٦ - هەتاوی: ١٣٩٤/١١/٠٤ - ١٠:٠٨ تاران قه‌باره‌ی فۆنت: قه‌باره‌ی نووسراوه‌ گه‌وره‌ بكه‌قه‌باره‌ی نووسراوه‌ بچووكتر بكه‌‌
حیزبی دێموکرات و حکوومەتی دێموکراتیک
کەریم پەرویزی

دامەزرانی کۆماری کوردستان لە ٧٠ ساڵ لەمەوبەردا، دنیایەکی گۆڕی کە لە پێشتردا نەتەوەی کوردی تێدا دەسڕایەوە و دەسەڵاتی فاشیستی دەیەویست بوونی نەتەوەیەک لە ڕەگ و ڕیشەوە بسڕێتەوە. کۆماری کوردستان چەندین ڕەهەندی جیاوازی سیاسی، کولتووری، مێژوویی، ستراتژیک و کۆمەڵناسانەی هەیە کە هەرکامەیان پێویستیان بە خوێندنەوە و وەرددانەوەی جیاواز و تایبەت هەیە.

لەم نێوەدا دەوری بوونی حیزبی دێموکراتی کوردستان، وەکوو دامەزرێنەری ئەو کۆمارە، دەورێکی یەکلاکەرەوە و پێناسەکەرانەیە.

یەکلاکەرەوە بەو مانایە کە بە بێ بوونی حیزبێکی مودێڕن و دێموکراتیک، ئەگەری دامەزرانی حکوومەتێکی پێشکەوتوانە و پڕشانازیی وەکوو کۆماری کوردستان، زۆر لاواز دەبوو. پێناسەکەرانەش بەو مانایە کە هەر کات باس لە حکوومەتی کوردستان لە ١٩٤٦دا دەکرێ، بۆ ناساندنی و پێناسەکردنی ئەو حکوومەتە، دەبێ پەنا ببرێتە بەر پێناسەکان و بەرنامەکانی حیزبی دێموکرات کە ئەو کۆمارەی دامەزراند.

پرسیارێک کە دوای چاوخشاندنەوەیەکی خێرا بەو مێژووە، لە تێکەڵاویی کۆمار و حیزبی دێموکرات دێتە ئاراوە ئەوەیە؛ گەر حیزبی دێموکرات نەبوایە، حکومەتێکی فەرزیی کە قەرار ببوا دابمەزرێ، چۆن حکومەتێک دەبوو؟
ئەوەی کە لە مێژوودا ڕوویداوە ناتوانین وەری گێڕینەوە و لە جیاتی ئەو پارامێترانە، پارامێتری دیکە دابنین و شکڵێکی فەرزی بە مێژوو بدەین، بەڵام نموونە و ئەزموونەکانی نەتەوەکانی دیکە و نەتەوەی کوردیش نیشانیان داوە کە لە ئامادە نەبوونی حیزبێکی دێموکراتدا چۆن حکوومەتێک دادەمەزرێ.

هەرچەند حیزبی دێموکرات تازە دامەزرابوو و ئەوەندەی کات نەبوو تاکوو هەموو قووڵاییکانی ژیانی خەڵک شۆڕ ببێتەوە و بەرنامەکانی بەتەواوی بە خەڵک ڕابگەیەنێ و خەڵک لەو بەرنامانە تێبگەن، بەڵام لە ماوەی ٣٣٠ ڕۆژ دەسەڵاتداریی کۆماردا، دنیایەک شانازیی دێموکراتیکی خولقاند کە نەوەکانی دوای کۆمار وەکوو ڕێباز چاو لەو کارە گرینگانە دەکەن.
بەڵام لە ئامادە نەبوونی حیزبێکی دێموکراتیدا، حکوومەتی زۆر لە جیهان و لە ڕۆژهەڵاتی نێوەڕاست و تەنانەت لە کوردستانیش دامەزراون و ئەزموون کراون. زۆر حکوومەت بوون کە هەرچەند لە سەرەتاوە شەرعیەتی شۆڕشگێڕانەیان هەبووە، بەڵام دواتر و لە ڕەوتی درێژەدانی دەسەڵاتداری‏دا لەبەر نەبوونی حێزبێکی دێموکرات لە دەسەڵاتدا، بەرەو دیکتاتۆری و سەرەڕۆیی هەنگاویان هەڵگرتووە و لە ئاکامدا هەندێک لەو جۆرە دەسەڵاتدارانە گرەوی سەرکوتیان لە حکومەتەکانی پێش خۆیان بردۆتەوە، بە شێوەیەک کە خەڵکی وڵات ئاواتیان گەڕانەوەی دۆخەکە بۆ پێش لە شۆڕش و حکوومەتە نادێموکراتیکە بەرهەمهاتووەکەی خواستوە.

لێرەدایە کە دەگەین بەو تێڕوانینە کە جیا لە ڕۆڵی حیزبی دێموکرات لە دامەزرانی کۆماردا، بوونی ڕێکخراوێکی دێموکراتیک کە ڕوانینێکی مرۆیی و مودێڕن و دێموکراتیکی بۆ ژیانی کۆمەڵایەتی و سیاسیی خەڵک هەبێ، پێویستییەکی حاشاهەڵنەگرە کە لە نموونەی حیزبی دێموکراتی کوردستانی ئێراندا، دەفتەری شانازییەکانی ئەستوورتر و قورستر دەکا.
بالاترین چاپکردنی ئەم بابەتە

رۆژنامەی کوردستان
رۆژنامەی کوردستان ژ. ٧١٣ لەم ژمارەیەدا:

ــ بوومەلەرزەی سیاسی
ــ لە خەبات دژ بە ئەپارتایدەوە بۆ ڕاسان
ــ ئەمن چی بكەم، خۆتان دروستی بكەنەوە
ــ دانیشتن لەگەڵ ئۆپۆزیسیۆنی ئێرانی و چەند سەرنجێک